May Makapahiusa Gid Bala sa mga Tawo?

BISAN ano man ang imo ginapatihan, ayhan magaugyon ka nga may yara mga tawo gikan sa halos tanan nga relihion nga nagahigugma sa kamatuoran. Ang mga tawo nga nagapabalor gid sa kon ano ang matuod kag handa nga pangitaon ini, masapwan sa tunga sang mga Hindu, mga Katoliko, mga Judiyo, kag iban pa. Apang, daw ginabahinbahin sang relihion ang katawhan. Ginagamit pa gani sang iban ang relihion para sa malaut nga mga katuyuan. Posible pa ayhan nga mahiusa ang sinsero nga mga tawo gikan sa tanan nga relihion nga nagahigugma sa kon ano ang maayo kag matuod? Sarang ayhan sila matipon para sa isa ka katuyuan?

Makatulublag gid nga ang relihion kapin kag kapin nga ginabangdan sang pagbinahinbahin! Binagbinaga ang pila sini nga mga inaway. Ang mga Hindu kag mga Budhista sa Sri Lanka nagaaway. Ang mga Protestante, mga Katoliko, kag mga Judiyo nagpaagay sing dugo sa nanuhaytuhay nga mga inaway. Ang ginatawag nga mga Cristiano nagapakig-away batok sa mga Muslim sa Bosnia, Chechnya, Indonesia, kag Kosovo. Kag sang Marso 2000, 300 ang napatay sa Nigeria pagkatapos sang duha ka adlaw nga pag-inaway nga may kaangtanan sa relihion. Sa pagkamatuod, gingatungan sang relihioso nga dumot ang kapintas sining mga inaway.

Ang sinsero nga mga tawo masami nga nagakasubo sa mga kalautan nga ginahimo sa ngalan sang relihion. Halimbawa, madamo nga sumilimba ang natingala nga ang mga klerigo nga seksuwal nga nag-abuso sa mga kabataan, opisyal nga ginakunsinti sang pila ka simbahan. Ang iban nga mga tumuluo nagabatyag sing daku nga kahuya bangod sang mga pagbinahinbahin sa sulod sang madamo sang ginatawag nga Cristianong mga sekta tuhoy sa mga hulusayon subong sang homoseksuwalidad kag aborsion. Maathag nga wala mapahiusa sang relihion ang katawhan. Apang, may yara mga tawo sa madamo nga relihion nga may matuod nga gugma sa kamatuoran subong ginapakita sang masunod nga mga eksperiensia.

Ginkalangkagan Nila ang Kamatuoran

Si Fidelia isa ka sinsero kag debotado nga sumilimba sa Katoliko nga Simbahan sang San Francisco sa La Paz, Bolivia. Nagahapa sia sa atubangan sang imahen ni Maria kag nagabutang sia sing pinakamatahom nga mga kandila nga mabakal niya sa atubangan sang krusipiho. Kada semana, nagadonar sia sing madamo nga pagkaon agod ipanagtag sang pari sa mga imol. Apang, lima ka bata ni Fidelia ang napatay antes mabunyagan. Sang ginsugiran sia sang pari nga nagaantos sila tanan sa kadudulman sang Limbo, nagpalibog si Fidelia, ‘Kon maayo ang Dios, paano ini natabo?’

Si Tara, isa ka medikal nga doktor, ginpadaku subong isa ka Hindu sa Kathmandu, Nepal. Bilang pagsunod sa mga siglo na ang kadugayon nga mga kinabatasan sang iya mga katigulangan, nagasimba sia sa iya mga dios sa mga templo sang mga Hindu kag may mga idolo sia sa iya balay. Apang naligban si Tara sa sining mga pamangkot: Ngaa may daku gid nga pag-antos? Ngaa nagakapatay ang mga tawo? Halos wala sia makatigayon sing makaalayaw nga mga sabat sa iya relihion.

Si Panya, sa pihak nga bahin, nagdaku subong isa ka Budhista  sa isa ka balay sa tupad sang kanal sa Bangkok, Thailand. Gintudluan sia nga ang pag-antos resulta sang mga hinimuan sa nagligad nga mga kabuhi kag matapos lamang ini kon sikwayon sang isa ang tanan niya nga handum. Kaangay sang iban pa nga sinsero nga mga Budhista, gintudluan sia nga tahuron sing tudok ang kaalam sang nakasutana sing dalag nga mga monghe nga nagakadto sa ila balay kon kaagahon agod mangayo sing limos. Nagapamalandong sia kag nagapanipon sing mga imahen ni Budha bangod sang pagpati nga makahatag ini sing pangamlig. Sang maaksidente sia nga nagresulta sa iya pagkaparalisado halin sa hawak paubos, nagduaw si Panya sa mga monasteryo sang mga Budhista, nga nagalaum sing sinsero sa isa ka milagruso nga pag-ayo. Wala sia makatigayon sing pag-ayo ukon espirituwal nga kasanagan. Sa baylo, napadayag sia sa espiritismo kag nagsugod sa pagtilawtilaw sini.

Si Virgil natawo sa Estados Unidos kag nagbuylog sa Itom nga mga Muslim sa kolehiyo. Mabakas nga nanagtag sia sang ila literatura, nga nagasiling nga ang mga puti amo ang Yawa. Amo sini kon ngaa, siling nila, madamo gid nga kapintas ang ginhimo sang mga puti batok sa mga itom. Bisan pa sinsero sia sa iya mga ginapatihan, ginatublag si Virgil sining mga pamangkot: Paano nangin malaut ang tanan nga puti? Kag ngaa ang paghatag sing sermon daw pirme lang naangot sa kuwarta?

Bisan pa nagdaku si Charo sa laban ang Katoliko nga Bagatnan nga Amerika, sia isa ka sinsero nga Protestante. Nalipay sia nga wala sia nadalahig sa idolatriya sa palibot niya. Naluyagan ni Charo ang pagkadto sa simbahan kada Domingo para sa makatalandog nga serbisyo, diin nagasinggit sia sing “Hallelujah!” kag nagabuylog sa relihioso nga pag-amba kag pagsaot pagkatapos sini. Sinsero nga nagapati si Charo nga sia luwas na kag born again (ginpanganak liwat). Ginahatag niya sa simbahan ang ikanapulo sang iya suweldo, kag kon ang iya paborito nga ebanghelisador sa TV mangayo sing amot, nagapadala sia sing kuwarta para sa kabataan sa Aprika. Apang, sang ginpamangkot niya ang iya pastor kon ngaa ginapaantos sang Dios sang gugma ang mga kalag sa impierno, narealisar niya nga wala sia sing makatarunganon nga sabat. Sang ulihi, natukiban man niya nga ang iya mga ginaamot wala gali ginagamit sa pagbulig sa kabataan sa Aprika.

Bisan pa lainlain ang ginhalinan, isa ka butang ang kinaandan sa sining lima ka indibiduwal. Ginahigugma nila ang kamatuoran kag sinsero nga ginpangita nila ang matuod nga mga sabat sa ila mga pamangkot. Apang mapahiusa gid bala sila sa matuod nga pagsimba? Sabton sang masunod nga artikulo ini nga pamangkot.

[Retrato sa pahina 4]

Posible ayhan nga mapahiusa ang mga tawo nga may nanuhaytuhay nga ginhalinan?

[Picture Credit Line sa pahina 3]

G.P.O., Jerusalem