“Adlaw sang Pagkamatinuguton sa Relihion”

NAPUKAW ang interes bangod sang pagpakighambal niya sa mga Saksi ni Jehova, ang prinsipal sang isa ka eskwelahan sa Poland nagtalana sing isa ka “Adlaw Sang Pagkamatinuguton sa Relihion” para sa iya eskwelahan. Nagpanugda sia nga ang magaboluntaryo amo ang mga estudyante nga​​—⁠mga Katoliko, mga Budhismo, kag mga Saksi ni Jehova​​—⁠maghanda sing malip-ot nga mga presentasyon agod sugiran ang iban pa nga mga estudyante sang ila mga pagtuluuhan kag mga hilikuton. Tatlo ka pamatan-on nga mga Saksi ni Jehova ang nagboluntaryo sa gilayon.

Sang mag-abot ang gintalana nga adlaw, ang una nga naghambal amo ang 15-anyos nga si Malwina. Sing bahin, nagsiling sia: “Madamo sa inyo ang nakakilala na sa amon antes kami mag-eskwela sa sini nga eskwelahan kay naduaw na namon kamo sa inyo mga puluy-an. Ayhan natingala kamo kon ngaa padayon kami nga nagahimo sini. Ini bangod ginasunod namon ang halimbawa ni Jesucristo, ang Tagtukod sang Cristianismo. Nagbantala sia sing maayong balita sang Ginharian sang Dios sa bisan diin nga may mga tawo. Ginhimo man ini sang mga apostoles kag sang iban pa nga dumaan nga mga Cristiano. Ang mga Saksi ni Jehova nagaantos sing mabudlay nga mga pagtilaw sang pagtuo sa madamo nga mga lugar, apang nalipay kami nga diri sa aton eskwelahan may paghidait kami, nga sa sini tanan kamo may bahin. Nagapasalamat kami sa inyo tungod sini!”

Sa paghinakop sang iya presentasyon, si Malwina nagsiling: “May isa pa ka rason kon ngaa nagaduaw kami sa inyo puluy-an. Nagakabalaka kami sa inyo. Ang Biblia nagasiling nga ang katawhan sa dili madugay makaeksperiensia sang mga hitabo nga magapatay-ug sang kalibutan. Gani, sa masunod nga tion nga manuktok kami sa inyo ganhaan, palihug magpamati kamo. Luyag namon kamo sugiran kon paano kita makapuyo sing tingob sa paraiso nga duta sing dayon.”

Ang masunod nga humalambal amo si Mateusz, 15 anyos man. Ginsugiran ni Mateusz ang iya mga tumalambong nga sa sulod sang mga tinuig, naggamit ang mga Saksi ni Jehova sing nagakalainlain nga mga paagi agod mapalapnag ang maayong balita. Halimbawa, sang 1914​​—⁠sang panahon sang inapa nga mga sine​​—⁠ang mga Saksi nagpaguwa sang “Photo-Drama of Creation,”​​—⁠isa ka sine kag presentasyon sa slide nga may ginpasanto nga tunog.

 Si Mateusz nagpaathag sang papel sang radyo sa pagpalapnag sang mensahe sang Ginharian kag nian ginlaragway ang pinasahi nga multilanguage electronic phototypesetting system (MEPS) sa kompyuter nga ginhimo sang mga Saksi ni Jehova. Ginsaysay man niya kon paano nakabulig ang mga Saksi ni Jehova sa pagpahibalo sa mga doktor tuhoy sa mga paagi sang pagbulong nga wala nagagamit sing dugo. “Karon, ang kilala nga mga doktor sa Poland nagkomento pabor sa amon tindog kag nagpatalupangod nga kada tuig nagadamo ang indi Saksi nga mga pasyente nga ginaoperahan nga wala nagagamit sing dugo,” siling niya.

Naghinakop si Mateusz paagi sa pagsugid tuhoy sa pagpatindog sing mga Kingdom Hall kag nagsiling: “Luyag bala ninyo magbisita sa amon? Wala ini sing bayad, kag wala sing kuwarta nga ginakolekta.” Tuhoy sa sentro sang kombension sa Sosnowiec, siling ni Mateusz: “Dapat ninyo makita ining daku kag mapuslanon nga tinukod. Ngaa indi kita mag-ululupod sa pagkadto didto? May yara kami panugda, kag ang aton abyan nga si Katarzyna amo ang magasugid sa inyo tuhoy sini.”

Pagkatapos sini, ang 15 anyos nga si Katarzyna naghambal sing mapagsik: “Ginaabiabi namon kamo sa pagkadto sa Sosnoweic para sa distrito nga kombension sang mga Saksi ni Jehova. Ang mga topiko tuhoy sa mga pamatan-on pagabinagbinagon.” Ginsambit man ni Katarzyna ang pangunang selebrasyon sang mga Cristiano​​—⁠ang Memoryal sang kamatayon ni Jesucristo. Ginpalig-on niya ang iya mga manugpalamati: “Sang nagligad nga tuig sobra sa 14 ka milyon ang nagtambong sa sini nga selebrasyon sa bug-os nga kalibutan. Ngaa indi kamo magbuylog sa amon sa masunod nga tion?”

Pagkatapos sang ila mga presentasyon, sanday Malwina, Mateusz, kag Katarzyna naghatag sa mga maestra sang libro nga Jehovah’s Witnesses​​—⁠Proclaimers of God’s Kingdom upod ang duha ka videocassette nga nagapaathag sang mga pagtuluuhan kag mga hilikuton sang mga Saksi ni Jehova.⁠ * Mapinasalamaton ini nga ginbaton sang mga maestra kag nagsaad sila nga gamiton nila ini sa ila mga klase sa maragtas.

Sa hingapusan sang sesyon, ginpatokar sang 12 anyos nga si Martyna para sa tanan nga nagtilipon ang ambahanon nga natig-uluhan “Salamat, Jehova.” Ining mga pamatan-on nga mga Saksi ‘nagtipon sing kaisog paagi sa ila Dios’ kag naghatag sing isa ka maayo nga panaksi. (1 Tesalonica 2:2) Daw ano ka ekselente nga halimbawa sa pamatan-on nga mga Saksi bisan diin!

[Nota]

[Retrato sa pahina 26]

Si Katarzyna nga nagapili sang mga kasulatan para sa presentasyon

[Retrato sa pahina 26]

Si Malwina nga nagahanda sang presentasyon pila ka adlaw antes ini ihatag sa eskwelahan