Ang Bulawanon nga Sulundan—Praktikal Ini

Bisan pa ginatamod sang kalabanan nga tawo ang Bulawanon nga Sulundan subong isa ka panudlo tuhoy sa husto nga pamatasan nga ginwali ni Jesus, sia mismo nagsiling: “Ang akon ginatudlo indi akon, kundi iya sang nagpadala sa akon.”​—⁠Juan 7:⁠16.

HUO, ang naghatag sang gintudlo ni Jesus, lakip ang gintawag nga Bulawanon nga Sulundan, amo ang isa nga nagpadala kay Jesus, nga amo, ang Manunuga, si Jehova nga Dios.

Sa ginsuguran, ang katuyuan sang Dios sa tanan nga katawhan amo nga himuon nila sa iban ang luyag nila nga himuon man sa ila sang iban. Nagpahamtang sia sing labing maayo nga halimbawa sa pagpakita sing kabalaka sa kaayuhan sang iban sang gintuga niya ang mga tawo: “Gintuga sang Dios ang tawo sa iya dagway, sa dagway sang Dios gintuga niya sia; lalaki kag babayi gintuga niya sila.” (Genesis 1:27) Nagakahulugan ini nga mahigugmaon nga ginhatagan sang Dios ang mga tawo sing pila ka kasangkaron sang iya talalupangdon nga mga kinaiya  agod nga magkabuhi sila nga may paghidait, kalipay, kag paghiusa​​—⁠ayhan tubtob sa walay katubtuban. Ang konsiensia nga ginhatag sa ila sang Dios, kon mahanas sing nagakaigo, magatuytoy sa ila nga himuon sa iban ang luyag nila nga himuon man sa ila sang iban.

Nangibabaw ang Kakagod

Sanglit matahom ang ginsuguran sang katawhan, ano ang natabo? Sa simple nga hambal, ang mga tawo nangin makagod. Pamilyar ang kalabanan nga tawo sa kasaysayan sang Biblia tuhoy sa ginhimo sang unang mag-asawa, nga narekord sa Genesis kapitulo 3. Sa sugyot ni Satanas, nga nagpamatok sa tanan nga matarong nga talaksan sang Dios, makagod nga ginsikway nanday Adan kag Eva ang paggahom sang Dios kabaylo sang pagkaindependiente kag pagdesisyon para sa kaugalingon. Ang ila makagod kag rebelyuso nga aksion nagresulta indi lamang sa daku nga kadulaan sa ila kaugalingon kundi sa makapasubo man nga mga resulta para sa ila palaabuton nga mga anak. Isa yadto ka maathag nga pasundayag sang malaglagon nga resulta sang pagsikway sa panudlo nga gintawag nga Bulawanon nga Sulundan. Busa, “paagi sa isa ka tawo nagsulod ang sala sa kalibutan kag ang kamatayon paagi sa sala, kag busa ang kamatayon naglapnag sa tanan nga tawo bangod sila tanan nakasala.”​​—⁠Roma 5:⁠12.

Bisan pa ginsikway sang katawhan sa kabilugan ang mahigugmaon nga mga dalanon ni Jehova nga Dios, wala niya pagbiyai sila. Halimbawa, ginhatagan ni Jehova ang pungsod sang Israel sang iya Kasuguan agod magtuytoy sa ila. Gintudluan sila sini nga himuon sa iban ang luyag nila nga himuon man sa ila sang iban. Naghatag ang Kasuguan sing panuytoy kon paano pakig-angutan ang mga ulipon, ang ilo sa amay nga mga bata nga lalaki, kag ang balo nga mga babayi. Ginpakita sini kon ano ang himuon sa pag-atake, pagpangidnap, kag pagpangawat. Ang kasuguan tuhoy sa katinlo nagpakita sing kabalaka sa kapagros sang iban. May yara pa gani kasuguan tuhoy sa seksuwal nga mga butang. Ginsumaryo ni Jehova ang iya Kasuguan paagi sa pagpamulong sa katawhan: “Higugmaon mo ang imo isigkatawo subong sang imo kaugalingon,” isa ka pinamulong nga ginbalikwat sang ulihi ni Jesus. (Levitico 19:18; Mateo 22:​39, 40) Naglakip man ang Kasuguan sing  mga regulasyon kon paano pakig-angutan ang dumuluong nga mga pumuluyo sa tunga sang mga Israelinhon. Ang Kasuguan nagsugo: “Dili mo pagpiguson ang dumuluong nga pumuluyo, kay nakahibalo kamo sang kalag sang dumuluong nga pumuluyo, bangod nangin dumuluong nga mga pumuluyo kamo sa duta sang Egipto.” Kon sa aton pa, dapat magpakita ang mga Israelinhon sing mahinuklugon nga kaayo sa mga makaluluoy.​​—⁠Exodo 23:⁠9; Levitico 19:34; Deuteronomio 10:19.

Tubtob matutom nga gintuman sang Israel ang Kasuguan, ginpakamaayo ni Jehova yadto nga pungsod. Sa idalom sang paghari ni David kag ni Solomon, nagtin-ad ang pungsod kag ang katawhan nangin malipayon kag kontento. Ang isa ka rekord sang maragtas nagasugid sa aton: “Ang Juda kag Israel madamo, subong sang balas nga yara sa baybayon sang dagat sa kadamuon, nga nagakaon kag nagainom kag nagakasadya. Kag ang Juda kag Israel nagpuyo sing malig-on, ang tagsa ka tawo sa idalom sang iya ubas kag sa idalom sang iya higuera.”​​—⁠1 Hari 4:​20, 25.

Makapasubo nga ang paghidait kag kalig-unan sadto nga pungsod wala magdugay. Bisan pa ginhatagan sila sang Dios sang iya Kasuguan, wala ini pagsunda sang mga Israelinhon; nangin makagod sila sa baylo nga magpakita sing kabalaka sa iban. Ini, upod sa apostasya, nagresulta sa ila pag-antos subong indibiduwal kag subong isa ka pungsod. Sang ulihi, sang tuig 607 B.⁠C.⁠E., gintugutan ni Jehova ang mga Babilonianhon nga laglagon ang ginharian sang Juda, ang siudad sang Jerusalem, kag bisan gani ang matahom nga templo diri. Ano ang rason? “ ‘Bangod nga wala kamo magtuman sa akon mga pulong, yari karon, magasugo ako kag kuhaon ko ang tanan nga pamilya sa aminhan,’ amo ang siling ni Jehova, ‘nga magasugo pa gani kay Nabocodonosor nga hari sang Babilonia, nga akon alagad, kag dalhon ko sila batok sa sini nga duta kag batok sa mga pumuluyo sini kag batok sa sining tanan nga pungsod sa palibot; kag itugyan ko sila sa kalaglagan kag himuon ko sila nga isa ka butang nga makapatingala kag butang nga panagutsutan kag mga duog nga nahapay tubtob sa walay latid nga tion.’ ” (Jeremias 25:​8, 9) Daw ano nga bayad sa pagsikway sa putli nga pagsimba kay Jehova!

Isa ka Halimbawa nga Ilugon

Sa pihak nga bahin, wala lamang gintudlo ni Jesucristo ang Bulawanon nga Sulundan kundi nagpahamtang man sia sing labing maayo nga halimbawa sa pagsunod sa sini. Nagpakita sia sing matuod gid nga kabalaka sa kaayuhan sang iban. (Mateo 9:​36; 14:14; Lucas 5:​12, 13) Sang isa ka bes, malapit sa siudad sang Nain, nakita ni Jesus ang isa ka nagapangasubo nga balo nga babayi sa isa ka prosesyon sang lubong para sa iya bugtong nga anak. Ang rekord sang Biblia nagasiling: “Sang nakita sia sang Ginuo, napahulag sia sang kaluoy sa iya.” (Lucas 7:​11-​15) Ang ekspresyon nga “napahulag sang kaluoy,” suno sa Vine’s Expository Dictionary of Old and New Testament Words, nagakahulugan sing “napahulag ang nasulod nga balatyagon.” Nabatyagan niya ang kasakit nga ginbatyag sang balo nga babayi, kag nagpahulag ini sa iya nga himuon ang positibo nga mga tikang agod maumpawan ang iya kasakit. Daw ano nga kalipay ang nabatyagan sining balo nga babayi sang ginbanhaw ni Jesus ang pamatan-on nga lalaki kag “ginhatag sia sa iya iloy”!

Sang ulihi, nahisanto sa katuyuan sang Dios, kinabubut-on nga nag-antos si Jesus kag ginhatag niya ang iya kabuhi subong isa ka gawad agod nga mahilway ang katawhan gikan sa pagkaulipon sa sala kag kamatayon. Amo ini ang supremo nga halimbawa sang pagkabuhi nahisanto sa Bulawanon nga Sulundan.​​—⁠Mateo 20:28; Juan 15:13; Hebreo 4:⁠15.

Ang mga Tawo nga Nagaaplikar sang Bulawanon nga Sulundan

May mga tawo bala sa aton tion nga nagasunod gid sa Bulawanon nga Sulundan? Huo, kag indi kon san-o lamang mahapos ini para sa ila. Halimbawa, sa tion sang Bug-os Kalibutan nga Inaway II sa Nazi Alemanya, ginhuptan sang mga Saksi ni Jehova ang ila pagtuo sa Dios kag gugma para sa ila isigkatawo kag nangindi nga ikompromiso ang Bulawanon nga Sulundan. Samtang ginpatuman sang Estado ang kampanya nga dumtan kag ihig-ihigon ang tanan nga Judiyo, ginsunod gihapon sang mga Saksi ang Bulawanon nga Sulundan. Bisan sa mga kampo konsentrasyon, gin-atipan nila gihapon ang ila mga isigkatawo, nagapaambit sang ila pagkaon, bisan pa diutay lamang ini, sa ginagutom nga mga Judiyo kag mga di-Judiyo. Dugang pa, bisan pa ginsugo sila sang Estado nga mag-uyat sing armas agod patyon ang iban, nangindi sila nga himuon ini, subong nga indi man nila luyag nga patyon sila sang iban. Paano nila patyon ang mga tawo nga dapat higugmaon nila subong sang ila kaugalingon? Bangod sang ila pagpangindi, madamo sa ila ang wala lamang ginbilanggo sa mga kampo konsentrasyon kundi ginpatay pa.​​—⁠Mateo 5:​43-​48.

 Samtang ginabasa mo ining artikulo, nagabenepisyo ikaw sa isa pa ka halimbawa sang pagsunod sa Bulawanon nga Sulundan. Narealisar sang mga Saksi ni Jehova nga madamo karon ang nagaantos nga walay paglaum kag walay mahimo. Bangod sini, boluntaryo nga nagahimo ang mga Saksi sing positibo nga aksion agod buligan ang iban pa nga makatuon tuhoy sa paglaum kag sa praktikal nga pagtuytoy nga masapwan sa Biblia. Bahin ini tanan sang isa ka bug-os kalibutan nga hilikuton sa pagtudlo nga ginahimo karon sa walay tupong nga kasangkaron. Ang resulta? Subong gintagna sa Isaias 2:​2-4, “madamo nga tawo,” sa katunayan kapin sa anom ka milyon ka indibiduwal sa bug-os nga kalibutan, ang ‘ginatudluan sang mga dalanon ni Jehova kag nagalakat sa iya mga banas.’ Sing malaragwayon, natun-an nila nga ‘salsalon ang ila mga espada nga mga punta sang arado kag ang ila mga bangkaw nga mga galab nga inughagbas.’ Nakasapo sila sing paghidait kag kalig-unan walay sapayan sang kagamo karon.

Kamusta Ikaw?

Binagbinaga sa makadali ang kasakit kag pag-antos sang katawhan bangod wala ginsunod ang Bulawanon nga Sulundan sugod sang pagrebelde sa Eden, nga ginsulsol ni Satanas nga Yawa. Katuyuan ni Jehova nga baliskaron ang kahimtangan sa indi madugay. Paano? “Sa sining katuyuan ang Anak sang Dios ginpahayag, nga amo, sa paglaglag sa mga binuhatan sang Yawa.” (1 Juan 3:8) Mahanabo ini sa idalom sang paggahom sang Ginharian sang Dios, sa maalamon kag sangkol nga mga kamot ni Jesucristo, ang isa nga nagtudlo kag nagkabuhi nahisanto sa Bulawanon nga Sulundan.​​—⁠Salmo 37:​9-​11; Daniel 2:⁠44.

Si Hari David sang dumaan nga Israel nagsiling: “Nangin pamatan-on ako, kag karon tigulang na, apang wala ako makakita nga ang bisan sin-o nga matarong ginpabayaan, ukon ang iya kaliwat nga nagapakilimos sing tinapay. Sa bug-os nga adlaw nagapakita sia sing kaluoy kag nagapahulam, kag busa ang iya kaliwat magabaton sing pagpakamaayo.” (Salmo 37:​25, 26) Indi bala nga kalabanan sang mga tawo karon nagapanguha kag nagapang-agaw sa baylo nga ‘magpakita sing kaluoy kag magpahulam’? Maathag nga ang pagsunod sa Bulawanon nga Sulundan makadul-ong sa matuod nga paghidait kag kalig-unan bangod paagi sa sini makabaton ang isa sing mga pagpakamaayo karon kag sa palaabuton sa idalom sang Ginharian sang Dios. Dulaon sang Ginharian sang Dios ang tanan nga kakagod kag kalautan sa duta kag buslan ang sistema sang malaut nga paggahom sang tawo karon sing isa ka bag-o nga sistema nga paluntaron sang Dios. Nian, ang tanan nga tawo magakabuhi nahisanto sa Bulawanon nga Sulundan.​​—⁠Salmo 29:11; 2 Pedro 3:⁠13.

[Mga retrato sa pahina 4, 5]

Wala lamang gintudlo ni Jesus ang Bulawanon nga Sulundan kundi nagpahamtang man sia sing labing maayo nga halimbawa sa pagbuhat sini

[Mga retrato sa pahina 7]

Ang pagsunod sa Bulawanon nga Sulundan makadul-ong sa matuod nga paghidait kag kalig-unan