“Magakit-anay Kita sa Ginharian sang Dios”

“Mahal nga Abyan! Rupert, ginsentensiahan ako karon nga adlaw sing kamatayon. Indi ka magpangasubo tungod sa akon. Ginapadala ko ang akon gugma sa imo kag sa tanan sa balay. Magakit-anay kita sa Ginharian sang Dios.”

SANG Hunyo 8, 1942, ginsulat ni Franc Drozg ini nga mga pulong pila ka minuto antes sia gintiro sang mga soldado nga Nazi. Ngaa ginpatay sia?

Suno sa rekord sang Museum of National Liberation sa Maribor, Slovenia, ining 38-anyos nga panday sa salsalon nangindi sa pagbuylog sa Wehrmannschaft, isa ka grupo sang Aleman nga paramilitar sa sakop sang Aleman nga Slovenia. Sia isa ka Bibelforscher, ukon Estudyante sang Biblia, nga amo ang pagkakilala anay sa mga Saksi ni Jehova sa sadto nga duog. Bilang pagtuman sa Isaias 2:⁠4, wala sia magsakdag sa panikasog sang Nazi sa inaway, nagapakilala sang iya kaugalingon subong sakop sang Ginharian sang Dios.​—⁠Mateo 6:33.

Sa iya tumandok nga banwa sang Ptuj, si Franc nakilal-an subong isa ka makugi nga manugwali sang maayong balita sang Ginharian sang Dios. (Mateo 24:14) Walay sapayan sang madamo nga kabudlayan, walay untat niya nga ginbantala ang maayong balita tubtob nga gin-aresto sia sang Mayo 1942.

Madamong taga-Slovenia nga mga Saksi ni Jehova ang ginhingabot sing tuman sang mga Nazi. Si Franc isa sang una nga ginpatay sa ila tungod sang iya relihioso nga mga pagpati. Kaangay sang unang siglo nga mga Cristiano, napalig-on sia sang mga pulong: “Dapat kita magsulod sa ginharian sang Dios paagi sa madamong kapipit-an.” (Binuhatan 14:22) Ang iya pagpati sa pagkamatuod sining langitnon nga panguluhan maathag sa iya katapusan nga mga pulong, “Magakit-anay kita sa Ginharian sang Dios.”

[Picture Credit Lines sa pahina 32]

Franc Drozg: Photo Archive-Museum of National Liberation Maribor, Slovenia; sulat: Ginatago ang orihinal sa Museum of National Liberation Maribor, Slovenia