Kaumpawan Gikan sa Kahuol—⁠Isa ka Praktikal nga Remedyo

“Kari sa akon, kamo tanan nga ginabudlayan kag ginabug-atan, kag paumpawan ko kamo.”​​—⁠MATEO 11:28.

1, 2. (a) Ano ang mabasa sa Biblia nga nagabulig sa pagpahaganhagan sa tuman nga kahuol? (b) Daw ano ka epektibo ang mga panudlo ni Jesus?

AYHAN magaugyon ka nga ang tuman nga kahuol malain; katumbas ini sa tuman nga kabalaka. Ginapakita sang Biblia nga ang tanan nga tawhanon nga tinuga ginabug-atan gid sang mga kabalaka amo nga ang madamo mabinalak-on nga nagahulat sing kaumpawan gikan sa mahuol nga kabuhi karon. (Roma 8:​20-​22) Apang ginapakita man sang Kasulatan kon paano kita makatigayon sing daku nga kaumpawan gikan sa tuman nga kabalaka karon mismo. Matigayon ini paagi sa pagsunod sa laygay kag sa halimbawa sang isa ka pamatan-on nga nagkabuhi sang nagligad nga 20 ka siglo. Isa sia ka panday, apang mas daku ang iya gugma sa mga tawo sangsa iya trabaho. Natandog niya ang tagipusuon sang mga tawo, nahatag ang ila mga kinahanglanon, nabuligan ang mga maluya kag nalugpayan ang mga napung-awan. Dugang pa, nabuligan niya ang madamo nga malab-ot ang ila espirituwal nga ikasarang. Sa amo napaumpawan sila gikan sa tuman nga kahuol, subong sang mahimo man nga matabo sa imo.​​—⁠Lucas 4:​16-​21; 19:​47, 48; Juan 7:⁠46.

² Ini nga tawo, si Jesus nga taga-Nazaret, wala gintuytuyan sang kalibutanon nga ihibalo nga gintinguhaan nga matigayon sang iban sa dumaan nga Roma, Atenas, ukon Alexandria. Walay sapayan sini, ang iya mga panudlo bantog. May tema ini: ang panguluhan nga paagi sa sini ang Dios madinalag-on nga magagahom sa aton duta. Ginpaathag man ni Jesus ang sadsaran nga mga prinsipio sa kabuhi​​—⁠mga prinsipio nga mapuslanon gid karon. Ang mga nagtuon kag nagsunod sa kon ano ang gintudlo ni Jesus nagaagom sing gilayon nga mga benepisyo, lakip na ang kaumpawan gikan sa tuman nga kahuol. Maagom mo bala ini?

3. Anong makalilipay nga imbitasyon ang ginhatag ni Jesus?

³ Ayhan may mga duhaduha ka. ‘Mahimo bala impluwensiahan sing daku sang isa nga madugay na nga nagkabuhi ang akon karon kabuhi?’ Ti, pamatii ang makagalanyat nga mga pulong ni Jesus: “Kari sa akon, kamo tanan nga ginabudlayan kag ginabug-atan, kag paumpawan ko kamo. Itakod ninyo ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kaumpawan sa inyo mga kalag. Kay ang akon gota mahulas kag ang akon lulan mamag-an.” (Mateo 11:28-​30) Ano ang buot niya silingon? Usisaon naton ini nga mga pulong sing detalyado kag tan-awon kon paano ini nagabulig sa imo nga makita ang kaumpawan gikan sa makapabug-at nga kahuol.

4. Kay sin-o nagpamulong si Jesus, kag ngaa mahimo nga nabudlayan ang iya tagpalamati sa pagsunod sa kon ano ang ginsugo sa ila?

⁴ Nagpamulong si Jesus sa madamo nga hanuot gid nga nagatinguha sa paghimo kon ano ang husto apang ‘nabug-atan’ bangod ginhimo sang Judiyong mga lider ang relihion nga isa ka butang nga makapabug-at. (Mateo 23:4) Nagkonsentrar sila sa madamo gid nga pagsulundan sa halos tanan nga bahin sang kabuhi. Indi ka bala mahul-an sa pagpamati pirme nga “indi mo dapat” himuon ini ukon ina? Sa pagpatuhay, ang imbitasyon ni Jesus nagdul-ong sa mga tawo sa kamatuoran, sa pagkamatarong, sa mas maayo nga kabuhi paagi sa pagpamati sa iya. Huo, agod makilala ang matuod  nga Dios, kinahanglan nga pamatian si Jesucristo, kay sa iya, mahimo​​—⁠kag sarang​​—⁠mahangpan sang mga tawo kon sin-o gid si Jehova. Si Jesus nagsiling: “Sia nga nakakita sa akon nakakita man sa Amay.”​​—⁠Juan 14:9.

Tuman Bala Kahuol ang Imo Kabuhi?

5, 6. Kamusta ang mga kahimtangan sa trabaho kag sweldo sang panahon ni Jesus kon ipaanggid sa panahon naton karon?

⁵ Mahimo nga interesado ka sa sini bangod ang imo trabaho ukon kahimtangan sa pamilya mahimo nga nagapahuol gid sa imo. Ukon ang iban nga mga responsabilidad mahimo nga daw tuman kabug-at. Kon amo, kaangay ka sang sinsero nga mga tawo nga nasugilanon kag nabuligan ni Jesus. Halimbawa, binagbinaga ang problema sa palangabuhian. Madamo ang nagahimakas sa sini karon, kag amo man sang panahon ni Jesus.

⁶ Sadto, ang isa ka obrero nga nagatrabaho sing 12 ka oras sa isa ka adlaw, 6 ka adlaw sa isa ka semana, masami nga may kinitaan nga isa lamang ka denario sa bug-os nga adlaw. (Mateo 20:​2-​10) Kamusta ina kon ipaanggid sa sweldo mo ukon sang imo mga abyan? Mahimo nga mabudlay ipaanggid ang sweldo sadto sa karon. Ang isa ka paagi sa pagpaanggid amo ang pagbinagbinag sa balor sang kuwarta, sa kon ano ang sarang sini mabakal. Ang isa ka iskolar nagsiling nga sang panahon ni Jesus ang isa ka pan nga tinapay nga ginhimo sa apat ka tasa sang harina sang trigo nagabili sing isa ka oras nga sweldo. Ang isa pa ka iskolar nagsiling nga ang isa ka kopa sang maayong klase nga alak nagabili sing duha ka oras nga sweldo. Makita mo gikan sa sining mga detalye nga ang mga tawo sadto nagtrabaho sing lakas sa sulod sang madamo nga inoras kada adlaw agod mabuhi. Nagkinahanglan sila sing kaumpawan kag kapahuwayan, kaangay naton. Kon ikaw nagatrabaho, mahimo nagabatyag ka nga ginaipit nga mangin mabungahon. Sa masami wala na kita sing tion sa paghimo sing nahunahuna-sing-maayo nga mga desisyon. Mahimo batunon mo nga nagahandum ka sing kaumpawan.

7. Ano anay ang reaksion sa mensahe ni Jesus?

⁷ Maathag nga ang imbitasyon ni Jesus sa tanan nga “ginabudlayan kag ginabug-atan” makagalanyat gid sa madamo nga tagpalamati sadto. (Mateo 4:​25; Marcos 3:​7, 8) Kag dumduma nga gindugang ni Jesus ang saad, “Paumpawan ko kamo.” Ini nga saad matuod gihapon karon. Mahimo ini maaplikar sa aton kon kita “ginabudlayan kag ginabug-atan.” Kag mahimo ini maaplikar sa aton mga hinigugma, nga ang ila kahimtangan mahimo nga kaangay sini.

8. Paano ang pagpadaku sa kabataan kag pagtigulang nagahatag sing dugang nga kahuol?

⁸ May iban pa nga mga butang nga nagapabug-at sa mga tawo. Ang pagpadaku sa kabataan isa ka daku nga hangkat. Bisan ang mangin isa ka bata  makahalangkat. Nagadamo nga indibiduwal sang tanan nga pangidaron ang nakasumalang sing mga problema sa kapagros sa hunahuna kag lawas. Kag walay sapayan nga ang mga tawo mas malawig sing kabuhi, ang mga tigulang may yara pinasahi nga mga problema nga dapat batuan, walay sapayan sang mga pag-uswag sa medisina.​​—⁠Manugwali 12:1.

Napaidalom sa Gota

9, 10. Sang dumaan nga panahon, ano ang ginasimbulo sang gota, kag ngaa gin-agda ni Jesus ang mga tawo nga itakod nila ang iya gota?

⁹ Natalupangdan mo bala nga sa mga pulong nga ginbalikwat gikan sa Mateo 11:​28, 29, si Jesus nagsiling: “Itakod ninyo ang akon gota kag magtuon kamo sa akon”? Sadto, ang isa ka ordinaryo nga tawo mahimo magbatyag nga daw nagatrabaho sia sa idalom sang gota. Sang dumaan nga panahon, ang gota nagasimbulo sa pagkaulipon ukon pagpangalagad. (Genesis 27:40; Levitico 26:13; Deuteronomio 28:48) Madamo sang adlawan nga mga obrero nga nasugilanon ni Jesus ang nagtrabaho nga may gota sa ila mga abaga, kag nagapas-an sing mabug-at nga mga lulan. Depende sa kon paano ginkortehan ang gota, mahimo nga sigo ini sa liog kag abaga ukon mahimo nga nagasag-id sa panit. Subong isa ka panday, si Jesus mahimo nga naghimo sing mga gota, kag mahimo nga makahibalo sia kon paano magdihon sing isa nga “mahulas.” Ayhan ginbutangan niya sing panit ukon tela ang mga bahin nga nagasag-id sa liog kag abaga agod mangin komportable ang gota.

¹⁰ Sang nagsiling si Jesus, “Itakod ninyo ang akon gota,” mahimo nga ginpaanggid niya ang iya kaugalingon sa isa nga nag-aman sing mga gota nga ginhimo sing maayo kag “mahulas” sa liog kag abaga sang isa ka trabahador. Sa amo, si Jesus nagsiling pa: “Ang akon lulan mamag-an.” Nagakahulugan ini nga ang gota mahulas gamiton, kag ang trabaho indi man mapiguson. Matuod, paagi sa pag-agda sa iya tagpalamati nga batunon ang iya gota, si Jesus wala magtan-ay sing gilayon nga kaumpawan gikan sa tanan nga mapiguson nga mga kahimtangan sadto. Apang, ang tuhay nga pagtamod sa gintan-ay niya makahatag sing daku nga kaumpawan. Ang mga pagbag-o sa ila estilo sang pagkabuhi kag sa kon paano nila ginahimo ang mga butang makapaumpaw man sa ila. Sing labi pa ka importante, ang isa ka maathag kag malig-on nga paglaum magabulig sa ila nga tamdon ang kabuhi sing kubos ka makapahuol.

Matigayon Mo ang Kaumpawan

11. Ngaa wala gid ginapahangop ni Jesus ang pagpabaylo sang gota?

¹¹ Palihug talupangda nga si Jesus wala magsiling nga mahimo pabayluhan sang mga tawo ang gota sing lain. Ang Roma amo gihapon ang nagakontrol sa pungsod, subong nga ang mga panguluhan karon amo ang nagakontrol sa pungsod nga ginapuy-an sang mga Cristiano. Ang pagbuhis sang unang-siglo nga Roma indi madula. Ang problema sa panglawas kag pangabuhi magapabilin. Ang pagkadihimpit kag sala magaapektar gihapon sa mga tawo. Walay sapayan sini, matigayon nila ang kaumpawan paagi sa pagsunod sa panudlo ni Jesus, subong nga matigayon man naton ini karon.

12, 13. Ano ang ginpatalupangod ni Jesus nga makahatag sing kaumpawan, kag ano ang reaksion sang iban?

¹² Ang importante nga aplikasyon sang ilustrasyon ni Jesus tuhoy sa gota nangin maathag tuhoy sa hilikuton nga paghimo sing disipulo. Wala duhaduha nga ang panguna nga hilikuton ni Jesus amo ang pagtudlo sa iban, nga ang ginapadaku amo ang Ginharian sang Dios. (Mateo 4:23) Gani sang nagsiling sia, “Itakod ninyo ang akon gota,” pat-od gid nga naglakip ini sang pagsunod sa iya sa sini man nga hilikuton. Ginapakita sang rekord sang Ebanghelyo nga ginbuyok ni Jesus ang sinsero nga mga tawo nga islan ang ila trabaho, ang isa ka butang nga ginakabalak-an sing daku sa kabuhi sang madamo. Dumduma ang panawagan niya kanday Pedro, Andres, Santiago, kag Juan: “Sunod kamo sa akon, kag himuon ko kamo nga mga mangingisda sang mga tawo.” (Marcos 1:​16-​20) Ginpakita niya sa sining mga mangingisda kon daw ano ka makalilipay kon himuon nila ang hilikuton nga gin-una niya sa iya kabuhi, kag himuon ini sa idalom sang pagtuytoy niya kag paagi sa bulig niya.

¹³ Nahangpan ini sang pila sang iya Judiyong tagpalamati kag gin-aplikar nila ini. Handurawa ang danyag sa higad-baybay nga mabasa naton sa Lucas 5:​1-​11. Ang apat ka mangingisda nangisda sa bug-os nga gab-i apang wala sila sing nahulik. Sa hinali lamang, nabuta ang ila pukot! Indi ini natabuan lamang; resulta ini sang pagpasilabot ni Jesus. Sang gintan-aw nila ang baybayon, nakita nila ang isa ka kadam-an sang katawhan nga nagapamati sing maayo sa mga panudlo ni Jesus. Nagbulig ini agod ipaathag ang ginsiling anay ni Jesus sa apat: “Sugod karon magapangisda [kamo] sing mga tawo nga buhi.” Ano  ang ila reaksion? “Gindala nila sa duta ang mga bangka, kag biniyaan nila ang tanan kag nagsunod sa iya.”

14. (a) Paano kita makasapo sing kaumpawan sa karon? (b) Anong makapaumpaw nga maayong balita ang ginbantala ni Jesus?

¹⁴ Mahimo mo man ini. Ang hilikuton nga pagtudlo sing kamatuoran sang Biblia sa mga tawo nagapadayon gihapon. Mga anom ka milyon ka Saksi ni Jehova sa bug-os nga kalibutan ang nagbaton sang imbitasyon ni Jesus nga “itakod [nila ang iya] gota”; sila nangin “mga mangingisda sang mga tawo.” (Mateo 4:19) Ginahimo ini sang iban nga ila bug-os tion nga hilikuton; ginahimo naman sang iban ang ila bug-os nga masarangan sing part-time. Nasapwan ini sang tanan nga makapaumpaw, gani ang ila kabuhi indi na tanto kahuol. Nagalakip ini sang paghimo sa butang nga naluyagan nila, ang pagsugid sa iban sing maayong balita​​—⁠“ang maayong balita sang ginharian.” (Mateo 4:23) Makalilipay pirme nga ipakighambal ang maayong balita apang ilabi na ining maayong balita. Makita sa Biblia ang ginakinahanglan gid naton nga materyal agod kumbinsihon ang madamo nga mahimo sila magkabuhi sing indi tanto kahuol.​​—⁠2 Timoteo 3:​16, 17.

15. Paano ka makabenepisyo gikan sa mga panudlo ni Jesus tuhoy sa kabuhi?

¹⁵ Sa pila ka kasangkaron, bisan ang mga tawo nga bag-o lang makatuon tuhoy sa Ginharian sang Dios nakabenepisyo gikan sa mga panudlo ni Jesus sa kon paano magkabuhi. Madamo ang makasiling sing matinuuron nga ang mga panudlo ni Jesus nagpaumpaw sa ila kag nagbulig sa ila nga mabag-o sing bug-os ang ila kabuhi. Mapamatud-an mo ini mismo paagi sa pag-usisa sa pila sa mga prinsipio sang pagkabuhi nga ginsambit sa kasaysayan tuhoy sa kabuhi kag ministeryo ni Jesus, ilabi  na ang mga Ebanghelyo nga ginsulat nanday Mateo, Marcos, kag Lucas.

Pagpangita sing Kaumpawan

16, 17. (a) Diin mo makita ang pila sang panguna nga mga panudlo ni Jesus? (b) Ano ang kinahanglan agod makasapo sing kaumpawan paagi sa pag-aplikar sa mga panudlo ni Jesus?

¹⁶ Sang tigpamulak sang 31 C.⁠E., si Jesus naghatag sing isa ka pamulongpulong nga bantog sa kalibutan tubtob karon. Masami ini ginatawag nga Sermon sa Bukid. Narekord ini sa Mateo kapitulo 5 tubtob 7 kag Lucas kapitulo 6, kag ginasumaryo sini ang madamo sang iya mga panudlo. Mabasa mo ang iban pa nga mga panudlo ni Jesus sa iban nga bahin sang mga Ebanghelyo. Ang madamo sa ginsiling niya madali mahangpan, bisan pa nga ang pag-aplikar sa sini mahimo nga mabudlay. Ngaa indi mo basahon ini nga mga kapitulo sing maayo, sing mahunahunaon? Tuguti ang imo panghunahuna kag panimuot nga maimpluwensiahan sang gahom sang iya mga ideya.

¹⁷ Maathag nga ang mga panudlo ni Jesus mahimo maareglo sa nagkalainlain nga mga paagi. Grupu-grupuhon naton ang panguna nga mga panudlo agod nga may yara isa ka panudlo para sa kada adlaw sang bulan, nga may tulumuron nga iaplikar ini sa imo kabuhi. Paano? Ti, indi lamang ini pagpahapyawi. Dumduma ang manggaranon nga manuggahom nga namangkot kay Jesucristo: “Ano ang himuon ko agod mapanubli ko ang kabuhi nga walay katapusan?” Sang ginsulit ni Jesus ang importante gid nga mga ginapatuman sang Kasuguan sang Dios, ang lalaki nagsabat nga ginahimo na niya ini nga mga butang. Apang, nakahisayod sia nga dapat sia maghimo sing dugang pa. Ginpangabay sia ni Jesus nga manikasog sing dugang pa agod maaplikar ang diosnon nga mga prinsipio sa praktikal nga mga paagi, ang mangin isa ka aktibo nga disipulo. Maathag nga ang lalaki indi pa handa  nga himuon yadto. (Lucas 18:18-​23) Gani, dapat dumdumon sang isa nga luyag magtuon sang mga panudlo ni Jesus karon nga may yara kinatuhayan sa ulot sang pag-ugyon sa sini kag sang paghimo gid sini, sa amo ginabuhinan ang kahuol.

18. Iilustrar kon paano mo magamit sing mapuslanon ang kaupod nga kahon.

¹⁸ Subong panugod sa pag-usisa kag sa pag-aplikar sa mga panudlo ni Jesus, tan-awa ang punto 1 sa kaupod nga kahon. Nagapatuhoy ini sa Mateo 5:​3-9. Matuod, ang bisan sin-o sa aton mahimo makahinguyang sing madamo nga tion nga ginapamalandungan ang makalilipay nga laygay nga ginhatag sa sining mga bersikulo. Apang, sa pagtan-aw sa sini sa kabug-usan, ano ang mahinakop mo tuhoy sa panimuot? Kon luyag mo gid nga malandas ang epekto sang tuman nga kahuol sa imo kabuhi, ano ang makabulig? Paano mo mapauswag ang imo kahimtangan kon ginahatagan mo sing dugang nga igtalupangod ang espirituwal nga mga butang, kag ginatugutan ini nga amo pirme ang imo ginahunahuna? May iban pa bala nga mga kabalaka sa imo kabuhi nga indi mo dapat hatagan sing daku nga importansia, sa amo ginahatagan sing dugang pa nga igtalupangod ang espirituwal nga mga butang? Kon ginahimo mo ini, ang imo kalipay sa karon magadugang.

19. Ano ang himuon mo agod makatigayon sing dugang nga paghantop kag paghangop?

¹⁹ Himua karon ang dugang pa nga tikang. Ngaa indi mo binagbinagon ini nga mga bersikulo upod sa isa pa ka alagad sang Dios, ayhan sa imo tiayon, malapit nga himata, ukon abyan? (Hulubaton 18:24; 20:5) Dumduma nga ang manggaranon nga manuggahom namangkot sa iban​​—⁠kay Jesus​​—⁠tuhoy sa isa ka may kaangtanan nga butang. Ang sabat mahimo nga nakahatag sa iya sing kahigayunan nga makatigayon sing dugang pa nga kalipay kag dayon nga kabuhi. Ang masigkasumilimba nga kaupod mo sa pagbinagbinag sining mga bersikulo indi kaangay ni Jesus; apang, ang inyo paghambalanay tuhoy sa mga panudlo ni Jesus magabenepisyo sa inyo nga duha. Tilawi ini nga himuon sa gilayon.

20, 21. Ano nga programa ang mahimo mo sundon agod matun-an ang mga panudlo ni Jesus, kag paano mo matulutimbang ang imo pag-uswag?

²⁰ Tan-awa liwat ang kaupod nga kahon, “Mga Panudlo nga Magabulig sa Imo.” Ining mga panudlo gingrupo agod nga sa di-magkubos may yara isa ka panudlo nga mabinagbinag mo kada adlaw. Mahimo mo anay basahon ang ginsiling ni Jesus sa mga bersikulo nga ginsambit. Nian hunahunaa ang iya mga pinamulong. Pamalandungi kon paano mo ini maaplikar sa imo kabuhi. Kon sa banta mo ginahimo mo na ini, binagbinaga kon ano pa ang sarang mo himuon agod maaplikar ang panudlo sang Dios. Tinguhai nga iaplikar ini sa sina nga adlaw. Kon nabudlayan ka nga mahangpan ukon mahibaluan kon paano ini iaplikar, maghinguyang sing isa pa ka adlaw sa sini. Apang, dumduma nga indi kinahanglan nga mahibaluan mo ini sing maayo antes ka magliton sa masunod nga panudlo. Sa masunod nga adlaw, mahimo mo mabinagbinag ang isa pa ka panudlo. Pagkatapos sang isa ka semana, marepaso mo kon daw ano ka madinalag-on nga naaplikar mo ang apat ukon lima sa mga panudlo ni Jesus. Dugangi ini sa ikaduha nga semana, sa adlaw-adlaw. Kon nakita mo nga wala mo maaplikar ang pila ka panudlo, indi maluyahan sing buot. Ang tagsa ka Cristiano makaeksperiensia sina. (2 Cronica 6:​36; Salmo 130:⁠3; Manugwali 7:​20; Santiago 3:8) Padayuna sa ikatlo kag ikap-at nga semana.

²¹ Pagkatapos sang isa ukon kapin ka bulan, mahimo nabinagbinag mo na ang tanan nga 31 ka punto. Ano man ang kahimtangan, ano ang batyagon mo subong resulta? Indi bala mas malipayon ka, ayhan mas relaks? Bisan pa diutay lamang ang imo pag-uswag, mahimo nga wala ka na tanto ginahul-an, ukon sa di-magkubos maatubang mo na sing maayo ang kahuol, kag may paagi ka para magpadayon. Indi pagkalimti nga may madamo pa nga maayo nga mga punto sang mga panudlo ni  Jesus ang wala sa listahan. Ngaa indi mo pangitaon ang iban sini kag tinguhaan ini nga iaplikar?​​—⁠Filipos 3:⁠16.

22. Ano ang mahimo nga magresulta sa pagsunod sa mga panudlo ni Jesus, apang anong dugang nga mga butang ang nagakabagay nga tun-an?

²² Makita mo nga ang gota ni Jesus, bisan pa indi nga walay bug-at, tunay nga mahulas. Ang lulan sang iya mga panudlo kag pagkadisipulo mamag-an. Pagkatapos sang kapin sa 60 ka tuig sang personal nga eksperiensia, si apostol Juan, ang pinalangga nga abyan ni Jesus, nag-ugyon: “Amo ini ang kahulugan sang gugma sa Dios, nga sundon naton ang iya mga sugo; apang ang iya mga sugo indi mabug-at.” (1 Juan 5:3) Matigayon mo man ini nga pagsalig. Kon mas madugay mo nga ginaaplikar ang mga panudlo ni Jesus, mas makita mo nga ang butang nga nagapahuol gid karon sa kabuhi sang madamo indi gali makapahuol sa imo. Makita mo ang daku nga kaumpawan. (Salmo 34:8) Apang, may isa pa ka bahin sang mahulas nga gota ni Jesus nga dapat mo binagbinagon. Ginsambit man ni Jesus nga sia “malulo kag mapainubuson sing tagipusuon.” Paano ina nagasigo sa aton pagtuon kag pag-ilog kay Jesus? Sa masunod nga artikulo, binagbinagon naton ini.​​—⁠Mateo 11:29.

Ano ang Imo Sabat?

• Ngaa dapat kita magdangop kay Jesus kon nagapangita kita sing kaumpawan gikan sa tuman nga kahuol?

• Ano ang ginasimbulo sang gota, kag ngaa?

• Ngaa gin-agda ni Jesus ang mga tawo nga itakod ang iya gota?

• Paano mo matigayon ang espirituwal nga kaumpawan?

[Mga Pamangkot sa Pagtinuon]

[Blurb sa pahina 14]

Ang tuigan nga teksto sang mga Saksi ni Jehova sa 2002 amo: “Kari sa akon, . . . kag paumpawan ko kamo.”​​—⁠Mateo 11:28.

[Kahon/Retrato sa pahina 12, 13]

Mga Panudlo nga Magabulig sa Imo

Anong maayo nga mga butang ang mabasa mo sa Mateo kapitulo 5 tubtob 7? Mabasa sa sining mga kapitulo ang mga panudlo nga ginhatag sa banglid sa Galilea sang Batid nga Manunudlo, si Jesus. Palihug basaha ang mga bersikulo nga ginsambit sa ubos, nga ginagamit ang imo kopya sang Biblia, kag pamangkuta ang imo kaugalingon sang may kahilabtanan nga mga pamangkot.

1. 5:​3-9 Ano ang ginasugid sini sa akon tuhoy sa akon kinaandan nga panimuot? Ano ang himuon ko agod matigayon ang daku pa nga kalipay? Paano ko mahatagan sing dugang nga igtalupangod ang akon espirituwal nga mga kinahanglanon?

2. 5:25, 26 Ano ang maayo pa sangsa pag-ilog sa makiawayon nga espiritu sang madamo?​​—⁠Lucas 12:​58, 59.

3. 5:27-30 Ano ang ginapadaku sang pinamulong ni Jesus tuhoy sa romantiko nga mga pagdalamguhanon? Paano makaamot sa akon kalipay kag kalinong sa hunahuna ang paglikaw ko sa sini?

4. 5:38-42 Ngaa dapat ko panikasugan nga likawan ang pagpadaku nga ginahatag sang modernong katilingban sa tuman nga kasupog?

5. 5:43-48 Paano ako makabenepisyo kon pangilalahon ko sing maayo pa ang mga kaupod nga mahimo ginkabig ko nga mga kaaway? Ano ang mahimo sini agod mabuhinan ukon madula ang tension?

6. 6:14, 15 Kon may huyog ako kon kaisa nga indi magpatawad, mahimo bala nga ang kahisa ukon paghinakit amo ang panguna nga kabangdanan? Paano ko ini mabag-o?

7. 6:16-18 Nahuyog bala ako nga mangin mas interesado sa hitsura sangsa kon ano ang akon nasulod nga kinaugali? Sa ano ako dapat mangin mas alisto?

8. 6:19-32 Ano ang mangin epekto kon mabalaka ako sing sobra sa kuwarta kag mga pagkabutang? Ang paghunahuna sa ano ang makabulig sa akon nga mahuptan ang pagkatimbang bahin sini?

9. 7:1-5 Ano ang akon ginabatyag kon kaupod ko ang mga tawo nga may panimuot nga nagapakamalaut kag nagamulay, nga pirme nagapangita sing kasaypanan? Ngaa importante para sa akon nga likawan nga mangin subong sini?

10. 7:7-11 Kon ang pagkamapinadayunon dalayawon kon nagapangabay ako sa Dios, kamusta naman sa iban nga mga bahin sang kabuhi?​​—⁠Lucas 11:​5-​13.

11. 7:12 Bisan pa nahibaluan ko ang Bulawanon nga Sulundan, daw ano kasunson ko ginaaplikar ini nga laygay sa pagpakig-angot sa iban?

12. 7:24-27 Sanglit salabton ko ang pagpalakat sa akon kabuhi, paano ako makahanda sing mas maayo para sa madamo nga kabudlayan kag problema? Ngaa dapat ko ini karon hunahunaon?​​—⁠Lucas 6:​46-​49.

Dugang pa nga mga panudlo nga mahimo ko binagbinagon:

13. 8:2, 3 Paano ko mapakita ang kaawa sa mga kubos, subong sa masami nga ginhimo ni Jesus?

14. 9:9-38 Ano ang bahin sang pagpakita sing kaluoy sa akon kabuhi, kag paano ko ini mapakita sing labi pa?

15. 12:19 Nagatuon gikan sa tagna tuhoy kay Jesus, ginapanikasugan ko bala nga likawan ang makiawayon nga mga argumento?

16. 12:20, 21 Ano nga kaayuhan ang mahimo ko kon wala ko ginapabug-atan ang iban paagi sa akon mga hambal ukon mga buhat?

17. 12:34-37 Ano ang pirme ko ginahambal? Nahibaluan ko nga kon pugaon ko ang kahil, duga sang kahil ang nagaguwa, gani ngaa dapat ko hunahunaon kon ano ang yara sa sulod ko, sa tagipusuon ko?​​—⁠Marcos 7:​20-​23.

18. 15:4-6 Gikan sa komento ni Jesus, ano ang nahangpan ko tuhoy sa mahigugmaon nga pag-ulikid sa mga tigulang?

19. 19:13-15 Ano ang dapat ko hatagan sing tion nga himuon?

20. 20:25-28 Ngaa indi maayo nga ipakita ang awtoridad sa kaugalingon nga kaayuhan? Paano ko mailog si Jesus bahin sa sini?

Dugang pa nga mga panghunahuna, nga ginrekord ni Marcos:

21. 4:24, 25 Ngaa importante kon paano ko ginapakig-angutan ang iban?

22. 9:50 Kon ang akon ginasiling kag ginahimo maayo, ano ang mangin maayo nga mga resulta?

Sa katapusan, binagbinaga ang pila ka panudlo nga ginrekord ni Lucas:

23. 8:11, 14 Kon pabay-an ko ang kabalaka, manggad, kag kalipayan nga mangibabaw sa akon kabuhi, ano ang mahimo nga resulta?

24. 9:1-6 Bisan pa si Jesus may gahom sa pagpaayo sa mga masakiton, ano ang gin-una niya?

25. 9:52-56 Madali bala ako maakig? Ginalikawan ko bala ang espiritu sang pagbalos?

26. 9:62 Paano ko dapat tamdon ang akon responsabilidad sa paghambal tuhoy sa Ginharian sang Dios?

27. 10:29-37 Paano ko mapamatud-an nga isa ako ka isigkatawo, indi isa ka estranghero?

28. 11:33-36 Ano nga mga pagbag-o ang mahimo ko himuon agod mangin mas simple ang akon kabuhi?

29. 12:15 Ano ang kaangtanan sang kabuhi sa mga pagkabutang?

30. 14:28-30 Kon maghinguyang ako sing tion nga timbangtimbangon sing maayo ang mga desisyon, ano ang mahimo nga malikawan ko, kag ano ang bentaha?

31. 16:10-12 Ano nga mga kaayuhan ang mahimo nga matigayon ko gikan sa pagkabuhi nga may integridad?

[Mga retrato sa pahina 10]

Ang nagaluwas-kabuhi nga hilikuton sa idalom sang gota ni Jesus makapaumpaw