Matuod nga Pagtuo—Posible Pa Bala Ini?

“Ang pagtuo isa ka buhi, maisugon nga pagsalig sa bugay sang Dios, nga tuman gid ka sigurado kag masaligan amo nga handa itaya sing linibo ka beses sang tumuluo ang iya kabuhi sa sini.”​—⁠MARTIN LUTHER, 1522.

“Sa katunayan isa na kita ka sekular nga katilingban diin ang Cristianong pagtuo kag mga buhat nagatagumatayon gid.”​—⁠LUDOVIC KENNEDY, 1999.

ANG pagtamod tuhoy sa pagtuo nagkalainlain. Sang nagligad, ang pagtuo sa Dios kinaandan lamang. Karon, sa isa ka kalibutan sang mga duhaduha kag pag-antos, ang matuod nga pagtuo sa Dios kag sa Biblia madasig nga naalimunaw.

Matuod nga Pagtuo

Para sa madamo, ang “pagtuo” amo ang relihioso nga pagpati ukon pagsunod sa isa ka porma sang pagsimba. Apang, subong ginagamit sa Biblia, ang “pagtuo” amo ang bug-os nga pagsalig​—⁠lubos kag di-mationg nga pagsalig sa Dios kag sa iya mga saad. Isa ini ka kinaiya nga nagapakilala sa isa ka disipulo ni Jesucristo.

Sang isa ka okasyon, si Jesucristo naghambal tuhoy sa kinahanglanon nga magpangamuyo kag “indi mag-untat.” Bangod sini, ginpautwas niya ang isa ka pamangkot kon bala magaluntad gid ang matuod nga pagtuo sa aton adlaw. Namangkot sia: “Kon mag-abot ang Anak sang tawo, makakita gid bala sia sini nga pagtuo sa duta?” Ngaa ginpautwas niya ini nga pamangkot?​—⁠Lucas 18:​1, 8, footnote.

Nadula nga Pagtuo

Madamo nga butang ang mahimo bangdan agod mawasi sang mga tawo ang ila pagtuo. Lakip sa sini amo ang masakit nga mga inagihan kag mga pagtilaw sa adlaw-adlaw nga pagkabuhi. Si Propesor Michael Goulder, halimbawa, isa ka kura paroko anay sa Manchester, Inglaterra, sang nahulog ang eroplano sa Munich sang 1958 diin madamo nga humalampang sang Manchester United football team ang napatay. Sa isa ka programa sa telebisyon sang BBC, ang manugwaragwag nga si Joan Bakewell nagpaathag nga si Goulder “nagbatyag nga walay mahimo sang nakita niya ang daku nga kalisod sang mga tawo.” Ang isa ka resulta amo nga “nadula [niya] ang iya pagtuo sa Dios nga nagapasilabot sa kapalaran sang tawo.” Ginsambit ni Goulder ang iya pagpati nga “ang Biblia indi . . .  ang wala nagasayop nga pulong sang Dios” kundi, sa baylo, “ang nagasayop nga pulong sang tawo, ayhan nga may pagbugna sang Dios sa lainlain nga bahin.”

Kon kaisa ang pagtuo nagakaalimunaw lamang. Amo sina ang natabo sa bahin sang manunulat kag manugwaragwag nga si Ludovic Kennedy. Nagsiling sia nga sugod sa pagkabata “ang [iya] mga duhaduha kag mga pangalag-ag [tuhoy sa Dios] nag-utwas sa pulupanag-on kag ang [iya] mga di-pagpati nagtubo.” Daw wala sing isa nga makahatag sa iya sing makatarunganon nga mga sabat sa iya mga pamangkot. Ang pagkapatay sang iya amay sa dagat isa ka wala gid ginapaabot nga hitabo nga labi nga nagpaluya sang maluya na kaayo nga pagtuo. Ang mga pangamuyo sa Dios nga “amligi kami gikan sa mga katalagman sa dagat kag gikan sa kasingki sang kaaway” wala ginsabat sang ang pangpasahero nga barko nga ginsakyan sang iya amay ginsalakay kag ginguba sang mga bapor-de-guerra sang mga Aleman sang Bug-os Kalibutan nga Inaway II.​—⁠All in the Mind​—⁠A Farewell to God.

Ini nga mga eksperiensia kinaandan lamang. “Ang pagtuo,” siling ni apostol Pablo, “wala ginapanag-iyahan sang tanan nga tawo.” (2 Tesalonica 3:2) Ano sa banta mo? Ang matuod nga pagtuo sa Dios kag sa iya Pulong posible pa bala sa labi ka maduhaduhaon nga kalibutan? Usisaa kon ano ang masiling sang masunod nga artikulo tuhoy sini nga topiko.