Mga Pamangkot Gikan sa mga Bumalasa
Mga Pamangkot Gikan sa mga Bumalasa
Ano ang “kapahuwayan” nga ginpatuhuyan sa Hebreo 4:9-11, kag paano ang isa “makasulod sa sina nga kapahuwayan”?
Sa Hebreong mga Cristiano sang una nga siglo, si apostol Pablo nagsulat: “May nabilin pa nga adlaw nga inugpahuway para sa katawhan sang Dios. Kay ang tawo nga nakasulod sa kapahuwayan sang Dios nakapahuway man sa iya kaugalingon nga mga buhat, subong sang ginhimo sang Dios gikan sa iya mga buhat. Busa himuon naton ang aton bug-os nga masarangan nga makasulod sa sina nga kapahuwayan.”—Hebreo 4:9-11.
Sang naghambal si Pablo nga nagpahuway ang Dios gikan sa Iya hilikuton, mahimo gid nga ginpatuhuyan niya kon ano ang ginasiling sa Genesis 2:2, nga aton mabasa: “Sa ikapito nga adlaw natapos sang Dios ang iya buluhaton nga ginhimo niya, kag nagpahuway sia sa ikapito nga adlaw gikan sa tanan niya nga buluhaton nga ginhimo niya.” Ngaa “nagpahuway [si Jehova] sa ikapito nga adlaw”? Pat-od nga indi bangod kinahanglan niya nga maulian “gikan sa tanan niya nga buluhaton nga ginhimo niya.” Ang masunod nga bersikulo nagahatag sa aton sing ideya: “Ginpakamaayo sang Dios ang ikapito nga adlaw kag ginhimo ini nga sagrado, bangod nga sa sini ang Dios nagpahuway gikan sa tanan nga buluhaton nga gintuga sang Dios agod himuon.”—Genesis 2:3; Isaias 40:26, 28.
Ang “ikapito nga adlaw” tuhay gid gikan sa nagligad nga anom ka adlaw bangod amo ini ang adlaw nga ginpakamaayo sang Dios kag ginpakabalaan, kon sayuron, isa ka adlaw nga ginpain para sa, ukon gindedikar para sa, isa ka pinasahi nga katuyuan. Ano ini nga katuyuan? Antes sini, ginpahayag sang Dios ang iya katuyuan sa katawhan kag sa duta. Sa unang mag-asawa, ang Dios nagsiling: “Magmabungahon kamo kag magbuad kag pun-a ninyo ang duta kag gamhi ini, kag magpakaagalon kamo sa kaisdaan sang dagat kag sa nagalupad nga mga tinuga sang langit kag sa tagsa ka buhi nga tinuga nga nagagiho sa duta.” (Genesis 1:28) Bisan pa ginhatagan sang Dios ang katawhan kag ang duta sing himpit nga panugod, kinahanglan pa ang tion agod ang bug-os nga duta magamhan sing bug-os kag himuon nga isa ka paraiso nga napun-an sang isa ka himpit tawhanon nga pamilya, subong sang gintuyo sang Dios. Gani, sa “ikapito nga adlaw,” nagpahuway ang Dios, ukon nag-untat, gikan sa madamo nga pagpanuga nga hilikuton sa duta agod tugutan ang natuga na niya nga mag-uswag suno sa iya kabubut-on. Sa katapusan sining ikapito nga “adlaw,” ang tanan nga gintuyo sang Dios mangin isa na ka katunayan. Daw ano kadugay ini nga kapahuwayan?
Kon balikan naton ang pinamulong ni Pablo sa mga Hebreo, matalupangdan naton nga ginsambit niya nga “may yara nabilin nga isa ka adlaw nga inugpahuway para sa katawhan sang Dios,” kag ginlaygayan niya ang iya mga masigka-Cristiano nga himuon ang ila labing masarangan nga ‘magsulod sa sina nga kapahuwayan.’ Ginapakita sini nga sang ginsulat ni Pablo ining mga pulong, “ang ikapito nga adlaw” sa kapahuwayan sang Dios, nga nagsugod sang mga 4,000 ka tuig antes sini, nagapadayon pa. Indi ini matapos tubtob ang katuyuan sang Dios sa katawhan kag sa duta matuman sing bug-os sa katapusan sang Isa ka Libo ka Tuig nga Paggahom ni Jesucristo, nga amo ang “Ginuo sang adlaw nga inugpahuway.”—Mateo 12:8; Bugna 20:1-6; 21:1-4.
Nagapaabot sining makalilipay nga paglaum, ginpaathag ni Pablo kon paano ang isa mahimo makasulod sa kapahuwayan sang Dios. Sia nagsulat: “Ang tawo nga nagsulod sa kapahuwayan sang Dios nagpahuway man gikan sa iya mismo mga buhat.” Nagasugid ini sa aton nga bisan pa may isa ka himpit nga panugod, ang katawhan sa kabilugan wala makasulod sa kapahuwayan sang Dios. Ini bangod, wala magdugay, wala gintuman nanday Adan kag Eva ang “ikapito nga adlaw” nga kapahuwayan sang Dios paagi sa pagbaton sang kahimusan sang Dios para sa ila. Sa baylo, nagrebelde sila kag luyag nga mangin independiente sa Dios. Sa katunayan, ginbuylugan nila ang mga pahito ni Satanas sa baylo nga batunon ang mahigugmaon nga panuytoy sang Dios. (Genesis 2:15-17) Subong resulta, nadula nila ang paglaum nga mabuhi sing dayon sa isa ka paraiso nga duta. Halin sadto, ang tanan nga katawhan nangin ulipon sa sala kag kamatayon.—Roma 5:12, 14.
Ang pagrebelde sang katawhan wala mag-upang sa katuyuan sang Dios. Ang adlaw sang iya kapahuwayan nagapadayon. Apang, si Jehova naghatag sing isa ka mahigugmaon nga aman—ang gawad—paagi sa iya Anak, si Jesucristo, agod ang tanan nga magbaton sini pasad sa pagtuo mahimo makapaabot sang kahilwayan kag kapahuwayan gikan sa lulan sang sala kag kamatayon. (Roma 6:23) Amo kon ngaa naglaygay si Pablo sa iya mga masigka-Cristiano nga ‘magpahuway gikan sa ila kaugalingon nga mga buhat.’ Dapat nga batunon nila ang aman sang Dios para sa kaluwasan kag indi magtinguha nga panikasugan ang ila palaabuton sa ila kaugalingon nga paagi, subong sang ginhimo nanday Adan kag Eva. Dapat man nila likawan nga padayunon pa ang ila mga buhat sa pagpakamatarong sa kaugalingon.
Ang pagsikway sa makagod ukon kalibutanon nga mga handum agod himuon ang kabubut-on sang Dios makapaumpaw gid kag makahatag sing kapahuwayan. Si Jesus nagpalanog sini nga pangagda: “Kari sa akon, kamo tanan nga ginabudlayan kag ginabug-atan, kag papagsikon ko kamo. Itakud ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kaumpawan sa inyo mga kalag. Kay ang akon gota mahulas kag ang akon lulan mamag-an.”—Mateo 11:28-30.
Ang pagbinagbinag ni Pablo sang kapahuwayan sang Dios kag kon paano ang isa mahimo makasulod sa sini pat-od nga isa ka tuburan sang pagpalig-on sa Hebreong mga Cristiano sa Jerusalem, nga nagbatas sang tuman nga paghingabot kag pagyubit bangod sang ila pagtuo. (Binuhatan 8:1; 12:1-5) Sing kaanggid, ang mga pulong ni Pablo mahimo mangin isa ka tuburan sang pagpalig-on sa mga Cristiano karon. Sa paghibalo nga ang katumanan sang mga saad sang Dios nga paluntaron ang paraiso nga duta sa idalom sang iya matarong nga Ginharian malapit na gid, kita man dapat magpahuway gikan sa aton mga buhat kag himuon ang aton labing masarangan nga makasulod sa sini nga kapahuwayan.—Mateo 6:10, 33; 2 Pedro 3:13.
[Mga retrato sa pahina 31]
Ang ginasaad sang Dios nga isa ka paraiso nga duta magaluntad sa katapusan sang iya adlaw nga kapahuwayan