Leksion Gikan sa Palma

“ISA ka magayon nga garhom sang tumalagsahon nga katahom.” Amo sini ang paglaragway sa palma sang isa ka insiklopedia sa Biblia. Sa panahon sang Biblia kag sa karon, ang date nga mga palma nagapatahom sang Nalupyakan sang Nilo sang Egipto, kag nagaaman sing makapaumpaw nga handong sa palibot sang mga oasis sang Desyerto Sang Negeb.

Kaangay sang kalabanan nga espesyi sang palma, ang date nga palma may matahom nga tindog. Ang pila nagalab-ot sa kataason nga 30 metros kag nagapamunga sa sulod sang 150 ka tuig. Huo, ang palma matahom kag mabungahon gid. Kada tuig nagabunga ini sing pila ka dahog. Ang isa lamang ka dahog mahimo magaunod sing kapin sa 1,000 ka date. Tuhoy sa date, ang isa ka manunulat nagsulat: “Ang mga . . . nakatilaw sang binulad lamang, napakete nga mga date sa mga istante sang balaligyaan, indi gid makahanduraw kon daw ano ini kanamit kaunon kon preska.”

Sing nagakaigo, ginapaanggid sang Biblia ang pila ka tawo sa mga palma. Agod mangin kalahamut-an sa panulok sang Dios, katulad sang mabungahon nga palma, ang isa ka tawo dapat mangin matarong sa moral kag dapat magpadayon sa pagpamunga sing maayong mga buhat. (Mateo 7:17-20) Bangod sini, gingamit ang ginsilsil nga mga larawan sang mga palma subong dekorasyon sa templo ni Solomon kag sa templo sa palanan-awon ni Ezequiel. (1 Hari 6:​29, 32, 35; Ezequiel 40:14-​16, 20, 22) Sa amo, agod kahamut-an sang Dios ang pagsimba sang isa, dapat nga may halandumon sia nga mga kinaiya sang isa ka date nga palma. Ang pulong sang Dios nagapaathag: “Ang mga matarong mismo magapamulak kaangay sang palma.”​—⁠Salmo 92:12.