Madumduman Mo Bala?

Naapresyar mo bala ang pagbasa sing ulihi nga mga guwa sang Ang Lalantawan? Bueno, tan-awa kon masabat mo ang masunod nga mga pamangkot:

• Ano ang nabulig sang Federal Constitutional Court sang Alemanya sa legal nga kadalag-an sa relihion?

Ginbaliskad sini nga korte ang negatibo nga opisyal nga desisyon sang isa ka korte sa mga Saksi ni Jehova kag ang pagkilala sa ila subong isa ka korporasyon suno sa kasuguan para sa publiko. Ang madaugon nga desisyon nagsiling nga suno sa ginatugot sang relihioso nga kahilwayan ang bisan sin-o mahimo ‘magtuman sa relihioso nga pagtuluuhan’ sangsa mga ginapatuman sang Estado.​​—⁠8/15, pahina 8.

• Daw ano kalawig nga panahon ang pag-antos ni Job?

Ang tulun-an sang Job wala nagasugid nga nag-antos sia sing madamo nga tinuig. Ang pag-antos ni Job kag ang kalubaran sini mahimo nga natabo sa sulod sang pila ka bulan, ayhan kubos lamang sa isa ka tuig.​​—⁠8/15, pahina 31.

• Ngaa makapat-od kita nga ang Yawa indi disparatis?

Nahibaluan ni Jesucristo nga matuod ang Yawa. Ginsulay si Jesus sang isa ka matuod nga persona, indi sang isa nga malaut sa sulod niya. (Mateo 4:​1-​11; Juan 8:​44; 14:30)​​—⁠9/1, pahina 5-6.

• Ang Hulubaton 10:15 nagasiling: “Ang bilidhon nga mga butang sang tawo nga manggaranon amo ang iya mabakod nga banwa. Ang kalaglagan sang mga imol amo ang ila kaimulon.” Paano ini napamatud-an nga matuod?

Ang manggad mahimo nga isa ka pangamlig batok sa pila ka walay kapat-uran sa kabuhi, subong nga ang nakutahan nga banwa nagahatag sing kalig-unan sa mga nagapuyo sa sini. Sa pihak nga bahin, ang kaimulon mahimo mangin malaglagon kon matabo ang wala ginapaabot nga mga butang.​​—⁠9/15, pahina 24.

• Sa ano nga kahulugan nagsugod ang “pagtawag sa ngalan ni Jehova” sang adlaw ni Enos? (Genesis 4:26)

Ang ngalan sang Dios gingamit na kutob pa sang pagsugod sang maragtas sang tawo; busa ang nagsugod sang panahon ni Enos amo ang indi pagtawag kay Jehova nga may pagtuo. Mahimo nga gin-aplikar sang mga tawo ang ngalan sang Dios sing mapasipalahon sa ila mismo ukon sa iban nga paagi sa ila, pakunokuno nga nagasimba sila sa Dios.​​—⁠9/15, pahina 29.

• Subong gingamit sa Biblia, ano ang kahulugan sang tinaga nga “disiplina”?

Ang tinaga wala nagapahangop sing bisan ano nga sahi sang pag-abuso ukon kapintas. (Hulubaton 4:​13; 22:15) Ang Griegong tinaga sa “disiplina” nagapatuhoy una sa instruksion, pagtudlo, pagtadlong kag, kon kaisa, sa malig-on apang mahigugmaon nga pagsilot. Ang importante nga paagi nga masunod sang mga ginikanan si Jehova amo ang pagtinguha nga huptan nga bukas ang linya sang komunikasyon upod sa ila mga anak. (Hebreo 12:​7-​10)​​—⁠10/1, pahina 8, 10.

• Paano ginapakita sang mga Cristiano karon nga dampig sila sa paggahom sang Dios?

Sa pagsakdag sa Ginharian sang Dios, ang mga Saksi ni Jehova wala nagabuylog sa politika ukon nagasugyot sing rebelyon, bisan sa kadutaan nga ginadumilian ang mga Saksi. (Tito 3:1) Nagatinguha sila nga makahatag sing positibo nga bulig subong sang ginhimo anay ni Jesus kag sang iya una nga mga disipulo kag nagpanikasog nga mabuligan ang mga tawo nga batunon ang mapuslanon nga mga prinsipio sang Biblia, subong sang pagkabunayag, matinlo nga moral, kag maayong panimuot sa trabaho.​​—⁠10/15, pahina 6.

• Paano nagailig ang nagahatag-kabuhi nga tubig sa Andes?

Ang mga Saksi ni Jehova didto nagapanikasog nga madala ang kamatuoran sang Biblia sa mga tawo, bisan sa duha ka lokal nga lenguahe, Quechua kag Aymara. Ang mga Saksi nagaduaw sa mga tawo nga nagapuyo sa mga isla sang Lake Titicaca, lakip sa “nagalutaw” nga mga plataporma nga isla nga nahuman sa mga tabun-ak nga nagapamuhi sa tubig sang linaw.​​—⁠10/15, pahina 8-10.

• Ano nga panuytoy ang ginhatag sang Dios sa aton nga mapaanggid sa panuytoy nga sistema sang kompyuter sa modernong pangpasahero nga mga eroplano?

Ginsangkapan sang Dios ang mga tawo sang ikasarang para sa pagtuytoy sa moral, ang nasulod moral nga igbalatyag. Amo ini ang aton napanubli nga konsiensia. (Roma 2:​14, 15)​​—⁠11/1, pahina 3, 4.

• Ngaa ang kamatayon ni Jesus may daku nga balor?

Sang nagpakasala ang himpit nga tawo nga si Adan, nadula niya ang tawhanon nga kabuhi para sa iya mismo kag sa iya mga kaliwatan. (Roma 5:12) Subong himpit nga tawo, ginhalad ni Jesus ang iya tawhanon nga kabuhi, sa amo naghatag sing gawad agod nga ang matutom nga mga tawo mahimo nga makaagom sang kabuhi nga walay katapusan.​​—⁠11/15, pahina 5-6.

• Sin-o ang mga Escita nga ginsambit sa Colosas 3:​11?

Ang mga Escita isa ka manlulugayaw nga pungsod sa kapatagan sang Eurasia, nga naggahom kutob sang 700 tubtob 300 B.⁠C.⁠E. Makadalayaw sila nga mga manugkabayo kag mga hangaway. Ang Colosas 3:11 mahimo nga nagapahangop, indi sing isa ka espesipiko nga pungsod, kundi sang pinakamalain indi sibilisado nga mga tawo.​​—⁠11/15, pahina 24-5.

• Ngaa makasiling kita nga ang Bulawanon nga Sulundan isa ka panudlo nga dapat naton pirme talupangdon?

Ini nga sulundan sang husto nga pamatasan ginasambit sa Judaismo, Budhismo, Griegong pilosopiya, kag Confucianismo. Apang, ang ginsugo ni Jesus sa Sermon sa Bukid nagakinahanglan sing positibo nga mga buhat, kag nagaapektar ini sa kabuhi sang mga tawo bisan diin kag sa bisan ano nga dag-on. (Mateo 7:12)​​—⁠12/1, pahina 3.