Pagpadayon Padulong sa Katapusan nga Kadalag-an!

“Yari karon! ang kabayo nga maputi; kag ang isa nga nagasakay sa sini may pana; kag ginhatagan sia sing korona, kag naglakat sia nga nagapangdaug kag sa pagtapos sang iya pagdaug.”​—⁠BUGNA 6:2.

1. Anong palaabuton nga mga hitabo ang nakita ni Juan sa palanan-awon?

PAAGI sa pagbugna gikan sa Dios nakita ni apostol Juan ang mga 1,800 ka tuig sa palaabuton kag nalaragway ang paglingkod sa trono ni Cristo subong Hari. Kinahanglan ni Juan ang pagtuo agod mapatihan ang nakita niya sa palanan-awon. May maathag nga pamatuod kita karon nga ining gintagna nga paglingkod sa trono natabo sang 1914. Paagi sa mga mata sang pagtuo, nakita naton si Jesucristo nga ‘nagapangdaug kag nagatapos sang iya pagdaug.’

2. Ano ang reaksion sang Yawa sa pagkabun-ag sang Ginharian, kag sa ano ini isa ka pamatuod?

² Pagkatapos sang pagkabun-ag sang Ginharian, si Satanas gintabog gikan sa langit, nga nagtiklod sa iya nga makig-away sing lakas kag nga may mas daku nga kasingkal apang wala gid magpauswag sang iya tsansa nga magmadinalag-on. (Bugna 12:7-12) Bangod sang iya kaakig, ang mga kahimtangan sa kalibutan labi pa nga nangin makahalanguyos. Ang tawhanon nga katilingban daw nabahinbahin. Para sa mga Saksi ni Jehova, maathag ini nga pamatuod nga ang ila Hari nagaabante “sa pagtapos sang iya pagdaug.”

Ginatukod ang Isa ka Bag-ong Kalibutan nga Katilingban

3, 4. (a) Ano nga mga pagbag-o sa organisasyon ang ginhimo sa Cristianong kongregasyon sugod sang pagkabun-ag sang Ginharian, kag ngaa kinahanglanon ini? (b) Ano ang benepisyo sining mga pagbag-o, subong sang gintagna ni Isaias?

³ Sang natukod ang Ginharian, tion na agod ang ginpasag-uli nga Cristianong kongregasyon​—⁠nga karon may dugang pa nga responsabilidad sa Ginharian​—⁠magpahisuno sing labi pa sa sulundan sang unang-siglo nga Cristianong kongregasyon. Sa amo, sa mga guwa sini sang Hunyo 1 kag 15, 1938, gin-usisa sang Ang Lalantawan kon paano dapat magpanghikot ang Cristianong kongregasyon. Sang ulihi, labi pa kaathag nga ginpakilala sang Disiembre 15, 1971 nga guwa ang modernong-adlaw nga Nagadumala nga Hubon sa artikulo nga “Isa ka Nagadumala nga Hubon Subong Tuhay Gikan sa Isa ka Legal nga Korporasyon.” Sang 1972, ang mga hubon sang mga gulang gintangdo agod maghatag sing bulig kag panuytoy sa lokal nga mga kongregasyon.

⁴ Ang pagpasag-uli sang nagakaigo nga pagtatap nagpabakod sing daku sa Cristianong kongregasyon. Nakabulig man sa sini amo ang mga kahimusan nga ginhimo sang Nagadumala nga Hubon agod tudluan ang mga gulang sang ila mga katungdanan, pati na ang paghanas sa ila  sa hudisyal nga mga butang. Ang amat-amat nga pag-uswag may kaangtanan sa kahimusan sang dutan-on nga organisasyon sang Dios kag sa positibo nga mga resulta sini gintagna sa Isaias 60:17: “Sa baylo sang saway magadala ako sing bulawan, kag sa baylo sang salsalon magadala ako sing pilak, kag sa baylo sang kahoy, saway, kag sa baylo sang mga bato, salsalon; kag itangdo ko ang paghidait subong imo mga manugdumala kag ang pagkamatarong subong imo mga manughatag sing buluhaton.” Ining positibo nga mga pag-uswag nagpabanaag sang pagpakamaayo sang Dios kag nagpamatuod sang kahamuot sang Dios sa mga tawo nga hayag kag makugi nga nagasakdag sang iya Ginharian.

5. (a) Ano ang reaksion ni Satanas sa pagpakamaayo ni Jehova sa Iya katawhan? (b) Nahisuno sa Filipos 1:​7, ano ang reaksion sang katawhan ni Jehova sa kaakig ni Satanas?

⁵ Ang mahigugmaon nga pagtatap kag pagtuytoy nga ginpakita sang Dios sa iya katawhan pagkatapos sang pagkabun-ag sang Ginharian wala maglipas nga wala matalupangdan ni Satanas. Halimbawa, sang 1931 ining diutay nga grupo sang mga Cristiano nagpahayag sing dayag nga indi lamang sila mga Estudyante sang Biblia. Nahisuno sa Isaias 43:​10, sila mga Saksi ni Jehova! Natabuan man ukon indi, ginhimo sang Yawa ang di-matupungan nga mga paghingabot sa bug-os nga kalibutan. Bisan sa mga kadutaan nga nakilal-an anay tungod sa kahilwayan sa relihion, subong sang Estados Unidos, Canada, kag Alemanya, ang mga Saksi sulit-sulit nga napilitan nga makig-away sing legal agod huptan ang ila kahilwayan sa pagsimba. Sang 1988, ginrepaso sang Korte Suprema sang Estados Unidos ang 71 ka kaso may kaangtanan sa mga Saksi ni Jehova, kag dos-tersia sini ang gindesisyunan pabor sa ila. Sa karon, sa bug-os nga kalibutan, ang legal nga mga pagpakig-away nagapadayon amo nga, subong sang unang siglo, may yara ‘pagpangapin kag legal nga pagpalig-on sa maayong balita.’​—⁠Filipos 1:7.

6. Napunggan bala sang mga pagdumili ang katawhan ni Jehova gikan sa pagpadayon? Iilustrar.

⁶ Sang katuigan 1930, sang mga panahon nga nagdangat sa Bug-os Kalibutan nga Inaway II, gindumilian sang diktatoryal nga mga panguluhan ang hilikuton sang mga Saksi ni Jehova sa Alemanya, Espanya, kag Japan, sa pagsambit sang tatlo lamang. Apang sang tuig 2000, ining tatlo lamang ka pungsod may yara halos 500,000 ka aktibo nga manugbantala sang Ginharian sang Dios. Halos napulo ka pilo ina sang kadamuon sang mga Saksi sa bug-os nga kalibutan sang 1936! Sing maathag, ang mga pagdumili indi makatapna sang pagpadayon sang katawhan ni Jehova sa idalom sang ila mandadaug nga Lider, si Jesucristo.

7. Anong tumalagsahon nga hitabo ang natabo sang 1958, kag anong daku nga pagbalhin ang natabo sugod sadto?

⁷ Isa gid ka daku nga pagpadayag tuhoy sining abante nga paghulag sang ginhiwat sa New York City, sang 1958, ang pinakadaku nga kombension sang mga Saksi ni Jehova, ang Divine Will International Assembly, nga may pinakamataas nga tumalambong nga 253,922. Sang 1970 ang ila hilikuton ginbuksan sa tatlo ka pungsod nga ginsambit sa ibabaw, magluwas sa nakilal-an anay nga Sidlangan nga Alemanya. Apang ang mga Saksi ginadumilian gihapon sa daku nga Unyon Sobyet kag sa alyado nga mga pungsod sini sa Warsaw Pact. Sa karon, sa sining anay Komunista nga mga pungsod, may yara kapin sa tunga ka milyon ka aktibo nga Saksi.

8. Ano ang nangin resulta sang pagpakamaayo ni Jehova sa iya katawhan, kag ano ang masiling sang The Watchtower sang 1950 tuhoy sini?

⁸ Ang mga Saksi ni Jehova ginpakamaayo sing pag-uswag bangod padayon nila nga ‘ginpangita anay ang ginharian kag pagkamatarong [sang Dios].’ (Mateo 6:33) Sa literal nga paagi, natuman na ang tagna ni Isaias: “Ang diutay mangin isa ka libo, kag ang magamay mangin isa ka gamhanan nga pungsod. Ako, si Jehova, magapadali sini sa iya kaugalingon nga tion.” (Isaias 60:22) Kag ang pag-uswag nagapadayon. Sang nagligad lamang nga dekada, ang kadamuon sang aktibo nga sumalakdag sang pagginahom sang Ginharian nag-uswag sa kapin sa 1,750,000 ka tawo. Ini sila boluntaryo nga nangin bahin sang isa ka grupo nga tuhoy sa ila ang 1950 nga Watchtower nagkomento sing amo sini: “Ginahanda na karon sang Dios ang isa ka bag-ong kalibutan nga katilingban. . . . Ini nga grupo magapadayon tubtob sa Armagedon, . . . ang una sa patag sang pagpanghikot sa ‘bag-ong duta’ . . . , nga gin-organisar sing teokratiko, nga nakahibalo sang mga  pamaagi sa pag-organisar.” Ang artikulo naghinakop: “Kon amo, mag-abante kita tanan sing padayon, subong isa ka bag-ong kalibutan nga katilingban!”

9. Paano nangin mapuslanon ang mga butang nga natun-an sang mga Saksi ni Jehova sa sulod sang mga tinuig?

⁹ Samtang, natun-an sining nagauswag pirme nga bag-ong kalibutan nga katilingban kon paano himuon ang mga butang sing maayo kag sing epektibo kag napamatud-an ini nga hamili sa karon kag ayhan bisan sa tion sang hilikuton sang pagpasag-uli pagkatapos sang Armagedon. Halimbawa, natun-an sang mga Saksi nga mag-organisar sing dalagku nga mga kombension, maghatag sing maabtik nga bulig sa tion sang emerhensia, kag magpatindog sing madasig sang mga tinukod. Bangod sini nga hilikuton, ginatamod sang madamo ang mga Saksi ni Jehova nga may pagdayaw kag pagtahod.

Pagtadlong sa Sayop nga mga Impresyon

10, 11. Iilustrar kon paano gintadlong ang sayop nga mga impresyon tuhoy sa mga Saksi ni Jehova.

¹⁰ Walay sapayan sina, may mga tawo nga nagasumbong sa mga Saksi ni Jehova subong wala nagapahisuno sa tawhanon nga katilingban. Ini bangod ilabi na sa pasad-sa-Biblia nga panindugan sang mga Saksi sa mga butang subong sang pagpatayon sing dugo, neutralidad, pagpanigarilyo, kag moralidad. Apang ginabaton na karon sang publiko nga ang mga pagtamod sang mga Saksi nagakaigo nga binagbinagon. Halimbawa, ginteleponohan sang isa ka doktora sa Poland ang opisina sang administrasyon sang mga Saksi ni Jehova kag nagsiling nga ginbaisan nila sang iya mga kaupod sa ospital sa sulod sang pila ka oras ang topiko tuhoy sa mga pagpatayon sing dugo. Ang paghambalanay resulta sang isa ka artikulo nga ginbalhag sa sina nga adlaw sa Polaco nga pamantalaan nga Dziennik Zachodni. “Nagakasubo mismo ako nga ang dugo ginagamit sing sobra sa patag sang medisina,” baton sang doktora. “Dapat ini bag-uhon, kag nalipay ako nga may isa nga nagbukas sang topiko. Luyag ko ang dugang pa nga impormasyon.”

¹¹ Sa isa ka komperensia nga ginhiwat sang nagligad nga tuig, ang mga doktor gikan sa  Canada, Europa, Israel, kag Estados Unidos nagbinagbinag sang impormasyon nga gindesinyo agod buligan ang mga doktor sa pagbulong sa mga pasyente nga wala nagagamit sing dugo. Ginpatalupangod sa sini nga miting, nga ginhiwat sa Switzerland, nga kabaliskaran sa popular nga opinyon, ang kadamuon sang nagakapatay nga mga pasyente nga gintayunan sing dugo aktuwal nga mas madamo sangsa mga pasyente nga wala gintayunan sing dugo. Ang mga Saksi nga pasyente masunson nga nagaguwa sa ospital sing mas temprano sangsa mga pasyente nga ginbulong nga nagagamit sing dugo, nga sa masami nagabuhin sang gastos sa pagpabulong.

12. Maghatag sing halimbawa kon paano gindayaw sang kilala nga mga indibiduwal ang panindugan sang mga Saksi ni Jehova may kaangtanan sa pagkaneutral sa politika.

¹² Madamong paborable nga komento ang ginhambal man tuhoy sa neutral nga panindugan sang mga Saksi ni Jehova antes kag sa tion sang Bug-os Kalibutan nga Inaway II sang ginbatas nila ang pagsalakay sang mga Nazi. Ang video nga Jehovah’s Witnesses Stand Firm Against Nazi Assault, nga ginbalhag sang mga Saksi ni Jehova kag nagakaigo nga una nga ginpasalida sa kampo konsentrasyon sa Ravensbrück sa Alemanya sang Nobiembre 6, 1996, nakabaton sing madamong paborable nga komento. Sa pagbukas sini man nga pagpasalida sa bantog nga kampo konsentrasyon sa Bergen-Belsen sang Abril 18, 1998, ang direktor sang Center for Political Education in Lower Saxony, nga si Dr. Wolfgang Scheel, nagbaton: “Ang isa sang makahuluya nga mga kamatuoran sang maragtas amo nga ginsikway sang mga Saksi ni Jehova ang Pungsudnon nga Sosyalismo sing mas determinado sangsa ginhimo sang Cristianong mga simbahan. . . . Ano man ang aton balatyagon tuhoy sa mga panudlo kag relihioso nga kakugi sang mga Saksi ni Jehova, ang ila katutom sa tion sang rehimen sang mga Nazi nagakabagay tahuron.”

13, 14. (a) Anong maalamon nga obserbasyon para sa unang mga Cristiano ang naghalin sa wala ginapaabot nga ginhalinan? (b) Maghatag sing mga halimbawa sang paborable nga mga komento para sa katawhan sang Dios karon.

¹³ Kon ang kilala nga mga indibiduwal ukon mga desisyon sa korte magpahayag sing dayag pabor sa mga Saksi ni Jehova sa mga butang nga ginabaisan, mahimo sini ginabuhinan ang mga pag-ihig-ihig kag mangin kabangdanan agod tamdon ang mga Saksi sing mas paborable. Masunson ini nagabukas sang dalan agod masugilanon ang mga tawo nga wala gid anay nagapamati. Busa, ini nga mga buhat sang kilala nga mga indibiduwal ukon mga desisyon sang korte ginapasalamatan sing daku, kag ginaapresyar gid ini sang mga Saksi ni Jehova. Nagapahanumdom ini sa aton sang natabo anay sang unang siglo sa Jerusalem. Sang luyag patyon sang Sanhedrin, ang Judiyong mataas nga hukmanan, ang mga Cristiano bangod sang ila makugi nga pagbantala, si Gamaliel, “isa ka manunudlo sang Kasuguan nga ginatahod sang tanan nga tawo,” nagpalanog sing paandam kag nagsiling: “Mga tawo sang Israel, hatagi ninyo sing igtalupangod ang inyo kaugalingon nahanungod sa ginabuko ninyo nga himuon nahanungod sining mga tawo. . . . Indi ninyo paghilabti ining mga tawo, kundi pabayai sila; (kay, kon ining buko ukon ining buhat naghalin sa mga tawo, mapukan ini; apang kon naghalin ini sa Dios, indi ninyo ini mapukan;) basi masapwan pa kamo nga sa katunayan nagapakig-away sa Dios.”​—⁠Binuhatan 5:33-39.

¹⁴ Kaangay ni Gamaliel, ang kilala nga mga indibiduwal naghambal sing masidla sining karon lang pabor sa relihioso nga kahilwayan para sa mga Saksi ni Jehova. Halimbawa, ang tsirman anay sang International Academy for Freedom of Religion and Belief nangatarungan: “Ang relihioso nga mga kinamatarong sang isa ka relihion indi dapat idingot bangod lamang kay ang mga kombiksion sini ginatamod sang katilingban subong di-kalahamut-an ukon di-kinaandan.” Kag ang propesor sang sientipiko nga pagtuon sang relihion sa unibersidad sang Leipzig nagpautwas sing isa ka pamangkot tuhoy sa isa ka ahensia sang Aleman nga panguluhan nga gintukod agod mag-usisa sa ginatawag nga relihioso nga mga sekta, nga nagapamangkot: “Ngaa ang magagmay nga mga relihion lamang ang ginausisa kag indi ang duha ka dalagku nga relihion [ang Iglesia Romana Katolika kag Luterano nga Iglesia]?” Madali naton makita ang sabat sa mga pulong sang anay Aleman nga opisyal, nga nagsulat: “Wala sing duhaduha nga sing likom, gindiktahan sang mga panatiko sang simbahan ang  ginahimo nga politika sang komisyon sang panguluhan.”

Kay Sin-o Kita Magadangop Para sa Kaumpawan?

15, 16. (a) Ngaa limitado lamang ang pagkaepektibo sang ginhimo ni Gamaliel? (b) Paano limitado lamang ang mahimo sang tatlo pa ka impluwensiado nga indibiduwal para kay Jesus?

¹⁵ Ang ginsiling ni Gamaliel nagapatalupangod gid sang katunayan nga ang isa ka hilikuton nga ginasakdag sang Dios indi mahimo nga mapaslawan. Ang unang mga Cristiano pat-od gid nga nakabenepisyo gikan sa ginsiling niya sa Sanhedrin, apang wala nila ginkalimtan nga ang ginsiling ni Jesus tuhoy sa iya mga sumulunod nga sila pagahingabuton matuod man. Bangod sang ginhimo ni Gamaliel, ang mga buko sang relihiosong mga lider nga patyon sila nauntat, apang wala sini nadula ang paghingabot, kay aton mabasa: “Sa sini namati sila sa iya, kag gintawag nila ang mga apostoles, ginbunal sila, kag ginmanduan sila nga mag-untat na sa paghambal pasad sa ngalan ni Jesus, kag ginbuhian sila.”​—⁠Binuhatan 5:40.

¹⁶ Sang si Jesus ginbista, gintilawan ni Poncio Pilato nga buy-an si Jesus bangod wala sia sing nakita nga kasal-anan sa iya. Apang wala sia magmadinalag-on. (Juan 18:​38, 39; 19:​4, 6, 12-16) Bisan ang duha ka katapo sang Sanhedrin, nga si Nicodemo kag si Jose nga taga-Arimatea, nga mabuligon kay Jesus, limitado ang nahimo agod punggan ang korte sa paghimo sing aksion batok kay Jesus. (Lucas 23:50-52; Juan 7:45-52; 19:38-40) Ang kaumpawan nga natigayon sang mga tawo sang nagtindog sila sa pagpangapin sa katawhan ni Jehova​—⁠tungod sa ano man nga rason​—⁠limitado lamang. Ang kalibutan padayon nga magadumot sa matuod nga mga sumulunod ni Cristo, subong sang pagdumot sini sa iya. Ang bug-os nga kaumpawan magahalin lamang kay Jehova.​—⁠Binuhatan 2:24.

17. Ano ang realistiko nga pagtamod sang mga Saksi ni Jehova, apang ngaa wala sila magluya sa ila pamat-od nga padayunon ang pagbantala sing maayong balita?

¹⁷ Bangod may realistiko nga pagtamod sa mga butang, ginapaabot sang mga Saksi ni Jehova nga magapadayon ang paghingabot. Madula lamang ang pagpamatok kon ang sistema ni Satanas bug-os nga malutos. Apang, ining paghingabot, bisan pa di-maayo, wala nagapauntat sa mga Saksi sa pagtuman nila sa ila hilikuton nga ibantala ang Ginharian. Ngaa mauntat sila, kay ginasakdag sila sang Dios? Ginatan-aw nila ang ila maisog nga Lider, si Jesucristo, subong maayo gid nga halimbawa.​—⁠Binuhatan 5:17-21; 27-32.

18. Ano nga kabudlayan ang yara gihapon sa unahan sang katawhan ni Jehova, apang sa ano nga resulta sila kumbinsido?

¹⁸ Kutob gid sa ginsuguran sini, ang matuod nga relihion nag-atubang sing mabaskog nga pagpamatok. Sa indi madugay, mangin puntariya ini sang bug-os nga pagsalakay ni Gog, si Satanas sa iya ginpaubos nga kahimtangan sugod sang gintabog sia gikan sa langit. Apang ang matuod nga relihion makalampuwas. (Ezequiel 38:14-16) “Ang mga hari sang bug-os napuy-an nga duta,” sa idalom sang panuytoy ni Satanas, “magapakig-away batok sa Kordero, apang, bangod sia ang Ginuo sang mga Ginuo kag Hari sang mga Hari, ang Kordero magadaug sa ila.” (Bugna 16:14; 17:14) Huo, ang aton Ginuo nagapadayon padulong sa katapusan nga kadalag-an kag sa dili madugay ‘magatapos sang iya pagdaug.’ Daw ano gid nga pribilehiyo nga magpadayon upod sa iya, sa pagkahibalo nga sa dili madugay wala na sing isa nga magapamatok pa liwat sa mga sumilimba ni Jehova kon magsiling sila: “Ang Dios para sa amon”!​—⁠Roma 8:31; Filipos 1:​27, 28.

Mapaathag Bala Ninyo?

• Ano ang ginhimo ni Jehova agod pabakuron ang Cristianong kongregasyon sugod sang pagkabun-ag sang Ginharian?

• Ano ang ginhimo ni Satanas agod tinguhaan nga punggan si Cristo gikan sa pagtapos sang iya pagdaug, kag ano ang mga resulta?

• Ano ang aton timbang nga pagtamod sa paborable nga ginahimo sang mga di-Saksi?

• Ano ang himuon ni Satanas sa dili madugay, kag ano ang resulta?

[Mga Pamangkot sa Pagtinuon]

 [Retrato sa pahina 18]

Ang mga kombension isa ka pagpadayag sang pag-abante sang katawhan ni Jehova

[Mga retrato sa pahina 20]

Ang neutralidad sang mga Saksi sang Bug-os Kalibutan nga Inaway II nagahatag gihapon sing kadayawan kay Jehova