Mga Pamangkot Gikan sa mga Bumalasa

Ang panuytoy sang Dios nga narekord sa Jeremias 7:16 nagakahulugan bala nga ang mga Cristiano indi dapat magpangamuyo sa isa nga ginsikway sa Cristianong kongregasyon bangod isa sia ka di-mahinulsulon nga makasasala?

Pagkatapos mahatag ang iya hudisyal nga desisyon batok sa di-matutom nga Juda, nagsiling si Jehova kay Jeremias: “Tuhoy sa imo, indi ka magpangamuyo para sa sini nga katawhan, ni magtu-aw para sa ila sing pakitluoy ukon sing pangamuyo ukon mag-ampo sa akon, kay indi ako mamati sa imo.”​​—⁠Jeremias 7:⁠16.

Ngaa gindumilian ni Jehova si Jeremias sa pagpangamuyo para sa mga Israelinhon? Maathag nga bangod ini sang ila hayag gid nga mga paglapas sa iya Kasuguan. Dayag kag makahuluya nga “nagpangawat [sila], nagpatay kag nanghilahi kag nagsumpa sing kabutigan kag naghimo sing halad nga ginsunog kay Baal kag nagsunod sa iban nga mga dios.” Bangod sini, nagsiling si Jehova sa walay pagtuo nga mga Judiyo: “Palayason ko kamo gikan sa akon atubangan, subong sang pagpalayas ko sa tanan mo nga kauturan, ang bug-os nga kaliwat ni Efraim.” Sa pagkamatuod, indi gid nagakaigo para kay Jeremias, ukon kay bisan sin-o man, nga magpangamuyo kay Jehova nga baliskaron niya ang Iya paghukom.​​—⁠Jeremias 7:​9, 15.

Nahisanto sa sini, nagsulat si apostol Juan tuhoy sa nagakaigo nga pangamuyo sa Dios. Una anay, ginpasalig niya ang mga Cristiano: “Bisan ano man nga butang ang pangayuon naton suno sa iya kabubut-on, nagapamati sia sa aton.” (1 Juan 5:14) Nian, tuhoy sa pagpangamuyo tungod sa iban, nagpadayon si Juan: “Kon makita sang bisan sin-o ang iya utod nga nagapakasala sing isa ka sala nga indi sa kamatayon, magahingyo sia, kag magahatag sia sa iya sing kabuhi, huo, sa mga wala nagapakasala nga sa kamatayon. May sala nga sa kamatayon. Indi nahanungod sina nga sala nagasiling ako nga maghingyo ang isa.” (1 Juan 5:16) Si Jesus nagsambit man sang sala nga “indi mapatawad,” kon sayuron, ang sala batok sa balaan nga espiritu.​​—⁠Mateo 12:​31, 32.

 Nagakahulugan bala ini nga ang tanan nga ginsikway sa Cristianong kongregasyon tungod sa pagpakasala kag indi paghinulsol nakahimo sang sala nga “sa kamatayon” kag busa indi dapat pangamuyuan? Indi gid man amo sini pirme ang kahimtangan bangod sa pila ka halimbawa ini nga mga paglapas indi mga sala nga sa kamatayon. Sa katunayan, mabudlay mahibaluan kon bala amo gid ini sila. Ang isa ka halimbawa amo si Hari Manases sang Juda. Nagtukod sia sing mga halaran sa butig nga mga dios, naghalad sang iya kaugalingon nga mga anak nga lalaki, naghimo sing espiritismo, kag nagbutang sang mga larawan nga tinigban sa templo ni Jehova. Sa katunayan, nagsiling ang Biblia nga si Manases kag ang katawhan naghimo “sing malaut nga labi pa sangsa mga pungsod nga ginlaglag ni Jehova gikan sa atubangan sang mga anak sang Israel.” Bangod sini tanan, ginsilutan ni Jehova si Manases paagi sa pagdala sa iya nga bihag sa Babilonia nga nagapos sa mga grilyos.​​—⁠2 Hari 21:​1-9; 2 Cronica 33:​1-​11.

Ang mga sala bala ni Manases, walay sapayan nga malubha gid, amo ang sahi nga sa kamatayon? Maathag nga indi, kay ang kasaysayan nagasiling sing dugang tuhoy sa iya: “Sang nagpalisod ini sa iya, ginpahumok niya ang nawong ni Jehova nga iya Dios kag nagpaubos sang iya kaugalingon sing daku bangod sang Dios sang iya katigulangan. Kag padayon sia nga nangamuyo sa Iya, amo nga gintugutan Niya sia nga mapakiluuyan sini kag ginpamatian Niya ang iya pag-ampo kag ginpasag-uli sia sa Jerusalem sa iya pagkahari; kag nakilala ni Manases nga si Jehova amo ang matuod nga Dios.”​​—⁠2 Cronica 33:​12, 13.

Busa, indi kita gilayon maghinakop nga ang isa nakahimo na sing sala nga sa kamatayon bangod lamang ginsikway sia sa kongregasyon. Ayhan kinahanglan pa ang tion agod mahibaluan ang matuod nga kahimtangan sang tagipusuon sang indibiduwal. Sa katunayan, masami na ginasiling nga ang isa sang mga katuyuan sang pag-disfellowship amo ang pagbulig sa isa nga makamaradmad kag ginalauman nga maghinulsol sia kag magliso.

Bangod wala na sia sa kongregasyon, ang bisan ano man nga pagbag-o sa iya tagipusuon kag panimuot una nga makita sang mga tawo nga malapit sa iya, subong sang isa ka tiayon ukon mga katapo sang pamilya. Ang mga makakita sini nga mga pagbag-o mahimo maghinakop nga ang naglapas wala makahimo sing sala nga sa kamatayon. Mahimo sila mapahulag sa pagpangamuyo nga kuntani makakuha sia sing kusog gikan sa inspirado nga Pulong sang Dios kag si Jehova magapanghikot para sa nakasala nahisanto sa Iya kabubut-on.​​—⁠Salmo 44:21; Manugwali 12:⁠14.

Bisan pa mahimo makita sang iban ang nagakaigo nga ebidensia nga naghinulsol na ang nakasala, mahimo nga indi ini makita sang kongregasyon sa kabilugan. Mahimo sila maligban, masit-an, kag masandad pa gani kon makabati sila nga may isa nga mangamuyo sing dayag para sa isa nga gin-disfellowship. Bangod sini, ang mga napahulag nga ipangamuyo ang nakasala dapat maghimo lamang sini sing pribado, nga ginatugyan ang dugang pa nga pagbag-o sa kamot sang masaligan nga mga gulang sa kongregasyon.

[Retrato sa pahina 31]

Ang malubha nga mga sala ni Manases ginpatawad sang nagpaubos sia sa atubangan ni Jehova

[Picture Credit Line sa pahina 30]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s