Mga Pamangkot Gikan sa mga Bumalasa

Paano mabalanse sang Cristianong asawa ang iya pagkamainunungon sa Dios kag ang pagpasakop sa iya di-tumuluo nga bana kon nagapakigbahin sia sa relihioso nga mga selebrasyon?

Ang iya paghimo sini nagakinahanglan sing kaalam kag taktika. Apang ginahimo ang husto nga butang sa pagpanikasog nga mabalanse niya ang iya duha ka katungdanan. Si Jesus naghatag sing laygay tuhoy sa isa ka kaanggid nga kahimtangan: “Ihatag nian kay Cesar ang mga butang nga iya ni Cesar, apang sa Dios ang mga butang nga iya sang Dios.” (Mateo 22:21) Matuod, ginapatuhuyan niya ang mga katungdanan sa gobierno, sa amo ang mga Cristiano ginsugo sang ulihi nga magpasakop. (Roma 13:1) Apang, ang iya laygay maaplikar man sa pagbalanse sang isa ka asawa sang iya katungdanan sa Dios kag sang iya Makasulatanhon nga pagpasakop sa iya bana, bisan pa di-tumuluo sia.

Wala sing isa nga pamilyar sa Biblia ang makapanghiwala nga ginapadaku sini nga ang una nga katungdanan sang Cristiano amo ang mangin mainunungon sa Labing Gamhanan nga Dios sa tanan nga tion. (Binuhatan 5:29) Sa gihapon, sa pila ka mga kahimtangan mapasugtan sang isa ka matuod nga sumilimba ang ginapangabay ukon ginapangayo sang isa ka di-tumuluo nga yara sa awtoridad samtang wala ginalapas ang mataas nga mga kasuguan sang Dios.

Makita naton ang nagatudlo nga halimbawa sang tatlo ka Hebreo, subong ginsaysay sa Daniel kapitulo 3. Ang pangulo sa ila gobierno, si Nabocodonosor, nagsugo nga sila kag ang iban pa magkadto sa kapatagan sang Dura. Sa paghibalo nga gintalana didto ang butig nga pagsimba, mahimo nga ginpakamaayo sang tatlo ka Hebreo nga maglikaw sa pagkadto didto. Ayhan nakapamalibad si Daniel nga indi magkadto,  apang indi ini mahimo sang tatlo.⁠ * Gani nagtuman sila nga magtambong, apang indi sila​​—⁠kag wala sila⁠​—⁠magpakig-ambit sa bisan ano nga sala nga buhat.​​—⁠Daniel 3:​1-​18.

Sing kaanggid, sa tion sang mga selebrasyon ang di-tumuluo nga bana mahimo nga mangabay ukon maghingyo sa iya Cristianong asawa nga himuon ang butang nga ginalikawan sang iya asawa. Binagbinaga ang pila ka halimbawa: Ginpaluto sia sing pagkaon sa adlaw nga ang iya bana kag ang iban pa magasaulog sing isa ka selebrasyon. Ukon naghingyo ang bana nga ang pamilya (upod ang iya asawa) magbisita sa iya mga paryente sa sina nga adlaw para magkaon ukon magduaw lang. Ukon antes pa gani sang selebrasyon, mahimo magsiling sia nga samtang nagapamalaklon ang iya asawa, baklan sia sing​​—⁠mga pagkaon para sa sina nga okasyon, pila ka butang nga pangregalo, ukon inugputos nga papel kag mga card nga gamiton para sa iya mga regalo.

Sa liwat, ang Cristianong asawa dapat mangin determinado nga indi magpakigbahin sa butig relihioso nga mga buhat, apang kamusta sa sina nga mga pangabay? Ang bana amo ang ulo sang pamilya, kag ang Pulong sang Dios nagasiling: “Kamo nga mga asawa, magpasakop kamo sa inyo mga bana, subong nga nagakaigo sa Ginuo.” (Colosas 3:18) Sa sini nga mga kahimtangan, mapakita bala niya ang pagpasakop subong isa ka asawa samtang mangin mainunungon sa Dios? Dapat sia magpamat-od kon paano niya mabalanse ang pagtuman sa iya bana kag ang pagtuman man kay Jehova.

Kon kaisa, mangabay ang iya bana nga lutuan sia sing isa ka pagkaon, tungod kay paborito niya ini ukon bangod kay naandan niya ini nga pagkaon sa isa ka partikular nga okasyon. Handum niya nga ipakita ang iya gugma sa iya bana kag ang pagkilala sa iya pagkaulo. Mahimo niya bala ini kon ang iya bana mangabay sa okasyon sang isa ka selebrasyon? Sarang ini mahimo sang pila ka Cristianong asawa nga ginahuptan gihapon ang maayong konsiensia, ginakabig ini nga isa ka kinaandan lamang nga hilikuton sa paghanda sing matag-adlaw nga pagkaon. Sa pagkamatuod, ang mainunungon nga Cristiano indi magahatag sing suno sa selebrasyon nga kahulugan sa sini, bisan pa amo ini ang pagtamod sang iya bana. Sing kaanggid man, ayhan obligahon sia sang iya bana nga mag-upod sa iya kon magbisita sia sa iya mga paryente sa nanuhaytuhay nga mga tion kada bulan ukon kada tuig. Sarang niya bala mahimo ini bisan pa adlaw ini sang isa ka selebrasyon? Ukon luyag niya bala baklon ang mga butang nga ginpangabay sang iya bana nga daw sa kinaandan lang, nga wala ginahukman kon ano ang tuyo sang iya bana sa mga butang nga ginbakal niya para sa iya bana samtang nagapamalaklon?

Siempre, dapat hunahunaon man sang Cristianong asawa ang iban​​—⁠ang epekto sini sa ila. (Filipos 2:4) Luyag niya likawan ang maghatag sing impresyon nga nagapakigbahin sia sa selebrasyon, subong nga mahimo gid nga ginpakamaayo sang tatlo ka Hebreo nga kuntani wala sing iban nga makakita sa ila nga nagalakbay pakadto sa kapatagan sang Dura. Gani mahimo nga manikasog sia nga mangatarungan sing mataktikanhon sa iya bana nga basi pa man lang, bangod sang konsiderasyon sang iya bana sa iya balatyagon, mahimo nga sia na lang mismo ang magahimo sang pila ka butang may kahilabtanan sa selebrasyon agod mabuligan ang iya asawa nga nagahigugma kag nagatahod sa iya. Ayhan mahimo nga mahangpan sang bana ang pagkamaalamon nga indi sila nga duha ibutang sa isa ka makahuluya gid nga sitwasyon kon magdumili ang iya asawa sa paghimo sing butig relihiosong mga buhat. Huo, ang abanse kalma nga paghambalanay mahimo nga magadul-ong sa mahidaiton nga solusyon.​​—⁠Hulubaton 22:3.

Sa katapusan nga pag-analisar, dapat binagbinagon sang matutom nga Cristiano ang mga katunayan kag magpamat-od kon ano ang himuon. Dapat unahon ang pagtuman sa Dios, subong sang ginhimo sang tatlo ka Hebreo. (1 Corinto 10:31) Apang samtang ginahunahuna ina, ang tagsa ka Cristiano dapat magpamat-od man kon ano nga mga butang ang sarang mahimo nga indi sia makompromiso sa ginapangabay sang isa nga may awtoridad sa pamilya ukon sa komunidad.

[Nota]