Report sang mga Manugbantala sang Ginharian

“Sala ang Gindayal Mo nga Numero”

SA Johannesburg, Bagatnan nga Aprika, nagabuslanay si Leslie kag si Caroline sa pagpanaksi sa telepono sa mga tawo nga nagapuyo sa may estrikto-sing-seguridad nga minuro sang mga retirado. Pila lamang ang ila nasalapuan sa balay kag diutay lamang ang interesado sa ila Cristianong mensahe, amo nga napalig-on si Caroline sang may isa ka babayi nga nagsabat.

“Si Gng. B​​—⁠bala ini?” pamangkot ni Caroline.

“Ay, indi,” siling sang isa ka mainabyanon nga tingog, “Si Gng. G​​—⁠ini. “Sala ang gindayal mo nga numero.”

Bangod mainabyanon ang iya tingog, nagsiling si Caroline: “Ti, sa imo ko na lang ipaathag ang inugsugid ko kay Gng. B​​—⁠.” Nian ginsugid niya ang tuhoy sa mga pagpakamaayo sang nagapakari nga Ginharian sang Dios. Pagkatapos magsugtanay nga idul-ong niya ang brosyur nga Ano ang Ginapatuman Sang Dios sa Aton?, namangkot si Gng. G​​—⁠: “Huo gali, ano ang imo relihion?”

“Mga Saksi ni Jehova kami,” sabat ni Caroline.

“Ay, indi ako sina nga relihion! Indi ka na lang magkadto diri.”

“Apang Gng. G​​—⁠,” apelar ni Caroline, “sa sulod sang nagligad nga 20 minutos, ginsugid ko sa imo ang labing makalilipay nga mensahe, kag ginpatalupangod ko gikan sa Biblia kon ano ang himuon sang Ginharian sang Dios sa dili madugay para sa katawhan. Nalipay ka gid sa pagpamati sa sini nga mga butang​​—⁠nakunyag pa gani​​—⁠kag luyag mo nga mahibaluan ang dugang pa. Ano gid bala ang nahibaluan mo tuhoy sa mga Saksi ni Jehova? Kon nagamasakit ka, magapabulong ka bala sa mekaniko? Ngaa indi mo tugutan nga ako ang magasugid sa imo kon ano ang ginapatihan sang mga Saksi ni Jehova?”

Pagkatapos sang pila ka tinion nga paghipos, nagsabat sia: “Sa banta ko husto ka. Maayo pa nga magkari ka. Apang luyag ko nga mahangpan mo, indi gid nimo ako makumbertir!”

“Gng. G​​—⁠, indi ko gid ikaw makumbertir bisan pa gustuhon ko,” sabat ni Caroline. “Si Jehova lamang ang makahimo sina.”

Ang pagduaw agod idul-ong ang brosyur nangin maayo, kag si Gng. G⁠​—⁠(Betty) nagpasugot nga duawon liwat. Sang nagbalik si Caroline, nagsiling si Betty nga ginsugiran niya ang mga babayi nga kaupod niya sa ila hulot-kalan-an nga nagapakigsugilanon sia sa mga Saksi ni Jehova. “Ngaa ginhimo mo ina?” pamangkot nila, nga nagapamiriphi. “Ina nga mga tawo wala gani nagapati kay Jesus!”

Gilayon nga ginpahanumdom ni Caroline kay Betty ang isa ka panguna nga punto gikan sa ila pinakaulihi nga paghinun-anon tuhoy sa Ginharian sang Dios.

“Sin-o bala ang mangin Hari?” pamangkot ni Caroline.

“Siempre, si Jesus,” sabat ni Betty.

“Huo,” siling ni Caroline. Nian ginpaathag niya nga ang mga Saksi ni Jehova nagapati nga si Jesus Anak sang Dios, apang indi sia katupong sang Dios subong bahin sang isa ka Trinidad.​​—⁠Marcos 13:32; Lucas 22:42; Juan 14:28.

Pagkatapos sang pila pa ka pagduaw, bal-anon gid nga bisan pa may malaumon kag malipayon sia nga panimuot, si Betty may maluya nga panglawason. Sa katunayan, may kanser sia kag nahadlok sia mapatay. “Kuntani sang una ko pa nabatian ini nga mga butang kag may pagtuo kaangay mo,” tu-ad niya. Ginlugpayan sia ni Caroline paagi sa pagpakita sa iya sang mga kasulatan nga nagalaragway sa kamatayon subong isa ka mahamuok nga katulogon nga gikan sini makabugtaw ang isa sa pagkabanhaw. (Juan 11:​11, 25) Makapalig-on gid ini para kay Betty, nga sa karon tayuyon na nga nagatuon sa Biblia. Ang iya lamang nagaluya nga panglawason amo ang nagapugong sa iya sa pagtambong sa mga miting sa Kingdom Hall.

Siling ni Caroline: “Maathag sa akon nga ini nga buluhaton ginatuytuyan sang mga anghel. Ang pagdayal ko sa numero ni Betty aksidente lamang, kag hunahunaa lamang, 89 anyos sia!”​​—⁠Bugna 14:6.