Ang mga Pagpakamaayo sang Maayong Balita

“Ginhaplas ako ni Jehova sa pagwali sing maayong balita sa mga mahagop. Ginpadala niya ako sa pagbugkos sa mga buong sing tagipusuon, . . . sa paglipay sa tanan nga nagalalaw.”​—⁠ISAIAS 61:​1, 2.

1, 2. (a) Ano ang ginsugid ni Jesus tuhoy sa iya kaugalingon, kag paano? (b) Anong mga pagpakamaayo ang dala sang maayong balita nga ginbantala ni Jesus?

SANG isa ka Adlaw sang Inugpahuway sang maaga nga bahin sang iya ministeryo, si Jesus didto sa sinagoga sa Nazaret. Suno sa rekord, “gindaho sa iya ang linukot ni manalagna Isaias, kag ginbukad niya ang linukot kag nakita ang bahin diin nasulat: ‘Ang espiritu ni Jehova yari sa akon, bangod nga ginhaplas niya ako sa pagwali sing maayong balita.’ ” Ginbasa pa niya ang dugang pa nga matagnaon nga kasulatan. Nian naglingkod sia kag nagsiling: “Karon ining kasulatan nga bag-o lang ninyo mabatian natuman.”​—⁠Lucas 4:16-21.

² Sa sining paagi, ginpakilala ni Jesus ang iya kaugalingon subong ang gintagna nga ebanghelisador, ang manugbantala sing maayong balita kag manugdala sing lugpay. (Mateo 4:23) Kag maayong balita gid ang ginbantala ni Jesus! Ginsugiran niya ang iya mga tagpalamati: “Ako ang kapawa sang kalibutan. Sia nga nagasunod sa akon indi gid magalakat sa kadudulman, kundi makaangkon sing kapawa sang kabuhi.” (Juan 8:12) Nagsiling man sia: “Kon magpabilin kamo sa akon pulong, matuod gid kamo nga mga disipulo ko, kag mahibaluan ninyo ang kamatuoran, kag ang kamatuoran magahilway sa inyo.” (Juan 8:​31, 32) Huo, si Jesus may “mga pulong sang kabuhi nga walay katapusan.” (Juan 6:​68, 69) Kapawa, kabuhi, kahilwayan​—⁠amo gid ini ang mga pagpakamaayo nga dapat pakabahandion!

3. Anong maayong balita ang ginbantala sang mga disipulo ni Jesus?

³ Pagkatapos sang Pentecostes 33 C.⁠E., ginpadayon  sang mga disipulo ang pag-ebanghelyo nga hilikuton ni Jesus. Ginbantala nila ang “maayong balita sang ginharian” sa mga Israelinhon kag sa katawhan sang mga pungsod. (Mateo 24:14; Binuhatan 15:⁠7; Roma 1:16) Nakilala sang mga namati si Jehova nga Dios. Nahilway sila sa relihioso nga pagkaulipon kag nangin bahin sang bag-ong espirituwal nga pungsod, ang “Israel sang Dios,” nga ang mga katapo sini may paglaum nga maggahom sing dayon sa langit upod sa ila Ginuo, si Jesucristo. (Galacia 5:⁠1; 6:​16; Efeso 3:​5-7; Colosas 1:​4, 5; Bugna 22:5) Hamili gid ini nga mga pagpakamaayo!

Ang Pag-ebanghelyo sa Karon

4. Paano karon ginatuman ang sugo nga pagbantala sing maayong balita?

⁴ Sa karon, padayon nga ginatuman sang hinaplas nga mga Cristiano, nga suportado sang nagadamo nga “dakung kadam-an” sang “iban nga mga karnero,” ang matagnaon nga sugo nga ginhatag una kay Jesus. (Bugna 7:⁠9; Juan 10:16) Subong resulta, ang maayong balita ginabantala sa kasangkaron nga wala pa gid mahimo sang una. Sa 235 ka pungsod kag teritoryo, ang mga Saksi ni Jehova naglakat “sa pagwali sing maayong balita sa mga mahagop . . . , sa pagbugkos sa mga buong sing tagipusuon, sa pagbantala sing kahilwayan sa mga bihag kag sa bug-os nga pagpamuklat sang mga mata bisan sa mga bilanggo; sa pagbantala sang tuig sang maayong kabubut-on ni Jehova kag sang adlaw sang pagtimalos sang aton Dios; sa paglipay sa tanan nga nagalalaw.” (Isaias 61:​1, 2) Gani, ang Cristianong hilikuton nga pag-ebanghelyo padayon nga nagadala sing mga pagpakamaayo sa madamo kag sing matuod nga paglipay sa “bisan anong sahi sang kapipit-an.”​—⁠2 Corinto 1:​3, 4.

5. Tuhoy sa pagbantala sing maayong balita, paano ang mga Saksi ni Jehova tuhay sa mga simbahan sang Cristiandad?

⁵ Matuod nga suportado sang mga simbahan sang Cristiandad ang nagkalainlain nga mga paagi sang pag-ebanghelyo. Madamo ang nagapadala sing mga misyonero agod mangumbertir sa iban nga mga pungsod. Halimbawa, ang The Orthodox Christian Mission Center Magazine nagareport tuhoy sa hilikuton sang Ortodokso nga mga misyonero sa Madagascar, nabagatnan nga Aprika, Tanzania, kag Zimbabwe. Apang, sa Ortodokso nga Simbahan, subong sang iban nga mga simbahan sang Cristiandad, ang kalabanan nga katapo wala nagapakigbahin sa sining hilikuton. Sa pagpatuhay, ang tanan nga dedikado nga mga Saksi ni Jehova nagapanikasog nga makigbahin sa pag-ebanghelyo. Nahangpan nila nga ang pagwali sing maayong balita isa ka tanda nga ang ila pagtuo matuod. Si Pablo nagsiling: “Paagi sa tagipusuon ang isa nagatuo para sa pagkamatarong, apang paagi sa baba ang isa nagapahayag sing dayag para sa kaluwasan.” Ang pagtuo nga wala nagapahulag sa isa sa pagpanghikot, sa katunayan, patay.​—⁠Roma 10:10; Santiago 2:17.

Ang Maayong Balita nga May Dayon nga mga Pagpakamaayo

6. Anong maayong balita ang ginabantala karon?

⁶ Ginabantala sang mga Saksi ni Jehova ang pinakamaayo nga balita. Ginabuksan nila ang ila mga Biblia kag ginapakita sa mga nagapamati nga ginhalad ni Jesus ang iya kabuhi agod ang katawhan makapalapit sa Dios, mapatawad ang mga kasal-anan, kag may paglaum nga magkabuhi sing walay katapusan. (Juan 3:16; 2 Corinto 5:​18, 19) Ginapahibalo nila nga ang Ginharian sang Dios natukod na sa langit sa idalom sang gintangdo nga Hari, si Jesucristo, kag sa dili madugay dulaon sini ang kalautan sa duta kag dumalahan ang pagpasag-uli sa Paraiso. (Bugna 11:15; 21:​3, 4) Bilang katumanan sang tagna ni Isaias, ginasugiran nila ang ila mga isigkatawo nga karon na ang “tuig sang maayong kabubut-on ni Jehova” diin ang katawhan mahimo pa makapamati sa maayong balita. Ginapaandam man nila nga sa dili madugay magaabot ang “adlaw sang pagtimalos sang aton Dios” diin laglagon ni Jehova ang di-mahinulsulon nga mga makasasala.​—⁠Salmo 37:9-11.

7. Ano nga eksperiensia ang nagapakita sang paghiusa sang mga Saksi ni Jehova, kag ngaa ginaagom nila ini nga paghiusa?

⁷ Sa kalibutan nga ginatublag sang trahedya kag kalamidad, amo lamang ini ang maayong balita nga may dayon nga mga benepisyo. Ang mga nagapamati sa sini mangin bahin sang isa ka nahiusa, bug-os kalibutan nga paghiliutod sang mga Cristiano nga wala nagatugot nga bahinbahinon sila sang mga kinatuhayan sa pungsod, tribo, kag pangabuhi. ‘Ginpanaptan nila ang ila kaugalingon sang gugma, kay amo ini ang himpit nga higot sang paghiusa.’ (Colosas 3:14; Juan 15:12) Nakita ini sang nagligad nga tuig sa isa ka pungsod sa  Aprika. Isa ka aga, ang kabisera nga siudad ginpukaw sang tiniruhay. May nagatinguha nga agawon ang gobierno. Sang ini nga hitabo nangin isa ka etniko nga mga gumontang, ang isa ka Saksi nga pamilya ginmulay bangod sang pagsapopo sa kaupod nga mga Saksi halin sa tuhay nga etniko nga grupo. Ang pamilya nagsabat: “Mga Saksi ni Jehova lamang ang nagadayon sa amon balay.” Para sa ila, ang etniko nga mga kinatuhayan indi importante; ang Cristianong gugma​—⁠ang paglugpay sa mga nagakinahanglan​—⁠amo ang importante. Ang isa ka di-Saksi nga paryente nagkomento: “Ginaluiban sang mga katapo sang tanan nga relihion ang ila mga masigkasumilimba. Mga Saksi ni Jehova lamang ang wala magluib.” Madamong kaanggid nga mga hitabo nga ginreport gikan sa mga pungsod nga gintublag sang inaway sibil ang nagapakita nga ang mga Saksi ni Jehova ‘nagahigugma gid sang bug-os nga katilingban sang mga kauturan.’​—⁠1 Pedro 2:17.

Ang Maayong Balita Nagapabag-o sa mga Tawo

8, 9. (a) Anong mga pagbag-o ang ginhimo sang mga nagbaton sing maayong balita? (b) Anong mga eksperiensia ang nagalaragway sang gahom sang maayong balita?

⁸ Ang maayong balita may yara kaangtanan sa gintawag ni Pablo nga “kabuhi karon kag sa palaabuton.” (1 Timoteo 4:8) Wala lamang ini nagahatag sing makalilipay kag sigurado nga paglaum para sa palaabuton kundi nagaresulta man ini sa mga pagbag-o sa “kabuhi karon.” Subong mga indibiduwal, ang mga Saksi ni Jehova ginatuytuyan sang Pulong sang Dios, ang Biblia, agod mapahisanto ang ila kabuhi sa kabubut-on sang Dios. (Salmo 119:101) Ang ila mismo mga personalidad nagabag-o samtang ginapalambo nila ang mga kinaiya subong sang pagkamatarong kag pagkamainunungon.​—⁠Efeso 4:24.

⁹ Binagbinaga ang halimbawa ni Franco. Madali sia maakig. Kon may butang nga magsala, nagasingki sia sa kaakig kag nagapangguba sing mga pagkabutang. Ang iya asawa nagtuon sa Biblia upod sa mga Saksi ni Jehova, kag bangod sang ila Cristianong halimbawa, amat-amat nga nahangpan ni Franco nga dapat sia magbag-o. Nagtuon sia sa Biblia upod sa ila kag napadayag niya sang ulihi ang mga bunga sang balaan nga espiritu nga paghidait kag pagpugong sa kaugalingon. (Galacia 5:​22, 23) Isa sia sang 492 nga ginbawtismuhan sa Belgium sang 2001 nga tuig sang pag-alagad. Binagbinaga man si Alejandro. Ining pamatan-on nagiyan gid sa droga amo nga nabuhi sia sa pagpamasura, nagapanguha sang mga butang nga mahimo pa niya mabaligya agod masustentuhan ang iya bisyo sa droga. Sang mag-edad sia sing 22 anyos, gintanyagan si Alejandro sang mga Saksi ni Jehova nga magtuon sa Biblia, kag nagpasugot sia. Adlaw-adlaw niya nga ginbasa ang Biblia kag nagtambong sa Cristianong mga miting. Madasig niya nga natinluan ang iya kabuhi amo nga wala pa anom ka bulan, nakigbahin na sia sa hilikuton nga pag-ebanghelyo​—⁠isa sang 10,115 nga nakigbahin sa sini nga hilikuton sang nagligad nga tuig sa Panama.

 Ang Maayong Balita​—⁠Isa ka Pagpakamaayo sa mga Mahagop

10. Sin-o ang nagapamati sa maayong balita, kag paano nagabag-o ang ila panimuot?

¹⁰ Nagtagna si Isaias nga ang maayong balita ibantala sa mga mahagop. Sin-o ining mga mahagop? Sila amo ang ginlaragway sa tulun-an sang Mga Binuhatan nga “husto nga napahamtang para sa kabuhi nga walay katapusan.” (Binuhatan 13:48) Sila amo ang mapainubuson nga mga indibiduwal nga masapwan sa tanan nga bahin sang katilingban kag nagapamati sa mensahe sang kamatuoran. Natun-an nila nga ang paghimo sang kabubut-on sang Dios nagadala sing mga pagpakamaayo nga bugana pa sa bisan ano nga mahatag sang sekular nga kalibutan. (1 Juan 2:15-17) Apang, paano ginalab-ot sang mga Saksi ni Jehova ang mga tagipusuon sa ila hilikuton nga pag-ebanghelyo?

11. Suno kay Pablo, paano dapat ibantala ang maayong balita?

¹¹ Ti, binagbinaga ang halimbawa ni apostol Pablo, nga nagsulat sa mga taga-Corinto: “Sang nagkadto ako sa inyo, mga kauturan, wala ako magkadto nga may pagkasampaton sang pulong ukon sang kaalam nga nagapahayag sa sagrado nga tinago sang Dios sa inyo. Kay namat-od ako nga indi paghibaluon ang bisan ano nga butang sa tunga ninyo luwas kay Jesucristo, kag sia nga ginlansang.” (1 Corinto 2:​1, 2) Wala gintinguhaan ni Pablo nga padayawon ang iya mga tagpalamati sa iya tinun-an. Ang mga kamatuoran lamang nga ginpasalig sang Dios ang gintudlo niya, ang mga kamatuoran nga narekord karon sa Biblia. Talupangda man ang pagpalig-on ni Pablo sa iya kaupod nga ebanghelisador nga si Timoteo: “Ibantala ang pulong, magmadagmit sa sini.” (2 Timoteo 4:2) Ibantala ni Timoteo “ang pulong,” ang mensahe sang Dios. Nagsulat man si Pablo kay Timoteo: “Himua ang imo bug-os nga masarangan nga ipakita ang imo kaugalingon nga nahamut-an sang Dios, manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.”​—⁠2 Timoteo 2:15.

12. Paano ginasunod sang mga Saksi ni Jehova karon ang mga ginsiling kag halimbawa ni Pablo?

¹² Ginasunod sang mga Saksi ni Jehova ang halimbawa ni Pablo, subong man ang mga ginsiling niya kay Timoteo. Ginakilala nila ang gahom sang Pulong sang Dios kag ginagamit ini sing maayo samtang nagapanikasog sila nga ipakita sa ila mga isigkatawo ang nagakaigo nga mga pulong sang paglaum kag paglugpay. (Salmo 119:52; 2 Timoteo 3:​16, 17; Hebreo 4:12) Matuod, ginagamit nila sing maayo ang mga literatura sa Biblia agod ang mga interesado makatigayon sing dugang nga ihibalo sa Biblia sa ila kombeniente nga tion. Apang pirme nila ginatinguhaan nga ipakita sa mga tawo ang mga ginasiling sang Kasulatan. Nahibaluan nila nga ang inspirado nga Pulong sang Dios magapahulag sa tagipusuon sang mga mapainubuson. Kag ang paghimo sini nagapabakod man sang ila pagtuo.

“Paglipay sa Tanan nga Nagalalaw”

13. Sang tuig 2001, anong mga hitabo ang nagdul-ong sa lapnag nga pagkinahanglan nga hatagan sing paglipay ang mga nagalalaw?

¹³ May mga kalamidad nga natabo sang tuig 2001, kag subong resulta, madamo nga indibiduwal ang nagkinahanglan sing lugpay. Ang isa ka talalupangdon nga halimbawa amo ang natabo sang Septiembre sa Estados Unidos, sang ginsalakay sang mga terorista ang World Trade Center sa New York kag ang Pentagon malapit sa Washington, D.C. Kinayasan gid ang bug-os nga pungsod sa sadtong mga pagsalakay! Walay sapayan sining mga hitabo, ang mga Saksi ni Jehova nanikasog nga tumanon ang ila hilikuton nga hatagan sing ‘paglipay ang tanan nga nagalalaw.’ Ipakita sang pila ka eksperiensia kon paano nila ini ginhimo.

14, 15. Paano nagamit sing epektibo sang mga Saksi sa duha ka kahigayunan ang mga kasulatan agod lugpayan ang mga nagalalaw?

¹⁴ Ginpalapitan sang isa ka Saksi nga bug-os tion nga ebanghelisador ang isa ka babayi sa bangketa kag ginpamangkot sia kon ano ang masiling niya sa ulihi nga mga pagsalakay sang mga terorista. Ang babayi naghibi. Nagsiling sia nga nasubuan sia kag luyag niya kuntani nga makabulig sa pila ka paagi. Ginsugiran sia sang Saksi nga ang Dios interesado gid sa aton tanan, kag ginbasa niya ang Isaias 61:​1, 2. Nahangpan sang babayi ining inspirado nga mga pulong sang Dios, nga nagsiling nga ang tanan nagalalaw. Ginbaton niya ang isa ka tract kag nagpangabay sa Saksi nga duawon sia sa iya balay.

¹⁵ Nasugilanon sang duha ka Saksi nga nagapakigbahin sa hilikuton nga pag-ebanghelyo  ang isa ka lalaki nga nagatrabaho sa iya palasilungan. Nagtanyag sila nga ipakita sa iya ang makalulugpay nga mga pulong gikan sa Kasulatan bangod sining karon lang nga trahedya sa World Trade Center. Sang nagpasugot sia ginbasa nila ang 2 Corinto 1:3-7, nga nagalakip sang mga pulong: “Ang mga lugpay . . . bugana paagi kay Cristo.” Nagpasalamat sia nga ang iya Saksi nga mga kaingod nagapaambit sing makalulugpay nga butang kag nagsiling: “Kabay nga pakamaayuhon sang Dios ang inyo maayo nga ginahimo.”

16, 17. Anong duha ka eksperiensia ang nagapakita sang gahom sang Biblia sa pagbulig sa mga indibiduwal nga nasubuan ukon nabalaka sa mga trahedya?

¹⁶ Nasugilanon sang isa ka Saksi nga nagaduaw liwat sa mga interesado ang anak nga lalaki sang isa ka babayi nga nagpakita sing interes sang nagligad kag ginpaathag nga interesado sia nga mahibaluan kon kamusta na ang iya mga kaingod pagkatapos sining ulihi lang nga trahedya. Nakibot ang lalaki nga naghinguyang ang Saksi sing tion agod maduaw ang mga tawo kag kamustahon sila. Nagsiling sia nga nagatrabaho sia malapit lang sa World Trade Center kag nakita niya ang tanan nga natabo sang ginsalakay ini. Sang namangkot ang lalaki kon ngaa ginapahanugutan sang Dios ang pag-antos, nagbasa ang Saksi sing mga bersikulo sa Biblia, lakip na ang Salmo 37:​39, nga nagasiling: “Ang kaluwasan sang mga matarong nagagikan kay Jehova; sia pamakod nila sa tion sang kalisdanan.” Mainayuhon nga ginkamusta sang lalaki ang Saksi kag ang iya pamilya, gin-agda sia nga magbalik, kag tinagipusuon nga nagpasalamat sa pagduaw.

¹⁷ Ang isa pa sang linibo nga nagalalaw nga ginlugpayan sang mga Saksi ni Jehova mga inadlaw pagkatapos sang mga pagsalakay sang mga terorista amo ang isa ka babayi nga nasugilanon sang mga Saksi samtang nagaduaw sila sa ila mga kaingod. Naapektuhan gid sia sang natabo kag nagpamati samtang ginabasa nila ang Salmo 72:12-14: “Luwason niya ang imol nga nagapangayo sing bulig, subong man ang nasit-an kag ang bisan sin-o nga wala sing manugtabang. Magakaawa sia sa kubos kag imol, kag luwason niya ang mga kalag sang mga imol. Tubson niya ang ila kalag gikan sa pagpigos kag kasingki, kag ang ila dugo mangin bilidhon sa iya itululok.” Daw ano gid ka makapalig-on yadto nga mga pulong! Ginpabasa liwat sang babayi sa mga Saksi ang mga bersikulo kag ginpadayon sila sa iya balay agod padayunon ang paghambalanay. Nasugdan ang isa ka pagtuon sa Biblia pagkatapos sini.

18. Paano nabuligan sang isa ka Saksi ang iya mga isigkatawo sang gin-agda sia nga mangamuyo para sa ila?

¹⁸ Isa ka Saksi ang nagatrabaho sa restawran sa  isa ka medyo manggaranon nga komunidad diin ang mga tawo wala anay nagapakita sing daku nga interes sa maayong balita sang Ginharian. Pagkatapos sang mga pagsalakay sang mga terorista, ang komunidad daw kinayasan. Sang Biernes sang gab-i pagkatapos sang pagsalakay, ginpangabay sang manedyer sang restawran ang tanan nga magguwa kag mag-uyat sing kandila, nagadulog sa makadali bilang paghunahuna sing mahipos sa mga biktima. Bilang pagtahod sa ila balatyagon, ang Saksi nagguwa kag nagtindog sing mahipos sa bangketa. Nahibaluan sang manedyer nga ministro sia sang mga Saksi ni Jehova, gani pagkatapos sang isa ka tion sang pagpamalandong, ginpangabay niya sia nga mangamuyo para sa tanan. Ang Saksi nagpasugot. Sa iya pangamuyo, ginsambit niya ang lapnag nga paglalaw apang nagsiling nga ang mga nagalalaw indi dapat magkalisod nga wala sing paglaum. Ginsambit niya ang tion nga ining makakulugmat nga mga hitabo indi na mahanabo kag nagsiling nga ang tanan mahimo makapalapit sing suod sa Dios sang paglipay paagi sa sibu nga ihibalo gikan sa Biblia. Pagkatapos makasiling sing “Amen,” ang manedyer​—⁠nga ginsundan sang 60 pa ka tawo nga didto sa guwa sang restawran​—⁠nagpalapit sa Saksi, nagpasalamat sa iya, kag naghakos sa iya, nagakomento nga amo yadto ang pinakamaayo nga pangamuyo nga nabatian niya.

Isa ka Pagpakamaayo sa Komunidad

19. Ano nga eksperiensia ang nagapakita nga ginakilala sang iban ang mataas nga mga talaksan sang mga Saksi ni Jehova?

¹⁹ Ilabi na sa sining mga adlaw, ang mga komunidad diin aktibo ang mga Saksi ni Jehova nakabenepisyo bangod sang ila presensia​—⁠subong sang ginkomento sang madamo. Huo, ang katawhan nga nagapauswag sing paghidait, pagkabunayag, kag matinlo nga moral isa gid ka pagpakamaayo. Sa isa ka pungsod sa Central Asia, nasugilanon sang mga Saksi ang isa ka retirado nga opisyal sang anay ahensia sa seguridad sang estado. Nagsiling sia nga ginpaimbestigahan anay sa iya ang nagkalainlain nga relihiosong mga organisasyon. Sang gin-imbestigahan niya ang mga Saksi ni Jehova, nagdayaw gid sia sa ila pagkabunayag kag maayo nga paggawi. Nagdayaw sia sa ila mabakod nga pagtuo kag sa katunayan nga ang ila mga panudlo napasad sa Kasulatan. Ini nga tawo nagpasugot sa pagtuon sa Biblia.

20. (a) Ano ang ginapakita sang hilikuton nga ginreport sang mga Saksi ni Jehova sang nagligad nga tuig? (b) Ano ang nagapakita nga madamo pa ang dapat himuon, kag paano naton ginatamod ang aton pribilehiyo sa pag-ebanghelyo?

²⁰ Gikan sa pila ka eksperiensia nga ginsaysay sa sining artikulo, gikan sa linibo nga mahimo masaysay, maathag nga ang mga Saksi ni Jehova masako gid sadtong 2001 nga tuig sang pag-alagad.⁠ * Nasugilanon nila ang minilyon ka tawo, nalugpayan ang madamo nga nagalalaw, kag ang ila hilikuton sa pag-ebanghelyo ginpakamaayo. May yara 263,431 nga nagsimbulo sang ila dedikasyon sa Dios paagi sa pagpabawtismo. Sa bug-os nga kalibutan, ang kadamuon sang mga ebanghelisador nag-uswag sing 1.7 ka porsiento. Kag ang kamatuoran nga 15,374,986 ang nagtambong sa tuigan nga Memoryal sang kamatayon ni Jesus nagapakita nga may madamo pa nga dapat himuon. (1 Corinto 11:23-26) Kabay nga padayon naton nga pangitaon ang mga mahagop nga magapamati sa maayong balita. Kag bangod ang tuig sang maayong kabubut-on ni Jehova nagapadayon, kabay nga padayon naton nga lugpayan ang “mga buong sing tagipusuon.” Daw ano gid ka makalilipay ang aton hilikuton! Ginapalanog gid naton tanan ang mga pulong ni Isaias: “Pat-od gid nga magahugyaw ako kay Jehova. Magakalipay ang akon kalag sa akon Dios.” (Isaias 61:10) Kabay nga padayon kita nga gamiton sang Dios samtang ginatuman niya ining matagnaon nga mga pulong: “Pahanabuon sang Soberanong Ginuong Jehova ang pagpanugdo sang pagkamatarong kag sang kadayawan sa atubangan sang tanan nga pungsod.”​—⁠Isaias 61:11.

[Footnote]

Madumduman Mo Bala?

• Paano ang mga mahagop ginpakamaayo bangod sang maayong balita nga ginbantala ni Jesus?

• Ano nga mga pagpakamaayo ang natigayon sadtong naghulag sa hilikuton nga pag-ebanghelyo sang unang siglo nga mga disipulo ni Jesus?

• Paano karon ginapakamaayo ang mga nagapamati sa maayong balita?

• Paano naton ginatamod ang aton pribilehiyo subong mga ebanghelisador?

[Mga Pamangkot sa Pagtinuon]

 [Tsart sa pahina 19-22]

2001 NGA REPORT SANG PAG-ALAGAD SANG MGA SAKSI NI JEHOVA SA BUG-OS KALIBUTAN

 (Tan-awa bound volume)

[Mga retrato sa pahina 15]

Pirme ginadumdom sang mga Saksi ni Jehova ang ila salabton nga mag-ebanghelyo

[Mga retrato sa pahina 17]

Ang mga nagapamati sa maayong balita nangin bahin sang isa ka nahiusa, bug-os kalibutan nga paghiliutod