Tigayuna ang Tagipusuon nga Kalahamut-an kay Jehova

“Tugaha sa akon ang isa ka putli nga tagipusuon, O Dios, kag ibutang sa sulod ko ang isa ka bag-o nga espiritu, ang isa nga mabakod.”​—⁠SALMO 51:10.

1, 2. Ngaa dapat kita mangin interesado sa aton tagipusuon?

MATAAS sia kag maambong. Sang makita sia, si manalagna Samuel nagdayaw gid amo nga naghinakop sia nga ining kamagulangan nga anak nga lalaki ni Jesse amo ang ginpili sang Dios nga magabulos kay Saul sa paghari. Apang si Jehova nagsiling: ‘Indi ka magtulok sa panagway [sina nga anak] kag sa iya kataason, bangod ginsikway ko sia. . . . Ang tawo nagatulok sa kon ano ang makita sang mga mata; apang tuhoy kay Jehova, nagatulok sia sa tagipusuon.’ Ang pinili ni Jehova amo ang kamanghuran nga anak nga lalaki ni Jesse, si David​—⁠“isa ka lalaki nga kalahamut-an sa iya tagipusuon.”​—⁠1 Samuel 13:14; 16:7.

² Mabasa sang Dios ang tagipusuon sang tawo, kay gin-athag niya sang ulihi: “Ako, si Jehova, nagausisa sang tagipusuon, nagasayasat sang mga batobato, sa paghatag sa kada isa suno sa iya mga dalanon, suno sa bunga sang iya mga pagpakig-angot.” (Jeremias 17:10) Huo, “si Jehova amo ang manugsayasat sang mga tagipusuon.” (Hulubaton 17:3) Apang, ano nga tagipusuon ang ginasayasat ni Jehova sa isa ka tawo? Kag ano ang himuon naton agod matigayon ang tagipusuon nga kalahamut-an sa iya?

“Ang Tinago nga Pagkatawo Sang Tagipusuon”

3, 4. Sa anong kahulugan ang tinaga nga “tagipusuon” panguna nga ginagamit sa Biblia? Maghatag sing mga halimbawa.

³ Ang tinaga nga “tagipusuon” mabasa sing mga isa ka libo ka beses sa Balaan nga Kasulatan. Sa masami ginagamit ini sa malaragwayon nga kahulugan. Halimbawa, si Jehova nagsiling kay manalagna Moises: “Ipamulong sa mga anak ni Israel, agod magtipon sila sing amot para sa akon: Gikan sa tagsa ka tawo nga ginapahulag sang iya tagipusuon magtipon kamo sing amot para sa akon.” Kag ang mga nag-amot “nag-abot, ang tagsatagsa nga ginpahulag sang iya tagipusuon.” (Exodo 25:⁠2; 35:21) Maathag nga ang isa ka bahin sang malaragwayon nga tagipusuon amo ang motibasyon​—⁠ang nasulod nga puwersa nga nagapahulag sa aton sa pagpanghikot. Ginapakita man sang aton malaragwayon nga tagipusuon ang aton mga emosyon kag mga balatyagon, ang aton mga handum kag mga luyag. Ang tagipusuon mahimo magsingkal sa kaakig ukon mahugakom sa kahadlok, magkalisod ukon magkasadya.  (Salmo 27:⁠3; 39:⁠3; Juan 16:22; Roma 9:2) Mahimo ini mangin bugalon ukon mapainubuson, mahigugmaon ukon madinumtanon.​—⁠Hulubaton 16:⁠5; Mateo 11:29; 1 Pedro 1:22.

⁴ Sing nagakahisuno, ang “tagipusuon” masami ginaangot sa motibasyon kag emosyon, samtang ang “hunahuna” ilabi na nga may kaangtanan sa kinaalam. Amo sini kon paano dapat hangpon ining mga termino kon mabasa ini sa isa ka konteksto sa Kasulatan. (Mateo 22:37; Filipos 4:7) Apang ang tagipusuon kag hunahuna mahimo kon kaisa magpatuhoy sa isa lang ka butang. Halimbawa, ginlaygayan ni Moises ang mga Israelinhon: “Dumdumon mo sa imo tagipusuon [ukon, “hupti sa imo hunahuna,” footnote] nga si Jehova ang matuod nga Dios.” (Deuteronomio 4:39) Sa mga escriba nga nagpadihot batok sa iya, si Jesus nagsiling: “Ngaa bala nagahunahuna kamo sing malaut nga mga butang sa inyo mga tagipusuon?” (Mateo 9:4) Ang ‘paghangop,’ “ihibalo,” kag “pangatarungan” mahimo man maangot sa tagipusuon. (1 Hari 3:12; Hulubaton 15:14; Marcos 2:6) Busa, ang malaragwayon nga tagipusuon mahimo man nga maglakip sa aton kinaalam​—⁠sa aton hunahuna ukon sa aton ighalangop.

5. Ano ang ginarepresentar sang malaragwayon nga tagipusuon?

⁵ Suno sa isa ka reperensia, ang malaragwayon nga tagipusuon nagarepresentar sa “pinakaimportante gid nga bahin sa kabilugan, sa nasulod nga kinaugali, hunahuna, ukon balatyagon, kag busa nagarepresentar ini sa nasulod nga pagkatawo subong nga nagapadayag sang iya kaugalingon sa iya tanan nagkalainlain nga hilikuton, sa iya handum, luyag, emosyon, balatyagon, katuyuan, sa iya hunahuna, paghantop, imahinasyon, sa iya kaalam, ihibalo, kalantip, sa iya pagtuluuhan kag sa iya pangatarungan, sa iya memorya kag sa iya pagkaalerto.” Nagarepresentar ini sa kon ano gid kita sa sulod, “ang tinago nga pagkatawo sang tagipusuon.” (1 Pedro 3:4) Amo ini ang ginatan-aw kag ginasayasat ni Jehova. Gani, si David makapangamuyo: “Tugaha sa akon ang isa ka putli nga tagipusuon, O Dios, kag  ibutang sa sulod ko ang isa ka bag-o nga espiritu, ang isa nga mabakod.” (Salmo 51:10) Paano naton matigayon ang putli nga tagipusuon?

“Ihugod ang Inyo Tagipusuon” sa Pulong Sang Dios

6. Ano nga laygay ang ginhatag ni Moises sa Israel samtang nagakampo sila sa Kapatagan sang Moab?

⁶ Sang ginlaygayan ang mga anak ni Israel nga nagtipon sa Kapatagan sang Moab antes sang pagsulod sa Ginsaad nga Duta, si Moises nagsiling: “Ihugod ang inyo tagipusuon sa tanan nga pulong nga ginapamulong ko subong paandam sa inyo karon, agod nga isugo ninyo sa inyo mga anak nga magbantay sila sa paghimo sang tanan nga pulong sini nga kasuguan.” (Deuteronomio 32:46) Ang mga Israelinhon dapat “magpamati sing maayo.” (Knox) Paagi lamang sa paghibalo sing maayo sang mga sugo sang Dios nga mapatudok nila ini sa ila mga anak.​—⁠Deuteronomio 6:6-8.

7. Ano ang nadalahig sa ‘paghugod sang aton tagipusuon’ sa Pulong sang Dios?

⁷ Ang panguna nga kinahanglanon agod makatigayon sing putli nga tagipusuon amo ang pagkuha sing sibu nga ihibalo sa kabubut-on kag mga katuyuan sang Dios. Isa lamang ang ginhalinan sini nga ihibalo, ang inspirado nga Pulong sang Dios. (2 Timoteo 3:​16, 17) Apang, ang ihibalo lamang indi makabulig sa aton nga makatigayon sing tagipusuon nga nagapahamuot kay Jehova. Agod ang ihibalo may epekto sa kon ano gid kita sa sulod, dapat naton ‘ihugod ang aton tagipusuon,’ ukon “dumdumon,” ang aton natun-an. (Deuteronomio 32:​46, An American Translation) Paano ini ginahimo? Si salmista David nagpaathag: “Nadumduman ko ang mga adlaw nga nagligad; ginpamalandungan ko ang tanan mo nga hinimuan; kinabubut-on ko nga ginhunahuna ang binuhatan sang imo mga kamot.”​—⁠Salmo 143:5.

8. Ano nga mga pamangkot ang mabinagbinag naton samtang nagatuon kita?

⁸ Dapat man naton pamalandungan sing mapinasalamaton ang hilikuton ni Jehova. Kon nagabasa sing Biblia ukon sing mga publikasyon pasad sa Biblia, dapat naton binagbinagon ang mga pamangkot subong sang: ‘Ano ang ginatudlo sini sa akon tuhoy kay Jehova? Ano nga mga kinaiya ni Jehova ang nakita ko diri? Ano ang ginatudlo sa akon sini nga kasaysayan tuhoy sa luyag kag indi luyag ni Jehova? Ano ang mga resulta sang paglakat sa dalanon nga naluyagan ni Jehova kon ipaanggid sa paglakat sa dalanon nga ginadumtan niya? Ano ang kaangtanan sini nga impormasyon sa akon na nga nahibaluan?’

9. Daw ano ka mapuslanon ang personal nga pagtuon kag pagpamalandong?

⁹ Ginapaathag sang 32-anyos nga si Lisa⁠ * kon paano niya naapresyar ang kapuslanan sang may katuyuan nga pagtuon kag pagpamalandong: “Sa tapos ako mabawtismuhan sang 1994, medyo aktibo ako sa kamatuoran sa sulod sang duha ka tuig. Nagatambong ako sa tanan nga Cristianong miting, nagahinguyang sing mga 30 tubtob 40 ka oras kada bulan sa ministeryo sa latagon, kag nagapakig-upod sa mga masigka-Cristiano. Nian nagsugod ako nga madaldal palayo. Nalunod gid ako amo nga nalapas ko pa gani ang kasuguan sang Dios. Apang nakamarasmas ako kag namat-od nga tinluan ang akon kabuhi. Nalipay gid ako nga ginkilala ni Jehova ang akon paghinulsol kag ginbaton ako liwat! Masunson ko ginahunahuna: ‘Ngaa nagpahilayo ako?’ Ang sabat nga pirme ko madumduman amo nga ginpatumbayaan ko ang may katuyuan nga pagtuon kag pagpamalandong. Ang kamatuoran sang Biblia wala gid makalab-ot sa akon tagipusuon. Sugod sadto, ang personal nga pagtuon kag pagpamalandong pirme na nangin importante nga bahin sang akon kabuhi.” Samtang nagauswag kita sa aton ihibalo kay Jehova, sa iya Anak, kag sa iya Pulong, daw ano gid ka importante nga maghinguyang kita sing tion para sa makahulugan nga pagpamalandong!

10. Ngaa hilingagawon nga maghinguyang kita sing tion para sa personal nga pagtuon kag pagpamalandong?

¹⁰ Sa sining masako nga kalibutan, ang pagpangita sing tion para sa pagtuon kag sa pagpamalandong mabudlay gid. Apang, ang mga Cristiano karon nagatindog na sa atangan sang isa ka makalilipay nga Ginsaad nga Duta​—⁠ang matarong nga bag-ong kalibutan sang Dios. (2 Pedro 3:13) Ang makapakibot nga mga hitabo, subong sang paglaglag sa “Babilonia nga Daku” kag pagsalakay ni “Gog sang duta sang Magog” sa katawhan ni Jehova, malapit na. (Bugna 17:​1, 2, 5, 15-17; Ezequiel 38:1-4, 14-16; 39:2) Ang nagahulat sa unhan mahimo magtilaw sang aton gugma kay Jehova. Hilingagawon gid nga magbakal kita karon sing nagakaigo  nga tion kag ihugod ang aton tagipusuon sa Pulong sang Dios!​—⁠Efeso 5:​15, 16.

‘Ihanda ang Imo Tagipusuon sa Pagkonsulta sa Pulong Sang Dios’

11. Paano mapaanggid sa duta ang aton tagipusuon?

¹¹ Ang malaragwayon nga tagipusuon mapaanggid sa duta diin ang binhi sang kamatuoran mahimo itanom. (Mateo 13:18-23) Ang literal nga duta masami nga ginasuk-ad agod pat-uron ang maayo nga pagtubo sang tanom. Sing kaanggid, ang aton tagipusuon dapat ihanda agod mangin mas mabinatunon ini sa Pulong sang Dios. “Ginhanda ni Esdras [nga saserdote] ang iya tagipusuon sa pagkonsulta sa kasuguan ni Jehova kag sa paghimo sini.” (Esdras 7:10) Paano naton ihanda ang aton tagipusuon?

12. Ano ang makabulig sa paghanda sang tagipusuon para sa pagtuon?

¹² Ang pinakamaayo nga paghanda sang tagipusuon kon ginakonsulta naton ang Pulong sang Dios amo ang tinagipusuon nga pangamuyo. Ang Cristianong mga miting sang matuod nga mga sumilimba ginabuksan kag ginatakpan sang pangamuyo. Daw ano gid ka nagakaigo nga sugdan naton ang tagsa ka personal nga pagtuon sa Biblia sing sinsero nga pangamuyo kag nian huptan ang mapangamuyuon nga panimuot sa tion sang aton pagtuon!

13. Agod matigayon ang tagipusuon nga kalahamut-an kay Jehova, ano ang dapat naton himuon?

¹³ Ang malaragwayon nga tagipusuon dapat ihanda agod ipahigad ang ginahaumhaum na nga mga opinyon. Ang relihioso nga mga lider sang panahon ni Jesus indi luyag sa paghimo sini. (Mateo 13:15) Sa pihak nga bahin, ang iloy ni Jesus, si Maria, naghinakop sa “iya tagipusuon” pasad sa mga kamatuoran nga nabatian niya. (Lucas 2:​19, 51) Nangin matutom nga disipulo sia ni Jesus. Si Lidia nga taga-Tiatira nagpamati kay Pablo, “kag ginbuksan ni Jehova ang iya tagipusuon agod magpamati.” Nangin tumuluo man sia. (Binuhatan 16:​14, 15) Kabay nga indi gid kita magpakatig-a sa aton personal nga mga ideya ukon ginapakabahandi nga mga doktrina. Sa baylo, mangin handa kita nga “masapwan ang Dios nga matuod, bisan pa masapwan ang tagsa ka tawo nga butigon.”​—⁠Roma 3:4.

14. Paano naton mahanda ang aton tagipusuon sa pagpamati sa Cristianong mga miting?

¹⁴ Ang paghanda sang tagipusuon sa pagpamati sa Cristianong mga miting importante gid. Ang mga tublag mahimo magpahilayo sang aton igtalupangod sa kon ano ang ginahambal. Ang ginbungat nga mga pulong mahimo nga may diutay lamang nga impluwensia sa aton kon masako kita sa mga butang nga nagakatabo sa sina nga adlaw ukon nabalaka kita sa kon ano ang aton himuon sa buwas. Dapat mamat-od gid kita sing malig-on sa pagpamati kag sa pagtuon agod makabenepisyo kita sa kon ano ang ginahambal. Daw ano gid nga mga benepisyo ang matigayon naton kon determinado kita nga hangpon ang mga kasulatan nga ginapaathag kag ang kahulugan nga ginahatag sa sini!​—⁠Nehemias 8:5-8, 12.

15. Paano kita ginabuligan sang pagkamapainubuson nga mangin mas madali tudluan?

¹⁵ Subong nga ang pagdugang sing nagakaigo nga mga suplemento mahimo magpatambok sang pisikal nga duta, ang aton man pagpalambo sing pagkamapainubuson, pagkagutom sa espirituwalidad, pagsalig, diosnon nga kahadlok, kag gugma sa Dios makapapagros sang aton malaragwayon nga tagipusuon. Ang pagkamapainubuson nagapahumok sang tagipusuon, nagabulig sa aton nga mangin mas madali matudluan. Si Jehova nagsiling kay Hari Josias sang Judea: “Bangod nga ang imo tagipusuon mahumok amo nga nagpaubos ka bangod kay Jehova sang pagkabati mo sang ginpamulong ko . . . kag naghibi sa akon atubangan, ako, ako mismo, nagpamati.” (2 Hari 22:19) Ang tagipusuon ni Josias mapainubuson kag mabinatunon. Bangod sang pagpaubos, nahangpan kag naaplikar sang “wala sing tinun-an kag kinaandan lamang” nga mga disipulo ni Jesus ang espirituwal nga mga kamatuoran nga wala mahangpan sang “mga maalam kag mga utukan” nga lalaki. (Binuhatan 4:13; Lucas 10:21) Kabay nga “magpaubos [kita] sa atubangan sang [aton] Dios” samtang nagatinguha kita nga makatigayon sing tagipusuon nga kalahamut-an kay Jehova.​—⁠Esdras 8:21.

16. Ngaa kinahanglan ang panikasog agod mapalambo ang pagkagutom sa espirituwal nga pagkaon?

¹⁶ Si Jesus nagsiling: “Malipayon ang mga mahunahunaon sang ila espirituwal nga kinahanglanon.” (Mateo 5:3) Samtang ginhatagan kita sing ikasarang para sa espirituwalidad, ang mga pag-ipit gikan sa sining malauton nga kalibutan ukon ang mga kinaiya subong sang katamad mahimo magpaburon sang aton pagkamahunahunaon sa aton kinahanglanon. (Mateo 4:4) Dapat naton palambuon ang maayo nga gana sa espirituwal nga pagkaon. Bisan pa nga sa  primero wala kita malipay sa pagbasa sing Biblia kag sa personal nga pagtuon, paagi sa pagkamapinadayunon ang ihibalo mangin ‘kalahamut-an sa aton kalag,’ amo nga malangkagon naton nga ginahulat ang mga tion sang pagtuon.​—⁠Hulubaton 2:​10, 11.

17. (a) Ngaa si Jehova takus sang aton bug-os nga pagsalig? (b) Paano naton mapalambo ang pagsalig sa Dios?

¹⁷ “Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop,” laygay ni Hari Solomon. (Hulubaton 3:5) Ang tagipusuon nga nagasalig kay Jehova nakahibalo nga ang bisan ano man nga Iya ginapangabay ukon ginasugo paagi sa iya Pulong pirme husto. (Isaias 48:17) Si Jehova takus gid sang aton bug-os nga pagsalig. Masarangan niya nga tumanon ang tanan niya nga katuyuan. (Isaias 40:​26, 29) Aba, ang iya mismo ngalan literal nga nagakahulugan sing “Ginapahanabo Niya nga Mangin Amo,” nga nagatukod sing pagsalig sa iya ikasarang sa pagtuman sa kon ano ang ginsaad niya! “Matarong [sia] sa tanan niya nga dalanon kag mainunungon sa tanan niya nga binuhatan.” (Salmo 145:17) Sa pagkamatuod, agod mapalambo ang pagsalig sa iya, kinahanglan naton ‘tilawan kag tan-awon nga si Jehova maayo’ paagi sa pag-aplikar sang aton natun-an sa Biblia sa personal naton nga kabuhi kag paagi sa pagbinagbinag sang mga kaayuhan nga ginahatag sini.​—⁠Salmo 34:8.

18. Paano ang diosnon nga kahadlok nagabulig sa aton nga mangin mabinatunon sa panuytoy sang Dios?

¹⁸ Nagapatalupangod sang isa pa ka kinaiya nga nagahimo sang aton tagipusuon nga mabinatunon sa panuytoy sang Dios, si Solomon nagsiling: “Kahadluki si Jehova kag magtalikod sa malaut.” (Hulubaton 3:7) Si Jehova nagsiling nahanungod sa dumaan nga Israel: “Kon mapalambo lamang nila kuntani ang ila tagipusuon sa pagkahadlok sa akon kag sa pagtuman pirme sang tanan ko nga sugo, agod nga magmaayo sa ila kag sa ila mga anak tubtob sa tion nga walay latid!” (Deuteronomio 5:29) Huo, ang mga nagakahadlok sa Dios nagatuman sa iya. May ikasarang si Jehova nga “ipakita ang iya kusog tungod sa ila nga ang tagipusuon himpit ayon sa iya” kag silutan ang mga nagalapas sa iya. (2 Cronica 16:9) Kabay nga ang matinahuron nga kahadlok nga indi pagpahamut-an ang Dios magatuytoy sang aton tanan nga buhat, hunahuna, kag emosyon.

‘Higugmaa si Jehova sa Bug-os Mo nga Tagipusuon’

19. Ano nga papel ang ginatungod sang gugma sa paghimo sang aton tagipusuon nga mabinatunon sa panuytoy ni Jehova?

¹⁹ Labaw sa tanan iban pa nga mga kinaiya, ang gugma nagahimo gid sang aton tagipusuon nga mabinatunon sa panuytoy ni Jehova. Ang tagipusuon nga puno sing gugma sa Dios nagahimo sa isa ka tawo nga malangkag sa pagtuon kon ano ang nagapahamuot sa Dios kag kon ano ang wala nagapahamuot sa iya. (1 Juan 5:3) Si Jesus nagsiling: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:37) Kabay nga ipatudok naton ang aton gugma sa Dios paagi sa ugali nga pagbinagbinag sang iya pagkaayo, paagi sa regular nga pagpakighambal sa iya subong isa ka mahirop nga abyan, kag paagi sa malangkagon nga pagsugid sa iban tuhoy sa iya.

20. Paano naton matigayon ang tagipusuon nga kalahamut-an kay Jehova?

²⁰ Sa pagrepaso: Ang pagtigayon sing tagipusuon nga kalahamut-an kay Jehova nagakinahanglan sang pagtugot sa Pulong sang Dios nga mag-impluwensia sa kon ano kita sa sulod, ang tinago nga pagkatawo sang tagipusuon. Ang makahulugan nga personal nga pagtuon sang Kasulatan kag ang mainapresyahon nga pagpamalandong kinahanglan gid. Mahimo ini sing labing maayo upod ang handa nga tagipusuon​—⁠ang tagipusuon nga hilway sa ginahaumhaum na nga mga ideya, isa nga puno sang mga kinaiya nga nagahimo sa aton nga madali tudluan! Huo, sa bulig ni Jehova, ang maayo nga tagipusuon mahimo matigayon. Apang, ano nga mga tikang ang himuon naton agod mabantayan ang aton tagipusuon?

[Nota]

Paano Mo Sabton?

• Ano ang malaragwayon nga tagipusuon nga ginasayasat ni Jehova?

• Paano naton ‘mahugod ang aton tagipusuon’ sa Pulong sang Dios?

• Paano naton dapat ihanda ang aton tagipusuon sa pagkonsulta sa Pulong sang Dios?

• Sa tapos mabinagbinag ining materyal, ano ang ginabatyag mo nga dapat mo himuon?

[Mga Pamangkot sa Pagtinuon]

[Retrato sa pahina 17]

Mainapresyahon nga ginpamalandungan ni David ang espirituwal nga mga butang. Ikaw bala?

[Mga retrato sa pahina 18]

Ihanda ang imo tagipusuon antes tun-an ang Pulong sang Dios