Si Henry VIII Kag ang Biblia
Si Henry VIII Kag ang Biblia
SI Winston Churchill, sa iya libro nga History of the English-Speaking Peoples (Tomo 2), nagsulat: “Sa patag sang relihion ang Repormasyon nagdala sing daku nga pagbag-o. Ang Biblia amo na karon ang bag-o kag ginabaton nga tiliman-an sang eksperto nga laygay nga may impluwensia sa madamo nga bahin. Nagapati anay ang nauna nga kaliwatan nga ang Biblia makatalagam sa kamot sang mga walay tinun-an kag dapat lamang ini basahon sang mga pari.”
Ang rekord nagapadayon: “Ang kompleto nga naimprinta nga mga Biblia, nga ginbadbad sa Ingles nanday Tyndale kag Coverdale, naglutaw sa nahauna nga tion sadtong talipuspusan nga bahin sang tigragas sang 1535, kag may yara na karon pila ka edisyon. Ginlaygayan sang Gobierno ang mga pari nga palig-unon ang pagbasa sa Biblia.” Pagkatapos sang siniglo nga pagkawalay namang-an sa Biblia kag sa kaundan sini, ang Inglaterra may ihibalo na karon sa Biblia, sa bulig sang gobierno ni Henry VIII sa baylo nga sa bulig sang simbahan. *
“Subong isa pa ka tuk-ap sa nauna nga pagpati ginsugo sang Gobierno sa Paris ang pag-imprinta sing madamo nga Ingles nga Biblia, nga mas mahal sangsa nauna nga edisyon, kag sang Septiembre 1538 ang tanan nga parokya sa pungsod ginsugo nga magbakal sing madamo nga Ingles nga Biblia, agod ipamutang sa tanan nga simbahan, diin mas mahapos ini nga magamit kag mabasa sang mga katapo sang parokya. Anom ka kopya ang ginbutang sa St Paul’s, sa Siudad sang London, kag madamo ang nagdugok sa katedral sa bug-os nga adlaw agod basahon ini, ilabi na, sugid sa amon, kon makakita sila sing isa nga makabasa sing mabaskog.”
Sing makapasubo, sa pila ka pungsod, madamo ang wala nagahimulos sa ila pribilehiyo nga basahon sing tayuyon ang Biblia. Dapat gid magkabalaka sa sini, bangod ang Biblia lamang ang “ginbugna sang Dios kag mapuslanon sa pagpanudlo, sa pagsabdong, sa pagtadlong sang mga butang, sa pagdisiplina sa pagkamatarong.”—2 Timoteo 3:16.
[Nota]
^ par. 3 Si Hari Henry VIII naggahom sa Inglaterra kutob sang 1509 tubtob sang 1547.
[Picture Credit Line sa pahina 32]
Henry VIII: Painting in the Royal Gallery at Kensington, from the book The History of Protestantism (Vol. I)
