‘Magpasalamat sa Mga Saksi Ni Jehova Bangod sang Relihiosong Kahilwayan’

“ANTES mo sirhan ang ganhaan sa isa ka Saksi ni Jehova,” siling sang isa ka artikulo sa pamantalaan nga USA Today, “magdulog anay kag binagbinaga ang makahuluya nga paghingabot nga ila gin-antos wala pa lang madugay ang nakaligad, subong man ang daku nga nabulig nila sa mga kahilwayan sa Nahaunang Kaligwatan nga aton tanan ginaagom.” Ang mga Saksi ni Jehova ginhingabot sa Estados Unidos sa sulod sang mga dekada 1940 tungod sa, lakip sa iban pa nga mga butang, pagdumili nga magsaludo sa bandera.​​—⁠Exodo 20:​4, 5.

Mga 30 ka kaso may kaangtanan sa mga Saksi ni Jehova ang ginbista sa Korte Suprema sang Estados Unidos. sa sulod sang lima ka tuig sa ulot sang 1938 kag 1943. Ang artikulo nagasiling: “Masunson gid nga ginpautwas sang mga Saksi ang sadsaran nga mga isyu may kaangtanan sa Nahaunang Kaligwatan amo nga si Huwes Harlan Fiske Stone nagsulat, ‘Ang mga Saksi ni Jehova dapat amutan bangod sang ila nabulig nga malubad ang legal nga mga problema tuhoy sa mga kahilwayan sang mga banwahanon.’ ”

Gani, antes ini maghinakop, ang artikulo nagasiling: “Ang tanan nga mga relihion dapat magpasalamat sa mga Saksi ni Jehova bangod sang pagsangkad sang [relihiosong] kahilwayan.”

[Picture Credit Lines sa pahina 32]

Sa likod, tinukod: Photo by Josh Mathes, Collection of the Supreme Court of the United States; naubos nga wala, mga huwes: Collection of the Supreme Court of the United States