Ang Dalan Padulong sa Isa ka Malipayon nga Kalibutan

“ANG lamang nga labing gamhanan nga persona​​—⁠indi lamang sa sining duha ka milenyo kundi sa bug-os nga maragtas sang tawo​​—⁠amo si Jesus nga taga-Nasaret,” siling sang Time nga magasin. Sang si Jesus yari sa duta, linibo ka bunayag-tagipusuon nga mga tawo ang nakahantop, indi lamang sang iya pagkadungganon, kundi sang iya kabalaka sa iban. Busa, indi makapakibot nga luyag nila nga himuon sia nga hari. (Juan 6:​10, 14, 15) Apang, subong sang ginsambit sa nauna nga artikulo, nangindi si Jesus nga madalahig sa politika.

ANG sabat ni Jesus napasad sa di-magkubos tatlo ka butang: ang pagtamod sang iya Amay sa mga ebidensia sang pagkaindependiente sang tawo, nga nagalakip sang paggahom sang tawo; nahibaluan ni Jesus nga may yara gamhanan, natago nga mga puwersa nga nagapanghikot batok sa maayo gid nga mga panikasog sang tawo sa paggahom; kag ang katuyuan sang Dios nga magtukod sing isa ka langitnon nga panguluhan nga maggahom sa bug-os nga duta. Samtang ginausisa naton sing dugang pa ining tatlo ka punto, tan-awon naton kon ngaa napaslawan ang mga panikasog sang katawhan nga mapauswag ang kahimtangan sa kalibutan. Tan-awon man naton kon paano matigayon ang kadalag-an.

Makagahom Bala ang mga Tawo sa Ila Kaugalingon?

Sang gintuga sang Dios ang mga tawo, ginhatagan niya sila sing awtoridad sa ibabaw sang kasapatan. (Genesis 1:26) Apang ang katawhan yara sa idalom sang pagkasoberano sang Dios. Dapat pamatud-an sang una nga lalaki kag babayi ang ila pagpasakop sa Dios paagi sa matinumanon nga paglikaw sa bunga sang isa ka partikular nga kahoy, “ang kahoy sa pagkilala sang maayo kag malain.” (Genesis 2:17) Makapasubo nga gin-abusuhan nanday Adan kag Eva ang ila kahilwayan sa pagdesisyon kag ginlalis nila ang Dios. Ang pagkuha sang ginadumilian nga bunga indi lamang isa ka pagpangawat. Isa  ini ka pagrebelde batok sa pagkasoberano sang Dios. Ang footnote sa Genesis 2:​17 sa New Jerusalem Bible nagasiling nga gin-angkon nanday Adan kag Eva ang “bug-os nga kahilwayan sa moral nga paagi sa sini nagdumili ang tawo nga kilalahon ang iya kahimtangan subong isa ka tinuga . . . Ang una nga sala amo ang pag-atake sa pagkasoberano sang Dios.”

Bangod serioso nga mga hulusayon sa moral ang nadalahig, gintugutan sang Dios si Adan kag si Eva kag ang ila mga kaliwat sa pagpili sang ila dalanon sa kabuhi, kag naghimo sila sang ila kaugalingon nga mga talaksan sang husto kag sayop. (Salmo 147:​19, 20; Roma 2:14) Kon sayuron, ang pag-eksperimento sang tawo sa paghimo sang luyag niya nagsugod sadto. Nagmadinalag-on bala ini? Sa nakita naton sa nagligad nga linibo ka tuig, makasiling kita nga wala! Ang Manugwali 8:9 nagasiling: “Gingamhan sang tawo ang tawo sa iya kasamaran.” Ang makapasubo nga rekord sang paggahom sang tawo sa iya kaugalingon nagapamatuod nga husto ang Jeremias 10:23: “Nahibaluan ko, O Jehova, nga ang dalanon sang tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang.” Napamatud-an sang maragtas nga ang mga tawo wala sing ikasarang sa paggahom sing madinalag-on nga wala ang ila Manunuga.

Si Jesus nag-ugyon sing bug-os. Ang pagkaindependiente sa Dios kalangil-aran sa iya. “Wala ako nagahimo sing bisan ano sa akon kaugalingon nga pagbuot,” siling niya. “Pirme ko ginahimo ang mga butang nga kalahamut-an sa [Dios].” (Juan 4:​34; 8:​28, 29) Busa, bangod wala sing pahanugot gikan sa Dios nga batunon ang pagkahari gikan sa mga tawo, wala man lang pagbinagbinaga ni Jesus nga batunon ini. Apang, wala ini nagakahulugan nga nagpangalag-ag sia sa pagbulig sa iya isigkatawo. Sa kabaliskaran, ginhimo niya ang tanan nga masarangan niya agod buligan ang mga tawo nga makasapo sing labing daku nga kalipay sadto kag sa palaabuton. Ginhatag pa gani niya ang iya kabuhi para sa katawhan. (Mateo 5:​3-​11; 7:​24-​27; Juan 3:16) Apang nahibaluan ni Jesus nga “sa tagsa ka butang may gintalana nga tion,” lakip ang tion sang Dios nga ipilit ang iya pagkasoberano sa ibabaw sang katawhan. (Manugwali 3:⁠1; Mateo 24:​14, 21, 22, 36-​39) Apang, dumduma nga didto sa Eden nagpasakop ang aton unang mga ginikanan sa kabubut-on sang isa ka malaut nga espiritu nga tinuga nga nakighambal paagi sa isa ka kitaon nga man-ug. Ginadala kita sini sa ikaduha nga rason kon ngaa naglikaw si Jesus sa politika.

Ang Indi Kilala nga Manuggahom Sang Kalibutan

Suno sa ginasugid sa aton sang Biblia, gintanyag ni Satanas kay Jesus “ang tanan nga ginharian sang kalibutan kag ang ila himaya” bilang kabaylo sang isa ka buhat sang pagsimba. (Mateo 4:​8-​10) Buot silingon, gintanyag kay Jesus ang paggahom sa kalibutan​—⁠apang suno sa kondisyon sang Yawa. Wala magpadaug si Jesus sa sini nga pagsulay. Apang isa gid bala yadto ka pagsulay? Makatanyag gid bala si  Satanas sing subong sadto kadaku nga butang? Huo, kay gintawag mismo ni Jesus ang Yawa nga “manuggahom sang kalibutan,” kag ginlaragway sia ni apostol Pablo subong ang “dios sining sistema sang mga butang.”​​—⁠Juan 14:30; 2 Corinto 4:⁠4; Efeso 6:⁠12.

Sa pagkamatuod, nahibaluan ni Jesus nga indi interesado ang Yawa sa kaayuhan sang katawhan. Ginlaragway niya si Satanas subong “manugpatay” kag subong “amay sang kabutigan kag sang tanan nga butig.” (Juan 8:​44, The Amplified Bible) Maathag nga ang isa ka kalibutan nga “yara sa gahom” sining malaut nga espiritu indi gid mangin malipayon sing bug-os. (1 Juan 5:19) Apang indi mahuptan sang Yawa ini nga awtoridad sing dayon. Si Jesus nga isa karon ka gamhanan nga espiritu nga tinuga, magapahalin sa indi madugay kay Satanas kag dulaon niya sing bug-os ang iya impluwensia.​​—⁠Hebreo 2:​14; Bugna 20:​1-3.

Nahibaluan mismo ni Satanas nga ang iya mga adlaw subong manuggahom sa kalibutan madasig nga nagahingapos. Busa, ginahimo niya ang tanan nga masarangan niya agod indi na mareporma ang katawhan sa ila kalautan, subong sang ginhimo niya antes sang Anaw sang adlaw ni Noe. (Genesis 6:​1-5; Judas 6) “Kailo sa duta kag sa dagat,” siling sang Bugna 12:​12, “kay ang Yawa nagpanaug sa inyo nga may daku nga kaakig, kay nahibaluan niya nga malip-ot na lamang ang iya tion.” Ginapakita sang tagna sa Biblia kag sang mga nagakatabo sa kalibutan nga nagakabuhi kita malapit sa katapusan sining ‘malip-ot na lamang nga tion.’ (2 Timoteo 3:​1-5) Malapit na ang kaumpawan.

Isa ka Panguluhan nga Magadala Sing Kalipay

Ang ikatlo nga rason kon ngaa naglikaw si Jesus sa politika amo nga nahibaluan niya nga sa isa ka gintalana nga tion sa palaabuton, magatukod ang Dios sing isa ka langitnon nga panguluhan nga magagahom sa ibabaw sang duta. Ginatawag sang Biblia ini nga panguluhan nga Ginharian sang Dios, kag amo ini anay ang panguna nga tema sang pagpanudlo ni Jesus. (Lucas 4:​43; Bugna 11:15) Gintudluan ni Jesus ang iya mga disipulo nga ipangamuyo ang pagkari sini nga Ginharian, kay sa idalom lamang sang paggahom sini nga ‘himuon ang kabubut-on sang Dios sa duta kon paano sa langit.’ (Mateo 6:​9, 10) Ayhan magapalibog ka, ‘Kon ining Ginharian magagahom sa ibabaw sang bug-os nga duta, ano ang mahanabo sa hinimo sang tawo nga mga panguluhan?’

Masapwan ang sabat sa Daniel 2:​44: “Sa mga adlaw sadto nga mga hari [nga nagagahom sa katapusan sang karon nga sistema] ang Dios sang langit magapatindog sing ginharian nga indi gid malaglag. Kag ang ginharian mismo indi iliton sa iban nga katawhan. Dugmukon sini kag papason ini tanan [hinimo sang tawo] nga ginharian, kag magapadayon ini tubtob sa walay katubtuban.” Ngaa dapat “dugmukon” sang Ginharian sang Dios ang mga pagginahom sa duta? Bangod nagapamilit sila nga padayunon ang ila nagapamatok sa Dios nga espiritu sang paggahom sa kaugalingon nga ginsakdag ni Satanas didto anay sa hardin sang Eden. Dugang sa pagpanghikot batok sa kaayuhan sang katawhan, ang mga nagapanikasog nga padayunon ini nga espiritu nagapahamtang sang ila kaugalingon sa pagbungguanay batok sa Manunuga. (Salmo 2:​6-​12; Bugna 16:​14, 16) Busa, dapat naton pamangkuton ang aton kaugalingon, ‘Dampig bala kita ukon batok sa paggahom sang Dios?’

Kay Sin-o Pagkasoberano ang Pilion Mo?

Agod mabuligan ang mga tawo sa pagdesisyon pasad sa sibu nga ihibalo tuhoy sa pagginahom, ginsugo ni Jesus ang iya mga disipulo nga ibantala ang “maayong balita sang ginharian . . . sa bug-os napuy-an nga duta subong panaksi sa tanan nga kapungsuran” antes mag-abot ang katapusan sang karon nga sistema. (Mateo 24:14) Sin-o sa karon ang kilala sa bug-os nga kalibutan sa pagbantala sang Ginharian sang Dios? Ang mga Saksi ni Jehova. Sa katunayan, ining magasin madugay na nga nagadala sa panghapin sini sing mga pulong, “Nagabantala Sang Ginharian ni Jehova.” Sa karon, mga anom ka milyon ka Saksi sa kapin sa 230 ka kadutaan ang nagabulig sa mga tawo nga makatigayon sing sibu nga ihibalo tuhoy sa sini nga Ginharian.⁠ *

Mga Pagpakamaayo Para sa mga Sakop Sang Ginharian

Pirme ginhimo ni Jesus ang mga butang suno sa paagi sang Dios. Busa, sa baylo nga pilion ang independiente  nga dalanon kag magtinguha nga sakdagon ukon pauswagon ang nagaluntad na nga sistema sang mga butang paagi sa politika, nagpangabudlay sia sing lakas sa pagpauswag sang mga intereses sang Ginharian sang Dios, ang lamang nga solusyon sa mga problema sang kalibutan. Bangod sang iya katutom ginpadyaan sia sing isa ka mahimayaon nga trono sa langit subong amo gid ang Hari sini nga Ginharian. Daw ano ka dalayawon nga padya sa iya pagpasakop sa Dios!​​—⁠Daniel 7:​13, 14.

Minilyon karon nga nagailog kay Jesus sa pag-una sang Ginharian sang Dios kag sa pagpasakop sa kabubut-on sang Dios ang magaagom man sing dalayawon nga regalo​​—⁠ang pribilehiyo nga mangin dutan-on nga mga sakop sang Ginharian sang Dios. (Mateo 6:33) Sa idalom sang mahigugmaon nga paggahom sini, bayawon sila sa tawhanon nga kahimpitan, nga may paglaum sa kabuhi nga walay katapusan. (Bugna 21:​3, 4) Ang 1 Juan 2:​17 nagasiling: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.” Bangod wala na si Satanas kag ang iya mga sumulunod kag ang duta nahimo na nga isa ka bug-os kalibutan nga paraiso nga wala sing nagabahinbahin nga nasyonalismo, malaut nga komersial nga mga sistema, kag butig nga relihion, daw ano ka makalilipay gid ang magpabilin diri sing dayon!​​—⁠Salmo 37:29; 72:16.

Huo, ang Ginharian sang Dios amo ang matuod nga dalan padulong sa isa ka malipayon gid nga kalibutan, kag ang mensahe nga nagapahibalo sini nagakaigo nga ginalaragway subong maayong balita. Kon wala mo pa mahimo ini, sa masunod nga tion nga magduaw sa inyo puluy-an ang isa sang mga Saksi ni Jehova, ngaa indi mo tilawan nga pamatian ining maayong balita nga ginadala sa imo?

[Footnote]

[Mga retrato sa pahina 5]

Ang maragtas nagapamatuod nga ang mga tawo indi makagahom sing madinalag-on nga wala ang Dios

[Retrato sa pahina 5]

Bangod ginagamhan niya ang karon nga “sistema sang mga butang,” sarang matanyag ni Satanas kay Jesus ang “tanan nga ginharian sang kalibutan”

[Mga retrato sa pahina 7]

Gintudlo ni Jesus nga sa idalom sang kahimusan sang Ginharian sang Dios, ang kalibutan mangin isa ka matahom nga duog