‘Nagbatas Sia Tubtob sa Katapusan’

SA ISA ka presentasyon sang video sang 1993 nga ginpatan-aw sa bag-o nga mga katapo sang ulong-talatapan sang mga Saksi ni Jehova, ginpabutyag ni Lyman Alexander Swingle ang iya balatyagon tuhoy sa pag-alagad kay Jehova: “Mapatay nga ginasuksok ang inyo botas!”⁠ *

Ginhimo gid sang 90 anyos nga si Utod Swingle ang ginpalig-on niya sa iban nga himuon. ‘Nagbatas sia tubtob sa katapusan.’ (Mateo 24:13) Bisan pa nagamasakit, sang Mierkoles, Marso 7, nagtambong sia sa miting sang Nagadumala nga Hubon sang mga Saksi ni Jehova diin katapo sia. Sang masunod nga Martes ang iya kahimtangan naglubha, kag sang alas 4:26 s.a., Marso 14, gindeklarar sang iya doktor nga patay na sia.

Ginsugdan ni Lyman Swingle ang iya pag-alagad sa bug-os kalibutan nga ulong-talatapan sang mga Saksi ni Jehova sa Brooklyn, New York, sang Abril 5, 1930. Nag-alagad sia didto sing halos 71 ka tuig. Una nga gin-asayn si Lyman sa bindery, masunod sa pressroom, kag nagbulig man sia sa paghimo sing tinta. Sa pagkamatuod, naghinguyang si Utod Swingle sing mga 25 ka tuig sa departamento nga nagahimo sing tinta. Nag-alagad man sia sing mga 20 ka tuig subong katapo sang Writing Department sang ulong-talatapan. Sa katapusan nga 17 ka tuig sang iya kabuhi, nagtrabaho sia sa Treasurer’s Office.

Si Lyman isa ka maisog nga manugbantala sang Ginharian sang Dios. Sa iya una nga mga tuig sa Brooklyn, sia kag ang iya kaupod sa kuwarto, nga si Arthur Worsley, nagpanakayon anay sa isa sang mga sakayan sang mga Saksi sa Hudson River. Nagagamit sing trompa, ginhinguyang nila ang madamo nga talipuspusan sang semana sa pagbantala sing mensahe sang Ginharian sa mga komunidad sa higad sang suba.

Natawo si Utod Swingle sang Nobiembre 6, 1910, sa Lincoln, Nebraska, apang wala madugay pagkatapos sadto nagsaylo ang iya pamilya sa Salt Lake City, Utah. Didto, sang 1913, ang iya mga ginikanan nangin mga Estudyante sang Biblia, subong amo anay ang pagtawag sa mga Saksi ni Jehova. Sa sulod sang mga tinuig, gin-amuma sang pamilya Swingle ang madamong dinapit nga mga humalambal halin sa ulong-talatapan sang mga Saksi sa Brooklyn, kag maayo gid ang impluwensia sini nga mga lalaki kay Lyman. Sang 1923, sa edad nga 12 anyos, ginbawtismuhan sia bilang simbulo sang iya dedikasyon sa Dios.

Pagligad sang kapin sa 26 ka tuig nga pag-alagad sa Brooklyn nga indi minyo, nag-uswag pa gid ang kabuhi ni Lyman sang napangasawa niya si Crystal Zircher sang Hunyo 8, 1956. Pirme gid sila nagaupdanay, nagapakigbahin sing magkaupod sa ministeryo tubtob sang napatay si Crystal sang 1998. Mga tatlo ka tuig antes sina, na-stroke si Crystal nga ginbangdan sang iya malubha nga pagkainutil. Ang adlaw-adlaw nga pag-atipan sa iya ni Lyman isa ka halimbawa sang katutom nga nagpukaw sang balatyagon sang tanan, ilabi na sa mga nakakita kay Lyman nga mahigugmaon nga nagatulod sang wheelchair sa mga sementado nga alagyan sa kaingod nga lugar samtang nagatanyag sing Ang Lalantawan kag Magmata! si Crystal sa mga nagalabay.

Si Utod Swingle isa ka prangka kag mabuot nga tawo nga ginpalangga gid sang mga nakakilala sa iya. Kaangay sang iya amay kag iloy, may yara sia pasad-sa⁠–​Biblia nga paglaum nga magkabuhi kaupod ni Jesucristo sa langitnon nga Ginharian, isa ka paglaum nga nakapat-od gid kita nga nabaton na niya.​—⁠1 Tesalonica 4:​15-​18; Bugna 14:13.

[Nota]

[Retrato sa pahina 31]

Nag-alagad si Utod Swingle sing mga 25 ka tuig sa departamento nga nagahimo sing tinta

[Retrato sa pahina 31]

Pirme magkaupod sanday Lyman kag Crystal