Ang Nagahatag-Kabuhi nga Tubig Nagailig sa Andes

Ang Andes Mountains nagalambot tubtob sa tunga-tunga sang Peru, ginatunga ang pungsod nga sa pihak amo ang kigas nga rehiyon malapit sa baybayon sa katundan kag sa pihak naman amo ang madabong kag magin-ot nga kagulangan sa sidlangan. Sa sining korte-taludtod nga bahin sang bukid nagapuyo ang kapin sa ikatlo nga bahin sang 27 milyones ka pumuluyo sang Peru. Nagapuyo sila sa mataas nga mga plateau kag pulupil-ason nga mga kiliran sang Andes ukon sa tama kadalom nga mga pil-as kag mauyahon nga mga nalupyakan sini nga kabukiran.

 ANG kudolkudol nga kabukiran sang Andes indi madali sudlon. Subong resulta, ang minilyon nga nagapuyo didto daw napain, halos indi apektado sang mga nagakalatabo sa guwa sang ila teritoryo.

Magamay nga mga minuro ang nag-inulhot sa higad sang mga suba agod makatigayon sing tubig para sa mga pananom kag mga panong sang llama, alpaca, vicuña, kag mga karnero. Apang, may isa pa ka sahi sang importante nga tubig nga nagailig sa Andes​​—⁠ang makapaumpaw nga espirituwal nga tubig nga nagagikan kay Jehova, “ang tuburan sang tubig nga buhi.” (Jeremias 2:13) Ginagamit sang Dios ang iya mga Saksi agod buligan ang mga tawo sa minuro nga nagapuyo sa mataas nga mga bahin sang Andes nga makatigayon sing sibu nga ihibalo tuhoy sa iya kag sa iya mga katuyuan.​​—⁠Isaias 12:⁠3; Juan 17:3.

Sanglit kabubut-on sang Dios nga “ang tanan nga sahi sang tawo maluwas kag makadangat sa sibu nga ihibalo sang kamatuoran,” nagapanikasog gid ining mga ministro nga madala ang nagahatag-kabuhi nga mensahe sang Biblia sa mabudlay lab-uton nga mga komunidad. (1 Timoteo 2:4) Ining napasad sa Biblia nga mensahe makapasanag kag dungganon. Naghilway ini sa bunayag-tagipusuon nga mga tumandok gikan sa mga disparatis, mga kinabatasan, kag mga ideya nga nagpahadlok sa ila sa mga patay, sa malaut nga mga espiritu, kag sa mga puwersa sang kinaugali. Kapin ka importante, ini nga mensahe nagahatag sa ila sing makalilipay gid nga paglaum sa kabuhi nga walay katapusan sa isa ka paraiso nga duta.

Pagpanikasog

Ang mga manugbantala sang Ginharian nga nagaduaw sa sining nabaw-ing nga mga rehiyon dapat maghimo sing madamo nga pagpasibu. Agod malab-ot ang tagipusuon sang mga tawo, dapat may nahibal-an man lang ang mga manunudlo sang Biblia sa Quechua ukon Aymara, ang duha ka lokal nga lenguahe.

Indi mahapos kadtuan ang mga minuro sa Andes. Wala sing madamo nga riles sa sini nga mga duog. Delikado ang pagbiyahe kag depende ini sa malain nga tiempo kag indi kinaandan nga sahi sang duta. Kon amo, paano ginalab-ot sang mga Saksi ang katawhan agod dalhon sa ila ang mensahe sang Ginharian?

Ginbaton sang maisugon nga mga manugbantala sing maayong balita ang hangkat kag nagsabat kaangay ni manalagna Isaias: “Yari ako! Ipadala ako.” (Isaias 6:8) Naggamit sila sing tatlo ka mobile home sa pagkadto sa aminhan, sentral, kag nabagatnan nga mga duog. Dala ang madamo nga karton sang mga Biblia kag mga literatura sa Biblia, ang makugi nga mga payunir, ukon bug-os tion nga mga ministro, nagsab-ug sing mga binhi sang kamatuoran sang Biblia sa tunga sang mainabyanon, maabiabihon, kag bunayag-tagipusuon nga mga tawo nga nagapuyo didto.

Labi gid nga makatalagam ang kurbada nga mga dalan sa bukid. Agod makaagi sa pila sini, ang mga salakyan dapat anay mag-abante diutay, dayon magdulog, kag mag-atras, kag dayon mag-abante paliko. Sa tion sang isa sini nga maniobra, ang isa ka misyonero nga nagapungko sa buli sang bus naglaaw sa bintana kag nakita niya nga ang isa sang pangulihi nga mga ruyda nagatibi gid sa isa ka pil-as nga kapin sa 190 metros ang kadalumon! Ginpiyong niya ang iya mga mata tubtob nakalampas ang bus.

Ang iban nga mga dalan batsehon kag tuman kakitid. Sang nagaagi sa sining batsehon nga dalan, ang isa sang mga mobile home nagapadulhog sa isa ka makitid nga dalan sang masugata sini ang isa ka trak nga nagapataklad. Ang mobile home nag-isol pataklad sa isa ka duog diin igoigo lang nga magsugataay ang duha ka salakyan.

Walay sapayan sini, nangin talalupangdon gid ang mga resulta sining makugi nga mga panikasog. Luyag mo bala mahibal-an sing dugang pa ang tuhoy sa sining mga panikasog?

“Pagpatubig” sa Lake Titicaca

Sa isa ka nalupyakan sang Andes Mountains nga 3,800 metros sa ibabaw sang katupungan sang dagat, ang Lake Titicaca amo ang pinakamataas nga linaw sa bug-os nga kalibutan nga nahamtang sa naligwin nga duog kag sarang masudlan sang sakayan. Ang nakulapan sing yelo nga mga putukpukan sang bukid, ang iban sini kapin sa 6,400 metros ang kataason, amo ang ginahalinan sang kalabanan sang 25 ka suba nga nagapatubig sa Titicaca. Bangod sang kataason, ang klima mabugnaw, kag ang mga indi taga-diri ginahawa.

Sang isa ka tion nga nagligad, ang isa ka grupo sang mga payunir nga nagahambal sing Quechua  kag Aymara nagpanakayon sa Lake Titicaca padulong sa mga isla sang Amantani kag Taquile. Nagdala sila sing slide nga presentasyon nga natig-uluhan “Masusi nga Pag-usisa sa mga Iglesia,” isa ka prangka nga pag-usisa sa kabutigan sang Cristiandad. Maayo ang pagbaton sa sini. Gin-abiabi sang isa ka tawo ang mga utod kag gintanyag ang isa ka maligwa nga hulot sa iya puluy-an agod makatener sila kag itudlo ang Biblia.

Ang una nga miting sa Amantani gintambungan sang 100 ka tawo; ang miting sa Taquile gintambungan sang 140. Ang presentasyon ginhatag sa Quechua nga hambal. Ang isa ka mag-asawa nga nagapuyo anay sa mainland nagsiling: “Tion na nga madumduman kami ninyo nga mga Saksi ni Jehova. Madugay na namon ginapangamuyo ang inyo pag-abot.”

Luwas sa sining duha ka daku nga isla, ang pila sang ginabanta nga 40 ka “nagalutaw” nga isla sa Lake Titicaca nalab-ot man sang maayong balita. Nagalutaw nga mga isla? Huo, nahuman ini sang totoras, mga tabun-ak nga nagapamuhi sa manabaw nga mga bahin sang linaw. Ang totoras nagatubo sa idalom sang tubig kag nagalusot sa kadaygan sini. Sa paghimo sing isa ka isla, ginahapay sang mga tumandok ang mga tabun-ak, nga ang gamot yara sa idalom sang linaw, kag ginabulubalighot ang mga ini agod maghimo sing plataporma. Nian, ang plataporma ginadasukan sing lunang kag ginadugangan pa sing nautod-utod nga mga tabun-ak agod magpag-on. Ang mga tawo nagapuyo sa mga kamalig nga buhat sa tabun-ak nga natukod sa ibabaw sang plataporma.

Nakatigayon ang mga Saksi ni Jehova sing sakayan agod gamiton sa pagbantala sa mga tawo sa mga isla sang Lake Titicaca. Ang sakayan makalulan sing 16 ka tawo. Sa tapos magdungka sa nagalutaw nga mga isla, nagalakat ang mga Saksi sa tabun-ak nga plataporma sa pagpamalaybalay. Nagasiling sila nga sa masami mabatyagan nila ang diutay nga pag-uyog sang kadaygan nga ginatapakan nila. Indi ini ang duog para sa dalagaton nga mga tawo!

Tuhoy sa nagahambal sing Aymara nga populasyon, nagapuyo sila sa madamo nga komunidad kag minuro sa higad sang baybay kag sa mga peninsula nga nagasiwil sa linaw. Madali ini sudlon paagi sa sakayan sangsa mag-agi sa duta. Sa kabilugan, ginabanta nga halos 400,000 ka tawo ang nagapuyo sa rehiyon nga ginadalhan sining mga sakayan sing mensahe sang Ginharian. Ang mga sakayan mangin masako sa pila ka tion nga magaabot.

Pagpaumpaw sa Espirituwal nga Kauhaw

Si Flavio nagapuyo sa minuro sang Santa Lucía, malapit sa Juliaca, sa Andes. Sa iya Evangelical Church, gintudluan sia sing doktrina sang kalayuhon nga impierno. Sa sulod sang mga tinuig nagkabuhi sia nga may kahadlok sa sining dayon nga silot sa kalayo. Pirme sia nagapalibog kon paano mahimo sang Dios sang gugma nga paantuson sing dayon ang mga tawo sa kalayo. Sang si Tito, isa ka bug-os tion nga ministro sang mga Saksi ni Jehova, nagduaw sa minuro, nakadtuan niya si Flavio.

Ang isa sang una nga ginpamangkot ni Flavio amo, “Nagatudlo bala ang inyo relihion nga ang mga tawo ginapaantos sa kalayuhon nga impierno?” Nagsabat si Tito nga ini nga ideya kalangil-aran sa Manunuga kag nagadala sing kahuy-anan sa ngalan ni Jehova, ang Dios sang gugma. Ginagamit ang mismo bersion sang Biblia ni Flavio, ginpakita ni Tito sa iya nga ang mga patay wala gid sing pangalibutan kag nagahulat sila sing pagkabanhaw sa duta sa idalom sang Ginharian sang Dios. (Manugwali 9:⁠5; Juan 5:​28, 29) Nabuksan ang kaisipan ni Flavio sa sini. Sa gilayon, ginbaton niya ang isa ka pagtuon sa Biblia kag wala magdugay nangin isa ka bawtismado nga Cristiano.

Isa ka Mainapresyahon nga Minuro

Handurawa kon daw ano ka makakulunyag nga dalhon ang Kasulatan sa mga taga-minuro nga wala pa gid anay makakita sing isa ka kopya sang Biblia ukon magbantala sa mga minuro diin ang mga tawo wala pa gid makabati anay tuhoy sa mga Saksi ni Jehova ukon tuhoy sa maayong balita nga ila ginabantala! Amo ini ang naeksperiensiahan sang tatlo ka payunir nga utod nga babayi​​—⁠sanday Rosa, Alicia, kag Cecilia​​—⁠nga nagbantala sa mga minuro sang Izcuchaca kag Conayca, nga nahamtang sa kataason nga kapin sa 3,600 metros sa sentral nga Peru.

Pag-abot nila sa una nga minuro, wala sila sing madayunan. Ginhambal nila ang lokal nga kumander sang pulisiya, nga ginapaathag ang rason sang  ila pagduaw. Ang resulta? Gintugutan sila nga magpaligad sang gab-i sa estasyon sang pulisiya. Pagkadason nga adlaw, nakakita ang mga payunir sing permanente nga dalayunan nga nangin sentro sang ila mga pagpanghikot.

Wala madugay nag-abot ang tion para sa tuigan nga Memoryal sang kamatayon ni Cristo. Naduaw sang mga payunir ang tanan nga balay sa minuro sang Izcuchaca, nakapahamtang sing madamo nga Biblia, kag nakasugod sing pila ka pagtuon sa Biblia. Antes sang Memoryal, nagpadala sila sing mga imbitasyon para sa sini nga okasyon, nga ginapaathag ang katuyuan sang selebrasyon kag ang kahulugan sang mga emblema nga gamiton sa tion sang pagsaulog. Isa ka grupo sang kauturan nga lalaki ang gin-agda sa pagbulig sa sini nga okasyon, kag isa sa ila ang naghatag sang pamulongpulong. Makalilipay nga makita ang 50 ka tawo gikan sa sining gamay nga minuro nga nagtambong sa sining pinasahi nga okasyon! Sa una nga tion, karon pa lang nila nahangpan kon ano gid ang kahulugan sang Panihapon sang Ginuo. Subong man, hamili gid para sa ila nga ginauyatan nila ang Pulong sang Dios!

Kahilwayan Gikan sa Mabug-at nga mga Lulan

Ang pagdala sing makapaumpaw nga tubig sang kamatuoran sang Biblia sa mga bihag sang butig nga relihion pirme makalilipay. Ang Pisac amo ang kuta sang dumaan nga Emperyo sang mga Inca. Ang kalabanan sang mga tawo nga nagapuyo didto gintudluan sing di-makasulatanhon nga panudlo sang kalayuhon nga impierno. Ginasugiran sila sang ila mga pari nga makakadto lamang sila sa langit paagi sa pagpatunga sang mga pari.

Gani, halangpunon nga ini nga mga tawo ginauhaw sa makapaumpaw nga tubig sang kamatuoran sang Biblia. Sang nagabantala sa kabalayan, si Santiago, isa ka bug-os tion nga ministro sang mga Saksi ni Jehova, nakahigayon nga ipaathag sa isa ka tawo nga ang mga matarong magapuyo sa isa ka paraiso nga duta. (Salmo 37:11) Ginpakita ni Santiago sa Biblia nga ang mga patay pagabanhawon kag ang katawhan pagatudluan sing himpit nga mga dalanon ni Jehova agod makatigayon sing kabuhi nga walay katapusan. (Isaias 11:9) Antes sini, ini nga lalaki isa ka debotado nga Katoliko, nagapakigbahin sa espiritismo, kag palainom. Karon, may yara na sia napasad sa Biblia nga paglaum kag isa ka tulumuron sa kabuhi​​—⁠ang magkabuhi sa Paraiso. Ginpangsunog niya ang tanan niya nga gamit sa espiritismo kag nag-untat sa pag-inom. Gintipon niya ang iya pamilya kag ginbaton ang pagtuon sa Biblia. Sang ulihi, ang bug-os nga pamilya nagdedikar sang ila kaugalingon kay Jehova nga Dios kag nabawtismuhan.

Ginbaton ang Pagkamaabiabihon

Maabiabihon gid ang mga tagabukid. Bisan pa gamay lamang ang ila mga balay kag pigado ang mga tawo, ginatanyag nila sa mga bisita ang kon ano ang may yara sila. Kon indi pa mahibal-an ang mataas nga mga talaksan sang Biblia, ang isa ka tagbalay mahimo magtanyag sa isa ka bisita sing mga dahon sang coca agod usapon samtang nagahambalanay sila. Apang sa tion nga mangin Saksi na ang isa, mahimo nga magatanyag sia sing isa ka kutsara sang kalamay, nga pareho lang sing balor sa mga dahon sang coca sa nabaw-ing nga mga probinsia.

Nanghagad ang isa ka utod nga lalaki sa isa ka misyonero nga updan sia sa isa ka pagduaw liwat. Sa tapos sang mabudlay nga pagtaklad sa taklaron nga banas sa bukid, ginpalakpak nila ang ila mga kamot agod ipahibalo sa tagbalay ang ila pag-abot. Ginpasulod sila sa isa ka balay nga kugon ang atop, kag kinahanglan nga magduko sila agod makasulod sa manubo nga puwertahan. Nagapangalihid nga nag-agi sila sa tunga sang duta nga salog, diin nagkutkot ang iloy sing isa ka buho, ginhapinan ini sang habol, kag ginbutang ang iya bata. Bangod indi sia makaguwa, kontento na lamang ining bata sa pag-uluudyak samtang nagahambalanay ang mga may-edad. Sa tapos sang ila mapagsik nga paghambalanay tuhoy sa mga pagpakamaayo sang Ginharian, ginpaguwa sang babayi ang isa ka mataas nga suludlan sang lokal nga ilimnon. Wala magdugay nagdulhog na ang mga utod sa kiliran sang bukid para sa dugang pa nga mga pagduaw.

Isa ka Bugana nga Ani

Sa karon sa sining rehiyon, may yara na mga isa ka gatos ka naligwin nga mga grupo sang mga Saksi ni Jehova nga may kapin sa isa ka libo ka tawo nga nagatuon sang Biblia upod sa ila. Ang mga gradwado sang Ministerial Training School sa Lima ginapadala agod buligan ining mga grupo nga mangin mga kongregasyon. Ang matarong sing tagipusuon nga mga indibiduwal nga nabihag sang butig nga relihion kag mga disparatis sa madugay nga tion nakasapo sing kahilwayan paagi sa maayong balita sang Ginharian! (Juan 8:32) Ang ila kauhaw sa tubig sang kamatuoran napaumpawan.

[Retrato sa pahina 10]

Ang pagpanaksi sa “nagalutaw” nga mga isla sang Lake Titicaca