Nagadugay nga Impresyon

KADA tuig, nagatipon ang mga Saksi ni Jehova sa Cristianong mga asambleya kag mga kombension sa ila kaugalingon nga pungsod. Nagatipon sila agod makatigayon sing makapalig-on sa espirituwal nga panudlo kag pagpakig-upod. Apang ang iban pa nga bahin sang ila mga pagtilipon may yara man nagadugay nga impresyon sa ila mga bisita.

Halimbawa, sang Hulyo 1999, nagtipon ang linibo ka Saksi sa Mozambique sa sulod sang tatlo ka makapalig-on nga adlaw sa “Matagnaon nga Pulong Sang Dios” nga Distrito nga mga Kombension. Madamo sang nagtipon didto ang karon pa lang nakatambong sa kombension. Nagdayaw sila indi lamang sa ila nabatian sa plataporma kundi sa ila man nakita sa palibot nila.

Amo ini ang isa ka komento sa Maputo Assembly Hall: “Wala pa gid ako makakita sang subong sini katahom nga duog sa bug-os ko nga kabuhi! Ang mga kasilyas may habon kag mga espeho, kag mahumot pa gani ini. Malinong ang palibot kag wala sing gahod sang nagailinaway nga kabataan. Kag wala sing nagadis-uganay! Nakita ko ang malipayon nga mga pamatan-on nga nagasugilanunay sing makapalig-on. Nagdayaw man ako sa maayo nga pagpanapot sang tanan. Sa masunod nga higayon, updon ko ang akon kabataan kag kumbinsihon ko ang akon bana nga tambungan namon ini nga kombension.”

Huo, natalupangdan ang pagkabunayag, integridad, kag pisikal nga katinlo sang mga Saksi ni Jehova. Ngaa tuhay ang mga Saksi? Bangod ginatinguhaan gid nila nga iaplikar ang ila ginatun-an sa Biblia. Ngaa indi ka mag-upod sa ila sini nga tuig sa ila mga kombension sa inyo pungsod ukon sa ila semanal nga mga miting sa Kingdom Hall sa inyo lugar kag tan-awa ini mismo?

[Retrato sa pahina 32]

ZAMBIA

[Retrato sa pahina 32]

KENYA

[Retrato sa pahina 32]

MOZAMBIQUE