Magtindog sing Bug-os kag Magtuo sing Malig-on

‘Tan-awa! Ang Dakung Kadam-an!’

ISA ini ka pamangkot nga nagpalibog anay sa mga alagad ni Jehova sa sulod sang mga dekada. Madugay na ginhimo ang pagpanikasog agod malubad ini sing Makasulatanhon. Nagresulta ini sa madamo nga pagbinagbinag. Apang nakita gid man sang ulihi ang sabat sa Biblia, kag nagpakunyag ini sing daku sa mga tumalambong sang isa ka kombension sa Washington, D.C., sang tuig 1935.

Ang sadsaran sang pagbinagbinag amo ang pamangkot: Paano makilal-an ang “daku nga kadamuan” (King James Version), ukon ang “dakung kadam-an” (New World Translation), nga ginsambit sa Bugna 7:⁠9? Ini bala nga grupo sang mga tumuluo magapuyo sa langit?

Isa ka Madugay Na nga Pamangkot

Kutob pa sang panahon ni apostol Juan tubtob karon, ang mga Cristiano nagapalibog kon paano makilal-an ang “dakung kadamuan.” Ginkabig sang mga Estudyante sang Biblia ang dakung kadam-an subong segundaryo nga langitnon nga klase, isa ka grupo nga may ihibalo sa kamatuoran sang Biblia apang diutay lang ang ginhimo agod mapalapnag ini.

Apang, may pila ka kaupod ang hinaplas nga mga Cristiano nga nangin makugi gid sa pagbantala nga hilikuton. Wala sila sing handum nga magkadto sa langit. Sa pagkamatuod, ang ila paglaum nahisuno sa pamulongpulong publiko nga “Minilyon Sang Nagakabuhi Karon ang Indi Na Mapatay,” nga ginpasanyog sang mga katawhan ni Jehova kutob sang 1918 tubtob 1922. Ini nga mga indibiduwal pakamaayuhon sing walay katapusan nga kabuhi sa duta.

Ang The Watch Tower sang Oktubre 15, 1923, nagbinagbinag sang parabola ni Jesus tuhoy sa mga karnero kag mga kanding kag nagsiling: “Ang mga karnero nagarepresentar sa tanan nga tawo sang mga pungsod, nga wala ginpanganak sa espiritu apang nahuyog sa pagkamatarong, nga nagakilala sa hunahuna kay Jesucristo subong Ginuo kag nagapaabot kag nagalaum para sa isa ka mas maayo nga tion sa idalom sang iya paggahom.”​​—⁠Mateo 25:31-​46.

Dugang Pa nga Silak Sang Kapawa

Sang tuig 1931, ginbinagbinag sang Vindication, Book One, ang Ezequiel kapitulo 9 kag ginpakilala yadtong gintandaan sa agtang agod amligan sa katapusan sang kalibutan subong mga karnero sang parabola ni Jesus. Ginlaragway sang Vindication, Book Three (ginbalhag sang 1932), ang matadlong sing tagipusuon nga panimuot sang di-Israelinhon nga tawo nga si Jonadab, nga nagsakay sa kangga sang hinaplas nga si Hari Jehu sang Israel kag nag-upod agod makita ang kakugi ni Jehu sa pagpatay sa butig nga mga sumilimba. (2 Hari 10:15-28) Ang libro nagsiling: “Si Jonadab nagarepresentar ukon nagalandong sa klase sang mga tawo karon diri sa duta [nga] wala nagapahisuno sa organisasyon ni Satanas, nga nagadampig sa pagkamatarong, kag sila amo ang luwason sang Ginuo sa tion sang Armagedon, tipigan sila gikan sa kapipit-an, kag hatagan sila sing kabuhi nga walay katapusan sa duta. Ini sila ang nagahuman sa ‘mga karnero’ nga klase.”

Sang 1934, Ang Lalantawan nagpaathag nga ang mga Cristiano nga may dutan-on nga paglaum dapat nga magdedikar kay Jehova kag magpabawtismo. Sa pagkamatuod, ang kapawa tuhoy sa sining dutan-on nga klase labi pa nga nagasilak sing masanag!​​—⁠Hulubaton 4:⁠18.

Isa ka Masanag nga Silak Sang Paghangop

Ang paghangop sa Bugna 7:​9-​17 buot nga magasilak nga may nagaigpat nga kasanag. (Salmo 97:11) Ginpabutyag sang Ang Lalantawan ang paglaum nga ang kombension nga natalana sa Mayo 30 tubtob sa Hunyo 3, 1935, sa Washington, D.C., E.⁠U.⁠A., mangin isa ka “matuod nga lugpay kag benepisyo” sa sadtong ginlaragway ni Jonadab. Kag nangin matuod gid ini!

Sa isa ka makapapagsik nga pamulongpulong tuhoy sa “Ang Dakung Kadamuan,”  nga ginhatag sa mga 20,000 ka kombensionista, si J. F. Rutherford nagpresentar sing Makasulatanhon nga pamatuod nga ang modernong-adlaw nga “iban nga mga karnero” kaangay sa “dakung kadam-an” sa Bugna 7:⁠9. (Juan 10:16) Sa talipuspusan sining pamulongpulong, ang humalambal namangkot: “Mahimo bala makatindog ang tanan nga may paglaum nga magkabuhi sing dayon sa duta?” Sang nagtindog ang daku nga bahin sang tumalambong, si Rutherford nagdeklarar: “Tan-awa! Ang dakung kadamuan!” Naglinong kag nagsunod ang mabaskog nga paghinugyaw. Sang masunod nga adlaw, 840 ka bag-o nga mga Saksi ni Jehova ang ginbawtismuhan, ang kalabanan sa ila nagapangangkon nga bahin sang dakung kadam-an.

Isa ka Talalupangdon nga Presensia

Antes sang 1935, ang nagadamo nga kadamuon sang mga nagbaton sa mensahe sang Biblia kag nagpakita sing kakugi sa pagbantala sing maayong balita nagpadayag sing interes nga magkabuhi sing dayon sa Paraiso nga duta. Wala sila sing handum nga magkadto sa langit, kay ang Dios wala maghatag sa ila sing paglaum nga langitnon nga kabuhi. Ang pagpakilala nila sa ila kaugalingon subong bahin sang dakung kadam-an sang iban nga mga karnero nagpakita nga sang 1935 ang pagpanawag sa 144,000 nga hinaplas nga Cristiano halos nakompleto na.​​—⁠Bugna 7:4.

Sang nagdabdab ang Bug-os Kalibutan nga Inaway II, si Satanas nga Yawa naghimo sing mabaskog nga pagpanikasog sa pagpauntat sang pagtipon sa dakung kadam-an. Ang pagbantala sang Ginharian nga hilikuton gindumilian sa madamo nga pungsod. Sa tion sadtong masubo nga mga adlaw, kag antes lamang sia napatay sang Enero 1942, si J. F. Rutherford nagsiling: “Daw subong bala nga ang ‘dakung kadamuan’ indi gid man mangin tuman ka daku.”

Apang, bangod sang pagpakamaayo sang Dios, nagbaylo ang kahimtangan. ‘Nagatindog sing bug-os kag malig-on sing pagtuo,’ ang hinaplas kag ang ila mga kaupod, ang iban nga mga karnero, nagatuman sang sugo nga maghimo sing disipulo. (Colosas 4:12; Mateo 24:14; 28:​19, 20) Sang 1946 ang kadamuon sang mga Saksi ni Jehova nga nagabantala sa bug-os nga kalibutan 176,456​​—⁠kalabanan sa ila bahin sang dakung kadam-an. Sang tuig 2000, sobra sa 6,000,000 ka Saksi ang matutom nga nagaalagad kay Jehova sa 235 ka pungsod​​—⁠isa gid ka dakung kadam-an! Kag ang kadamuon padayon nga nagadamo.