“Sin-o Ako Suno sa Ginasiling sang mga Tawo?”

PANAHON na naman sang Paskwa. Ang mga tawo sa bug-os nga kalibutan nagaselebrar sing isa ka kaadlawan. Kay sin-o kaadlawan? Sang Anak bala sang Dios ukon sang isa lamang ka debotado nga Judiyo nga may tuyo nga repormahon ang relihion sa iya duog sang nahaunang siglo? Kaadlawan bala ini sang isa ka tagpangapin sang mga imol, sang isa ka rebelde nga nangin makatalagam sa Emperyo sang Roma amo nga ginpapatay sia, ukon ayhan sang isa ka mangin-alamon nga nagpadaku sang ihibalo sa kaugalingon kag nasulod nga ginharian sang kaalam? May rason gid ikaw nga mamangkot, ‘Sin-o gid bala si Jesucristo?’

Si Jesus mismo interesado sa sabat sang mga tawo sa sini nga pamangkot. “Sin-o ako suno sa ginasiling sang mga tawo?” pamangkot niya anay sa iya mga disipulo. (Marcos 8:27) Ngaa ginpamangkot niya ini? Madamo na ang nag-untat sa pagsunod sa iya. Ang iban naman maathag nga naligban kag nalugaw-an sang ginsikway niya ang ila mga panikasog nga himuon sia nga hari. Isa pa, sang ginhangkat sia sang iya mga kaaway, wala maghatag si Jesus sing tanda gikan sa langit agod pamatud-an kon sin-o sia. Gani bilang sabat sa sini nga pamangkot, ano ang ginsiling sang iya

 mga apostoles kon sin-o sia? Ginsambit nila ang pila sa mga pagtamod nga lapnag sa mga tawo: “Ang pila nagasiling si Juan Bautista, ang iban si Elias, kag ang iban pa si Jeremias ukon isa sang mga manalagna.” (Mateo 16:​13, 14) Wala nila ginsambit ang madamong mamulayon nga mga tinaga nga lapnag sadto sa Palestina tuhoy kay Jesus​—⁠manugpasipala, impostor, butig nga manalagna, kag buang pa gani.

Ang Madamo nga Pagkilala kay Jesus

Kon ipamangkot man ini ni Jesus karon, mahimo nga ligwaton pa gani niya ini: “Sin-o ako suno sa ginasiling sang mga iskolar?” Sa liwat, ang mga sabat mahimo mabilog sa sini: Lainlain ang mga opinyon. Suno kay David Tracy sang University of Chicago, ang lainlain nga mga tawo may lainlain nga mga opinyon kag interpretasyon tuhoy kay Jesus kag sa iya ginsiling kag ginhimo. Sang nagligad nga siglo, naggamit ang mga iskolar sing madamong masibod nga metodo sa sosyolohiya, antropolohiya, kag literatura samtang ginatinguhaan nila nga sabton ang pamangkot kon sin-o gid si Jesus. Subong resulta, sin-o gid bala ang ginahunahuna nila nga si Jesus?

Ang pila ka mga iskolar padayon nga nagasiling nga ang maragtason nga si Jesus isa ka Judiyong manalagna nga nagatagna sang katapusan sang kalibutan kag nagapalig-on sing paghinulsol. Apang, wala nila sia pagtawga nga Anak sang Dios, Mesias, kag Manunubos. Ginduhaduhaan sang kalabanan ang rekord sang Biblia tuhoy sa iya langitnon nga ginhalinan kag sa iya pagkabanhaw. Para sa iban, si Jesus isa lamang ka tawo nga bangod sang iya huwaran nga pagkabuhi kag mga panudlo nagluntad ang pila ka relihion nga nangin bahin sang Cristianismo sang ulihi. Kag subong sang mabasa sa Theology Today, ang iban pa nagatamod kay Jesus subong “isa ka mamulayon, isa ka nagalagaw nga mangin-alamon, ukon isa ka mistiko nga timawa; isa ka organisador sang komunidad, isa ka hippie nga mamalaybay nga nagamulay sa establisado nga kahimusan sang katilingban, ukon isa ka anad-sa-kalye nga manugpabangig nga prangka sa iya mga opinyon samtang nagalibotlibot sia sa madamo sing tawo, imol, madali magsingki nga mga minuro sa naligwin nga Palestina.”

May yara man di-kinaandan pa nga mga pagtamod. Ang larawan sang itom nga Jesus hinali nga nagtuhaw sa rap music, taliambong sa mga siudad, kag mga saot pa gani.⁠ * Ang iban naghaumhaum nga si Jesus isa gid ka babayi. Sang tig-ilinit sang 1993, nakita sang mga dumuluaw sa Orange County Fair sa California ang estatwa ni “Christie,” isa ka hubo, babayi nga “Cristo” sa krus. Sadto man nga tion sa New York, gindispley si “Christa”​—⁠ang ginlansang sa krus nga babayi nga “Jesus.” Ining duha ka estatwa gintunaan sang daku nga binais. Kag sang maaga nga bahin sang 1999, ang mga bumalakal nakakita sing isa ka libro “tuhoy sa paghigugmaanay sang Bata nga Jesus kag sang iya ido, nga si Angel.” Ang ila relasyon ginlaragway subong “makatalandog sa espirituwal kag nagapakita kon paano handa nga isakripisyo sang bata kag sang ido ang ila kabuhi para sa isa kag isa.”

Importante Gid Bala Ini?

Ngaa dapat ka mangin interesado kon sin-o si Jesus sadto kag karon? Isa ka rason bangod, sa pagkutlo kay Napoleon, “si Jesucristo nag-impluwensia kag naggahom sa Iya mga sakop bisan pa indi Sia makita.” Paagi sa iya dinamiko nga panudlo kag paagi sa iya pagkabuhi, mabaskog nga naimpluwensiahan ni Jesus ang kabuhi sang binilyon nga tawo sa halos duha ka libo ka tuig. Ang isa ka manunulat nagakaigo nga nagsiling: “Ang tanan nga hangaway nga nagmartsa, kag ang tanan nga hangaway pangdagat nga natukod, kag ang tanan nga parlamento nga nagpanghikot, ang tanan nga hari nga naggahom, bisan kon tingubon wala makaimpluwensia sa kabuhi sang tawo sa sini nga duta sing subong kabaskog sa iya.”

Isa pa, dapat mo mahibaluan kon sin-o si Jesus sadto kag karon bangod direkta nga nagadepende sa iya ang imo palaabuton. May kahigayunan ka nga mangin sakop sang isa ka natukod na nga langitnon nga panguluhan​—⁠ang Ginharian sang Dios sa idalom ni Jesus. Ang aton nasit-an nga planeta ipasag-uli sa matahom nga pagkananuhaytuhay sang kabuhi sini kag pagkatimbang sa ekolohiya sa idalom sang pagtuytoy ni Jesus. Ang tagna sa Biblia nagapasalig sa aton nga ang Ginharian ni Jesus magapakaon sa mga gutom, magaatipan sa mga imol, magaayo sa mga nagabalatian, kag magabanhaw sa mga patay.

Pat-od nga luyag mo mahibaluan kon ano nga sahi sang persona ang magapangulo sa sining kinahanglanon gid nga panguluhan. Ang masunod nga artikulo magabulig sa imo nga mahantop ang matuod nga Jesus.

[Nota]