Ang mga Manunudlo sang Pulong sang Dios Ginpalig-on sa Pagtuman sang Ila Hilikuton

ANG ginatos ka libo nga manunudlo nagtipon sining ulihi nga binulan para sa instruksion. Sugod sang nagligad nga Mayo, nagtipon sila sa ginatos ka “Mga Manunudlo Sang Pulong Sang Dios” nga Distrito nga mga Kombension sang mga Saksi ni Jehova sa bug-os nga kalibutan. Ang mga delegado ginpalig-on nga tudluan ang ila kaugalingon, nga masangkapan pa sing maayo, kag tumanon ang ila hilikuton subong mga manunudlo.

Nakatambong ka bala sa isa sining mga kombension? Kon amo, pat-od gid nga nagapasalamat ka sa maayong espirituwal nga pagkaon nga ginhatag sa sining mga pagtinipon para sa pagsimba sa matuod nga Dios, si Jehova. Ngaa indi mo kami buylugan sa pagrepaso sa makatudlo nga programa sang kombension?

Una nga Adlaw​​—⁠Ang Inspirado nga Kasulatan Mapuslanon sa Pagpanudlo

Ang tsirman sang kombension mainit nga nag-abiabi sa mga delegado paagi sa pamulongpulong nga “Mangin Natudluan, Kamo nga mga Manunudlo Sang Pulong Sang Dios.” Bangod nagtuon kay Jehova, ang “Dakung Instruktor,” si Jesucristo nangin ang Dakung Manunudlo. (Isaias 30:20; Mateo 19:16) Agod mag-uswag kita subong mga manunudlo sang Pulong sang Dios, dapat man kita magpatudlo kay Jehova.

Ang masunod amo ang bahin nga “Ang Pagpanudlo Tuhoy sa Ginharian Nagapatubas Sing Maayo nga mga Bunga.” Paagi sa pag-interbyu sa eksperiensiado nga mga manunudlo sang Pulong sang Dios, ang mga kalipay kag mga pagpakamaayo sang paghimo sing disipulo ginpatalupangod.

 Ang masunod amo ang isa ka nagapahulag nga pamulongpulong nga natig-uluhan “Ginapahulag Sang ‘Halangdon nga mga Butang Sang Dios.’ ” Sadtong unang siglo, ang “halangdon nga mga butang” may kaangtanan sa Ginharian sang Dios nagpukaw sa mga tawo sa pagpanghikot. (Binuhatan 2:11) Mapukaw man naton ang mga tawo sa pagpanghikot paagi sa pagpahayag sang “halangdon nga mga butang” subong sang Makasulatanhon nga mga panudlo tuhoy sa gawad, pagkabanhaw, kag bag-ong katipan.

Ang masunod nga pamulongpulong nagpalig-on sa tanan sa “Pagsapo Sing Kalipay sa Pagkamatarong ni Jehova.” (Salmo 35:27) Ginbuligan kita nga tinguhaan nga matigayon ang pagkamatarong paagi sa pagtuon nga higugmaon ang matarong kag dumtan ang malain, paagi sa pagtuon sa Biblia, paagi sa lakas nga pagpamatok sa mga impluwensia nga makahalalit sa espirituwal, kag paagi sa pagpalambo sang pagkamapainubuson. Ini nga mga tikang magabulig sa pag-amlig sa aton gikan sa di-maayo nga mga kaupdanan, gikan sa paghatag sang kalibutan sing importansia sa materyal nga mga butang, kag gikan sa imoral kag masingki nga kalingawan.

Ang keynote address, nga natig-uluhan sing “Nasangkapan Sing Bug-os Subong mga Manunudlo Sang Pulong Sang Dios,” nagpahanumdom sa aton nga si Jehova nagahimo sa aton nga sangkol nga mga ministro niya paagi sa iya Pulong, sa iya balaan nga espiritu, kag sa iya dutan-on nga organisasyon. Bahin sa paggamit sa Pulong sang Dios, ang humalambal naglaygay sa aton: “Ang tulumuron naton amo nga kuhaon ang mensahe sang Biblia gikan sa mga pahina sini kag isaylo ini sa tagipusuon sang aton mga tagpalamati.”

Ang nahauna nga simposium sa kombension natig-uluhan sing “Nagatudlo sa Aton Kaugalingon Samtang Nagatudlo sa Iban.” Ginpadaku sang una nga bahin nga dapat naton sundon ang mataas nga talaksan sang Cristianong moralidad nga ginatudlo man naton sa iban. Ginlaygayan kita sang masunod nga bahin nga ‘gamiton sing matadlong ang pulong sang kamatuoran.’ (2 Timoteo 2:15) Agod tudluan ang aton kaugalingon, ang tayuyon kag makugi nga pagtuon sa Biblia kinahanglanon, bisan pa daw ano na kita kadugay nga nagaalagad sa Dios. Ginpakita sang katapusan nga bahin sang simposium nga ang Yawa nagabantay sa aton, nagapangita sang mga panimuot subong sang bugal, independiente nga espiritu, pagpaimportante sa kaugalingon, kaimon, kahisa, pagkamaakigon, paghinakit, kag pagpangita sing sayop. Apang, kon pamatukan gid naton ang Yawa, magapalagyo sia sa aton. Agod mapamatukan sia, dapat kita magpalapit sa Dios.​—⁠Santiago 4:​7, 8.

 Ginpakita sa aton sang suno-sa-tion nga pamulongpulong nga “Kangil-ari ang Kalibutanon nga Salot Sang Pornograpiya” kon paano daugon ining makapalain nga katalagman sa aton espirituwalidad. Si manalagna Habacuc nagsiling tuhoy kay Jehova: “Tuman ka putli ang imo mga mata agod makita ang malain; kag ang pagtan-aw sa kagamo indi mo masarangan.” (Habacuc 1:13) Dapat naton ‘kangil-aran ang malaut.’ (Roma 12:9) Ang mga ginikanan ginlaygayan nga bantayan ang paggamit sang ila mga kabataan sing Internet kag ang pagtan-aw nila sing telebisyon. Yadtong nabuyok sa pornograpiya, siling sang humalambal, dapat magpangayo sing bulig sa isa ka abyan nga hamtong sa espirituwal. Makabulig man ang pagpamalandong kag pagsaulo sa mga kasulatan subong sang Salmo 97:10; Mateo 5:​28; 1 Corinto 9:​27; Efeso 5:​3, 12; Colosas 3:⁠5; kag 1 Tesalonica 4:​4, 5.

Ang masunod nga pamulongpulong, “Tuguti ang Paghidait Sang Dios nga Mag-amlig sa Imo,” naglugpay sa aton paagi sa pasalig nga kon ginabug-atan kita bangod sang paghimud-os, mahaboy naton ang aton lulan kay Jehova. (Salmo 55:22) Kon ibubo naton ang aton tagipusuon sa pangamuyo, si Jehova magahatag sa aton sing “paghidait sang Dios,” ang kalinong kag katawhay sa hunahuna nga resulta sang aton hamili nga kaangtanan sa iya.​—⁠Filipos 4:​6, 7.

Ang nahauna nga adlaw makalilipay nga natapos paagi sa pamulongpulong nga “Ginapatahom ni Jehova ang Iya Katawhan Paagi sa Kapawa,” nga nagpaathag sang katumanan sang Isaias kapitulo 60. Sa tunga sang karon nga kadudulman sang kalibutan, ang “mga dumuluong”​​—⁠ang nagluntad nga dakung kadam-an sang mga tulad-karnero​​—⁠nagaagom sing kapawa ni Jehova upod sa hinaplas nga mga Cristiano. Tuhoy sa bersikulo 19 kag 20, ang humalambal nagpaathag: “Si Jehova indi ‘magtunod’ kaangay sang adlaw ukon ‘magdulom’ kaangay sang bulan. Padayon nga patahumon niya ang iya katawhan paagi sa pagpasilak sing kapawa sa ila. Isa gid ini ka dalayawon nga pasalig para sa aton samtang nagakabuhi kita sa katapusan nga mga adlaw sining madulom nga kalibutan!” Pagkatapos sang pamulongpulong, ginpahibalo sang humalambal ang pagpaguwa sa libro nga Ang Tagna ni Isaias​—⁠Kapawa Para sa Tanan nga Tawo, Tomo Dos. Nabasa mo na bala ining bag-o nga libro?

Ikaduha nga Adlaw —⁠Sangkol sa Pagtudlo sa Iban

Pagkatapos sang pagbinagbinag sang adlaw-adlaw nga teksto sa ikaduha nga adlaw, namati kita sing makawiwili gid sa ikaduha nga simposium sa kombension, “Mga Ministro nga Paagi sa Ila ang Iban Nangin mga Tumuluo.” Tig-isa nga ginpatalupangod sang mga humalambal sining tatlo-ka-bahin nga simposium ang tatlo ka tikang nga kinahanglan agod buligan ang mga tawo nga mangin mga tumuluo​—⁠pagpalapnag sa mensahe sang Ginharian, pagpalambo sa interes nga nakita, kag pagtudlo sa mga interesado nga tumanon ang ginsugo ni Cristo. Paagi sa mga interbyu kag pag-akto sa mga eksperiensia, nakita naton sing maathag kon paano naton matudluan ang iban nga mangin mga disipulo.

Ang masunod nga bahin amo ang tema nga “Idugang sa Inyo Pagbatas ang Diosnon nga Debosyon.” Ginpakita sang humalambal nga ang importante gid amo ang ‘pagbatas naton tubtob sa katapusan.’ (Mateo 24:13) Dapat naton himuslan ang tanan nga aman sang Dios​​—⁠pangamuyo,  personal nga pagtuon, mga miting, kag ministeryo⁠​—⁠agod mapalambo ang diosnon nga debosyon. Dapat naton punggan ang kalibutanon nga mga kailigbon kag mga buhat nga maglaksam ukon magguba sang aton diosnon nga debosyon.

Paano ang mga tawo nga nagapangabudlay kag nabug-atan makasapo sing kaumpawan sa karon? Ginsabat sang pamulongpulong nga “Pagsapo Sing Kaumpawan sa Idalom Sang Gota ni Cristo” ini nga pamangkot. Mainayuhon nga gin-agda ni Jesus ang iya mga sumulunod nga magpaidalom sa iya gota kag magtuon sa iya. (Mateo 11:28-​30) Sarang kita makapaidalom sa gota ni Jesus paagi sa pagsunod sang iya halimbawa sang pagkabuhi sing simple kag balanse. Ang panguna nga mga punto sini nga presentasyon ginpadaku paagi sa pag-interbyu sa mga utod nga nagahimo nga simple sang ila kabuhi.

Ang isa sang talalupangdon nga bahin sang dalagku nga pagtinipon sang mga Saksi ni Jehova amo ang pagbawtismo sa bag-ong dedikado nga mga alagad sang Dios. Ang utod nga naghatag sang diskurso nga “Ang Bawtismo Nagadul-ong sa Daku Pa nga mga Pribilehiyo sa Pagpanudlo” mainit nga nag-abiabi sa mga kandidato sa bawtismo kag nag-agda sa ila nga makigbahin sa daku pa nga mga pribilehiyo sa pag-alagad. Ang bag-ong bawtismado nga mga manunudlo sang Pulong sang Dios nga nakapahisanto sa Makasulatanhon nga mga kalipikasyon sarang makatinguha nga malab-ot ang nanuhaytuhay nga mga responsabilidad sa kongregasyon.

“Iluga ang Daku nga Manunudlo” amo ang tig-ulo sang unang pamulongpulong sadto nga hapon. Sa malawig nga tion sa langit, nakita sing maayo kag nailog ni Jesus ang iya Amay, amo nga nangin Dakung Manunudlo sia. Samtang sa duta, naggamit sia sing epektibo nga mga pamaagi sa pagpanudlo, subong sang nagadulot nga mga pamangkot kag simple apang maathag nga mga ilustrasyon. Ginpasad ni Jesus ang iya panudlo sa Pulong sang Dios kag nagpamulong nga may kapagsik, kainit, kag awtoridad. Wala bala kita napahulag nga ilugon ang Dakung Manunudlo?

Ang isa pa ka makapulukaw nga pamulongpulong, “Handa Bala Kamo nga Mag-alagad sa Iban?,” nagpalig-on sa aton nga ilugon ang halimbawa ni Jesus sa pag-alagad sa iban nga mga tawo. (Juan 13:12-​15) Direkta nga ginpalig-on sang humalambal ang sangkol nga mga lalaki nga mangin kaangay ni Timoteo sa paghimulos sa mga higayon nga buligan ang iban. (Filipos 2:​20, 21) Ang mga ginikanan ginpalig-on nga ilugon sanday Elcana kag Ana sa pagbulig sa ila mga kabataan nga himud-usan ang bug-os tion nga ministeryo. Kag ang mga pamatan-on ginlaygayan nga ilugon ang mga halimbawa ni Jesucristo kag sang lamharon nga si Timoteo paagi sa kinabubut-on nga pagtan-ay sang ila pag-alagad. (1 Pedro 2:21) Napahulag man kita sang pinamulong sang mga utod nga naghimulos sa kahigayunan nga buligan ang iban.

Ang tema sang ikatlo nga simposium amo ang “Magbenepisyo Sing Labi Pa Gikan sa Teokratikong Edukasyon.” Ginpadaku sang una nga humalambal ang importansia sang pagpauswag sang kalawigon sang aton igtalupangod. Agod mahimo ini, makasugod kita paagi sa malip-ot nga mga sesyon sang personal nga pagtuon kag sa pagpanikasog nga palawigon ini. Ginpalig-on man niya ang tumalambong sa pagpangita sa mga kasulatan kag sa pagkuha sing nota sa mga miting. Ginpaalerto sa aton sang ikaduha nga humalambal ang kinahanglanon nga manguyapot sa “sulundan sang makapapagros nga mga pulong.” (2 Timoteo 1:​13, 14) Agod amligan ang aton kaugalingon gikan sa imoral nga mga presentasyon sang media, tawhanon nga mga pilosopiya, higher criticism, kag apostata nga mga panudlo, dapat kita magbakal sing tion para sa personal nga pagtuon kag para sa pagtambong sa mga miting. (Efeso 5:​15, 16) Ginpadaku sang katapusan nga humalambal sang simposium ang kinahanglanon nga iaplikar ang mga butang nga natun-an agod makabenepisyo kita sing bug-os gikan sa teokratikong edukasyon.​​—⁠Filipos 4:9.

Nakunyag gid kita sa pagpamati sa pamulongpulong nga “Bag-o nga mga Bulig Para sa Aton Espirituwal nga Pag-uswag”! Nalipay kita nga mahibaluan ang pagbalhag sa ulihi sing bag-ong libro nga natig-uluhan Magbenepisyo sa Pagpanudlo  Sang Teokratikong Eskwelahan Para sa Ministeryo. Nalangkag gid kita samtang ginabalay sang humalambal ang mga kaundan sini. Tuhoy sa seksion sang libro nga may yara pila ka lalaygayan nga mga punto sa paghambal, sia nagsiling: “Ining bag-o nga libro wala ginsulat kaangay sang kalibutanon nga libro. Ang pagpresentar sini sang 53 ka bahin sang maayo nga pagbasa, paghambal, kag pagpanudlo ginpasad sa Makasulatanhon nga mga prinsipio.” Ipakita sini nga libro kon paano ang mga manalagna, si Jesus, kag ang iya mga disipulo nagpakita sing maayo nga mga ikasarang sa pagpanudlo. Huo, ini nga libro kag ang bag-o nga mga bahin sang Teokratikong Eskwelahan Para sa Ministeryo magabulig gid sa aton nga mangin mas maayo nga mga manunudlo sang Pulong sang Dios.

Ikatlo nga Adlaw​​—⁠Mangin mga Manunudlo Bangod sang Tion

Sa tapos mabinagbinag ang adlaw-adlaw nga teksto sa katapusan nga adlaw, ang tanan nagpamati sing maayo sa katapusan nga simposium sa kombension, “Ang Tagna ni Malaquias Nagahanda sa Aton Para sa Adlaw ni Jehova.” Si Malaquias nagtagna halos isa ka gatos ka tuig sa tapos makabalik ang mga Judiyo gikan sa Babilonia. Naanod sila liwat sang apostasya kag kalautan, kag wala ginpadunggan ang ngalan ni Jehova paagi sa paglapas sa iya matarong nga kasuguan kag paagi sa paghalad sing bulag, piang, kag masakiton nga mga sapat. Isa pa, gindiborsiohan nila ang mga asawa sang ila pagkapamatan-on, ayhan agod makaminyo sing dumuluong nga mga babayi.

Ang nahauna nga kapitulo sang tagna ni Malaquias nagapasalig sa aton sang gugma ni Jehova sa iya katawhan. Ginapadaku sini ang kinahanglanon nga magpakita sing matinahuron nga kahadlok sa Dios subong man sing apresasyon sa sagrado nga mga butang. Ginapaabot ni Jehova nga ihatag naton sa iya ang bug-os naton nga masarangan, simbahon sia tungod sa di-makagod nga gugma. Ang aton sagrado nga pag-alagad indi dapat nga pormalidad lamang, kag dapat kita manabat sa Dios.

Nagaaplikar sang ikaduha nga kapitulo sang Malaquias sa aton adlaw, ang humalambal sang ikaduha nga simposium nagpamangkot: “Alisto bala kita mismo nga ‘wala sing pagkadimatarong nga masapwan sa aton mga bibig’?” (Malaquias 2:6) Dapat pat-uron sang mga nagapanguna sa pagpanudlo nga ang ila ginasiling napasad gid sa Pulong sang Dios. Dapat naton dumtan ang pagluib subong sang pagtigayon sing di-makatarunganon nga mga diborsio.​​—⁠Malaquias 2:​14-​16.

Nagapamulongpulong sa tema nga “Sin-o ang Maluwas sa Adlaw ni Jehova?” ang katapusan nga humalambal sang simposium nagbulig sa aton sa paghanda para sa adlaw ni Jehova. “Makapalig-on gid para sa mga alagad ni Jehova ang mahibaluan nga ang Malaquias kapitulo 3, bersikulo 17, may daku nga katumanan sa ila!” tu-aw sang humalambal. “Ini nagasiling: ‘ “Sila pat-od nga mangin  akon,” siling ni Jehova sang mga kasuldadusan, “sa adlaw nga magapatubas ako sing isa ka pinasahi nga propiedad. Kag kaluy-an ko sila, subong sang pagkaluoy sang tawo sa iya anak nga lalaki nga nagaalagad sa iya.” ’ ”

Ang isa pa ka talalupangdon nga punto sa kombension amo ang may kostyum nga drama nga “Tahura ang Awtoridad ni Jehova,” nga nagpakita sa mga anak nga lalaki ni Kora. Walay sapayan sang rebelyuso nga panimuot sang ila amay kay Moises kag kay Aaron, nagpabilin sila nga matutom kay Jehova kag sa iya mga tiglawas. Samtang si Kora kag ang iya mga sumulunod nalaglag, ang mga anak naman ni Kora nakalampuwas. Gin-aplikar sang masunod nga pamulongpulong, “Matutom nga Magpasakop sa Awtoridad Sang Dios,” ang kaundan sang drama sa tagsatagsa sa aton. Ang humalambal nagpaandam sang anom ka bahin diin nagkulang si Kora kag ang iya mga sumulunod: wala magsuportar sing matutom sa awtoridad ni Jehova; nagtugot nga madaug sila sang bugal, ambisyon, kag kahisa; nagpadaku sang mga di-kahimpitan sang mga gintangdo ni Jehova; nagpalambo sang mayamuhon nga panimuot; nangin di-kontento sa ila mga pribilehiyo sa pag-alagad; kag nag-una sang pag-abyanay ukon kaangtanan sang pamilya sangsa katutom kay Jehova.

“Sin-o ang Nagatudlo Sang Kamatuoran sa Tanan nga Pungsod?” amo ang tema sang pamulongpulong publiko. Ang kamatuoran nga ginbinagbinag, indi amo ang kamatuoran sa kabilugan, kundi ang kamatuoran tuhoy sa katuyuan ni Jehova nga ginpanaksi ni Jesucristo. Ginbinagbinag sang humalambal ang kamatuoran bahin sa mga pagtuluuhan, ang kamatuoran may kaangtanan sa paagi sang pagsimba, kag ang kamatuoran tuhoy sa personal nga paggawi. Paagi sa sining pagpaanggid sa unang-siglo nga mga Cristiano sa mga Saksi ni Jehova karon, ang aton pagsalig nga ‘ang Dios yara gid sa tunga naton’ napabakod gid.​—⁠1 Corinto 14:25.

Pagkatapos sang sumaryo sang pagtinuon sa artikulo sang Lalantawan para sa semana, ang tanan nga manunudlo sang pulong sang Dios nga nagtambong napahulag sa pagpanghikot paagi sa katapusan nga pamulongpulong, “Madagmit nga Pagtuman sa Aton Hilikuton nga Pagpanudlo.” Ginpadaku sang malip-ot nga pagrepaso sa programa ang importansia sang paggamit sing Kasulatan sa pagpanudlo, sa mga paagi diin sarang kita mangin sangkol nga mga manunudlo, kag sa kinahanglanon nga magsalig sa kamatuoran nga ginatudlo naton sa iban. Ang humalambal naglaygay sa aton nga ‘ipadayag naton ang aton pag-uswag’ kag ‘hatagan sing padayon nga igtalupangod ang aton kaugalingon kag ang aton panudlo.’​—⁠1 Timoteo 4:​15, 16.

Isa gid ka espirituwal nga piesta ang naagom naton sa “Mga Manunudlo Sang Pulong Sang Dios” nga Distrito nga Kombension! Kabay nga ilugon naton ang aton Dakung Instruktor, si Jehova, kag ang aton Dakung Manunudlo, si Jesucristo, sa pagtudlo sa iban sang pulong sang Dios.

[Kahon/Mga retrato sa pahina 28]

Mga Bag-ong Publikasyon Para Sa Pinasahi Nga mga Kinahanglanon

Ang mga delegado sa “Mga Manunudlo Sang Pulong Sang Dios” nga Distrito nga Kombension mainit nga nagbaton sang duha ka publikasyon nga mangin mapuslanon gid sa pagtudlo sing Makasulatanhon nga kamatuoran sa mga tawo sa iban nga mga bahin sang kalibutan. Ang tract nga natig-uluhan sing Ikaw Bala May Di-mamalatyon nga Espiritu? isa ka mapuslanon nga kasangkapan sa pagsugod sang pagpakighambal sa mga nagapuyo sa mga pungsod diin ang lokal nga mga lenguahe para sa “kalag” kag “espiritu” pareho lamang. Maathag nga ginapakita sang bag-ong tract nga ang espiritu nga puwersa tuhay sa espiritu nga tinuga kag nga ang mga tawo indi mangin espiritu nga mga tinuga kon mapatay sila.

Ang brosyur nga Isa ka Makaalayaw nga Kabuhi​—⁠Kon Paano Ini Matigayon ginpaguwa sa katapusan nga bahin sang ikaduha nga adlaw sang kombension. Ini nga brosyur ginhimo sa tuyo nga makasugod sing mga pagtuon sa Biblia upod sa mga wala sing ideya sa isa ka Manunuga nga may personalidad kag sa libro nga gin-inspirar sang Dios. Nagamit mo na bala ining bag-ong mga publikasyon sa imo ministeryo?

[Mga retrato sa pahina 26]

Sa Milan, Italya, kag sa mga kombension sa bug-os nga kalibutan, ginatos ang ginbawtismuhan

[Retrato sa pahina 29]

Ang mga tumalambong natandog sang drama nga “Tahura ang Awtoridad ni Jehova”