Paano Mo Mabuligan ang Isa ka “Buhaha” nga Anak?

“Magkalipay, kay . . . nadula sia kag nakita.”​​—⁠LUCAS 15:32.

1, 2. (a) Ano ang nangin reaksion sang iban nga mga pamatan-on sa Cristianong kamatuoran? (b) Ano mahimo ang ginabatyag sang mga ginikanan kag mga anak sa sini nga mga kahimtangan?

“MAGUWA ako sa kamatuoran!” Makapasubo gid para sa mahinadlukon sa Dios nga mga ginikanan nga nagtinguha sa pagpadaku sa ila mga anak sa Cristianong paagi nga mabatian ining mga pulong gikan sa isa ka anak! Ang iban nga mga pamatan-on ‘nagapaanod’ na lamang nga wala ginasugid ang ila himuon. (Hebreo 2:1) Madamo sa ila ang kaanggid sa buhaha nga anak sa parabola ni Jesus, nga nagbiya sa balay sang iya amay kag gin-usikan ang iya pinanubli nga manggad sa isa ka malayo nga duta.​​—⁠Lucas 15:11-​16.

² Bisan pa ang kalabanan nga mga Saksi ni Jehova wala sing subong sini nga problema, sa iban nga may subong sini nga problema, wala sing lugpay nga makadula sing bug-os sang ila kasubo. Kag indi man dapat kalipatan ang kasubo nga maeksperiensiahan sang isa ka batinggilan nga pamatan-on. Sa iya pinakatudok nga balatyagon, mahimo nga ginatublag sia sang iya konsiensia. Sa parabola ni Jesus, ang buhaha nga anak ‘nakamaradmad’ sang ulihi, nga ginkalipay sang iya amay. Paano ang mga ginikanan kag ang iban pa sa kongregasyon makabulig sa buhaha nga mga anak nga “makamaradmad”?​​—⁠Lucas 15:17.

Kon Ngaa ang Iban Nagadesisyon sa Pagguwa

3. Ano ang pila ka rason kon ngaa ang mga pamatan-on nagapamat-od nga magguwa sa Cristianong kongregasyon?

³ Ginatos ka libo ka pamatan-on ang malipayon nga nagaalagad kay Jehova sa sulod sang Cristianong  kongregasyon. Ti, ngaa, nagaguwa ang iban? Ayhan ginabatyag nila nga may nawasi sila sa ginatanyag sang kalibutan. (2 Timoteo 4:10) Ukon ayhan naestriktuhan sila sa maamligon nga toril ni Jehova. Ang isa ka nakasala nga konsiensia, ang mabaskog nga interes sa tuhay nga sekso, ukon ang handum nga batunon sang mga katubotubo mahimo man bangdan sang amat-amat nga pagguwa sang isa ka pamatan-on gikan sa panong ni Jehova. Ang isa ka pamatan-on mahimo mag-untat sa pag-alagad sa Dios bangod sang daw pagkasalimpapaw sang iya mga ginikanan ukon sang iban nga Cristiano.

4. Ano masami ang gamot nga kabangdanan sang pagpalayo sang mga pamatan-on?

⁴ Ang rebelyuso nga panimuot kag pamatasan sang isa ka bata masami nga amo ang mga sintoma sang espirituwal nga kaluyahon, mga palatandaan sang kon ano ang yara sa iya tagipusuon. (Hulubaton 15:13; Mateo 12:34) Kon ano man ang rason nga nagpalayo ang isa ka pamatan-on, masami nga ang gamot sang problema amo nga wala sia sing “sibu nga ihibalo sa kamatuoran.” (2 Timoteo 3:7) Kapin pa sa pakulahaw lamang nga pagsimba kay Jehova, importante nga magpalambo ang mga pamatan-on sing suod nga personal nga kaangtanan sa iya. Ano ang magabulig sa ila agod mahimo ini?

Magpalapit sa Dios

5. Ano ang kinahanglanon agod makapalambo ang isa ka pamatan-on sing personal nga kaangtanan sa Dios?

⁵ “Magpalapit sa Dios,” sulat ni disipulo Santiago, “kag magapalapit sia sa inyo.” (Santiago 4:8) Agod mahimo ini, dapat mabuligan ang isa ka pamatan-on sa pagpalambo sing kaluyag sa Pulong sang Dios. (Salmo 34:8) Sa primero magakinahanglan sia sing “gatas”​​—⁠ang sadsaran nga mga panudlo sang Biblia. Apang samtang nagakalipay sia sa Pulong sang Dios kag nagapatubo sing kaluyag sa “pagkaon nga matig-a,”​​—⁠ang madalom nga espirituwal nga impormasyon​​—⁠sa indi madugay mangin hamtong sia sa espirituwal. (Hebreo 5:​11-​14; Salmo 1:2) Ang isa ka pamatan-on nga nagbaton nga nadaug sia anay sang kalibutan nagsugod sa pag-apresyar sa espirituwal nga mga prinsipio. Ano ang nakabulig sa iya sa pagliso? Sa pagsunod sa panugda nga basahon ang bug-os nga Biblia, ginbasa niya ang Biblia sing regular. Huo, ang regular nga pagbasa sang Pulong sang Dios importante agod mapalambo ang suod nga kaangtanan kay Jehova.

6, 7. Paano mabuligan sang mga ginikanan ang ila mga anak nga magpalambo sing gugma sa Pulong sang Dios?

⁶ Importante gid nga mabuligan sang mga ginikanan ang ila mga anak nga magpalambo sing gugma sa Pulong sang Dios! Walay sapayan nga regular ang ila pagtuon sa Biblia subong pamilya, ang isa ka dalagita nagpakig-upod sa mga delingkwente. Tuhoy sa pagtuon sang iya pamilya, sia naghinumdom: “Sa kada tion nga ipamangkot ni Tatay ang mga pamangkot, ginabasa ko lamang ang mga sabat, nga wala gani nagatulok sa iya nawong.” Sa baylo nga kobrehan lamang ang materyal sa tion sang pagtuon sang pamilya, ang maalamon nga mga ginikanan nagagamit sing arte sa pagpanudlo. (2 Timoteo 4:2) Agod mawili ang isa ka pamatan-on sa pagtuon, dapat mabatyagan niya nga nadalahig sia. Ngaa indi mamangkot sing mga pamangkot nga nagapangayo sing mga pagtamod kag tuguti sia nga ipabutyag ang iya kaugalingon? Palig-una ang pamatan-on nga iaplikar sa praktikal nga paagi ang materyal nga ginabinagbinag.⁠ *

⁷ Dugang pa, himua nga buhi ang paghinun-anon sa Kasulatan. Kon nagakaigo, ipaarte sa mga pamatan-on ang mga natabo kag mga drama sa Biblia. Buligi sila nga handurawon ang lokasyon kag mga bahin sang duta diin natabo ang mga butang nga ginahambalan. Mahimo makabulig ang paggamit sing mga mapa kag mga tsart. Huo, upod ang diutay nga imahinasyon, ang pagtuon sang pamilya mahimo mangin buhi kag nanuhaytuhay. Dapat man usisaon sang mga ginikanan ang ila mismo kaangtanan kay Jehova. Samtang sila mismo nagasuod pa kay Jehova, mabuligan nila ang ila mga anak nga himuon man ini.​​—⁠Deuteronomio 6:​5-7.

8. Paano ang pangamuyo nagabulig sa isa nga mangin suod sa Dios?

⁸ Ang pangamuyo nagabulig man agod mangin suod ang isa sa Dios. Ang isa ka dalagita indi makapili sa ulot sang Cristianong pagkabuhi kag sang iya pagpakig-upod sa mga abyan nga wala nagaugyon sa iya mga pagtuluuhan. (Santiago 4:4) Ano ang ginhimo niya sa sini? “Sa una pa lang nga tion,” tu-ad niya, “nangamuyo gid ako kay Jehova kon ano ang ginabatyag ko.” Naghinakop sia nga ang iya pangamuyo ginsabat sang makakita sia  sang ulihi sa sulod sang Cristianong kongregasyon sing isa ka abyan nga iya matu-aran sang iya ginabatyag. Bangod nabatyagan niya nga ginatuytuyan sia ni Jehova, nagsugod sia sa pagtukod sing personal nga kaangtanan sa Dios. Mabuligan sang mga ginikanan ang ila mga anak paagi sa pagpauswag sa kalidad sang ila mismo mga pangamuyo. Kon nagapangamuyo subong isa ka pamilya, mahimo ipautwas sang mga ginikanan ang ila tinagipusuon nga ginabatyag, agod nga mabatyagan sang mga anak ang ila personal nga kaangtanan kay Jehova.

Mangin Mapailubon Apang Malig-on

9, 10. Ano nga huwaran ang ginpahamtang ni Jehova sa pagpakita sing pagkamainantuson sa batinggilan nga mga Israelinhon?

⁹ Kon ang isa ka pamatan-on amat-amat nga nagapalayo, mahimo nga painon niya ang iya kaugalingon kag pamatukan ang bisan ano nga panikasog sang iya mga ginikanan nga makighambal sa iya tuhoy sa espirituwal nga mga butang. Ano ang mahimo sang mga ginikanan sa sining mabudlay nga kahimtangan? Binagbinaga ang ginhimo ni Jehova sa dumaan nga Israel. Nagbatas sia sa “tingkuyan” nga mga Israelinhon sing kapin sa 900 ka tuig antes niya ginsikway sila bangod sang ila pagkabatinggilan. (Exodo 34:⁠9; 2 Cronica 36:17-​21; Roma 10:21) Walay sapayan sang makapila nga ‘pagtilaw [nila] sa iya,’ nangin “maluluy-on” sa ila si Jehova. “Madamong beses ginpaiway niya ang iya kaakig, kag wala sia magpaibwal sang iya bug-os nga kasingkal.” (Salmo 78:38-​42) Himpit ang Dios sa iya mga pagpakig-angot sa ila. Ang mahigugmaon nga mga ginikanan nagailog kay Jehova kag mapailubon kon ang bata wala sa gilayon nagasunod sa ila panikasog nga buligan sia.

¹⁰ Ang pagkamainantuson, ukon pagkamapailubon, wala nagakahulugan sing “pag-antos sa malawig nga tion”; nagakahulugan ini sing indi pagpangampo nga malubad pa ang isa ka may problema nga kaangtanan. Nagpahamtang si Jehova sing huwaran kon paano mangin mainantuson. Sia ang naghimo sang una nga tikang paagi sa pagpadala sang iya mga mensahero sa mga Israelinhon sing “liwat kag liwat.” “Naluoy [si Jehova] sa iya katawhan,” bisan pa “padayon nga ginauligyat nila ang mga mensahero sang matuod nga Dios kag ginatamay ang iya mga pulong.” (2 Cronica 36:​15, 16) Nakitluoy sia sa mga Israelinhon, nga nagasiling: “Magpanumbalik kamo, palihug, ang tagsatagsa gikan sa iya malaut nga dalanon.” (Jeremias 25:​4, 5) Apang, wala ginkompromiso ni Jehova ang iya matarong nga mga prinsipio. Ginsugo ang mga Israelinhon nga “magpanumbalik” sa Dios kag sa iya mga dalanon.

11. Paano ang mga ginikanan mangin mainantuson apang malig-on sa ila pagpakig-angot sa isa ka bata nga nagasipak?

¹¹ Mailog sang mga ginikanan ang pagkamainantuson  ni Jehova paagi sa indi pagpangampo sing padasudaso kon ang bata nagasipak. Wala nagadula sing paglaum, sila mismo makahimo sing una nga tikang nga huptan nga bukas ang mga linya sang komunikasyon ukon ipasag-uli ang komunikasyon. Samtang ginasakdag gihapon ang matarong nga mga prinsipio, mahimo sila magpakiluoy sa bata sing “liwat kag liwat” nga magpanumbalik sa dalanon sang kamatuoran.

Kon Madisfellowship ang Isa ka Menor-de-Edad

12. Ano ang responsibilidad sang mga ginikanan sa isa ka menor-de-edad nga nagapuyo upod sa ila apang ginpaguwa sa kongregasyon?

¹² Ano kon ang isa ka menor-de-edad nga nagapuyo upod sa iya mga ginikanan makahimo sing mabug-at nga sala kag bangod sang iya indi mahinulsulon nga panimuot ginpaguwa sia sa kongregasyon? Bangod ang bata nagapuyo upod sa iya mga ginikanan, responsibilidad gihapon nila nga tudluan kag disiplinahon sia nahisanto sa Pulong sang Dios. Paano ini mahimo?​​—⁠Hulubaton 6:​20-​22; 29:17.

13. Paano malab-ot sang mga ginikanan ang tagipusuon sang isa ka nakasala nga anak?

¹³ Posible​​—⁠sa pagkamatuod, labing maayo gid​​—⁠nga ihatag ini nga pagtudlo kag pagdisiplina sa tion sang pribado nga pagtuon sa Biblia. Dapat usisaon sang ginikanan kon ano ang sa likod sang matig-a nga panimuot sang iya anak kag kon ano ang yara sa iya tagipusuon. Daw ano ka grabe ang iya espirituwal nga balatian? (Hulubaton 20:5) Malab-ot bala ang mahumok nga bahin sang iya tagipusuon? Ano nga mga kasulatan ang magamit sing epektibo? Ginapasalig kita ni apostol Pablo: “Ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagalapos tubtob sa nautlan sang kalag kag espiritu, kag sang mga lutalutahan kag ila utok, kag may ikasarang sa paghantop sang mga hunahuna kag mga tinutuyo sang tagipusuon.” (Hebreo 4:12) Huo, kapin pa ang mahimo sang mga ginikanan sangsa singganan lamang ang ila anak nga indi pagliwaton ang sala nga nahimo. Mahimo sugdan nila mismo kag sakdagon ang proseso sa pagpaayo.

14. Ano ang una nga tikang nga dapat himuon sang isa ka nakasala nga pamatan-on agod mapasag-uli ang iya kaangtanan kay Jehova, kag paano mabuligan sang mga ginikanan ang bata sa paghimo sini nga tikang?

¹⁴ Dapat mapasag-uli sang isa ka nakasala nga pamatan-on ang iya kaangtanan kay Jehova. Ang una nga tikang nga dapat niya himuon amo ang ‘paghinulsol . . . kag pagliso.’ (Binuhatan 3:​19; Isaias 55:​6, 7) Sa pagbulig sa pamatan-on sa ila puluy-an nga maghinulsol, dapat ang mga ginikanan ‘magpugong sang ila kaugalingon sa idalom sang kalautan, nagatudlo sing malulo’ sa bata nga balingag. (2 Timoteo 2:​24-​26) Dapat nila ‘sabdungon’ sia suno sa Biblikanhon nga kahulugan. Ang Griegong tinaga nga ginbadbad ‘pagsabdong’ sarang man mabadbad nga “paghatag sing makakumbinsi nga ebidensia.” (Bugna 3:​19; Juan 16:8) Busa, ang pagsabdong nagadalahig sang pagpakita sing bastante nga ebidensia agod kumbinsihon ang bata nga sayop ang iya dalanon. Matuod, indi ini mahapos himuon. Kon posible, sarang mapukaw sang mga ginikanan ang iya tagipusuon, ginagamit ang tanan nga nagakaigo nga Makasulatanhon nga paagi agod kumbinsihon sia. Dapat mabuligan nila sia nga mahangpan ang kinahanglanon nga ‘dumtan ang malaut, kag higugmaon ang maayo.’ (Amos 5:15) Mahimo sia makapanumbalik sa iya “husto nga panimuot gikan sa siod sang Yawa.”

15. Ano ang papel sang pangamuyo agod mapasag-uli sang isa nga nakasala ang iya kaangtanan kay Jehova?

¹⁵ Agod mapasag-uli sang isa ang kaangtanan kay Jehova, kinahanglan gid ang pangamuyo. Sa pagkamatuod, wala sing dapat “maghingyo” tuhoy sa daku nga sala nga ginabuhat sing di-mahinulsulon sang bisan sin-o nga indibiduwal nga katapo anay sang Cristianong kongregasyon. (1 Juan 5:​16, 17; Jeremias 7:​16-​20; Hebreo 10:​26, 27) Apang, sarang makapangamuyo ang mga ginikanan kay Jehova nga hatagan sila sing kaalam sa pag-atubang sa kahimtangan. (Santiago 1:5) Kon  ang nadisfellowship nga pamatan-on nagapakita sing ebidensia sang paghinulsol apang wala sing ‘kahilwayan sa paghambal sa Dios,’ mahimo mangamuyo ang mga ginikanan nga kon makasapo ang Dios sing sadsaran agod patawaron ang sala sang ila anak, kabay nga matuman ang Iya kabubut-on. (1 Juan 3:21) Ang pagpamati sa sini nga mga pangamuyo dapat magbulig sa pamatan-on nga makilala si Jehova subong isa ka maluluy-on nga Dios.⁠ *​​—⁠Exodo 34:​6, 7; Santiago 5:⁠16.

16. Paano naton mabuligan ang mga katapo sang pamilya sang mga menor-de-edad nga nadisfellowship?

¹⁶ Kon madisfellowship ang isa ka nabawtismuhan nga pamatan-on, ang mga katapo sang kongregasyon ginapaabot nga “mag-untat sa pagpakig-upod” sa iya. (1 Corinto 5:​11; 2 Juan 10, 11) Mahimo nga makabulig ini sa iya sa ulihi nga “makamaradmad” kag manumbalik sa maamligon nga toril sang Dios. (Lucas 15:17) Apang, manumbalik man sia ukon indi, sarang mapalig-on sang mga katapo sang kongregasyon ang pamilya sang nadisfellowship nga pamatan-on. Mahimo kita tanan mangita sing kahigayunan nga magpakita sa ila sing “patugsiling” kag “mapinalangganon nga kaawa.”​​—⁠1 Pedro 3:​8, 9.

Kon Paano Makabulig ang Iban

17. Ano ang dapat tandaan sang mga katapo sang kongregasyon kon nagatinguha sa pagbulig sa isa ka nagasipak nga bata?

¹⁷ Kamusta naman ang isa ka pamatan-on nga wala madisfellowship gikan sa Cristianong kongregasyon apang nagluya sa pagtuo? “Kon ang isa ka bahin nagaantos,” sulat ni apostol Pablo, “ang tanan sang iban pa nga bahin nagaantos upod [sa iya].” (1 Corinto 12:26) Mahimo magpakita ang iban sing aktibo nga interes sa sini nga pamatan-on. Sa pagkamatuod, kinahanglan ang paghalong, kay ining nagabalatian sa espirituwal nga pamatan-on mahimo makahatag sing malain nga impluwensia sa iban nga mga pamatan-on. (Galacia 5:​7-9) Sa isa ka kongregasyon, ang maayo sing katuyuan nga mga adulto nga luyag magbulig sa pila ka pamatan-on nga nagluya sa espirituwal nag-agda sa ila sa mga pagtilipon agod magtokar sila sing popular nga musika. Bisan pa ginbaton ini dayon sang mga pamatan-on kag naluyagan nila ini nga mga sesyon, ang ila impluwensia sa isa kag isa nagdul-ong sa ila sang ulihi nga mag-untat sa pagpakig-upod sa kongregasyon. (1 Corinto 15:33; Judas 22, 23) Ang makabulig sa nagabalatian nga bata agod mag-ayo, indi ang sosyal nga mga pagtinipon nga wala sing espirituwal nga direksion, kundi ang  pagpakig-upod nga nagabulig sa iya sa pagpalambo sing kaluyag para sa espirituwal nga mga butang.⁠ *

18. Paano naton mailog ang panimuot sang amay sang buhaha sa parabola ni Jesus?

¹⁸ Kon ang isa ka pamatan-on nga nagbiya sa kongregasyon magbalik liwat sa Kingdom Hall ukon magtambong sa isa ka asambleya, hunahunaa kon ano mahimo ang ginabatyag niya. Indi bala nga dapat naton sia abiabihon subong sang ginpakita sang amay sang buhaha sa parabola ni Jesus? (Lucas 15:18-20, 25-32) Ang isa ka tin-edyer nga nagbiya sa Cristianong kongregasyon apang sang ulihi nagtambong sa isa ka distrito nga kombension nagsiling: “Pagdumdom ko indi magsapak ang tanan sa kasubong ko, apang ginpalapitan ako sang mga utod, kag gin-abiabi. Natandog gid ako.” Nagtuon sia liwat sa Biblia kag nabawtismuhan sang ulihi.

Indi Mangampo

19, 20. Ngaa dapat kita mangin positibo tuhoy sa isa ka buhaha nga anak?

¹⁹ Ang pagbulig sa isa ka “buhaha” nga anak agod “makamaradmad” nagakinahanglan sing pailob kag mahimo mangin isa ka hangkat sa mga ginikanan kag sa iban pa. Apang indi mangampo. “Si Jehova indi mahinay may kaangtanan sa iya saad, subong sang ginakabig sang iban nga kahinayon, kundi mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.” (2 Pedro 3:9) May yara kita Makasulatanhon nga pasalig nga luyag ni Jehova nga maghinulsol ang mga tawo kag mabuhi. Sa kamatuoran, sia mismo ang naghimo sing kahimusan agod makapanumbalik sa iya ang mga tawo. (2 Corinto 5:​18, 19) Bangod sang iya pagpailob, nakamaradmad ang minilyon.​​—⁠Isaias 2:​2, 3.

²⁰ Indi bala, nian, dapat gamiton sang mga ginikanan ang tanan nga Makasulatanhon nga paagi nga posible agod buligan ang ila menor-de-edad nga anak nga buhaha nga makamaradmad? Sa pag-ilog kay Jehova, mangin mainantuson samtang nagahimo kamo sing positibo nga mga tikang agod buligan ang inyo anak nga makapanumbalik kay Jehova. Sunda gid ang mga prinsipio sang Biblia, kag tinguhai nga ipakita ang mga kinaiya ni Jehova nga gugma, katarungan, kag kaalam samtang nagapangayo kamo sa iya sing bulig paagi sa pangamuyo. Subong nga madamong batinggilan nga rebelde ang nagbaton sa mahigugmaon nga pangagda ni Jehova nga manumbalik, basi man ang imo buhaha nga anak nga lalaki ukon anak nga babayi manumbalik sa maamligon nga panong sang Dios.​​—⁠Lucas 15:​6, 7.

[Mga nota]

Madumduman Mo Bala?

• Ano mahimo ang gamot sang problema kon nagabiya ang mga pamatan-on sa kongregasyon?

• Paano mabuligan ang mga pamatan-on sa pagpalambo sing personal nga kaangtanan kay Jehova?

• Ngaa dapat mangin mainantuson ang mga ginikanan apang malig-on kon nagabulig sa isa ka buhaha nga anak?

• Paano ang mga utod sa kongregasyon makabulig sa isa ka buhaha nga pamatan-on nga manumbalik?

[Mga Pamangkot sa Pagtinuon]

[Retrato sa pahina 15]

Ang pagbasa sa Pulong sang Dios importante para sa pagpalambo sing suod nga kaangtanan kay Jehova

[Retrato sa pahina 15]

Ang tinagipusuon nga pangamuyo sang mga ginikanan makabulig sa ila kabataan nga mabatyagan ang personal nga kaangtanan sang ila mga ginikanan kag ni Jehova

[Retrato sa pahina 17]

Abiabiha ang buhaha nga anak kon “makamaradmad” sia

[Retrato sa pahina 18]

Maghimo sing positibo nga mga tikang agod buligan ang imo anak nga makapanumbalik kay Jehova

[Kapsion sa pahina 18]