Report sang mga Manugbantala sang Ginharian

Ginpahiran sang Dios ang Iya mga Luha

ANG mga tawo nga nagapahisuno sang ila pagkabuhi sa mga kasuguan kag mga prinsipio ni Jehova ginapakamaayo gid. Bisan pa indi pirme mahapos ang paghimo sang kinahanglanon nga mga pagbag-o, matigayon gid ang bulig kag pagpalig-on. (Salmo 84:11) Ginapakita ini sang masunod nga eksperiensia sa Bagatnan-Sidlangan nga Asia.

Samtang nagabakasyon, ang isa ka Saksi halin sa Pransia nakasugilanon kay Kim,⁠ * nga tag-iya sang isa ka balaligyaan, tuhoy sa katuyuan ni Jehova para sa duta. Ginbilinan man niya si Kim sing isa ka kopya sang libro nga Mahimu Ka Mabuhi Sing Dayon sa Paraiso sa Duta. Samtang nagatulutan-aw sa libro, nabasa ni Kim ang pinamulong nga “pahiran niya ang tagsa ka luha sa mga mata nila.” (Bugna 21:⁠4) “Natandog gid ako sini nga bersikulo,” hinumdom ni Kim. “Bangod nakita ako nga nagayuhum kag nagapakigsugilanon sa bug-os nga adlaw sa balaligyaan, sin-o ang makahibalo nga sa pagpauli ko gali pagkagab-i, nagahibi ako tubtob matulugan?” Nagasugid sang kabangdanan sang iya kasubo, nagsiling sia: “Nagapuyopuyo ako upod sa isa ka lalaki sa sulod sang 18 ka tuig kag indi gid malipayon bangod indi niya ako luyag pakaslan. Luyag ko na untaton ini nga paagi sang pagkabuhi, apang bangod madugay na kami nga nagaupdanay, wala ako sing kaisog.”

Wala madugay sang ulihi, ginbaton ni Kim ang isa ka pagtuon sa Biblia upod kay Linh, nga isa sang mga Saksi ni Jehova. “Luyag ko gid iaplikar ang panudlo sang Biblia,” siling ni Kim. “Halimbawa, nag-untat ako sa pagsimba sa akon mga katigulangan, bisan pa nga nagresulta ini sa pagpamatok sang akon pamilya. Isa pa, gintinguhaan ko nga himuon nga legal ang amon pag-upod, apang nangindi ang akon ginapuyopuyo. Sa sining mabudlay nga tion, ang Saksi nga taga-Pransia padayon nga nagpadala sa akon sing mga publikasyon sa Biblia, kag ginpalig-on gid ako ni Linh. Ang pagpailob kag mahigugmaon nga bulig sini nga mga utod nga babayi nagbulig sa akon nga magpadayon tubtob nakita ko ang matuod nga pagkatawo sang akon ginapuyopuyo. Natukiban ko nga may yara na sia gali 5 ka ‘asawa’ kag 25 ka kabataan! Naghatag ini sa akon sing kaisog nga biyaan sia.

“Ang pagsaylo sa isa ka gamay nga apartment halin sa isa ka daku kag komportable nga balay indi mahapos. Isa pa, gin-ipit ako sang akon ginapuyopuyo anay nga mag-upod liwat sa iya, namahog pa gani nga basyahan ako sing aksido kon indi ako magpasugot. Sa bulig ni Jehova, nasarangan ko nga himuon kon ano ang husto.” Nagpadayon sa pag-uswag si Kim kag nabawtismuhan sang ulihi sang Abril 1998. Dugang pa, ang iya duha ka utod nga babayi kag ang iya tin-edyer nga anak nga lalaki nagsugod sa pagtuon sa Biblia upod sa mga Saksi ni Jehova.

“Abi ko anay wala na gid sing paglaum ang akon kabuhi,” siling ni Kim. “Apang, malipayon ako karon, kag wala na ako nagahibi kon gab-i. Ginpahiran na ni Jehova ang mga luha sa akon mga mata.”

[Nota]