Indi Pagtuguti nga Gub-on sang Pangduhaduha ang Imo Pagtuo
Indi Pagtuguti nga Gub-on sang Pangduhaduha ang Imo Pagtuo
Sang isa ka adlaw pagdumdom mo maayo ang imo panglawas. Sang masunod nga adlaw nagmasakit ka. Sa hinali lamang, nadulaan ka na sing kusog ukon kabaskog. Nagasakit ang imo ulo kag ang imo kalawasan. Ano ang natabo? May makatalagam nga mga kagaw nga nagsulod kag nagpaluya sang sistema sang imo lawas sa pagbato sa balatian kag nagsalakay sang importante nga mga bahin sang imo lawas. Kon indi pagbulngon, ining nagsulod nga mga organismo mahimo maghalit sing permanente sang imo panglawas—makapatay pa gani sa imo.
SA PAGKAMATUOD, kon indi maayo ang imo panglawas sang naimpeksion ka, labi pa nga madali ka magmasakit. Halimbawa, kon nagluya ang imo lawas bangod sang malnutrisyon, ang imo resistensia “tuman gid kaluya amo nga ang pinakagamay nga impeksion mahimo mangin makamamatay,” siling sang medikal nga awtor nga si Peter Wingate.
Kon amo sina, sin-o ang luyag mabuhi sa gutom? Mahimo gid nga ginahimo mo ang imo masarangan agod makakaon sing maayo kag magpabilin nga mapagros. Ayhan ginahimo mo man ang tanan agod malikawan nga maimpeksion bangod sang kagaw ukon bakterya. Apang, amo man bala nga paghalong ang ginahimo mo kon tuhoy sa pagpabilin nga “mapagros sa pagtuo”? (Tito 2:2) Halimbawa, nahibaluan mo bala ang katalagman sang malalangon nga pangduhaduha? Mahapos ini magsulod sa imo hunahuna kag tagipusuon, kag nagahalit sang imo pagtuo kag sang imo kaangtanan kay Jehova. Ang iban nga tawo daw wala sing hinalung-ong sa sini nga katalagman. Madali sila masiod sa pangduhaduha bangod nagapagutom sila sa espirituwal. Posible bala nga ginahimo mo ina?
Pangduhaduha—Malain Gid Bala Ini?
Siempre pa, indi tanan nga pangduhaduha malain. Kon kaisa, kinahanglan nga indi mo anay patihan ang isa ka butang tubtob nga napat-od mo ang mga kamatuoran. Makatalagam kag makapatalang ang relihioso nga mga laygay nga magpati ka lang kag indi dapat magduhaduha. Matuod, ang Biblia nagasiling nga ang gugma ‘nagapati sa tanan nga butang.’ (1 Corinto 13:7) Ang isa ka mahigugmaon nga Cristiano pat-od gid nga madali magpati sa mga tawo nga napamatud-an na nga masaligan sang una. Apang, ang Pulong sang Dios nagapaandam man batok sa ‘pagtuo sa tagsa ka pulong.’ (Hulubaton 14:15) Kon kaisa ang nagligad nga rekord sang isa ka tawo isa gid ka rason agod magduhaduha. “Bisan pa ginahimo [sang malalangon nga nagahambal] nga matahom ang iya tingog,” paandam sang Biblia, “indi ka magpati sa iya.”—Hulubaton 26:24, 25.
Ginpaandaman man ni apostol Juan ang mga Cristiano batok sa bulag nga pagpati. “Dili ninyo pagtuuhi ang tagsa ka inspirado nga hambal,” sulat niya. Sa baylo, “tilawi ang inspirado nga mga hambal agod makita kon bala naghalin ini sa Dios.” 1 Juan 4:1) Ang isa ka “hambal,” panudlo ukon opinyon, mahimo nga daw naghalin sa Dios. Apang naghalin gid bala ini sa iya? Ang pagduhaduha, ukon ang indi anay pagpati, mangin isa gid ka pangamlig bangod, subong sang ginsiling ni apostol Juan, “madamong madaya ang naglakat sa kalibutan.”—2 Juan 7.
(Wala Sing Sadsaran nga Pangduhaduha
Huo, masami nga kinahanglan ang bunayag kag mapainubuson nga pag-usisa sang mga katunayan agod mapat-od ang kamatuoran. Apang, tuhay ini sa pagtugot nga magtubo sa aton hunahuna kag tagipusuon ang wala sing sadsaran kag makahalalit nga pangduhaduha—pangduhaduha nga makaguba sang aton napasad sing malig-on nga mga pagpati kag mga kaangtanan. Ini nga pangduhaduha ginalaragway subong “di-kapat-uran sa pagpati ukon opinyon nga masami nga nagaupang sa paghimo sing desisyon.” Nadumduman mo bala kon paano ginpasulod ni Satanas sa hunahuna ni Eva ang pagduhaduha kay Jehova? “Nagsiling gid bala ang Dios nga indi kamo dapat magkaon gikan sa tanan nga kahoy sa hardin?” pamangkot niya. (Genesis 3:1) Ang pagduhaduha bangod sinang daw inosente pamatian nga pamangkot nag-upang sa paghimo niya sing desisyon. Isa ina sa mga paagi ni Satanas. Kaangay sang isa ka tawo nga nagasulat sing mga pasipala, lantip gid sia sa paggamit sing mga palahidlahid, indi bug-os nga mga kamatuoran, kag mga kabutigan. Madamong maayo kag masaligan nga mga kaangtanan ang ginguba ni Satanas paagi sa malalangon nga pangduhaduha nga ginatanom sa sina nga paagi.—Galacia 5:7-9.
Nahangpan gid ni disipulo Santiago ang makahalalit nga epekto sini nga sahi sang pangduhaduha. Ginsambit niya ang aton matahom nga pribilehiyo nga hilway nga makapangayo sing bulig sa Dios sa tion sang pagtilaw. Apang, paandam ni Santiago, kon nagapangamuyo ka sa Dios, ‘padayon nga magpangayo nga may pagtuo, nga wala gid nagapangduhaduha.’ Ang pagduhaduha sa aton kaangtanan sa Dios nagahimo sa aton nga “kaangay sang balod sa dagat nga ginapalid sang hangin kag ginatumbotumbo.” Mangin kaangay kita sang isa ka “tawo nga indi makapamat-od, indi malig-on sa tanan niya nga dalanon.” (Santiago 1:6, 8) Mangin maduhaduhaon kita sa pagpati amo nga magaalang-alang kita. Nian, subong sang natabo kay Eva, madali kita maapektuhan sang tanan nga sahi sang panudlo kag pilosopiya sang mga demonyo.
Paghupot Sing Kapagros sa Espirituwal
Gani, paano naton maamligan ang aton kaugalingon gikan sa makahalalit nga pangduhaduha? Simple lang ang sabat: paagi sa pagsikway sing malig-on sa sataniko nga propaganda kag sa paghimulos sing bug-os sang mga aman sang Dios para sa espirituwal nga pagpakaon agod mangin ‘malig-on kita sa pagtuo.’—1 Pedro 5:8-10.
Kinahanglanon gid ang maayong pagkaon sa espirituwal. Ang awtor nga si Wingate, nga ginsambit kaina, nagpaathag: “Bisan pa nagapahuway ang lawas kinahanglan sini ang padayon nga suplay sang enerhiya para sa kemikal nga mga proseso kag para sa mga hilikuton sang importante nga mga bahin sini; kag kinahanglan pirme islan ang mga selula sang madamo nga basad.” Amo man sa aton espirituwal nga kapagros. Kon wala ang padayon nga pagkaon sa espirituwal, ang aton pagtuo, kaangay sang lawas nga wala sing pagkaon, amat-amat nga mahalitan kag sa ulihi mapatay. Si Jesucristo nagpadaku sini sang nagsiling sia: “Ang tawo mabuhi, indi lamang sa tinapay, kundi sa tagsa ka pulong nga nagaguwa sa baba ni Jehova.”—Mateo 4:4.
Hunahunaa ina. Paano kita una nga nakatukod sing mabakod nga pagtuo? “Ang pagtuo nagasunod sa butang nga nabatian,” sulat ni apostol Pablo. (Roma 10:17) Buot niya silingon nga una naton nga natukod ang aton pagtuo kag pagsalig kay Jehova, sa iya mga saad, kag sa iya organisasyon paagi sa pagtuon sa Pulong sang Dios. Siempre pa, wala naton dayon ginapatihan ang tanan nga aton nabatian. Ginhimo naton ang ginhimo sang mga tawo nga nagapuyo sa siudad sang Berea. ‘Gin-usisa naton sing maayo ang Kasulatan adlaw-adlaw kon bala matuod gid ini nga mga butang.’ (Binuhatan 17:11) ‘Ginpamatud-an naton sa aton kaugalingon ang maayo kag kalahamut-an kag himpit nga kabubut-on sang Dios’ kag ginpat-od nga ang aton nabatian matuod. (Roma 12:2; 1 Tesalonica 5:21) Sugod sadto, mahimo nga ginpalig-on pa naton ang aton pagtuo samtang mas maathag pa nga nakita naton nga ang Pulong kag mga saad sang Dios wala nagakapaslawi.—Josue 23:14; Isaias 55:10, 11.
Likawi ang Espirituwal nga Gutom
Ang hangkat karon amo ang paghupot sang aton pagtuo kag ang paglikaw sa bisan ano nga 1 Timoteo 4:1) Ining makapatalang nga mga pinamulong kag mga panudlo amo ang kabangdanan sang pangduhaduha sa mga hunahuna sang iban kag nagapahilayo sa ila sa Dios. Ano ang aton pangamlig? Ang magpadayon nga “ginasagod sang mga pulong sang pagtuo kag sang maayong mga panudlo nga [aton] ginsunod sing mahalungon.”—1 Timoteo 4:6.
pagduhaduha sa pagpati nga makapaluya sang aton pagsalig kay Jehova kag sa iya organisasyon. Agod mahimo ini dapat padayon naton nga usisaon ang Kasulatan adlaw-adlaw. Si apostol Pablo nagpaandam nga “sa ulihi nga mga hut-ong sang tion ang iban [nga may mabakod nga pagtuo sang una] magatalikod sa pagtuo, nga nagahatag sing igtalupangod sa nagapatalang nga inspirado nga mga pinamulong kag mga panudlo sang mga demonyo.” (Apang, makapasubo nga ginpili sang pila karon nga indi ‘masagod sang mga pulong sang pagtuo’—bisan pa matigayon sing hilway ina nga pagkaon. Subong sang ginpakita sang isa sang mga manunulat sang tulun-an sang Hulubaton, posible nga palibutan sang maayo nga pagkaon sa espirituwal, sang isa ka espirituwal nga bangkete, kon sa aton pa, kag indi gihapon makakaon kag makatunaw sang pagkaon.—Hulubaton 19:24; 26:15.
Makatalagam ini. Ang awtor nga si Wingate nagsiling: “Sa tion nga gamiton na sang lawas ang kaugalingon sini nga protina nagasugod na ini sa pagluya.” Kon magutman ka, ginagamit sang imo lawas ang gatong nga ginareserba sa bug-os nga lawas. Kon maubos ini nga mga reserba, ginagamit sang lawas ang protina nga kinahanglanon para sa pagtubo kag pagkay-o sang basad. Ang importante nga mga bahin sang lawas amat-amat nga nagauntat sa pagpanghikot. Nian nagaluya ang imo panglawas.
Amo sini ang natabo sa espirituwal nga kahulugan sa pila sa unang Cristianong kongregasyon. Gingamit lamang nila ang ila espirituwal nga mga reserba. Mahimo nga ginpatumbayaan nila ang personal nga pagtuon, kag nangin maluya sila sa espirituwal. (Hebreo 5:12) Ginpaathag ni apostol Pablo ang katalagman sa paghimo sini sang nagsulat sia sa Hebreo nga mga Cristiano: “Kinahanglan naton hatagan sing labi pa sangsa kinaandan nga igtalupangod ang mga butang nga nabatian naton, agod indi kita maanod palayo.” Nahibaluan niya kon daw ano kahapos madaldal padulong sa malain nga batasan kon “ginpatumbayaan naton ang isa ka kaluwasan nga subong sina kadaku.”—Hebreo 2:1, 3.
Talupangda nga ang isa ka tawo nga nagaantos sing malnutrisyon daw indi gid man pirme masakiton ukon maniwang tan-awon. Sing kaanggid, mahimo nga indi dayon hilmunon kon ang isa ginagutom sa espirituwal. Posible nga, kon tan-awon, daw maayo ang imo espirituwalidad bisan pa nga wala ka nagakaon sing nagakaigo—apang sa malip-ot lamang nga tion! Sa ulihi magaluya ka sa espirituwal, nga madali mabuyok sang wala sing sadsaran nga pangduhaduha, kag indi makapakig-away sing lakas sa pagtuo. (Judas 3) Nahibaluan mo—bisan pa wala sing iban nga nakahibalo—kon daw ano kadamo ang imo ginakaon sa espirituwal.
Gani, padayuna ang imo personal nga pagtuon. Batui sing lakas ang pagduhaduha. Ang di-pagsapak sa diutay nga impeksion kag sa makahalangawa nga pangduhaduha mahimo magresulta sa kapahamakan. (2 Corinto 11:3) ‘Nagakabuhi gid bala kita sa katapusan nga mga adlaw? Mapatihan mo bala ang tanan nga ginasiling sang Biblia? Amo gid bala ini ang organisasyon ni Jehova?’ Luyag gid ni Satanas nga magtanom sing pangduhaduha kaangay sini sa imo hunahuna. Indi pagtuguti nga bangod sang mapatumbayaon nga panimuot sa espirituwal nga pagkaon, madali ka masiod sang iya makapatalang nga mga panudlo. (Colosas 2:4-7) Sunda ang laygay nga ginhatag kay Timoteo. Mangin maayo nga estudyante sang “balaan nga mga kasulatan” agod ‘makapadayon ka sa mga butang nga natun-an mo kag nahaylo nga patihan.’—2 Timoteo 3:13-15.
Mahimo nagakinahanglan ka sing bulig agod mahimo ini. Ang manunulat nga ginbalikwat kaina nagpadayon sa pagsiling: “Sa malubha nga gutom ang mga bahin sang lawas nga ginagamit Santiago 5:14, 15.
sa pagtunaw mahimo nga mahalitan gid bangod sang kakulang sing mga bitamina kag sing iban pa nga mga kinahanglanon amo nga indi na sini masarangan nga tunawon ang ordinaryo nga pagkaon. Ang mga tawo sa sini nga kahimtangan mahimo magkinahanglan sing pagkaon nga madali tunawon sa pila ka tion.” Kinahanglan ang pinasahi nga pag-atipan agod maremedyuhan ang mga epekto sang gutom sa lawas. Sing kaanggid, ang isa nga nagpatumbaya sing daku sa iya personal nga pagtuon sa Biblia mahimo magkinahanglan sing daku nga bulig kag pagpalig-on agod mapanumbalik ang iya gana sa espirituwal. Kon amo sini ang imo kahimtangan, mangayo sing bulig kag batuna sing malipayon ang bisan anong bulig nga ihatag sa imo agod matukod liwat ang imo espirituwal nga kapagros kag kusog.—Indi “Malingkang sa Kakulang Sing Pagtuo”
Mahimo maghunahuna ang iban nga may rason ang patriarka nga si Abraham sa pagduhaduha kon binagbinagon nila ang iya kahimtangan. Mahimo nga daw makatarunganon maghinakop nga ‘wala na sia sing paglaum nga mangin amay sang madamo nga pungsod’—walay sapayan sang saad sang Dios. Ngaa? Ti, kon sa pagtamod lang sang tawo, daw wala na sing paglaum ang iya kahimtangan. ‘Ginbinagbinag niya ang iya kaugalingon nga lawas, nga karon patay na, subong man ang patay nga kahimtangan sang tiyan ni Sara,’ siling sang rekord sang Biblia. Apang, wala gid niya gintugutan nga manggamot sa iya hunahuna kag tagipusuon ang pagduhaduha tuhoy sa Dios kag sa iya mga saad. Si apostol Pablo nagsulat: “Wala sia magluya sa pagtuo,” ukon “malingkang sa kakulang sing pagtuo.” Nagpabilin si Abraham nga ‘kumbinsido sing bug-os nga ang ginsaad sang Dios sarang man niya himuon.’ (Roma 4:18-21) Nakatukod sia sing mabakod, personal, kag nagasalig nga kaangtanan kay Jehova sa sulod sang madamong tinuig. Ginsikway niya ang bisan ano nga pangduhaduha nga mahimo magpaluya sina nga kaangtanan.
Mahimo mo man ina kon “padayon ka nga manguyapot sa sulundan sang makapapagros nga mga pulong”—kon magkaon ka sing maayo sa espirituwal. (2 Timoteo 1:13) Tamda sing serioso ang katalagman sang pagduhaduha. Nagapakigbahin si Satanas sa mahimo matawag nga inaway nga nagagamit sing espirituwal nga bakterya subong hinganiban. Kon patumbayaan mo ang pagkaon sing maayo sa espirituwal paagi sa personal nga pagtuon sa Biblia kag paagi sa pagtambong sa Cristianong mga miting, ginahimo mo ang imo kaugalingon nga maluya sa sini nga mga pagsalakay. Himusli sing maayo ang bugana kag suno sa tion nga suplay sang espirituwal nga pagkaon nga ginaaman sang “matutom kag mainandamon nga ulipon.” (Mateo 24:45) Padayon nga ‘mag-ugyon sa makapapagros nga mga pulong’ kag magpabilin nga “mapagros sa pagtuo.” (1 Timoteo 6:3; Tito 2:2) Indi pagtuguti nga gub-on sang pangduhaduha ang imo pagtuo.
[Mga retrato sa pahina 21]
Daw ano kaayo ikaw nagakaon sa espirituwal?