Indi Mag-untat sa Paghimo sing Maayo

“Indi kita mag-untat sa paghimo sing maayo, kay sa nagakaigo nga dag-on magaani kita kon indi kita paglapyuon.”​—⁠GALACIA 6:9.

1, 2. (a) Ngaa kinahanglan ang pagbatas agod maalagad ang Dios? (b) Paano ginpakita ni Abraham ang pagbatas, kag ano ang nakabulig sa iya sa paghimo sini?

SUBONG mga Saksi ni Jehova, nalipay kita sa paghimo sang kabubut-on sang Dios. Narepreskuhan man kita sa pagtakod sang “gota” sang pagkadisipulo. (Mateo 11:29) Apang, ang pag-alagad kay Jehova upod kay Cristo indi pirme mahapos. Gin-athag ini ni apostol Pablo sang ginlaygayan niya ang mga masigka-Cristiano: “Nagakinahanglan kamo sing pagbatas, agod nga, pagkatapos ninyo mahimo ang kabubut-on sang Dios, mabaton ninyo ang katumanan sang saad.” (Hebreo 10:36) Kinahanglan ang pagbatas bangod ang pag-alagad sa Dios makahalangkat.

² Ang kabuhi ni Abraham isa gid ka pamatuod sa sini nga kamatuoran. Madamong beses nga nag-atubang sia sing mabudlay nga mga desisyon kag makapahuol nga mga kahimtangan. Ang sugo nga biyaan ang masulhay nga pangabuhi sa Ur pamuno lamang. Wala magdugay nag-atubang sia sang tiggulutom, pagpamatok sang iya mga kaingod, diutayan nga pagkadula sang iya asawa, kaakig sang pila ka himata, kag kapintas sang inaway. Daku pa nga mga pagtilaw ang magaabot. Apang si Abraham wala gid mag-untat sa paghimo sing maayo. Talalupangdon ini kon binagbinagon mo nga wala sia sing kompleto nga Pulong sang Dios, kaangay naton karon. Walay sapayan sina, pat-od gid nga nahibaluan niya ang unang tagna, nga sa sini ang Dios nagsiling: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi.” (Genesis 3:15) Bangod magakari ang Binhi paagi sa iya, natural lamang nga si Abraham amo ang sentro sang kaakig ni Satanas. Pat-od gid nga, bangod nahangpan ni Abraham ini nga katunayan, nabatas niya sing malipayon ang mga pagtilaw sa iya.

3. (a) Ngaa dapat magpaabot ang katawhan ni Jehova karon sing mga kapipit-an? (b) Ano nga pagpalig-on ang ginahatag sa aton sang Galacia 6:9?

³ Ang katawhan ni Jehova karon dapat man magpaabot sing mga kapipit-an. (1 Pedro 1:​6, 7) Ti, ang Bugna 12:17 nagapaandam sa aton nga si Satanas ‘nagapakig-away’ sa mga hinaplas nga nagkalabilin. Bangod sang ila suod nga pagpakig-upod sa mga hinaplas, ang “iban nga mga karnero” sentro man sang kasingkal ni Satanas. (Juan 10:16) Wala labot sa pagpamatok nga mahimo atubangon sang mga Cristiano sa ila dayag nga pagministeryo, mahimo man sila makaeksperiensia sing mabudlay nga mga pag-ipit sa ila personal nga mga kabuhi. Si Pablo naglaygay sa aton: “Indi kita mag-untat sa paghimo sing maayo, kay sa nagakaigo nga dag-on magaani kita kon indi kita paglapyuon.” (Galacia 6:9) Huo, bisan pa tuyo ni Satanas nga gub-on ang aton pagtuo, dapat kita magtindog batok sa iya, nga malig-on sa pagtuo. (1 Pedro 5:​8, 9) Ano ang mahimo nga resulta bangod sang aton matutom nga dalanon? Ang Santiago 1:​2, 3 nagapaathag: “Kabiga ninyo nga bug-os nga kalipay, mga kauturan ko, kon makasugata kamo sing nanuhaytuhay nga mga pagtilaw, kay nakahibalo kamo nga ining natilawan nga kinaiya sang inyo pagtuo nagahikot sing pagbatas.”

Direkta nga Pagsalakay

4. Paano gingamit ni Satanas ang direkta nga mga pagsalakay sa pagtinguha nga gub-on ang integridad sang katawhan sang Dios?

⁴ Ang kabuhi ni Abraham nagailustrar gid sang “nanuhaytuhay nga mga pagtilaw” nga mahimo atubangon karon sang isa ka Cristiano. Halimbawa, dapat niya atubangon ang mga nagsalakay gikan sa Sinar. (Genesis 14:11-16) Indi makapakibot nga si Satanas padayon nga nagagamit sang direkta nga mga pagsalakay sa dagway sang paghingabot. Sugod sang matapos ang Bug-os Kalibutan  nga Inaway II, madamo nga kadutaan ang nagpatuman sang pagdumili sang gobierno sa Cristianong hilikuton sa pagtudlo sang mga Saksi ni Jehova. Ang 2001 Yearbook of Jehovah’s Winesses nagasugid sang kasingki nga ginbatas sang mga Cristiano sa Angola sa mga kamot sang mga kaaway. Nagasalig kay Jehova, ang aton mga kauturan sa sini nga kadutaan malig-on nga nangindi sa pag-untat! Naghulag sila, indi paagi sa paggamit sing kasingki ukon pagrebelde, kundi paagi sa mainandamon nga pagpadayon sa pagbantala nga hilikuton.​—⁠Mateo 24:14.

5. Paano mahimo mangin biktima sang paghingabot sa eskwelahan ang Cristianong mga pamatan-on?

⁵ Apang, ang paghingabot indi kinahanglan nga nagadalahig sing kasingki. Si Abraham ginpakamaayo sang ulihi nga makatigayon sing duha ka anak nga lalaki​—⁠sanday Ismael kag Isaac. Ang Genesis 21:8-12 nagasugid sa aton nga sang isa ka bes ‘ginsunlog’ ni Ismael si Isaac. Sa iya sulat sa mga taga-Galacia, ginpakita ni Pablo nga indi lamang ini binatabata nga hampang, kay ginlaragway niya si Ismael nga naghingabot kay Isaac! (Galacia 4:29) Sa amo ang yaguta gikan sa mga kabutho kag ang masakit nga mga hambal sang mga nagapamatok mahimo matawag nga paghingabot. Ginhinumdom sang isa ka Cristianong pamatan-on nga si Ryan ang kasakit nga gin-antos niya gikan sa iya mga kabutho: “Ang 15-minutos nga pagsakay sa bus pakadto kag pauli halin sa eskwelahan daw kaangay sang mga inoras samtang ginabuyayaw ako. Ginapaso nila ako sang paper clip nga gin-init nila sa lighter sang sigarilyo.” Ang rason sining mapintas nga pagtratar? “Ang akon teokratikong paghanas naghimo sa akon nga tuhay gikan sa iban pa nga mga pamatan-on sa eskwelahan.” Apang, paagi sa suporta sang iya mga ginikanan, si Ryan nakabatas sing matutom. Mga pamatan-on, nagluya bala ang inyo buot bangod sang mga pagyaoyao sang inyo mga katubotubo? Ti, indi mag-untat! Paagi sa pagbatas sing matutom, maeksperiensiahan ninyo ang katumanan sang mga pulong ni Jesus: “Malipayon kamo kon ang mga tawo magpasipala sa inyo kag maghingabot sa inyo kag binutig nga maghambal sing tanan nga sahi sang malaut nga butang batok sa inyo tungod sa akon.”​—⁠Mateo 5:11.

Adlaw-adlaw nga mga Kabalaka

6. Ano nga mga butang ang makahalit sa mga kaangtanan sang mga masigka-Cristiano karon?

⁶ Ang kalabanan nga mga pagtilaw nga ginaatubang naton karon may yara kaangtanan sa kinaandan nga mga kabalaka adlaw-adlaw. Dapat lubaron ni Abraham ang tension sa tunga sang iya mga manugbantay sang kasapatan kag sang iya hinablos  nga si Lot. (Genesis 13:5-7) Sa kaanggid man nga paagi karon, ang mga kinatuhayan sa personalidad kag magagmay nga mga kahisa mahimo magguba sang mga kaangtanan kag maghalit pa gani sa kalinong sang kongregasyon. “Kon diin may kahisa kag kaawayon, may kagamo kag tagsa ka malaut nga butang.” (Santiago 3:16) Daw ano ka importante para sa aton nga indi mag-untat kag indi magtugot nga tublagon sang bugal ang kalinong, subong sang ginhimo anay ni Abraham, kag pangitaon ang mga intereses sang iban!​—⁠1 Corinto 13:⁠5; Santiago 3:17.

7. (a) Ano ang dapat himuon sang isa kon nasaklaw sia sang isa ka masigka-Cristiano? (b) Paano si Abraham nagpahamtang sing maayo nga halimbawa sa paghupot sing maayo nga kaangtanan sa iban?

⁷ Mabudlay makighidait kon nagabatyag kita nga ginpakig-angutan sing di-makatarunganon sang isa ka masigkatumuluo. Ang Hulubaton 12:18 nagasiling: “May isa nga nagapamulong sing di-mapatugsilingon kaangay sang mga pagbuno sang espada.” Ang di-mapatugsilingon nga mga pulong, bisan pa ginpamulong sing inosente, makatuga sing daku nga kasakit. Labi pa ini kasakit kon magbatyag kita nga ginpasipalahan kita ukon ginkutsokutso sing masakit. (Salmo 6:​6, 7) Apang indi magatugot ang isa ka Cristiano nga mag-untat sia bangod sang nasaklaw nga mga balatyagon! Kon yara ikaw sa sini nga kahimtangan, maghimo sing tikang nga tadlungon ini paagi sa pagpakighambal sing mainayuhon sa nagsaklaw. (Mateo 5:​23, 24; Efeso 4:26) Patawara ina nga tawo. (Colosas 3:13) Paagi sa indi paghupot sing kaakig, ginapaayo naton ang aton emosyon kag ang aton kaangtanan sa aton utod. Si Abraham wala maghupot sing bisan ano man nga kaakig nga mahimo ginbatyag niya kay Lot. Ti, si Abraham nagdalidali sa pagpangapin kay Lot kag sa iya pamilya!​—⁠Genesis 14:12-16.

Mga Pagtilaw nga Kita Mismo ang Naghimo

8. (a) Paano ang mga Cristiano mahimo ‘nagbuno sang ila kaugalingon sing madamong kasakitan’? (b) Ngaa si Abraham nakatigayon sing timbang nga pagtamod sa materyal nga mga butang?

⁸ Matuod nga ang iban nga mga pagtilaw kita mismo ang naghimo. Halimbawa, ginsugo ni Jesus ang iya mga sumulunod: “Mag-untat kamo sa pagtipon para sa inyo kaugalingon sing mga bahandi sa duta, diin ginaut-ot sang sapatsapat kag sang tuktok, kag diin ginakuha kag ginakawat sang mga kawatan.” (Mateo 6:19) Apang, ang iban nga mga kauturan “nagbuno sang ila mga kaugalingon sing madamong kasakitan” paagi sa pag-una sang materyal nga mga intereses sangsa mga intereses sang Ginharian. (1 Timoteo 6:​9, 10) Si Abraham handa sa pagsakripisyo sang materyal nga mga kasulhayan agod mapahamuot ang Dios. “Bangod sa pagtuo nagpuyo sia subong isa ka dumuluong sa duta sang saad subong sang sa iban nga duta, kag nagpuyo sa mga layanglayang upod kay Isaac kag kay Jacob, ang mga masigkamanunubli niya sang amo gid nga saad. Kay ginahulat niya ang siudad nga may matuod nga mga sadsaran, ang manunukod kag manugbuhat sini nga siudad amo ang Dios.” (Hebreo 11:​9, 10) Ang pagtuo ni Abraham sa palaabuton nga “siudad,” ukon panguluhan sang Dios, nagbulig sa iya nga indi magsalig sa mga manggad. Indi bala maalamon nga himuon man ini?

9, 10. (a) Paano ang paghandum nga makilala makatuga sing pagtilaw? (b) Paano karon makagawi ang isa ka utod nga lalaki subong “kubos”?

⁹ Binagbinaga ang isa pa ka bahin. Ang Biblia naghatag sining matigdas nga panuytoy: “Kon ang bisan sin-o maghunahuna kon daw sin-o sia samtang indi naman sia si sin-o, ginadaya niya ang iya kaugalingon nga hunahuna.” (Galacia 6:3) Dugang pa, ginalaygayan kita nga ‘indi maghimo sing bisan ano bangod sang pagbinaisay ukon bangod sang pagkamaiyaiyahon, kundi nga may mapainubuson nga hunahuna.’ (Filipos 2:3) Ginatilawan sang iban ang ila kaugalingon bangod sang indi pagsunod sini nga laygay. Bangod sang handum nga makilala sa baylo sang handum nga maghimo sing “maayong hilikuton,” nagaluya ang ila buot kag nagareklamo sila kon indi sila makabaton sing mga pribilehiyo sa kongregasyon.​—⁠1 Timoteo 3:1.

¹⁰ Si Abraham nagpahamtang sing maayo nga halimbawa sa ‘indi paghunahuna sing labaw pa sa kaugalingon sangsa kinahanglanon.’ (Roma 12:3) Sang nasumalang niya si Melquisedec, si Abraham wala maghulag nga daw superyor sia bangod sang iya kalahamut-an nga tindog upod sa Dios. Sa kabaliskaran, ginkilala niya ang mataas pa nga tindog ni Melquisedec subong saserdote paagi sa pagbayad sa iya sing ikapulo. (Hebreo 7:4-7) Ang mga Cristiano karon dapat man mangin handa sa paggawi subong ‘mga kubos’ kag indi magtinguha nga makilala. (Lucas 9:48) Kon ang mga nagapanguna sa kongregasyon daw nagadingot sang  pila ka pribilehiyo sa imo, usisaa sing bunayag ang imo kaugalingon agod hibaluon kon ano nga mga pag-uswag ang himuon mo sa imo personalidad ukon sa imo paghimo sang mga butang. Sa baylo nga mahanusbo bangod sa mga pribilehiyo nga wala mo matigayon, himusli sing bug-os ang pribilehiyo nga yara sa imo​—⁠ang pribilehiyo nga buligan ang iban nga makilala si Jehova. Huo, “magpaubos kamo . . . sa idalom sang gamhanan nga kamot sang Dios, agod nga bayawon niya kamo sa nagakaigo nga tion.”​—⁠1 Pedro 5:6.

Pagtuo sa mga Butang nga Di-makita

11, 12. (a) Ngaa nadula sang iban sa kongregasyon ang ila pagbatyag sing pagkahilingagawon? (b) Paano si Abraham nagpahamtang sing maayo nga halimbawa sa paghugod sang iya kabuhi sa pagtuo sa mga saad sang Dios?

¹¹ Ang isa pa ka pagtilaw mahimo may kaangtanan sa daw pagpalantang sang katapusan sining malauton nga sistema sang mga butang. Suno sa 2 Pedro 3:​12, ang mga Cristiano “nagahulat kag ginahuptan sing suod sa hunahuna ang presensia sang adlaw ni Jehova.” Apang, madamo ang naghulat sini nga “adlaw” sing tinuig na, ang iban sing mga dekada. Bangod sini, ang iban mahimo nga maluyahan sing buot kag madula ang ila pagbatyag sing pagkahilingagawon.

¹² Sa liwat, binagbinaga ang halimbawa ni Abraham. Ginhugod niya ang iya bug-os nga kabuhi sa pagtuo sa mga saad sang Dios, bisan pa nga wala sing higayon nga matuman ini tanan samtang buhi pa sia. Matuod, nakita pa niya ang pagdaku sang iya anak nga si Isaac. Apang mga siglo pa ang magaligad antes ang mga kaanakan ni Abraham mapaanggid sa “kabituunan sang mga langit” ukon sa “balas nga yara sa baybayon.” (Genesis 22:17) Apang, wala mahanusbo ukon maluyahan si Abraham. Sa amo si apostol Pablo nagsiling tuhoy kay Abraham kag sa iban nga mga patriarka: “Ini sila tanan napatay sa pagtuo, bisan pa wala nila matigayon ang katumanan sang mga saad, apang nakita nila ini gikan sa malayo kag gin-abiabi ini kag dayag nga nagpahayag nga sila mga dumuluong kag umalagi nga mga pumuluyo sa duta.”​—⁠Hebreo 11:13.

13. (a) Paano ang mga Cristiano karon kaangay sang “umalagi nga mga pumuluyo”? (b) Ngaa tapuson ni Jehova ining sistema sang mga butang?

¹³ Kon nahuptan ni Abraham ang iya kabuhi nga nahugod sa mga saad nga ang katumanan sini “malayo” pa, daw ano pa kita karon, nga ang katumanan sini nga mga butang malapit na! Kaangay ni Abraham, dapat naton tamdon ang aton kaugalingon subong “umalagi nga mga pumuluyo” sa sistema ni Satanas, nga wala nagakabuhi sing mapatuyangon. Natural lamang nga pakamaayuhon naton nga ining “katapusan sang tanan nga butang” yara na, indi lang nga malapit na. (1 Pedro 4:7) Ayhan nagaantos kita sing malubha nga problema sa panglawas. Ukon mahimo ginabug-atan kita sang kapurauton sa pangabuhi. Apang, dapat naton dumdumon nga tapuson ini ni Jehova indi lamang agod luwason kita gikan sa malubha nga mga kahimtangan kundi agod pakabalaanon man ang iya ngalan. (Ezequiel 36:23; Mateo 6:​9, 10) Magaabot ang katapusan, indi sa tion nga kombeniente para sa aton, kundi sa tion nga nagakaigo gid sa mga katuyuan ni Jehova.

14. Paano ang pagpailob sang Dios nagabenepisyo sa mga Cristiano karon?

¹⁴ Dumduma, man, nga “si Jehova indi mahinay may kaangtanan sa iya saad, subong sang ginakabig sang iban nga kahinayon, kundi mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.” (2 Pedro 3:9) Talupangda, ang Dios ‘mapailubon sa inyo’​—⁠nga mga katapo sang Cristianong kongregasyon. Mahimo nga ang pila sa aton nagakinahanglan sing dugang pa nga tion sa paghimo sing mga pagbag-o agod “nga sa katapusan masapwan niya [kita] nga walay dagta kag walay kasawayan kag sa paghidait.” (2 Pedro 3:14) Wala bala, nian, kita  nagapasalamat nga nagpakita ang Dios sing amo sini nga pagpailob?

Kon Paano Kita Makasapo Sing Kalipay Walay Sapayan Sang mga Balagbag

15. Paano nahuptan ni Jesus ang iya kalipay sa atubangan sang mga pagtilaw, kag paano nagabenepisyo ang mga Cristiano karon sa pag-ilog sa iya?

¹⁵ Ang kabuhi ni Abraham nagatudlo sing madamong leksion sa mga Cristiano karon. Wala lamang sia magpakita sing pagtuo kundi sing pailob, kaalam, kaisog, kag di-mahamkunon nga gugma. Gin-una niya sa iya kabuhi ang pagsimba kay Jehova. Apang, dumduma nga ang superlatibo nga halimbawa nga dapat naton sundon ginpahamtang ni Jesucristo. Nag-atubang man sia sing madamong pagtilaw, apang walay sapayan sini tanan, wala gid niya madula ang iya kalipay. Ngaa? Bangod ginhuptan niya ang iya hunahuna nga nahugod sa paglaum sa unahan. (Hebreo 12:​2, 3) Sa amo si Pablo nagpangamuyo: “Karon kabay nga itugot sang Dios nga nagahatag sing pagbatas kag paglipay nga magluntad sa tunga ninyo ang amo man nga panimuot sang hunahuna nga yara kay Cristo Jesus.” (Roma 15:5) Upod ang husto nga panimuot sa hunahuna, makasapo kita sing kalipay walay sapayan sang mga balagbag nga mahimo ibutang ni Satanas sa atubangan naton.

16. Ano ang himuon naton kon ang mga problema daw mabug-at gid?

¹⁶ Kon ang mga problema daw mabug-at gid, dumduma nga subong nga ginhigugma niya si Abraham, si Jehova man nagahigugma sa imo. Luyag niya nga magmadinalag-on ka. (Filipos 1:6) Magsalig sing bug-os kay Jehova, may kompiansa nga “indi sia magtugot nga sulayon [ka] labaw sa [imo] masarangan, kundi kaupod sang pagsulay magahatag man sia sing lulutsan agod nga mabatas [mo] ini.” (1 Corinto 10:13) Palambua ang batasan sa pagbasa sang Pulong sang Dios adlaw-adlaw. (Salmo 1:2) Magpadayon sa pagpangamuyo, nagapangabay kay Jehova nga buligan ka nga makabatas. (Filipos 4:6) ‘Ihatag niya ang balaan nga espiritu sa mga nagapangayo sa iya.’ (Lucas 11:13) Himusli ang mga aman ni Jehova sa pagsakdag sa imo sa espirituwal nga paagi, subong sang aton pasad-sa-Biblia nga mga publikasyon. Subong man, tinguhai nga matigayon ang suporta sang paghiliutod. (1 Pedro 2:17) Magtambong sing tayuyon sa Cristianong mga miting, kay didto mabaton mo ang pagpalig-on nga ginakinahanglan mo agod makabatas. (Hebreo 10:​24, 25) Magkasadya sa pagtuo nga ang imo pagbatas nagadul-ong sa kalahamut-an nga kahimtangan sa mga mata sang Dios kag nga ang imo katutom magapahalipay sang iya tagipusuon!​—⁠Hulubaton 27:11; Roma 5:3-5.

17. Ngaa indi dapat mahanusbo ang mga Cristiano?

¹⁷ Si Abraham ginhigugma sang Dios subong “abyan” niya. (Santiago 2:23) Walay sapayan sini, ang kabuhi ni Abraham may madamong mahuol nga pagtilaw kag kapipit-an. Busa mapaabot man ini sang mga Cristiano sa sining malaut nga “katapusan nga mga adlaw.” Sa katunayan, ang Biblia nagapaandam sa aton nga “ang malaut nga mga tawo kag mga impostor magalain kag magalain pa.” (2 Timoteo 3:​1, 13) Sa baylo nga mahanusbo, hibalua nga ang mga pag-ipit nga ginaatubang naton nagahatag sing pamatuod nga ang katapusan sang malauton nga sistema ni Satanas malapit na. Apang si Jesus nagapahanumdom sa aton nga “sia nga nakabatas tubtob sa katapusan amo sia ang maluwas.” (Mateo 24:13) Gani, ‘indi mag-untat sa paghimo sing maayo!’ Iluga si Abraham, kag malakip sa mga tawo nga “paagi sa pagtuo kag pagpailob nagpanubli sang mga saad.”​—⁠Hebreo 6:12.

Natandaan Mo Bala?

• Ngaa dapat magpaabot ang katawhan ni Jehova karon sing mga pagtilaw kag kapipit-an?

• Sa anong mga paagi si Satanas mahimo maggamit sing direkta nga mga pagsalakay?

• Paano malubad ang personal nga mga binangig sa tunga sang mga Cristiano?

• Paano makatuga sing mga pagtilaw ang bugal kag pagkamaiyaiyahon?

• Sa anong paagi si Abraham nagpahamtang sing maayong halimbawa sa paghulat sa katumanan sang mga saad sang Dios?

[Mga Pamangkot sa Pagtinuon]

[Retrato sa pahina 26]

Madamo nga Cristianong pamatan-on ang nagaantos sing paghingabot, nga ginayaguta sang mga katubotubo

[Retrato sa pahina 29]

Sang adlaw ni Abraham ang katumanan sang mga saad sang Dios “malayo” pa, apang ginhugod niya ang iya kabuhi sa sini