Kadalag-an sa Federal Constitutional Court

ANG mga Saksi ni Jehova sa Alemanya nakatigayon sing tumalagsahon nga kadalag-an sa Federal Constitutional Court sa Karlsruhe. Sa amo ginhimo nila ang isa ka importante nga tikang may kaangtanan sa pagkilala sa ila.

Madugay na nga nagabantala ang mga Saksi ni Jehova sa Alemanya sa kapin sa 100 ka tuig. Nalampuwasan nila ang mapintas gid nga paghingabot sang duha ka diktatoryal nga panguluhan sang ika-20 nga siglo​—⁠ang National Socialist kag ang Komunista. Kutob sang 1990, gintinguhaan sang mga Saksi nga matigayon ang legal nga pagkilala sa ila subong isa ka korporasyon suno sa kasuguan para sa publiko (public law). Pagkatapos sang duha ka paborable nga desisyon sang korte kag sang isa nga nagbaliskad sini, nag-apelar ang mga Saksi sa Federal Constitutional Court, nga nagpahibalo sang opisyal nga desisyon sini sang Disiembre 19, 2000.

Gin-ugyunan Sang Tanan nga Desisyon Para sa mga Saksi ni Jehova

Ang tanan pito ka huwes sang korte nagdesisyon pabor sa mga Saksi. Ginbaliskad sang mga huwes ang desisyon sang Federal Administrative Court sang 1997 kag ginhatagan sing instruksion ini nga korte nga binagbinagon liwat ang aplikasyon sang mga Saksi.

Gingamit sang Federal Constitutional Court ini nga okasyon agod komentuhan ang sadsaran nga kaangtanan sang Estado kag mga relihion. Una gid, ang estado sang isa ka relihion “ginapat-od, indi sang mga pagtuluuhan sini, kundi sang paggawi sini.”

Nagsiling man ang korte nga kon ginatuman sang mga Saksi ang “Cristianong neutralidad,” “wala [nila] ginakontra ang prinsipio sang demokrasya” kag “indi [nila] luyag buslan ang demokrasya sang iban pa nga sahi sang gobierno.” Gani, ang indi pagpakigbahin sa mga piniliay sa politika indi dapat batunon subong ebidensia batok sa mga Saksi sa ila pagpangabay sing legal nga pagkilala.​—⁠Juan 18:36; Roma 13:1.

Nagsiling pa ang korte nga ang isa ka tumuluo​—⁠Saksi man ukon iban nga relihion​—⁠mahimo kon kaisa mabutang sa sitwasyon diin magkatuhay ang ginasugo sang Estado kag ang ginapatuman sang iya relihion. Kon sundon sang indibiduwal ang iya konsiensia paagi “sa pagtuman sa relihioso nga pagtuluuhan sa baylo sang kasuguan,” mahimo ini tamdon sang Estado nga makatarunganon kag nalakip sa relihioso nga kahilwayan.​—⁠Binuhatan 5:29.

Ang desisyon sang korte ginbalita sa mga pamantalaan. Ginbalita halos sang tanan nga pamantalaan sa Alemanya ini nga kaso. Ginwaragwag sang tanan nga panguna nga estasyon sa telebisyon kag radyo ang mga report ukon ang mga interbyu. Karon pa lang nahatagan sing amo sini nga publisidad ang ngalan ni Jehova sa Alemanya.

[Picture Credit Line sa pahina 8]

AP Photo/Daniel Maurer