Ngaa Dapat Tun-an ang Biblia?

SI Bill lamharon, mabukod, edukado, kag malig-on sa pinansial. Apang, indi sia kontento. Ang iya kabuhi wala sing katuyuan, kag bangod sini nasit-an gid sia. Sa pagtinguha nga makakita sing katuyuan sa kabuhi, gin-usisa niya ang nagkalainlain nga relihion, apang wala niya nakita ang iya ginapangita. Sang 1991 nasugilanon niya ang isa sang mga Saksi ni Jehova nga nagbilin sa iya sing isa ka libro nga nagahinun-anon sang ginasiling sang Biblia tuhoy sa kahulugan sang kabuhi. Isa ka pagtuon sa Biblia ang ginhimos agod mabinagbinag ni Bill ini nga topiko kag ang iban man.

Si Bill naghinumdom: “Ginhiwat namon ang amon nahauna nga pagtuon, kag bangod pirme gid namon ginagamit ang Biblia, nahibaluan ko nga amo ini ang akon madugay na nga ginapangita. Ang mga sabat sa Biblia makalilipay gid. Pagkatapos sadto nga pagtuon, nagkadto ako sa kabukiran sakay sang akon trak, kag sang makapanaug sa trak, nagsinggit ako sing mabaskog sa daku nga kalipay. Nalipay ako nga nahibaluan ko na ang mga sabat sa akon mga pamangkot.”

Siempre pa, indi tanan nga nakakita sang kamatuoran  sang Biblia ang literal nga nagasinggit sa kalipay. Apang, makalilipay gid para sa madamo nga mahibaluan ang mga sabat sa importante nga mga pamangkot sa kabuhi. Ang ila balatyagon kaangay sa tawo sa parabola ni Jesus nga nakakita sing isa ka bahandi nga natago sa uma. Si Jesus nagsiling: “Bangod sa kalipay naglakat sia kag ginbaligya ang mga butang nga ginapanag-iyahan niya kag ginbakal yadto nga uma.”​—⁠Mateo 13:44.

Ang Yabi sa Makahulugan nga Kabuhi

Ginbinagbinag ni Bill ang sadsaran nga pamangkot, Ano ang katuyuan sang kabuhi? Ginpanikasugan sang mga pilosopo, mga teologo, kag mga sientipiko nga sabton ina nga pamangkot sa sulod sang mga milenyo. Di-maisip nga mga libro ang ginsulat sang mga indibiduwal nga nagatinguha nga masabat ini. Ang ila mga panikasog wala sing pulos, kag madamo ang naghinakop nga ang pamangkot indi masabat. Apang, may sabat ini. Bisan pa madalom, indi ini mabudlay. Ginapaathag ini sa Biblia. Ang yabi sa malipayon kag makahulugan nga kabuhi amo ini: Dapat may yara kita maayo nga kaangtanan kay Jehova, ang aton Manunuga kag langitnon nga Amay. Paano naton ina matigayon?

May yara duha ka daw nagasumpakilay nga paagi sang pagpakigsuod sa Dios. Ang mga nagapakigsuod sa Dios nahadlok sa iya kag nagahigugma sa iya. Binagbinagon naton ang duha ka kasulatan nga nagasakdag sa sina nga pulong. Sang madugay na nga nakaligad, gintun-an sing maayo sang maalam nga si Hari Solomon ang katawhan kag ginrekord niya ang iya mga natukiban sa tulun-an sang Manugwali sa Biblia. Nagasumaryo sang iya mga obserbasyon, sia nagsulat: “Ang katapusan sang butang, sang nabatian na ang tanan, amo: Magkahadlok sa matuod nga Dios kag magtuman sa iya mga sugo. Kay amo ini ang bug-os nga katungdanan sang tawo.” (Manugwali 12:13) Mga siglo sang ulihi, sang ginpamangkot kon ano ang pinakadaku nga sugo sa Kasuguan nga ginhatag kay Moises, si Jesus nagsabat: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:37) Daw indi kinaandan bala para sa imo nga dapat naton kahadlukan ang Dios kag higugmaon sia? Usisaon naton ang kahulugan sang kahadlok kag gugma kag kon paano ini nagabulig sa isa ka tawo nga matigayon ang makaalayaw nga kaangtanan sa Dios.

Kon Ano ang Kahulugan Sang Kahadlok sa Dios

Ang matinahuron nga kahadlok importante gid agod masimba naton ang Dios sing kalahamut-an. Ang Biblia nagasiling: “Ang kahadlok kay Jehova amo ang pamuno sang kaalam.” (Salmo 111:10) Si apostol Pablo nagsulat: “Magpadayon kita nga may di-bagay nga kaayo, nga paagi sini kalahamut-an nga makahimo kita sing sagrado nga pag-alagad sa Dios nga may diosnon nga kahadlok kag kapunaw.” (Hebreo 12:28) Sing kaanggid, ginsugdan sang anghel sa tunga sang langit nga nakita ni apostol Juan sa palanan-awon ang pagbantala niya sing maayong balita paagi sa mga pulong: “Kahadluki ninyo ang Dios kag hatagi sia sing himaya.”​—⁠Bugna 14:​6, 7.

Ini nga kahadlok sa Dios, nga importante gid sa makahulugan nga kabuhi, indi pareho sa makangilidlis nga kakugmat. Mahimo kita makugmat kon ginapahog kita sang isa ka mapintas kag makatalagam nga kriminal. Apang ang kahadlok sa Dios​—⁠ukon diosnon nga kahadlok​—⁠amo ang pagkapunaw kag daku nga pagtahod sa Manunuga. Nagadalahig ini sa nagakaigo nga kahadlok nga indi mapahamut-an ang Dios bangod sia amo ang Supremo nga Hukom kag Labing Gamhanan, nga may gahom kag awtoridad sa pagsilot sa mga nagalapas.

Ang Kahadlok kag Gugma Nagaupdanay

Apang, indi luyag ni Jehova nga ang mga tawo nagaalagad lamang sa iya bangod napunaw sila sa iya. Si Jehova isa gid ka Dios sang gugma. Si apostol Juan napahulag sa pagsulat: “Ang Dios gugma.” (1 Juan 4:8) Si Jehova nga Dios nakig-angot sing tuman ka mahigugmaon sa katawhan, kag luyag niya nga, bilang balos, ang katawhan magahigugma man sa iya. Apang, paano nahisanto ini nga gugma sa diosnon nga kahadlok? Ang duha naangot sing suod. Ang salmista nagsulat: “Ang  pagpakigsuod kay Jehova natungod sa mga nagakahadlok sa iya.”​—⁠Salmo 25:14.

Handurawa lamang ang pagtahod kag kahadlok nga nabatyagan sang isa ka bata sa mabukod kag maalam nga amay. Sa amo man nga tion, balusan sini nga bata ang gugma sang amay. Ang bata magasalig sa iya amay kag magapangayo sa iya sing panuytoy, nagasalig nga ini nga panuytoy magahatag sing mga benepisyo. Sing kaanggid, kon ginahigugma kag ginakahadlukan naton si Jehova, tumanon naton ang iya panuytoy, kag magabulig ini sa aton. Talupangda ang ginsiling ni Jehova nahanungod sa mga Israelinhon: “Kon mapalambo lamang nila kuntani ang ila tagipusuon sa pagkahadlok sa akon kag sa pagtuman pirme sang tanan ko nga sugo, agod nga magmaayo sa ila kag sa ila mga anak tubtob sa tion nga walay latid!”​—⁠Deuteronomio 5:29.

Huo, ang diosnon nga kahadlok wala nagadul-ong sa kahiulipnan kundi sa kahilwayan, wala ini nagadul-ong sa kasubo kundi sa kalipay. Si Isaias nagtagna tuhoy kay Jesus: “Magakalipay sia sa kahadlok kay Jehova.” (Isaias 11:3) Kag ang salmista nagsulat: “Malipayon ang tawo nga nagakahadlok kay Jehova, nga sa iya mga sugo nagakalipay sia sing daku.”​—⁠Salmo 112:1.

Maathag gid nga indi naton mahimo nga kahadlukan ang Dios ukon higugmaon sia kon indi naton sia kilala. Amo ina kon ngaa ang pagtuon sing Biblia importante gid. Ini nga pagtuon nagabulig sa aton nga mahangpan ang personalidad sang Dios kag maapresyar ang kaalam sang pagsunod sa iya panuytoy. Samtang mas nagasuod kita sa Dios, luyag naton nga himuon ang iya kabubut-on kag ginapahulag kita nga sundon ang iya mga sugo, sa pagkahibalo nga magabulig ini sa aton.​—⁠1 Juan 5:3.

Makalilipay mahibaluan nga ang isa yara sa husto nga banas sang kabuhi. Matuod ini kay Bill, nga ginsambit sa umpisa. Nagsiling sia sining karon lang: “Sa sulod sang siam ka tuig nga nakaligad sugod sang akon una nga pagtuon sa Biblia, ang akon kaangtanan kay Jehova nagtubo. Ang una nga pagsilabo sang kalipay nga nabatyagan ko nangin isa gid ka makalilipay nga dalanon sang kabuhi. Pirme ako malaumon sa kabuhi. Ang akon mga adlaw puno sing makahulugan nga hilikuton, indi sing walay pasingadtuan nga pagpangita sing kalipayan. Si Jehova nangin matuod nga persona para sa akon, kag nahibaluan ko nga interesado gid sia sa akon kaayuhan.”

Sa masunod nga artikulo, binagbinagon pa naton kon paano ang ihibalo tuhoy kay Jehova nagahatag sing kalipay kag nagabulig sa mga nagaaplikar sini sa ila kabuhi.

[Blurb sa pahina 5]

Ang pagpakigsuod sa Dios nagakahulugan nga higugmaon naton sia kag kahadlukan sia

[Retrato sa pahina 6]

Si Jesus malipayon sa pagkahadlok kay Jehova