Ang Maayong mga Buhat Nagahimaya sa Dios

PAAGI sa ila maayong paggawi kag huwaran nga mga buhat, ang matuod nga mga Cristiano nagadala sing himaya sa Dios. (1 Pedro 2:12) Makita ini sa natabo sa Italya sining karon lang nga tinuig.

Sang Septiembre 1997, isa ka makusog nga linog ang nagtay-ug sa madamo nga bahin sang Marche kag mga rehiyon sang Umbria, nga naghalit sa halos 90,000 ka puluy-an. Ang mga grupo sang mga Saksi ni Jehova gilayon nga nagbulig sa mga masigkatumuluo kag sa iban. Gin-aman ang mga trailer, sleeping bag, kalan, generator, kag iban pa kinahanglanon nga mga butang. Ining mga panikasog sa pagbulig napanilagan sang iban.

Ang pamantalaan nga Il Centro nagreport: “Ang una nga nag-abot upod ang mga suplay nga bulig sa apektado nga mga duog amo ang mga Saksi ni Jehova nga taga-Roseto [sa probinsia sang Teramo] . . . Luwas sa pagtipon sing tingob sa pulupanag-on para mangamuyo, yadtong mga matutom kay Jehova nanghikot sa praktikal nga paagi, naghatag sing bulig sa mga nagaantos, nga wala na ginahunahuna kon ano ang iya relihion.”

Ang meyor sang Nocera Umbra, nga isa sa mga banwa nga apektado gid, nagsulat sa mga Saksi: “Ginapasalamatan ko kamo sing tinagipusuon kag sing personal bangod sang inyo bulig sa mga pumuluyo sang Nocera. Pat-od ko nga ginapahayag ko ang balatyagon sang tanan nga pumuluyo sini.” Dugang pa, ang Ministry of the Interior naghatag sa Congregazione Cristiana dei Testimoni di Geova (Cristianong Kongregasyon sang mga Saksi ni Jehova) sing isa ka sertipiko sang kadungganan kag isa ka medalya “sa pagpamatuod sang nahimo kag kapisan nga ginpakita sa mga hilikuton may kaangtanan sa emerhensia nga nag-utwas sa mga rehiyon sang Umbria kag Marche.”

Sang Oktubre 2000, isa ka makahalapay nga baha ang naglambas sa rehiyon sang Piedmont sa naaminhan nga Italya. Sa liwat, ang mga Saksi maabtik nga nanghikot sa pag-aman sing bulig. Ining maayo nga mga hilikuton napanilagan man. Ginpadyaan sila sang Piedmont Region sing isa ka plake para sa ila “hamili boluntaryo nga hilikuton sa pagsakdag sa mga populasyon sang Piedmont nga naapektuhan sang baha.”

Si Jesucristo nagtudlo sa iya mga disipulo: “Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa mga langit.” (Mateo 5:16) Ang mga Saksi ni Jehova malipayon nga nagahimaya sa Dios, indi sa ila kaugalingon, paagi sa “maayong mga buhat” nga nagabulig sa ila mga isigkatawo sa espirituwal kag sa iban pa nga paagi.