Magkalipay sa Paglaum sang Ginharian!

ISA ka makalilipay nga okasyon nga ang tumalambong nga 5,784 nagtipon sang Marso 10, 2001, sa tatlo ka lugar nga gingamit sang daku nga pamilya Bethel sa New York. Ang okasyon amo ang gradwasyon sang ika-110 nga klase sang eskwelahan sa pagmisyonero sang ­Gilead.

Si Carey Barber, nga katapo sang Nagadumala nga Hubon sang mga Saksi ni Jehova, nag-abiabi sang tanan kag nagbukas sang programa, nga nagasiling: “Nalipay kita nga mahibaluan nga 110 ka klase sang mga estudyante sang ­Gilead ang nahanas na nga mga misyonero kag ginpadala sa mga teritoryo sa bug-os nga kalibutan.”

Kon Paano Magpabilin nga Malipayon

Pagkatapos sang nagabukas nga pamulongpulong ni Utod ­Barber, si Don ­Adams namulongpulong sa tumalambong, pati na sa 48 ka manuggradwar nga estudyante, sa tema nga “Ang Pagpakamaayo ni Jehova Nagapamanggad sa Aton.” Nagapasad sang iya pamulongpulong sa Hulubaton 10:​22, ginpahanumdom niya ang tumalambong nga ginasakdag kag ginapakamaayo ni Jehova ang iya mga alagad kon ginauna nila sa ila kabuhi ang mga intereses sang Ginharian. Ginpalig-on niya ang mga estudyante nga batunon ang ila bag-ong mga asaynment nga may espiritu sang pagkahanda subong sang ginpakita ni apostol Pablo sang gin-agda sia nga ‘magtabok sa Macedonia kag magtabang.’ (Binuhatan 16:9) Bisan pa may mga kabudlayan nga dapat landason, ang kahanda ni Pablo sa pagbantala sa lugar nga ginpadalhan sa iya nagresulta sa madamong makalilipay nga mga pagpakamaayo.

Natapos sang mga katapo sang manuggradwar nga klase ang ila lima-ka-bulan nga pagtuon sa Biblia kag paghanas bilang paghanda sa hilikuton nga pagmisyonero. Walay sapayan sina, ginpalig-on sila ni ­Daniel ­Sydlik, nga katapo sang Nagadumala nga Hubon sang mga Saksi ni Jehova, nga magpadayon sa pagtuon. Nagapamulongpulong sa tema nga “Mangin Matuod nga mga Disipulo,” sia nagkomento: “Ang pagkadisipulo nagakahulugan sang pirme nga pagtuman sa mga pulong ni Jesus. Nagalakip ini sang aton kahanda sa pagpamati pirme sa iya mga pulong, sa iya mensahe, sa iya panudlo.” Ginpakita niya nga ang mga disipulo ni Cristo wala nagahimo sing mga desisyon nga wala anay ginapamatian ang tingog sang Agalon; ang kaalam sang Dios makita sa kabuhi ni Cristo. (Colosas 2:3) Wala sing isa sa aton ang mahimo magpamati sang mga pulong ni Jesus sing makaisa kag nian maghinakop nga nahibaluan na naton ang tanan tuhoy sa iya, gani ginpalig-on ni Utod ­Sydlik ang tanan nga manuggradwar nga magpadayon sa pagtuon, sa pag-aplikar, kag sa pagtudlo sang Cristianong kamatuoran, nga nagaresulta sa kahilwayan.​—⁠Juan 8:​31, 32.

 Agod magpabilin nga malipayon sa pag-alagad sa Dios, ang isa dapat nga handa sa pagbaton sing disiplina kag pagtadlong. “Ang Inyo Bala mga Batobato Magatadlong sa Inyo?” amo ang pamangkot nga ginpautwas sang instruktor sang ­Gilead nga si Law­rence ­Bowen. Ginpakita niya nga sa Biblia ang malaragwayon nga mga batobato ginaangot sa nasulod gid nga panghunahuna kag balatyagon sang isa. Mahimo ini magtadlong sa isa kon ang inspirado nga laygay gikan sa Pulong sang Dios nagtudok sa nasulod gid nga mga bahin sang personalidad sang isa. (Salmo 16:⁠7; Jeremias 17:10) Ang matutom nga dalanon sang isa mahimo pa gani magtandog kay Jehova sing tudok. Sa tapos basahon ang Hulubaton 23:​15, 16, ang humalambal nagpamangkot: “Ang inyo bala mga batobato magatadlong sa inyo?” Nagsiling pa sia: “Ginapangamuyo naton nga magatadlong ini sa aton, kag sa amo mapabatyag ninyo kay Jehova ang tudok gid nga kalipay. Mapukaw ninyo ang tudok gid niya nga balatyagon. Huo, mapahalipay ninyo ang mga batobato sang Dios kon mainunungon kamo nga magpabilin sa inyo mga asaynment.”

Ang katapusan nga pamulongpulong sa sini nga bahin sang programa ginhatag ni Mark Nou­mair, nga nagmisyonero anay sa Kenya antes mangin instruktor sa ­Gilead. Ginpadaku sang iya pamulongpulong nga natig-uluhan “Maayo Pa ang Pagtan-aw Paagi sa mga Mata” ang importansia sang pagpalambo sing pagkakontento. Nahisuno sa Manugwali 6:​9, si Utod Nou­mair nagrekomendar: “Atubanga ang katunayan. Ina amo ang ‘pagtan-aw paagi sa mga mata.’ Sa baylo nga magdalamguhanon tuhoy sa butang nga luyag ninyo himuon apang wala ninyo ginahimo, magkonsentrar sa paghimulos gid sang inyo karon nga mga kahimtangan. Ang pagdalamguhanon, nga may di-makatarunganon nga mga pagpaabot, ukon ang pirme nga pagpamensar sang negatibo nga mga butang tuhoy sa inyo asaynment indi magapahalipay kag indi magapakontento sa inyo.” Huo, bisan diin man kita ukon bisan ano man ang aton kahimtangan, ang pagpalambo sing diosnon nga pagkakontento sa aton mga kahimtangan magaresulta sa malipayon nga pag-alagad sa aton Daku nga Manunuga.

 Makalilipay nga mga Eksperiensia sa Pag-alagad sa Ginharian kag sa Gilead

Pagkatapos sang praktikal nga laygay gikan sa sining mga diskurso, ginsaysay sang mga estudyante ang ila pila ka eksperiensia samtang nagapakigbahin sa publiko nga ministeryo sa ila lima-ka-bulan nga kurso. Sa idalom sang pagdumala ni Wal­lace Liv­er­ance, ang manugrehistro sang Eskwelahan sang Gilead, ginsugid sang manuggradwar nga mga estudyante kon paano nila ginrekomendar ang ila kaugalingon subong mga ministro sang Dios. (2 Corinto 4:2) Napukaw nila ang ginhatag-sang-Dios nga konsiensia sang iban. Ginpakita sang mga eksperiensia sang mga estudyante kon paano nila nasugdan ang mga pagtuon sing Biblia sa sinsero nga mga indibiduwal nga nasugilanon nila sa dalan, sa pamalaybalay nga ministeryo, kag sa iban pa nga mga lugar. Sa iban pa nga mga okasyon, ang mga interesado nagsiling nga ang pasad-sa-Biblia nga mga publikasyon sang organisasyon ni Jehova amo ang kamatuoran. Ang isa ka tagbalay namati gid sing maayo sa isa ka partikular nga bersikulo sa Biblia. Nagatuon na sia karon sing Biblia sa mga Saksi ni Jehova.

Masunod, gin-interbyu ni Joel Adams ang mga naggradwar sa Gilead gikan sa nagligad nga mga klase. Ang iya tema amo ang “Indi Gid Mag-untat sa Pagtuon, Indi Gid Mag-untat sa Pag-alagad kay Jehova.” Ang mga gin-interbyu may sibu sa tion nga laygay para sa bag-ong mga misyonero. Nagahinumdom sang panahon nga katapo sia sang ika-26 nga klase sang ­Gilead, si Har­y John­son nagsiling: “Gintudluan kami nga si Jehova pirme nagatuytoy sang iya katawhan kag magatuytoy sang iya katawhan. Ina nga pagsalig nangin pagpalig-on sa bug-os nga tinuig.” Si William Nonkes, nga katapo sang ika-53 nga klase sang ­Gilead, naglaygay sa mga manuggradwar: “Labaw sa tanan, dumduma ninyo pirme ang mga prinsipio sang Biblia, kag gamita ini sa tanan nga desisyon nga ginahimo ninyo sa kabuhi karon kag sa walay katubtuban. Subong resulta, magapabilin kamo sa inyo asaynment, kag ang bugana nga pagpakamaayo ni Jehova mangin sa inyo.”

Ang tema nga ginpili ni Rich­ard ­Rian para sa iya bahin sa programa amo ang “Ginpabakod sa Paghimo Sang Kabubut-on ni Jehova.” Ang isa sang mga gin-interbyu niya amo si John ­Kurtz, isa ka gradwado sang ika-30 nga klase, nga naghinguyang sing kapin sa 41 ka tuig sa Espanya subong misyonero. Sang ginpamangkot tuhoy sa kurikulum sang ­Gilead, si Utod ­Kurtz nagsiling: “Ang panguna nga tulun-an amo ang Biblia. Kag nian may yara kami mga bulig sa pagtuon sa Biblia sa pagbulig sa amon nga mahangpan ang Biblia. Matigayon ini sang tanan. Wala sing sekreto nga impormasyon nga ginahatag sa ­Gilead. Wala gid ako nagauntat sa pagpadaku sa sina bangod matigayon sang tanan ang impormasyon nga ginahatag sa ­Gilead.”

Si Utod Gerrit Lösch, nga katapo sang Nagadumala nga Hubon sang mga Saksi ni Jehova, naghinakop sang espirituwal nga programa paagi sa pagpamulongpulong sa tema nga “Sa Ibabaw kag sa Idalom Sang mga Pakpak ni Jehova.” Ginpaathag niya kon paano ang pangamlig kag pagsakdag sang Dios sa iya matutom nga mga alagad ginailustrar sa Biblia paagi sa mga pakpak sang agila. (Deuteronomio 32:​11, 12; Salmo 91:4) Ang hamtong nga agila nagahumlad kon kaisa sang iya pakpak sing inoras agod amligan ang iya mga piso. Kon kaisa, ginakupkupan pa gani sang iloy nga agila sang iya mga pakpak ang iya mga piso agod amligan sila gikan sa matugnaw nga hangin. Sa kaanggid nga paagi kag nahisuno sa iya katuyuan, si Jehova nagabulig sa iya matutom nga mga alagad, ilabi na kon nagaatubang sila sing espirituwal nga mga pagtilaw. Wala nagatugot si Jehova nga ang iya mga alagad sulayon labaw sa ila masarangan kundi nagahatag sing lulutsan agod mabatas nila ini. (1 Corinto 10:13) Si Utod Lösch naghinakop paagi sa pagsiling: “Agod magpabilin nga naamligan sa espirituwal, dapat kita magpabilin sa idalom sang mga pakpak ni Jehova. Nagakahulugan ini nga indi naton dapat pagpalambuon ang espiritu sang pagkinaugalingon. Magpabilin kita pirme nga suod kay Jehova kag sa iya tulad-iloy nga organisasyon, kag wala nagapahilayo sa ila panuytoy kag mahigugmaon nga laygay.”

Ang tsirman nagbasa sang mga telegrama kag mga panamyaw gikan sa mga nagapanginbulahan sa bug-os nga globo. Pagkatapos sini ginpanghatag ang mga diploma. Sang gintukod ang Eskwelahan sang Gilead, tuyo sini nga maghiwat sing pila lamang ka klase sa sulod sang lima ka tuig. Apang sa sulod sang 58 ka tuig ginhuptan ni Jehova nga Dios ang eskwelahan nga bukas. Subong sang ginsiling ni Utod ­Barber sa iya nagabukas nga komento: “Daw ano gid ka makatilingala nga rekord ang nahimo sang mga naggradwar sa ­Gilead sugod sang 1943, sang gin-inagurahan ang ­Gilead! Ang ila tingob nga panikasog nagresulta sa pagdugang sing literal nga ginatos ka libo ka mahagop sang duta sa mahimayaon nga organisasyon ni Jehova.” Huo, ining eskwelahan sa pagmisyonero nakabulig sa pagkalipay sang minilyon sa paglaum sang Ginharian.

[Kahon sa pahina 24]

ESTADISTIKA SANG KLASE

Kadamuon sang mga pungsod nga gintiglawas: 8

Kadamuon sang mga pungsod nga ginpadalhan: 18

Kabug-usan nga kadamuon sang mga estudyante: 48

Promedyo nga edad: 34

Promedyo nga tuig sa kamatuoran: 18

Promedyo nga tuig sa bug-os tion nga ministeryo: 13

[Retrato sa pahina 25]

Ika-110 nga Naggradwar nga Klase Sang Watchtower Bible School of Gilead

Sa listahan sa ubos, ang mga idas ginanumeruhan halin sa atubangan pa likod, kag ang mga ngalan ginalista halin sa wala pa tuo sa tagsa ka idas.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.