“Inughaplas sa Mata nga Ihaplas sa Imo mga Mata”

AMO ini ang ginreseta ni Jesucristo sa Cristianong kongregasyon sa Laodicea, Asia Minor, sang unang-siglo.

Si Jesus nagsiling: ‘Magbakal sing inughaplas sa mata nga ihaplas sa imo mga mata agod nga makakita ka.’ Indi literal nga balatian sa mata, kundi espirituwal nga pagkabulag ang nagakinahanglan sing pagbulong. Ang mga Cristiano sa Laodicea naimpluwensiahan sang materyalistiko nga espiritu sang mainuswagon sa materyal nga siudad nga ginapuy-an nila kag nangin di-masinapakon sa ila matuod espirituwal nga mga kinahanglanon.

Nagakomento sa sini subong amo ang ginatunaan sang ila nagaburon nga panulok, si Jesus nagsiling: “Nagasiling ka: ‘Manggaranon ako kag nagbugana ako kag wala nagakinahanglan sing bisan ano,’ apang wala ka makahibalo nga ikaw kailo kag makaluluoy kag imol kag bulag kag hubo.” Bisan pa wala nakahibalo tuhoy sa sini, ang mga katapo sang kongregasyon nagakinahanglan sing makapaayo nga “inughaplas sa mata” nga mahimo matigayon lamang paagi sa pagpasakop sa pagpanudlo kag pagdisiplina ni Jesucristo. “Magbakal gikan sa akon,” siling ni Jesus.​​—⁠Bugna 3:​17, 18.

Kaangay sang mga taga-Laodicea, ang matuod nga mga Cristiano sa karon dapat man magbantay batok sa di-nagakaigo kag malalangon nga impluwensia sang materyalistiko kag mahuyugon sa kalipay nga palibot nga ila ginapuy-an. Ang reseta sa paghupot sing isa ka mapagros nga espirituwal nga pagtamod ginapakita sa sining laygay: ‘Magbakal gikan [kay Jesus] sing inughaplas sa mata nga ihaplas sa imo mga mata agod nga makakita ka.’

Talalupangdon gid ang katunayan nga dapat baklon ining “inughaplas sa mata.” May bili nga nadalahig. Dapat gamiton ang tion sa pagtuon kag pagpamalandong sa Pulong sang Dios. Ginapasalig kita sang salmista nga ini nga Pulong “matinlo, nga nagapasanag sang [espirituwal nga] mga mata.”​​—⁠Salmo 19:8.