“Mga Pilas sang Isa ka Abyan”

NAKITA ni apostol Pablo ang kinahanglanon nga sabdungon ang unang siglo nga mga Cristiano sa Galacia. Ayhan agod malikawan ang ano man nga paghinakit, namangkot sia: “Gani, nian, nangin kaaway bala ako ninyo bangod ginasugid ko sa inyo ang kamatuoran?”​​—⁠Galacia 4:⁠16.

Sa ‘pagsugid sang kamatuoran,’ indi nila nangin kaaway si Pablo. Sa pagkamatuod, nagpanghikot sia suno sa prinsipio sang Biblia: “Matutom ang mga pilas sang isa ka abyan.” (Hulubaton 27:⁠6, King James Version) Nahibaluan niya nga ang bugal sang mga nakasala mahimo mapilasan. Apang, nakahibalo sia nga kon ang isa nga nakasala indi paghatagan sing kinahanglanon nga disiplina, ang gugma ni Jehova nga Dios indi mapabutyag sa iya. (Hebreo 12:​5-7) Gani, subong isa ka matutom nga abyan nga interesado gid sa nagadugay nga kaayuhan sang kongregasyon, wala mag-isol si Pablo sa paghatag sing nagatadlong nga laygay.

Sa karon, ginatuman sang mga Saksi ni Jehova ang sugo sa ila nga “maghimo sing mga disipulo sa mga tawo sa tanan nga kapungsuran, . . . nagatudlo sa ila nga tumanon ang tanan nga butang nga ginsugo [ni Jesucristo].” Sa paghimo sini, ining sinsero nga mga Cristiano wala nagakompromiso sang mga kamatuoran sa Biblia nga nagabuyagyag kag nagapakamalaut sang sayop nga panudlo kag di-cristiano nga paggawi. (Mateo 15:⁠9; 23:⁠9; 28:​19, 20; 1 Corinto 6:​9, 10) Sa baylo nga mangin kaaway nga pagasikwayon, ginapakita nila ang pagkabalaka sang tunay nga mga abyan.

Upod ang paghantop nga gin-inspirar sang Dios, ang salmista nagsulat: “Sakiton man ako sang matarong, ini mangin mahigugmaon nga kaayo; kag sabdungon man niya ako, ini mangin lana sa akon ulo, nga indi pagpangindian sang akon ulo.”​​—⁠Salmo 141:5.