Landasa ang mga Balagbag sa Imo Pag-uswag!

ANG imo salakyan engansado, kag nagaandar ang makina, apang indi ini makahalin. May diperensia bala sa makina? Wala, isa ka daku nga bato ang nagabangil sa isa ka ruweda. Ang pagkuha sini amo lamang ang kinahanglan agod maglakat ang salakyan.

Sa kaanggid nga paagi, ang iban nga nagatuon sing Biblia upod sa mga Saksi ni Jehova nagaatubang sing mga balagbag nga nagaupang sa ila espirituwal nga pag-uswag. Halimbawa, nagpaandam si Jesus nga ining mga butang subong sang “kabalaka sining sistema sang mga butang kag ang limbong nga gahom sang manggad” ‘makalumos sang pulong’ sang kamatuoran kag makaupang sang pag-uswag.​—⁠Mateo 13:22.

Para sa iban naman, ang kinaugali nga mga batasan ukon mga kaluyahon nagaupang sa ila pag-uswag. Naluyagan sang isa ka Hapones nga si Yutaka ang mensahe sang Biblia, apang may daku sia nga problema sa pagsugal. Pirme niya gintinguhaan nga madula ining malain nga batasan apang napaslawan sia. Bangod sang iya pagkasugarol, nadula niya ang daku nga kantidad sang kuwarta, tatlo ka balay, ang pagtahod sang iya pamilya, kag ang iya kaugalingon nga dignidad. Madula bala niya ini nga kasandaran kag mangin isa ka Cristiano?

Ukon binagbinaga ang isa ka babayi nga si Keiko. Sa bulig sang Biblia, nadula niya ang iya mga bisyo subong sang idolatriya, imoralidad, kag pagpamakot.  Apang, si Keiko nagbaton: “Ang pinakadaku nga balagbag sa akon amo ang pagpanigarilyo. Madamong beses ko na nga gintinguhaan nga mag-untat apang indi ko ini masarangan.”

Mahimo nga may yara ka man sang daw indi madula nga balagbag nga nagaupang sa imo pag-uswag. Ano man ini, magsalig nga sa bulig sang Dios, malandas mo ini.

Dumduma ang laygay ni Jesus sa iya mga disipulo sa tapos nga napaslawan sila sa pagtabog sang demonyo sa isa ka kuyapon nga tawo. Sang nahimo ni Jesus ang wala nila mahimo, ginsilingan niya ang iya mga disipulo: “Kon kamo may pagtuo nga subong kadaku sa lamigas sang mustasa, magasiling kamo sa sini nga bukid, ‘Saylo ka gikan diri pakadto didto,’ kag magasaylo ini, kag wala sing mangin imposible para sa inyo.” (Mateo 17:14-20; Marcos 9:17-29) Huo, ang isa ka problema nga daw tulad-bukid para sa aton tuman lang ka gamay para sa aton labing gamhanan nga Manunuga.​—⁠Genesis 18:14; Marcos 10:27.

Pagkilala sa mga Balagbag sa Pag-uswag

Antes mo malandas ang imo mga balagbag, dapat mo mahibaluan kon ano gid ini nga mga balagbag. Paano mo ini himuon? Kon kaisa ang isa ka katapo sang kongregasyon, subong sang gulang ukon ang indibiduwal nga nagatuon sang Biblia sa imo, mahimo magpatalupangod sang isa ka butang sa imo. Sa baylo nga maugot sa sining mahigugmaon nga laygay, dapat mo sing mapainubuson nga “pamatian ang disiplina kag magmaalam.” (Hulubaton 8:33) Sa iban nga tion, mahimo nga matalupangdan mo ang imo mga kaluyahon paagi sa imo pagtuon sa Biblia. Huo, “ang pulong sang Dios buhi kag gamhanan.” (Hebreo 4:12) Paagi sa pagbasa sang Biblia kag pasad sa Biblia nga mga publikasyon, mahibaluan mo ang imo labing nasulod nga mga panghunahuna, balatyagon, kag motibo. Nagabulig ini sa imo nga mausisa ang imo kaugalingon suno sa mataas nga mga talaksan ni Jehova. Ginapakita kag ginapatalupangod sini ang mga butang nga mahimo mag-upang sa imo espirituwal nga pag-uswag.​—⁠Santiago 1:23-25.

Halimbawa, ibutang ta nga ang isa ka estudyante sa Biblia may batasan nga magdalamguhanon sa imoral nga mga panghunahuna. Mahimo nga para sa iya daw indi man makahalalit ang paghimo sini, nagapangatarungan nga wala sia nagahimo sang bisan ano nga sala. Samtang nagatuon, nabasa niya ang pinamulong sang Santiago 1:​14, 15: “Ang kada isa ginatilawan kon ginabuyok kag ginahaylo sia sang iya kaugalingon nga kailigbon. Nian ang kailigbon, kon nakapanamkon na, nagapanganak sa sala; ang sala naman, kon maggulang na, nagapatubas sing kamatayon.” Karon nakita niya nga makatalagam gid sa iya pag-uswag ang magpadayon sa sini nga dalanon! Paano niya madula ini nga balagbag?​—⁠Marcos 7:21-23.

Paglandas sa mga Balagbag

Ayhan sa bulig sang isa ka hamtong nga Cristiano, mahimo magpanalawsaw pa ang estudyante sa Pulong sang Dios, nga nagagamit sang Watch Tower Publications Index.⁠ * Halimbawa, ginatudlo sang tig-ulo nga “Thoughts” ang bumalasa sa pila ka nabalhag nga mga artikulo nga nagabinagbinag sang paglandas sa makahalalit nga mga panghunahuna. Ginapadaku sini nga mga artikulo ang makabulig nga mga teksto sa Biblia, subong sang Filipos 4:​8, nga nagasiling: “Bisan ano man nga butang nga matuod, bisan ano man nga butang nga serioso nga hunahunaon, bisan ano man nga butang nga matarong, bisan ano man nga butang nga putli, bisan ano man nga butang nga hiligugmaon, bisan ano man nga butang nga ginahambal nga maayo, bisan ano man nga halangdon kag bisan ano man nga dalayawon, padayon nga binagbinaga ini nga mga butang.” Huo, ang imoral nga mga panghunahuna dapat buslan sang putli kag makapalig-on nga mga panghunahuna!

Sa tion sang iya pagpanalawsaw, walay duhaduha nga matukiban sang estudyante ang iban pa nga mga prinsipio sang Biblia nga magabulig sa iya nga malikawan nga dugangan ang iya problema. Halimbawa, ang Hulubaton 6:27 kag Mateo 5:28 nagapaandam batok sa pagpasulod sa hunahuna sing nagapukaw sa sekso nga materyal. “Ilikaw ang akon mga mata sa pagtan-aw sa wala sing pulos,” pangamuyo sang salmista. (Salmo 119:37) Siempre, indi bastante ang pagbasa lamang sini nga mga teksto sa Biblia. “Ang tagipusuon sang matarong nagapamalandong,” siling sang maalam nga tawo. (Hulubaton 15:28) Paagi sa pagpamalandong indi lamang sa kon ano ang ginasugo sang Dios kundi kon ngaa ginasugo man niya ini, matigayon sang estudyante ang mas madalom nga paghangop sa kaalam kag pagkamakatarunganon sang mga dalanon ni Jehova.

 Sa katapusan, ang isa nga nagatinguha sa paglandas sini nga balagbag sa iya pag-uswag dapat hilway nga magpangayo sing bulig kay Jehova. Kay man, nahibaluan gid sang Dios ang aton kahimtangan, nga indi kita himpit kag ginhimo gikan sa yab-ok. (Salmo 103:14) Ang padayon nga pagpangayo sing bulig sa Dios paagi sa pangamuyo, upod ang pagpanikasog nga likawan ang pagpatuyang sa imoral nga mga panghunahuna, magadul-ong sa ulihi sa isa ka maayo gid nga resulta​—⁠isa ka matinlo kag wala ginatublag nga konsiensia.​—⁠Hebreo 9:14.

Indi Magpangampo

Ano man nga kabudlayan ang ginapakigbatuan mo, dumduma nga mahimo ka mapaslawan kon kaisa. Kon matabo ina, natural lang nga magbatyag sing kalugaw-an. Apang, dumduma ang pinamulong sa Galacia 6:9: “Dili kita mag-untat sa paghimo sing maayo, kay sa nagakaigo nga dag-on magaani kita kon indi kita paglapyuon.” Ang matutom nga mga alagad sang Dios kaangay ni David kag ni Pedro nakaeksperiensia sing makahuluya nga mga kapaslawan. Apang wala sila magpangampo. Mapainubuson nila nga ginbaton ang laygay, nagbag-o, kag padayon nga nangin talalupangdon nga mga alagad sang Dios. (Hulubaton 24:16) Walay sapayan sang mga sayop ni David, gintawag sia ni Jehova nga “tawo nga kalahamut-an sa akon tagipusuon, nga magahimo sang tanan nga butang nga luyag ko.” (Binuhatan 13:22) Nakapasag-uli man si Pedro gikan sa iya mga sayop kag nangin haligi sa Cristianong kongregasyon.

Madamo sa karon ang nagmadinalag-on man sa paglandas sang mga balagbag. Si Yutaka, nga ginsambit kaina, nagbaton sang isa ka pagtuon sa Biblia. Sia nagsiling: “Ang pagsakdag kag pagpakamaayo ni Jehova sa tagsa ka pag-uswag nga mahimo ko nagbulig sa akon nga malandas ang akon problema sa pagsugal. Daku gid ang akon kalipay nga maeksperiensiahan ang kamatuoran sang pinamulong ni Jesus​—⁠nga paagi sa pagtuo, bisan ang mga ‘bukid’ sarang mahalin.” Sang ulihi, si Yutaka nangin isa ka ministeryal nga alagad sa kongregasyon.

Kamusta naman si Keiko, nga nagiyan sa tabako? Ang utod nga babayi nga nagtuon upod sa iya nagpanugda nga basahon niya ang nagkalainlain nga artikulo sa Magmata! tuhoy sa pagkagiyan sa tabako. Ginbutang pa gani ni Keiko ang pinamulong sang 2 Corinto 7:1 sa iya salakyan subong pahanumdom kada adlaw nga magpabilin nga matinlo sa panulok ni Jehova. Apang, indi niya gihapon ini mauntat. “Naugot gid ako sa akon kaugalingon,” hinumdom ni Keiko. “Gani ginpamangkot ko ang akon kaugalingon kon ano gid ang luyag ko​—⁠si Jehova bala ang luyag ko alagdon ukon si Satanas?” Sang nakapamat-od na sia nga si Jehova ang luyag niya alagaron, nagpangayo sia sing bulig paagi sa hanuot nga pagpangamuyo. “Sa akon kakibot,” hinumdom niya, “nauntat ko ang pagpanigarilyo nga wala mabudlayi sing tuman. Naghinulsol gid ako nga wala ako maghikot sing mas temprano.”

Magamadinalag-on ka man sa paglandas sa mga balagbag sa imo pag-uswag. Kon labi mo nga ipahisuno ang imo mga panghunahuna, handum, pulong, kag buhat sa mga talaksan sang Biblia, labi mo nga matigayon ang pagtahod sa kaugalingon kag pagsalig. Ang imo espirituwal nga mga kauturan, subong man mga katapo sang pamilya, mapapagsik kag mapalig-on kon makig-upod sila sa imo. Labing importante sa tanan, labi pa nga magasuod ang imo kaangtanan kay Jehova nga Dios. Nagsaad sia nga ‘kuhaon niya ang bisan ano nga balagbag sa dalan sang iya katawhan’ kon nagapalagyo sa pagkontrol ni Satanas. (Isaias 57:14) Kag makasalig ka nga kon panikasugan mo nga makuha kag malandas ang mga balagbag sa imo espirituwal nga pag-uswag, pakamaayuhon gid ikaw ni Jehova.

[Nota]

[Retrato sa pahina 28]

Si Jesus nagsaad nga paagi sa pagtuo, sarang malandas ang tulad bukid nga mga balagbag

[Retrato sa pahina 30]

Ang pagbasa sing Biblia makapabakod sang aton panikasog nga malandas ang espirituwal nga mga kaluyahon