Ang Pagtuon sa Biblia—Para Bala Ini sa Imo?

“INDI dapat basahon kon wala ang pari.” Makita ini nga paandam sa panugod sang pila ka Biblia sang mga Katoliko. “Subong mga Katoliko wala kami ginapabasa sang Biblia,” siling ni Kay Murdy sang Catholic Bible Institute sa Los Angeles, “apang lain na karon.” Sa tion nga mahibaluan sang mga Katoliko kon paano ang Balaan nga Kasulatan makaapektar sa ila kabuhi, siling niya, “ginagutom sila kag ginauhaw sa Biblia.”

Tuhoy sa sining pagbag-o, ang magasin nga U.⁠S. Catholic nagkutlo sa isa ka coordinator sa relihiosong edukasyon nga nagsiling nga ang mga Katoliko nga nagabuylog sa mga klase sa pagtuon sa Biblia nagbatyag nga “gindingutan sila subong mga Katoliko, kag may yara gali madamo nga manggad sa Biblia. Luyag nila nga maangkon ang madamo nga manggad nga sa ila pamatyag wala nila maagom.”

Kon ano man, ano nga “manggad” ang mahimo matukiban sang estudyante sa Biblia? Binagbinaga: Luyag mo bala mahibaluan kon paano malandas ang mga kabalaka sa adlaw-adlaw nga kabuhi? Paano mo mahuptan ang paghidait sa sulod sang pamilya? Ngaa may madamo nga pagpamintas kag batok sa katilingban nga paggawi? Ano ang kabangdanan sang kasingki sang mga pamatan-on karon? Ang masaligan nga mga sabat sa sini kag sa iban pa makalilibog nga mga pamangkot masapwan sa Pulong sang Dios, ang Biblia, kag matuod gid nga mangin “manggad” ini, indi lamang sa mga Katoliko ukon mga Protestante kundi subong man sa mga Budhista, Hindu, Muslim, Shintoista, bisan pa gani sa mga ateista, kag mga agnostiko. Subong sa ginsiling sang salmista, ‘ang pulong sang Dios suga sa iya tiil, kag kapawa sa iya banas.’ Mahimo nga mangin amo man ini sa imo.​​—⁠Salmo 119:105.