Mga Pamangkot Gikan sa mga Bumalasa

Diin si Daniel sang gintilawan ang tatlo ka Hebreo sa atubangan sang daku kaayo nga larawan nga ginpatindog ni Nabocodonosor sa kapatagan sang Dura?

Wala ginasugid sang Biblia, gani wala sing tawo karon ang makasugid kon diin si Daniel sa tion sadto nga pagtilaw.

Ang iban nagpanugda nga bangod sang posisyon ni Daniel ukon bangod ginhatagan sia ni Nabocodonosor sing pinasahi nga mga pribilehiyo nga mataas pa kanday Sadrac, Mesac, kag Abednego, indi obligado si Daniel sa pagkadto sa kapatagan sang Dura. Ginapakita sang Daniel 2:49 nga sa pila ka tion mas mataas ang iya posisyon sangsa tatlo niya ka kaupdanan. Apang indi naton mapamatud-an nga naghilway ini sa iya nga magbuylog sa iban sa atubangan sang larawan.

Sa pagtinguha nga ipaathag kon ngaa wala didto si Daniel, ang iban nagsiling nga mahimo ginpadala sia sa isa ka opisyal nga hilikuton ukon nagamasakit sia amo nga wala sia makatambong. Apang, wala nagasiling sing amo sina ang Biblia. Ano man ang kahimtangan, indi gid mahimo mulayon ang ginhimo ni Daniel, kay kon mahimo ini mulayon, walay duhaduha nga gingamit ini sang mahisaon nga mga opisyal sang Babilonia sa pagsumbong batok sa iya. (Daniel 3:⁠8) Antes kag sa tapos sini nga hitabo, ginpamatud-an ni Daniel ang iya kaugalingon nga isa ka manughupot sing integridad, mainunungon sa Dios bisan ano man nga pagtilaw ang atubangon niya. (Daniel 1:⁠8; 5:​17; 6:​4, 10, 11) Gani bisan wala ginasugid sang Biblia kon ngaa wala si Daniel sa kapatagan sang Dura, makasalig kita nga matutom gid sia kay Jehova nga Dios.​—⁠Ezequiel 14:14; Hebreo 11:33.