Pabakura ang Imo Pagsalig kay Jehova

May isa ka plano sa pagpatay. Ang tanan nga mataas nga opisyales sang pungsod nagsinapol kag namat-od nga magpanugda sing isa ka bag-o nga layi. Kamatayon ang luyag nila nga isilot kay bisan sin-o nga nagahimo sing pagsimba nga wala ginapahanugutan sang Estado.

PAMILYAR bala ini? Ang maragtas madamo sing halimbawa sang mga tawo nga nagapahito sang kalainan paagi sa kasuguan. Ang hitabo sa ibabaw natabo sa Emperyo sang Persia sang panahon ni manalagna Daniel. Ang kasuguan, nga ginpatuman mismo ni Hari Dario, amo ini: ‘Ang bisan sin-o nga magpangabay sa bisan ano nga dios ukon tawo sa sulod sang katluan ka adlaw luwas sa hari dapat itagbong sa lungib sang mga leon.’​—⁠Daniel 6:7-9.

Ano ang himuon ni Daniel sa idalom sang katalagman nga mapatay? Padayon bala sia nga magsalig sa iya Dios, si Jehova, ukon magkompromiso sia kag himuon ang ginadikta sang hari? Ang rekord nagasugid sa aton: “Si Daniel, sang nahibaluan niya nga ang sinulat ginpirmahan, nagsulod sa iya balay, kag, ang mga bintana sa iya hulot sa atop nabuksan para sa iya nayon sa Jerusalem, tatlo ka beses sa isa ka adlaw sia nagaluhod kag nagapangamuyo kag nagahalad sing pagdayaw sa atubangan sang iya Dios, subong sang ginahimo niya pirme antes sini.” (Daniel 6:10) Ang nabilin nga bahin sang kasaysayan bantog. Gintagbong si Daniel sa lungib sang mga leon tungod sa iya pagtuo, apang ‘ginpakium ni Jehova ang mga baba sang leon’ kag ginluwas ang iya matutom nga alagad.​—⁠Hebreo 11:33; Daniel 6:16-22.

 Tion sa Pag-usisa Sang Kaugalingon

Sa karon, ang mga alagad ni Jehova nagapuyo sa isa ka mapintas nga kalibutan, nga nagaatubang sing madamo nga katalagman sa ila pisikal kag espirituwal nga kaayuhan. Halimbawa, sa pagdabdab sang makasiligni nga pagdumot sa rasa sa pila ka pungsod, madamo nga Saksi ang napatay. Sa iban nga mga duog, ang mga Saksi ni Jehova nag-antos sang kakulang sing pagkaon, kapigaduhon, kinaugali nga mga kalamidad, malubha nga balatian, kag iban pa nga makatalagam-sa-kabuhi nga mga kahimtangan. Dugang pa, dapat nila batason ang paghingabot, pag-ipit sa trabaho, kag nanuhaytuhay nga pagsulay sa paghimo sing sayop, tanan ini mahimo magbutang sa katalagman sang ila espirituwalidad. Sa pagkamatuod, ang dakung Kaaway, si Satanas, determinado nga laglagon ang mga alagad ni Jehova sa bisan ano man nga paagi nga magamadinalag-on.​—⁠1 Pedro 5:8.

Nagaatubang sang amo sini nga mga kahimtangan, ano ang aton himuon? Walay sapayan nga natural lamang nga mahadlok kon ang kabuhi sang isa yara sa katalagman, mahimo naton huptan sa hunahuna ang nagapasalig nga mga pulong ni apostol Pablo: “[Si Jehova] nagsiling: ‘Indi ko gid kamo pagbiyaan ukon pagpatumbayaan.’ Agod nga makatigayon kita sing kaisog kag magsiling: ‘Si Jehova ang akon manugtabang; indi ako mahadlok. Ano ang mahimo sang tawo sa akon?’ ” (Hebreo 13:​5, 6) Makasalig kita nga amo man sini ang balatyagon ni Jehova sa iya mga alagad karon. Apang, ang paghibalo sa mga saad ni Jehova tuhay sa pagkakumbinsido nga magapanghikot sia tungod sa aton. Busa importante gid nga usisaon naton ang sadsaran nga sa sini ginatukod ang pagsalig kay Jehova kag himuon naton ang aton bug-os nga masarangan sa pagpabakod kag paghupot sina nga pagsalig. Kon himuon naton ina, “ang paghidait sang Dios nga nagalabaw sa tanan nga panghunahuna magatipig sang [aton] mga tagipusuon kag sang [aton] mga painoino sa kalalangan ni Cristo Jesus.” (Filipos 4:7) Nian kon mag-abot ang mga pagtilaw, makahunahuna kita sing maathag kag maatubang ini sing maalamon.

Sadsaran Sang Pagsalig kay Jehova

May madamo gid kita nga rason agod magsalig sa aton Manunuga, si Jehova. Una sa sini amo ang katunayan nga si Jehova isa ka mahigugmaon nga Dios nga nagaulikid gid sa iya mga alagad. May madamo gid nga hitabo nga narekord sa Biblia nga nagasugid sang mahigugmaon nga pag-atipan ni Jehova sa iya mga alagad. Nagalaragway sa mga pagpakig-angot ni Jehova sa iya pinili nga katawhan, ang Israel, si Moises nagsulat: “Nakita niya sia sa isa ka kahanayakan nga duta, kag sa isa ka mamingaw, nagauwang nga desyerto. Ginlibutan niya sia, agod atipanon sia, agod amligan sia subong sang tawotawo sang iya mata.” (Deuteronomio 32:10) Sa modernong mga tion, padayon nga ginaatipan ni Jehova ang iya mga alagad, subong isa ka grupo kag subong mga indibiduwal. Halimbawa, sang ang pila ka Saksi nakaeksperiensia sing tuman nga kakulang sing pagkaon sa tion sang inaway sibil sa Bosnia, ginpat-od ni Jehova nga makabaton sila sing kinahanglanon gid nga mga suplay paagi sa maisog nga panikasog sang ila mga kauturan gikan sa Croatia kag Austria, nga nagbutang sang ila kabuhi sa katalagman sa paglakbay sa makatalagam kaayo nga duog agod magdala sing bulig nga materyal sa ila mga kauturan.⁠ *

Sanglit si Jehova nga Dios amo ang Labing Gamhanan, masarangan gid niya nga amligan ang iya mga alagad sa idalom sang bisan ano nga kahimtangan. (Isaias 33:22; Bugna 4:8) Apang bisan pa ginatugutan ni Jehova ang pila sang iya mga alagad nga pamatud-an nga matutom tubtob sa kamatayon, ginasakdag gihapon niya sila kag ginabuligan sila nga mahuptan ang ila integridad, nagabulig sa ila nga magpabilin nga malig-on, malipayon, kag kalmado tubtob sa katapusan. Busa, makasalig man kita kaangay sa salmista: “Ang Dios isa ka dalangpan kag kusog para sa aton, isa ka bulig nga madali matigayon sa tion sang kalisdanan. Amo kon ngaa indi kita dapat mahadlok, bisan pa ang duta magbag-o kag bisan ang kabukiran mationg pakadto sa alibutod sang malapad nga dagat.”​—⁠Salmo 46:​1, 2.

Ginasugid man sang Biblia nga si Jehova isa ka Dios sang kamatuoran. Nagakahulugan ini nga ginatuman niya pirme ang iya mga saad. Sa katunayan, ginalaragway sia sang Biblia subong isa ka Dios “nga indi makabutig.” (Tito 1:2) Bangod sulit-sulit nga ginasiling ni Jehova ang iya kahanda sa pag-amlig kag sa pagluwas sa iya mga alagad, mapat-od gid naton nga indi lamang niya masarangan  kundi handa man sia nga tumanon ang iya mga saad.​—⁠Job 42:2.

Mga Paagi sa Pagpabakod Sang Aton Pagsalig

Bisan pa may rason gid kita sa pagsalig kay Jehova, indi naton dapat hunahunaon nga nagasalig kita pirme sa iya. Ini bangod ang kalibutan sa kabilugan may diutay nga pagtuo sa Dios, kag ini nga panimuot madali magpaluya sang aton pagsalig kay Jehova. Busa, dapat kita manikasog sing lakas sa pagpabakod kag sa paghupot sina nga pagsalig. Nahibaluan gid ini ni Jehova, kag nag-aman sia sing mga paagi agod mahimo naton ini.

Una sa tanan, gin-aman niya ang iya nasulat nga Pulong, ang Biblia, nga nagarekord sing madamong gamhanan nga buhat nga ginhimo niya para sa iya mga alagad. Hunahunaa lamang, daw ano ka daku ang imo pagsalig sa isa nga ang imo lamang nahibaluan sa iya amo ang iya ngalan? Ayhan diutay lang, kon may yara gid man. Kinahanglan mahibaluan mo ang iya mga dalanon kag ang iya mga buhat agod makasalig ka sa iya, indi bala? Samtang ginabasa kag ginapamalandungan naton ining mga kasaysayan sa Biblia, ang aton ihibalo tuhoy kay Jehova kag sa iya dalayawon nga mga dalanon nagadalom, kag labi pa gid naton mahangpan kon daw ano sia ka masaligan. Sa amo, ang aton pagsalig sa iya nagabakod. Ang salmista nagpahamtang sing maayo gid nga halimbawa sang nangamuyo sia sing hugot sa Dios: “Dumdumon ko ang mga binuhatan ni Jah; kay dumdumon ko ang imo makatalanhaga nga hinimuan sang dumaan nga tion. Kag magapamalandong ako sa tanan mo nga binuhatan, kag sa imo mga pagpakig-angot magatalupangod ako.”​—⁠Salmo 77:​11, 12.

Dugang pa sa Biblia, may yara kita bugana nga tuburan sang espirituwal nga pagkaon sa mga publikasyon sang Biblia nga ginaaman sang organisasyon ni Jehova. Lakip sa iban pa nga mga butang, ini nga mga publikasyon masunson nga nagalakip sang makapahulag nga mga sugilanon sa kabuhi sang mga alagad sang Dios sa modernong mga tion, nga nagapakita kon paano si Jehova nagahatag sing bulig kag kaumpawan kon makasumalang sila sang mabudlay nga mga kahimtangan. Halimbawa, si Martin Poetzinger, nga sang ulihi nangin katapo sang Nagadumala nga Hubon sang mga Saksi ni Jehova, nagmasakit sing malubha samtang nagapayunir sa mga duog sa Europa malayo sa iya dutang natawhan. Wala sia sing kuwarta, kag wala sing doktor nga luyag magtan-aw sa iya. Apang wala sia ginpabay-an ni Jehova. Sang ulihi, ginpakig-angutan ang senior consultant sang lokal nga ospital. Bangod isa ka tumuluo gid sa Biblia, ining mabuot nga tawo nag-atipan kay Utod Poetzinger subong sang pag-atipan niya sa isa ka anak, kag ginhimo niya ini nga wala sing bayad. Ang pagbasa sa personal nga mga sugilanon subong sini makapabakod gid sang aton pagsalig sa aton langitnon nga Amay.

Ang isa pa ka mapuslanon nga bulig nga ginaaman ni Jehova sa pagpabakod sang aton pagsalig sa iya amo ang hamili nga pribilehiyo sang pangamuyo. Si apostol Pablo mahigugmaon nga nagasiling sa aton: “Indi kamo magkabalaka sa bisan ano nga butang, kundi sa tagsa ka butang paagi sa pangamuyo kag pag-ampo nga may pagpasalamat ipakilala sa Dios ang inyo mga pangabay.” (Filipos 4:6) Ang “tagsa ka butang” mahimo maglakip sang aton mga balatyagon, kinahanglanon, kahadlok, kag kahuol. Kon labi kasunson kag tinagipusuon ang aton mga pangamuyo, labi nga nagabakod ang aton pagsalig kay Jehova.

Sang si Jesucristo yari sa duta, nagakadto sia kon kaisa sa mamingaw nga duog sing isahanon agod mangamuyo nga wala sing tublag. (Mateo 14:23; Marcos 1:35) Antes maghimo sing mabug-at nga mga desisyon, ginhinguyang pa gani niya ang bug-os nga gab-i nga nagapangamuyo sa iya Amay. (Lucas 6:​12, 13) Indi makapakibot nga ang pagsalig ni Jesus kay Jehova tuman kabakod amo nga nabatas niya ang labing masakit nga pagtilaw nga nag-abot kay bisan sin-o. Ang iya katapusan nga mga pulong sa usok sang pag-antos amo: “Amay, sa imo mga kamot ginatugyan ko ang akon espiritu.” Inang pagpabutyag sang pagsalig nagpakita nga tubtob sa katapusan ang iya pagsalig sa iya Amay wala magluya, bisan pa wala magpasilabot si Jehova agod luwason sia.​—⁠Lucas 23:46.

 Ang isa pa gid ka paagi sa pagtukod sang aton pagsalig kay Jehova amo ang regular nga pagpakig-upod sa mga nagasalig sa iya sing bug-os tagipusuon. Ginsugo ni Jehova ang iya katawhan nga magtipon sing regular agod magtuon sing dugang pa tuhoy sa iya kag magpalig-unay sa isa kag isa. (Deuteronomio 31:12; Hebreo 10:​24, 25) Ini nga pagpakig-upod nagpabakod sang ila pagsalig kay Jehova, nga nagbulig sa ila nga mabatas ang daku nga mga pagtilaw sang pagtuo. Sa isa ka pungsod sa Aprika diin ang pagbantala nga hilikuton gindumilian, ang mga Saksi ni Jehova gindingutan sing proteksion sang mga pulis, mga dokumento sa paglakbay, mga sertipiko sa pag-asawahay, pagpabulong sa ospital, kag mga trabaho. Sang nagdabdab ang inaway sibil sa isa ka duog, ang 39 ka miembro, pati na mga kabataan, sang malapit nga kongregasyon nagpuyo sa sulod sang mga apat ka bulan sa idalom sang manubo nga taytay sa desyerto agod makapalagyo sa pagpamomba sa ila banwa. Sa idalom sining daku kaayo nga kabudlayan, ang ila adlaw-adlaw nga pagbinagbinag sa teksto sang Biblia kag ang iban pa nga mga miting naghatag sa ila sing daku nga kusog. Sa amo nabatas nila ang daku nga pagtilaw nga malig-on gihapon ang espirituwalidad. Maathag nga ginapakita sining eksperiensia ang kabilihanan sang regular nga pagtilipon upod sa katawhan ni Jehova.

Sa katapusan, agod magbakod ang aton pagsalig kay Jehova, dapat padayon kita nga mag-aktibo sa pagbantala sing Ginharian nga hilikuton, nga handa pirme sa pagpaambit sing maayong balita sa iban. Ginpakita ini sang makapahulag nga eksperiensia sang isa ka makugi nga lamharon nga manugbantala sa Canada nga may malubha na gid nga leukemia. Walay sapayan sang iya malubha nga balatian, luyag niya nga mangin regular payunir, buot silingon, bug-os tion nga ministro. Sang nag-ayoayo ang iya balatian, nag-auxiliary payunir sia sa isa ka bulan. Nian naglala ang iya kahimtangan, kag napatay sia pagligad sang pila ka bulan. Apang, nagpabilin sia nga malig-on sa espirituwal tubtob sa katapusan, ang iya pagsalig kay Jehova wala gid malingkang bisan sa makadali. Ang iya iloy naghinumdom: “Tubtob sa katapusan, mas nabalaka pa sia sa iban sangsa iya kaugalingon. Ginapalig-on niya sila sa pagtuon sing Biblia, nga nagasiling sa ila, ‘Magaupdanay kita sa Paraiso.’ ”

Pagpamatuod Sang Aton Pagsalig kay Jehova

“Subong nga ang lawas nga wala sing espiritu patay, amo man ang pagtuo nga wala sing mga binuhatan patay.” (Santiago 2:26) Ang ginsiling ni Santiago tuhoy sa pagtuo sa Dios mahimo man masiling tuhoy sa aton pagsalig sa Iya. Bisan ano man ang aton ginasiling nga nagasalig kita sa Dios, wala ini sing pulos kon wala naton ginapakita ina nga pagsalig sa aton mga buhat. Si Abraham nagsalig sing bug-os kay Jehova kag ginpamatud-an niya ina nga pagsalig paagi sa pagtuman sa iya mga sugo nga wala nagapangalag-ag, tubtob sa punto nga handa sia nga ihalad ang iya anak, si Isaac. Bangod sining talalupangdon nga pagsalig kag pagtuman, si Abraham nakilala subong abyan ni Jehova.​—⁠Hebreo 11:​8-​10, 17-​19; Santiago 2:⁠23.

Indi na kinahanglan nga maghulat pa kita nga matabo ang daku nga pagtilaw sa aton antes naton ipakita ang aton pagsalig kay Jehova. Si Jesus nagsiling sa iya mga disipulo: “Ang tawo nga matutom sa diutay gid matutom man sa madamo, kag ang tawo nga di-matarong sa diutay gid di-matarong man sa madamo.” (Lucas 16:10) Dapat tun-an naton nga magsalig kay Jehova sa tanan naton nga hilikuton adlaw-adlaw, nagatuman sa iya bisan sa mga butang nga daw magagmay lamang. Kon makita naton ang mga kaayuhan nga resulta sang amo nga pagtuman, ang aton pagsalig sa aton langitnon nga Amay nagabakod, kag nagabulig sa aton nga maatubang ang mas daku ukon mas mabudlay nga mga pagtilaw.

Samtang ang kalibutan nagahilapit sa malaglagon nga katapusan sini, ang katawhan ni Jehova pat-od gid nga makaeksperiensia sing madamo pa nga pagtilaw kag katalagman. (Binuhatan 14:22; 2 Timoteo 3:12) Paagi sa pagpalambo sing mabakod kag bug-os nga pagsalig kay Jehova karon, makalaum kita nga maluwas pasulod sa ginsaad niya nga bag-ong kalibutan​—⁠paagi man sa paglampuwas sa dakung kapipit-an ukon paagi sa pagbaton sing pagkabanhaw. (2 Pedro 3:13) Kabay nga indi gid naton pagtugutan ang bisan ano nga kakulang sang pagsalig sa aton bahin nga gub-on ang aton hamili nga kaangtanan kay Jehova. Nian, ang ginsiling tuhoy kay Daniel sa tapos sia ginluwas gikan sa lungib sang mga leon masiling man sa aton: “Wala gid sing kasamaran nga nasapwan sa iya, bangod nagsalig sia sa iya Dios.”​—⁠Daniel 6:⁠23.

[Nota]

[Retrato sa pahina 9]

Ang pagbasa sa mga kasaysayan sang matutom nga mga alagad ni Jehova, kaangay sang iya ni Martin Poetzinger, makapabakod sang pagtuo