Mas Nagadugay Sangsa Puro nga Bulawan

ANG bulawan ginahimud-usan gid nga matigayon bangod matahom kag nagadugay ini. Daku ang katahom sini bangod padayon ini nga nagainggat kag daw wala gid nagalus-aw. Ini bangod ang bulawan indi mapierde sang tubig, oksiheno, asupre, kag halos sang tanan iban pa nga elemento. Madamo nga butang nga human sa bulawan nga natukiban sa naglugdang nga mga sakayan kag sa iban pa nga mga duog ang nagainggat gihapon pagligad sang ginatos ka tuig.

Apang, makawiwili nga ginasiling sang Biblia nga may isa ka butang nga mas nagadugay kag “daku pa ang balor sangsa bulawan nga nagakawala walay sapayan nga gintilawan ini sa kalayo.” (1 Pedro 1:⁠7) Ang bulawan nga “gintilawan,” ukon ginputli, sa kalayo kag iban pa nga mga proseso makalab-ot sa 99.9 porsiento nga pagkapuro. Apang, bisan ang ginputli nga bulawan nagakawala, ukon nagakatunaw, kon ibutang sa aqua regia (royal water), tinimpla nga tatlo ka bahin nga hydrochloric acid kag isa ka bahin nga nitric acid. Sa amo, husto sa siensia ang Biblia sa pagsiling nga ang ‘bulawan nagakawala.’

Sa pagpatuhay, ang matuod nga Cristianong pagtuo ‘nagatipig nga buhi sa kalag.’ (Hebreo 10:39) Mahimo mapatay sang mga tawo ang isa nga may mabakod nga pagtuo, subong sang ginhimo nila kay Jesucristo. Apang ang mga nagapanag-iya sang matuod nga pagtuo ginasaaran: “Magpakatutom ka tubtob sa kamatayon, kag hatagan ko ikaw sang korona sang kabuhi.” (Bugna 2:10) Dumdumon sang Dios ang mga napatay nga may pagtuo, kag banhawon niya sila. (Juan 5:​28, 29) Wala sing bulawan, ano man ini kadamo, ang makahimo sina. Bangod sini, mas bilidhon gid ang pagtuo sangsa bulawan. Apang, agod may amo sina nga nagalabaw nga balor ang pagtuo, dapat ini pamatud-an, ukon tilawan. Sa pagkamatuod, ‘ang natilawan nga kinaiya sang pagtuo’ ang ginsiling ni Pedro nga daku pa sing balor sa bulawan. Nalipay ang mga Saksi ni Jehova nga buligan ka sa pagtuon sang Biblia agod mapalambo kag mahuptan mo ang mabakod nga pagtuo sa matuod nga Dios, si Jehova, kag sa iya Anak, si Jesucristo. Ini, suno kay Jesus, “nagakahulugan sing kabuhi nga walay katapusan.”​—⁠Juan 17:3.