Ang Yawa Indi Disparatis

“Sa bug-os nga Bag-ong Testamento may daku nga pagsumpunganay, sa isa ka bahin, ang puwersa sang Dios kag sang maayo, kag sa pihak nga bahin, ang puwersa sang malaut nga ginapangunahan ni Satanas. Indi ini ideya sang isa ukon duha ka manunulat, kundi isa ka sadsaran nga ideya. . . . Ang pamatuod sang Bag-ong Testamento maathag. Si Satanas isa ka makahalalit nga realidad, pirme nagapakigsumpong sa Dios kag sa katawhan sang Dios.”​—⁠“The New Bible Dictionary.”

KON amo, ngaa ginasikway sang madamong nagapangangkon nga mga Cristiano​—⁠kag nagapangangkon nga nagapati sa Biblia⁠​—⁠​ang ideya nga nagaluntad ang matuod nga Yawa? Bangod, sa pagkamatuod, wala nila ginabaton ang Biblia subong Pulong sang Dios. (Jeremias 8:⁠9) Suno sa ila, ang mga manunulat sang Biblia nagkopya sa mga pilosopiya sang mga pungsod sa palibot nila kag wala ginpaalinton sing sibu ang kamatuoran halin sa Dios. Halimbawa, ang Katoliko nga teologo nga si Hans Küng nagsulat: “Ang patupato nga mga ideya tuhoy kay Satanas upod sang madamo kaayo nga demonyo . . . naghalin sa mitolohiya sang Babilonia pasulod sa una nga Judaismo kag  halin didto pasulod sa Bag-ong Testamento.”​—⁠On Being a Christian.

Apang ang Biblia indi pulong sang mga tawo; inspirado gid ini nga Pulong sang Dios. Gani, maalamon gid kon tamdon naton sing serioso ang ginasiling sini tuhoy sa Yawa.​​—⁠2 Timoteo 3:​14-​17; 2 Pedro 1:​20, 21.

Ano ang Ginhunahuna ni Jesus?

Si Jesucristo nagpati nga matuod ang Yawa. Si Jesus wala ginsulay sang isa nga malaut sa sulod niya. Ginsalakay sia sang isa ka matuod nga persona nga gintawag niya sang ulihi nga “manuggahom sang kalibutan.” (Juan 14:30; Mateo 4:​1-11) Nagpati man sia nga ang iban pa espiritu nga mga tinuga nagsakdag kay Satanas sa iya malaut nga mga padugi. Gin-ayo niya ang “ginsudlan sang demonyo” nga mga tawo. (Mateo 12:22-28) Bisan ang publikasyon sang mga ateista nga A Rationalist Encyclopædia nagpatalupangod sini paagi sa pagsiling: “Isa gid ka daku nga kasandaran sa mga teologo ang pagpati ni Jesus sang mga Ebanghelyo sa malauton nga espiritu nga mga tinuga.” Sang ginpatuhuyan ni Jesus ang Yawa kag ang iya mga demonyo, wala niya ginsunod ang mga disparatis nga naghalin sa mitolohiya sang Babilonia. Nahibaluan niya nga nagaluntad gid sila.

Madamo kita sing matun-an tuhoy sa Yawa kon binagbinagon naton ang mga pulong ni Jesus sa relihioso nga mga manunudlo sang panahon niya: “Halin kamo sa inyo amay nga Yawa, kag luyag ninyo himuon ang mga kailigbon sang inyo amay. Sia manugpatay sing tawo sang nagsugod sia, kag wala sia magtindog nga malig-on sa kamatuoran, bangod ang kamatuoran wala sa iya. Kon magpamulong sia sing kabutigan, nagapamulong sia suno sa iya kaugalingon nga disposisyon, bangod butigon sia kag amay sang kabutigan.”​—⁠Juan 8:44.

Suno sa sini, ang Yawa, ang ngalan nga nagakahulugan sing “nagapasipala,” ‘butigon kag amay sang kabutigan.’ Sia amo ang una nga tinuga nga nagbinutig tuhoy sa Dios, kag ginhimo niya ini didto sa hardin sang Eden. Ginsiling ni Jehova nga ang aton orihinal nga mga ginikanan ‘mapatay nga totoo’ kon magkaon sila gikan sa kahoy sa pagkilala sang maayo kag malain. Paagi sa isa ka man-ug, ginsiling ni Satanas nga indi ini matuod. (Genesis 2:17; 3:⁠4) Gani, nagakaigo nga gintawag sia nga “orihinal nga man-ug, ang ginatawag nga Yawa kag Satanas.”​—⁠Bugna 12:9.

Nagbinutig ang Yawa tuhoy sa kahoy sa pagkilala sa maayo kag malain. Nakigbais sia nga ang pagdumili sa pagkaon gikan sa sina nga kahoy indi husto; isa yadto ka pag-abuso sa gahom. Nagsiling sia nga si Adan kag si Eva ‘mangin kaangay sang Dios’ sa pagpat-od sa ila kaugalingon kon ano ang maayo kag malain. Ginpahangop ni Satanas nga subong mga tawo nga hilway sa pagbuot, dapat determinado sila sing bug-os sa ila kaugalingon. (Genesis 3:1-5) Ini nga pagsalakay sa pagkamatarong  sang paagi sang Dios sa paggahom nagbangon sing importante nga mga hulusayon. Gani nagtugot si Jehova sing tion agod mahusay ini nga mga hulusayon. Nagakahulugan ini nga gintugutan si Satanas nga magpadayon sa pagkabuhi sa pila ka tion. Ang iya diutay lamang nga tion madasig na nga nagakaubos. (Bugna 12:12) Sa gihapon, padayon niya nga ginapahilayo ang katawhan gikan sa Dios paagi sa kabutigan kag pagpangdaya, nagagamit sang mga tawo kaangay sang mga escriba kag mga Fariseo sang panahon ni Jesus agod ipalapnag ang iya mga panudlo.​—⁠Mateo 23:​13, 15.

Si Jesus nagsiling man nga ang Yawa “manugpatay sing tawo sang nagsugod sia” kag “wala sia magtindog nga malig-on sa kamatuoran.” Wala ini nagakahulugan nga gintuga ni Jehova ang Yawa nga “manugpatay.” Wala sia gintuga nga mangin isa ka sahi sang gadya nga nagadumala sa isa ka duog nga may kalayo kag pag-antos para sa bisan sin-o nga nagapamatok sa Dios. Ang “impierno” sa Biblia indi puluy-an ni Satanas. Amo ini ang kinaandan nga lulubngan sang katawhan.​—⁠Binuhatan 2:25-27; Bugna 20:​13, 14.

Sa ginsuguran, ang Yawa yara “sa kamatuoran.” Bahin anay sia sang langitnon nga pamilya ni Jehova subong isa ka himpit nga espiritu nga anak sang Dios. Apang wala sia “magtindog nga malig-on sa kamatuoran.” Ginpasulabi niya ang iya kaugalingon nga mga padugi kag mga prinsipio nga napasad sa kabutigan. “Nagsugod sia” nga mangin Yawa kag manugpatay sang tawo, indi sang gintuga sia nga anghel nga anak sang Dios, kundi sang hungod niya nga ginlapas si Jehova kag nagbinutig kay Adan kag kay Eva. Ang Yawa kaangay sang mga tawo nga nagrebelde batok kay Jehova sang panahon ni Moises. Tuhoy sa ila mabasa naton ini: “Nagpanghikot sila sing malaglagon sa bahin nila; sila indi niya mga anak, ang kasawayan ila.” (Deuteronomio 32:⁠5) Amo man ang masiling tuhoy kay Satanas. Nangin ‘manugpatay sia sing tawo’ sang nagrebelde sia kag nangin balasulon sa kamatayon ni Adan kag ni Eva kag, sa pagkamatuod, sang bug-os tawhanon nga pamilya.​—⁠Roma 5:12.

Malinapason nga mga Anghel

Ang iban nga mga anghel nagbuylog kay Satanas sa iya pagrebelde. (Lucas 11:​14, 15) Ini nga mga anghel “nagbiya sang ila kaugalingon nagakaigo nga puluy-an” kag nagmateryalisar sa lawas sang tawo agod makighulid sa “mga anak nga babayi sang mga tawo” sang adlaw ni Noe. (Judas 6; Genesis 6:​1-4; 1 Pedro 3:​19, 20) “Ang ikatlo nga bahin sang mga bituon sa langit,” ukon ang diutay nga bahin sang espiritu nga mga tinuga, naghimo sini.​—⁠Bugna 12:4.

Ang malaragwayon gid nga tulun-an sang Bugna nagalaragway sa Yawa subong “isa ka daku kag pula nga dragon.” (Bugna 12:⁠3) Ngaa? Indi bangod may literal sia nga makahaladlok kag malaw-ay nga lawas. Sa pagkamatuod, wala naton mahibaluan kon ano nga sahi ang lawas sang espiritu nga mga tinuga, apang mahimo nga indi tuhay si Satanas sa iban pa nga anghel nga mga tinuga sa sini nga bahin. Apang, ang “daku kag pula nga dragon” isa ka nagakaigo nga paglaragway sa nagapanukob, makahaladlok, gamhanan, kag malaglagon nga kinaiya ni Satanas.

Nalimitehan gid karon si Satanas kag ang mga demonyo. Indi na sila makamateryalisar subong sang una. Wala madugay sa tapos matukod ang Ginharian sang Dios paagi kay Cristo sang 1914, gintagbong sila sa duta.​—⁠Bugna 12:​7-9.

Ang Yawa Isa ka Mabudlay Lutuson nga Kaaway

Bisan amo sina, ang Yawa isa ka mabudlay lutuson nga kaaway. “Nagaluyong [sia] subong sang isa ka nagangurob nga leon, nga nagapangita sing bisan sin-o man nga matukob.” (1 Pedro 5:⁠8) Indi sia ang di-maathag nga malaut nga kinaugali sa aton di-himpit nga mga lawas. Matuod, may matag-adlaw kita nga pagpakig-away batok sa aton kaugalingon makasasala nga mga huyog. (Roma 7:18-20) Apang ang matuod nga pagpakig-away amo ang “batok sa mga manuggahom sang kalibutan  sining kadudulman, batok sa malaut nga mga espiritu sa langitnon nga mga duog.”​—⁠Efeso 6:12.

Daw ano ka lapnag ang impluwensia sang Yawa? “Ang bug-os nga kalibutan yara sa gahom sang isa nga malauton,” siling ni apostol Juan. (1 Juan 5:19) Siempre pa, indi naton luyag nga mawili sing tuman sa Yawa ukon tugutan nga mahugakom sang kahadlok sa iya bangod sang disparatis. Apang, maalamon kita kon magpabilin kita nga alisto sa iya mga panikasog nga bulagon kita sa kamatuoran kag bungkagon ang aton integridad sa Dios.​—⁠Job 2:​3-5; 2 Corinto 4:​3, 4.

Indi pirme mapintas ang paagi nga ginagamit sang Yawa sa pagsalakay sa mga luyag maghimo sang kabubut-on sang Dios. Kon kaisa, ginahimo niya ang iya kaugalingon nga daw “isa ka anghel sang kapawa.” Ginpaandaman ni apostol Pablo ang mga Cristiano tuhoy sa sini nga katalagman sang nagsulat sia: “Nagakahadlok ako nga basi, subong nga ang man-ug naglimbong kay Eva paagi sa kadaya sini, ang inyo hunahuna mapatalang gikan sa kahanuot kag kaputli nga nagakaigo kay Cristo.”​—⁠2 Corinto 11:​3, 14.

Gani, dapat naton ‘huptan ang aton kaligdong, magmabinantayon, magtindog batok sa iya, malig-on sa pagtuo.’ (1 Pedro 5:​8, 9; 2 Corinto 2:11) Likawi nga magpasiod kay Satanas paagi sa pag-eksperimento sa bisan ano nga butang may kahilabtanan sa espiritismo. (Deuteronomio 18:10-12) Tun-i sing maukod ang Pulong sang Dios, nagadumdom nga sulitsulit nga ginpatuhuyan ni Jesucristo ang Pulong sang Dios sang ginsulay sia sang Yawa. (Mateo 4:​4, 7, 10) Magpangamuyo para sa espiritu sang Dios. Ang mga bunga sini magabulig sa imo nga malikawan ang mga buhat sang unod, nga ginapukaw gid ni Satanas. (Galacia 5:16-24) Subong man, mangamuyo sing hanuot kay Jehova kon nagabatyag ka nga ginaipit sang Yawa kag sang iya mga demonyo.​—⁠Filipos 4:​6, 7.

Indi kinahanglan nga mahadlok sa Yawa. Si Jehova nagasaad sang matuod nga pangamlig batok sa bisan ano nga mahimo ni Satanas. (Salmo 91:​1-4; Hulubaton 18:10; Santiago 4:​7, 8) “Padayon kamo nga magtigayon sing gahom sa Ginuo kag sa iya kusog,” siling ni apostol Pablo. Nian “makatindog kamo sing malig-on batok sa mga daya sang Yawa.”​—⁠Efeso 6:​10, 11.

[Retrato sa pahina 5]

Nahibaluan ni Jesus nga ang Yawa isa ka matuod nga persona

[Retrato sa pahina 6]

“Ang bug-os nga kalibutan yara sa gahom sang isa nga malauton”

[Credit Line]

NASA photo

[Mga retrato sa pahina 7]

Magtindog batok sa Yawa paagi sa pagtuon sang Pulong sang Dios kag sa pagpangamuyo sing tayuyon