Magpadayon sa Pagpakita sing Pagkaayo

“Ang bunga sang kapawa nagalakip sang tagsa ka sahi sang pagkaayo kag pagkamatarong kag kamatuoran.”​—⁠EFESO 5:9.

1. Paano ginapakita sang minilyon karon nga nagaugyon sila sa Salmo 31:19?

ANG labing maayo nga butang nga mahimo sang bisan sin-o nga tawo amo ang paghatag sing himaya kay Jehova. Sa karon, minilyon ang nagahimo sini paagi sa pagdayaw sa Dios tungod sa iya pagkaayo. Subong matutom nga mga Saksi ni Jehova, bug-os tagipusuon nga nagaugyon kita sa salmista nga nag-amba: “Daw ano ka bugana ang imo pagkaayo, nga gintipigan mo para sa mga nagakahadlok sa imo!”​—⁠Salmo 31:19.

2, 3. Ano ang matabo kon ang aton paghimo-disipulo nga hilikuton wala ginaupdan sang maayo nga paggawi?

² Ang matinahuron nga kahadlok kay Jehova nagapahulag sa aton nga dayawon sia tungod sa iya pagkaayo. Nagapahulag man ini sa aton nga ‘dayawon si Jehova, pakamaayuhon sia, kag ipahibalo ang himaya sang iya pagkahari.’ (Salmo 145:10-13) Amo kon ngaa makugi kita nga nagapakigbahin sa pagbantala sing Ginharian kag paghimo-disipulo nga hilikuton. (Mateo 24:14; 28:​19, 20) Sa pagkamatuod, ang aton pagbantala nga hilikuton dapat updan sang maayo nga paggawi. Kay kon indi, mapakahuy-an naton ang balaan nga ngalan ni Jehova.

³ Madamo nga tawo ang nagapangangkon nga nagasimba sila sa Dios, apang ang ila paggawi wala nagahisanto sa mga talaksan nga ginapahamtang sa iya inspirado nga Pulong. Tuhoy sa pila nga wala nagapanghikot suno sa ila mga ginapangangkon nga paghimo sing maayo, si apostol Pablo nagsulat: “Ikaw bala nga nagatudlo sa iban, wala nagatudlo sang imo kaugalingon? Ikaw, nga nagabantala nga ‘Indi magpangawat,’ nagapangawat ka bala? Ikaw, nga nagasiling ‘indi magpanghilahi,’ nagapanghilahi ka bala? . . . ‘Ang ngalan sang Dios ginapasipalahan bangod sa inyo sa tunga sang mga pungsod’; subong sang nasulat na.”​—⁠Roma 2:​21, 22, 24.

4. Ano ang epekto sang aton maayo nga paggawi?

⁴ Sa baylo nga pakahuy-an ang ngalan ni Jehova, ginatinguhaan naton nga himayaon ini paagi sa aton maayo nga paggawi. May maayo ini nga epekto sa mga tawo sa guwa sang Cristianong kongregasyon. Isa pa, nagabulig ini sa aton agod pahipuson ang mga nagapamatok sa aton. (1 Pedro 2:15) Sing labi pa ka importante, ang aton maayo nga paggawi nagabuyok sa mga tawo sa organisasyon ni Jehova, nagabukas sang dalan agod mahimaya nila sia kag matigayon nila ang kabuhi nga walay katapusan.​—⁠Binuhatan 13:48.

5. Ano nga mga pamangkot ang dapat naton binagbinagon karon?

⁵ Bangod indi kita himpit, paano naton malikawan ang paggawi nga nagapakahuya kay Jehova kag nagapasandad sa mga nagapangita sing kamatuoran? Sa pagkamatuod, paano kita magmadinalag-on sa pagpakita sing pagkaayo?

Isa ka Bunga sang Kapawa

6. Ano ang pila sang “di-mabungahon nga mga buhat sang kadudulman,” apang ano nga bunga ang dapat makita sa mga Cristiano?

⁶ Subong dedikado nga mga Cristiano, natigayon naton ang butang nga nagabulig sa aton agod malikawan ang “di-mabungahon nga mga buhat sang kadudulman.” Nagalakip ini sa wala-nagapadungog  sa Dios nga mga buhat subong sang pagbutig, pagpangawat, maparas nga hambal, di-maayo nga paghambalanay tuhoy sa sekso, makahuluya nga paggawi, malaw-ay nga linahog, kag pagpahubog. (Efeso 4:​25, 28, 31; 5:​3, 4, 11, 12, 18) Sa baylo nga himuon ini, ‘padayon kita nga nagalakat subong mga anak sang kapawa.’ Si apostol Pablo nagsiling nga “ang bunga sang kapawa nagalakip sang tagsa ka sahi sang pagkaayo kag pagkamatarong kag kamatuoran.” (Efeso 5:​8, 9) Gani paagi sa paglakat sa kapawa makapadayon kita sa pagpakita sing pagkaayo. Apang ano ini nga sahi sang kapawa?

7. Ano ang dapat naton himuon agod mapakita sing padayon ang pagkaayo?

⁷ Walay sapayan sang aton pagkadihimpit, mapakita naton ang pagkaayo kon maglakat kita sa espirituwal nga kapawa. “Ang imo pulong suga sa akon tiil, kag kapawa sa akon banas,” amba sang salmista. (Salmo 119:105) Kon luyag naton nga ipakita sing padayon ang “bunga sang kapawa” paagi sa “tagsa ka sahi sang pagkaayo,” dapat himuslan naton pirme ang espirituwal nga kapawa nga masapwan sa Pulong sang Dios, kag ginabinagbinag sing maayo sa Cristianong mga publikasyon, kag regular nga ginahinun-anunan sa aton mga miting para sa pagsimba. (Lucas 12:42; Roma 15:⁠4; Hebreo 10:​24, 25) Dapat man naton hatagan sing pinasahi nga igtalupangod ang halimbawa kag mga panudlo ni Jesucristo, “ang kapawa sang kalibutan” kag ang ‘banaag sang himaya ni Jehova.’​—⁠Juan 8:12; Hebreo 1:1-3.

Isa ka Bunga sang Espiritu

8. Ngaa mahimo naton mapakita ang pagkaayo?

⁸ Walay duhaduha nga ang espirituwal nga kapawa nagabulig sa aton sa pagpakita sing pagkaayo. Dugang pa, mapadayag naton ini nga kinaiya bangod ginatuytuyan kita sang balaan nga espiritu, ukon aktibo nga puwersa, sang Dios. Ang pagkaayo bahin sang “bunga sang espiritu.” (Galacia 5:​22, 23) Kon nagapatuytoy kita sa balaan nga espiritu ni Jehova, magapatubas ini sa aton sing dalayawon nga bunga sini sang pagkaayo.

9. Paano kita makapanghikot suno sa pinamulong ni Jesus nga nasulat sa Lucas 11:9-13?

⁹ Ang aton hanuot nga handum nga pahamut-an si Jehova paagi sa pagpakita sing bunga sang espiritu nga pagkaayo magapahulag sa aton sa pagpanghikot suno sa mga pinamulong ni Jesus: “Padayon sa pagpangayo, kag ihatag ini sa inyo; padayon sa pagpangita, kag makita ninyo; padayon sa pagpanuktok, kag buksan ini sa inyo. Kay ang tagsatagsa nga nagapangayo nagabaton, kag ang tagsatagsa nga nagapangita makakita, kag sa tagsatagsa nga nagapanuktok ini pagabuksan. Sa pagkamatuod, sin-o bala sa inyo nga amay nga, kon pangayuan sang iya anak sing isda, ayhan magahatag sa iya sing man-ug sa baylo nga isda? Ukon kon mangayo man sia sing itlog, magahatag sa iya sing iwi-iwi? Busa, kon kamo, bisan pa [di-himpit kag sa amo kon ipaanggid] malaut, makahibalo maghatag sing maayong mga dulot sa inyo mga anak, daw ano ka labaw pa nga ang Amay sa langit magahatag sing balaan nga espiritu sa mga nagapangayo sa iya!” (Lucas 11:9-13) Sundon naton ang laygay ni Jesus paagi sa pagpangamuyo sing espiritu ni Jehova agod nga mapakita naton sing padayon ang bunga sini nga pagkaayo.

‘Magpadayon sa Paghimo sing Maayo’

10. Ano nga mga aspekto sang pagkaayo ni Jehova ang ginsambit sa Exodo 34:​6, 7?

¹⁰ Paagi sa espirituwal nga kapawa gikan sa Pulong sang Dios kag paagi sa bulig sang balaan nga espiritu sang Dios, ‘padayon kita nga makahimo sing maayo.’ (Roma 13:3) Paagi sa regular nga pagtuon sa Biblia, dugang pa nga matun-an naton kon paano ilugon ang pagkaayo ni Jehova. Ang nagligad nga artikulo nagbinagbinag sang mga aspekto sang pagkaayo sang Dios nga ginsambit sa pahayag ni Moises nga nasulat sa Exodo 34:​6, 7, nga aton mabasa: “Si Jehova, si Jehova, isa ka Dios nga maluluy-on kag mainayuhon, mahinay sa pagpangakig kag bugana sa mahigugmaon nga kaayo kag sa kamatuoran, nagatipig sing mahigugmaon nga kaayo para sa linibo, nagapatawad sang kasaypanan kag kalapasan kag kasal-anan,  apang indi gid sia magahatag sing pasaylo sa silot.” Ang pag-usisa sing maayo sa sining mga aspekto sang pagkaayo ni Jehova magabulig sa aton nga ‘magpadayon sa paghimo sing maayo.’

11. Ano ang epekto sa aton sang ihibalo nga si Jehova maluluy-on kag mainayuhon?

¹¹ Ining pahayag sang Dios nagapaalisto sa aton sang kinahanglanon nga ilugon si Jehova nga mangin maluluy-on kag mainayuhon. “Malipayon ang mga maluluy-on,” siling ni Jesus, “kay sila pakitaan sing kaluoy.” (Mateo 5:⁠7; Lucas 6:36) Bangod nakahibalo nga si Jehova mainayuhon, ginapahulag kita nga mangin mainayuhon kag malipayon sa aton mga pagpakig-angot sa iban, pati na sa aton mga ginabantalaan. Nagahisanto ini sa laygay ni Pablo: “Magpamulong kamo pirme nga may kaayo, nga natimplahan sing asin, agod mahibaluan ninyo kon paano kamo dapat maghatag sing sabat sa tagsatagsa.”​​—⁠Colosas 4:6.

12. (a) Sanglit ang Dios mahinay sa pagpangakig, paano kita dapat makig-angot sa iban? (b) Ang mahigugmaon nga kaayo ni Jehova nagapahulag sa aton sa paghimo sing ano?

¹² Sanglit ang Dios mahinay sa pagpangakig, ang aton handum nga ‘magpadayon sa paghimo sing maayo’ nagapahulag sa aton nga palampason ang magagmay nga kasaypanan sang mga masigkatumuluo kag sa pagtalupangod sang ila maayo nga mga kinaiya. (Mateo 7:⁠5; Santiago 1:19) Ang mahigugmaon nga kaayo ni Jehova nagapahulag sa aton nga ipakita ang mainunungon nga gugma, bisan sa idalom sang mabudlay kaayo nga mga kahimtangan. Halandumon gid ini kaayo.​—⁠Hulubaton 19:22.

13. Paano kita dapat manghikot sa pagpabanaag nga si Jehova ‘bugana sa kamatuoran’?

¹³ Sanglit ang aton langitnon nga Amay ‘bugana sa kamatuoran,’ ginatinguhaan naton nga ‘irekomendar ang aton kaugalingon subong mga ministro niya paagi sa maminatud-on nga hambal.’ (2 Corinto 6:3-7) Lakip sa pito ka butang nga makangilil-ad kay Jehova amo ang “butigon nga dila” kag “butigon nga saksi nga nagasugid sing kabutigan.” (Hulubaton 6:16-19) Gani ang aton handum nga pahamut-an ang Dios nagapahulag sa aton sa ‘pagdula sing kabutigan kag maghambal sing kamatuoran.’ (Efeso 4:25) Kabay nga ipadayag gid naton ang pagkaayo sa sining importante nga paagi.

14. Ngaa dapat kita magmapinatawaron?

¹⁴ Ang pahayag sang Dios kay Moises dapat magpahulag man sa aton nga mangin mapinatawaron, kay si Jehova handa sa pagpatawad. (Mateo 6:​14, 15) Sa pagkamatuod, ginasilutan ni Jehova ang di-mahinulsulon nga mga makasasala. Busa, dapat naton sundon ang iya mga talaksan sang pagkaayo may kaangtanan sa paghupot sa espirituwal nga katinlo sang kongregasyon.​​—⁠Levitico 5:⁠1; 1 Corinto 5:​11, 12; 1 Timoteo 5:⁠22.

‘Magpadayon sa Pagbantay sing Maayo’

15, 16. Paano ang laygay ni Pablo nga nasulat sa Efeso 5:15-19 nagabulig sa aton nga magpadayon sa paghimo sing pagkaayo?

¹⁵ Agod padayon nga mapadayag ang pagkaayo walay sapayan sang kalautan nga nagapalibot sa aton, kinahanglan nga mapun-an kita sang espiritu sang Dios kag magbantay kon paano kita nagalakat. Sing nahisuno, ginapalig-on ni Pablo ang mga Cristiano sa Efeso: “Magpadayon kamo sa pagbantay sing maayo nga ang inyo paglakat indi subong sang di-maalam kundi subong sang mga tawo nga maalamon, nga ginabakal ang nagakaigo nga tion para sa inyo kaugalingon, bangod  nga ang mga adlaw malaut. Bangod sini mag-untat kamo nga mangin di-makatarunganon, kundi padayon ninyo nga hangpon kon ano ang kabubut-on ni Jehova. Subong man, indi kamo magpahubog sa alak, nga may pagpatuyang, kundi magmapuno sang espiritu, nga nagahambal sa isa kag isa sang mga salmo kag mga pagdayaw sa Dios kag espirituwal nga mga ambahanon, nga nagaamba kag nagaakompanyar sang inyo kaugalingon sang musika sa inyo tagipusuon para kay Jehova.” (Efeso 5:15-19) Ini nga laygay nagakaigo gid para sa aton sa sining makahalanguyos nga katapusan nga mga adlaw.​​—⁠2 Timoteo 3:1.

¹⁶ Kon magpadayon kita sa paghimo sing pagkaayo, dapat magbantay kita pirme nga nagalakat kita subong sang mga may diosnon nga kaalam. (Santiago 3:17) Dapat likawan naton ang mabug-at nga mga sala kag dapat mapuno kita sang balaan nga espiritu, nga nagapatuytoy sa sini. (Galacia 5:19-25) Paagi sa pag-aplikar sa espirituwal nga instruksion nga ginahatag sa Cristianong mga miting, mga asambleya, kag mga kombension, padayon kita nga maghimo sing maayo. Ang pinamulong ni Pablo sa mga taga-Efeso mahimo man magpahanumdom sa aton nga sa kalabanan sang aton mga pagtinipon sa pagsimba, nagabenepisyo kita gikan sa aton tinagipusuon nga pag-amba sing “espirituwal nga mga ambahanon”​—⁠ang madamo sini nagapatalupangod sang espirituwal nga mga kinaiya, subong sang pagkaayo.

17. Kon bangod sang ila mga kahimtangan indi sila makatambong sing regular sa mga miting, ano ang mapat-od sang nagabalatian sing malubha nga mga Cristiano?

¹⁷ Kamusta naman ang aton mga masigkatumuluo nga indi makatambong sing regular sa Cristianong mga miting bangod sang malubha nga balatian? Mahimo nga maluyahan sila bangod indi sila pirme makasimba kay Jehova nga nagapakig-upod sing direkta sa ila espirituwal nga mga kauturan. Apang mapat-od nila nga nahangpan ni Jehova ang ila mga kahimtangan, ginahuptan sila sa kapawa, ginahatagan sila sang iya balaan nga espiritu, kag ginabuligan sila nga magpadayon sa paghimo sing maayo.​—⁠Isaias 57:15.

18. Ano ang magabulig sa aton agod makalakat sa dalanon sang pagkaayo?

¹⁸ Agod makalakat sa dalanon sang pagkaayo, kinahanglan nga bantayan naton ang aton pagpakig-upod kag likawan ang mga tawo nga “wala sing gugma sa kaayuhan.” (2 Timoteo 3:​2-5; 1 Corinto 15:33) Ang pag-aplikar sini nga laygay nagabulig sa aton agod indi ‘mapasubo ang balaan nga espiritu sang Dios’ paagi sa pagpanghikot sing supak sa mga panuytoy sini. (Efeso 4:30) Dugang pa, ginabuligan kita sa paghimo sing maayo kon nagapakig-upod kita sing suod sa mga tawo nga ang ila kabuhi nagapamatuod nga ginahigugma nila ang pagkaayo kag ginatuytuyan sila sang balaan nga espiritu ni Jehova.​—⁠Amos 5:​15; Roma 8:​14; Galacia 5:⁠18.

Ang Pagkaayo Nagahatag sing Maayo nga mga Resulta

19-21. Isaysay ang mga eksperiensia nga nagapakita sang epekto sang pagpakita sing pagkaayo.

¹⁹ Ang paglakat sa espirituwal nga kapawa, ang pagsunod sa panuytoy sang espiritu sang Dios, kag ang pagbantay sa kon paano kita nagalakat magabulig sa aton nga malikawan ang malain kag “magpadayon sa paghimo sing maayo.” May maayo man ini nga mga resulta. Binagbinaga ang halimbawa ni Zongezile, isa sang mga Saksi ni Jehova sa Bagatnan nga Aprika. Sang nagapakadto sia sa eskwelahan sang isa ka aga, gintan-aw niya kon pila ang iya diutay nga sinuptan sa bangko. Ginapakita sing sayop sang papel halin sa automatic teller machine nga sobra ini sing R42,000 ($6,000, U.⁠S.). Ang guardia sa bangko kag ang iban pa nagpilit sa iya nga kobrahon ang kuwarta kag ideposito ini sa iban nga bangko. Ang mag-asawa lamang nga Saksi nga ginadayunan niya ang nagdayaw sa iya bangod wala niya ginkobra ang kuwarta.

²⁰ Sang masunod nga adlaw sang trabaho, ginreport ni Zongezile ang natabo sa bangko. Natukiban nga halos pareho gali ang ila account number sang isa ka manggaranon nga negosyante nga nagsayop sa pagdeposito sing kuwarta sa lain nga account. Nakibot nga wala gingasto ni Zongezile ang bisan pila sini nga kuwarta, ginpamangkot sia sang negosyante: “Ano ang imo relihion?” Ginpaathag ni Zongezile nga isa sia sang mga Saksi ni Jehova. Gindayaw gid sia sang mga opisyales sang bangko, nga nagsiling: “Kuntani ang tanan nga tawo subong ka bunayag sa mga Saksi ni Jehova.” Sa pagkamatuod, bangod sang mga buhat sang pagkabunayag kag pagkaayo, ginahimaya sang iban si Jehova.​—⁠Hebreo 13:18.

²¹ Ang mga buhat sang pagkaayo indi kinahanglan nga mangin talalupangdon agod may maayo nga epekto. Sa pag-ilustrar: Ang isa ka lamharon  nga Saksi nga nagaalagad subong bug-os tion nga ebanghelisador sa isa sang mga isla sang Samoa nagkadto sa isa ka lokal nga ospital. Ang mga tawo nagahulat sa pagpakonsulta sa doktor, kag natalupangdan sang Saksi nga ang tigulang nga babayi masunod sa iya malain gid ang pamatyag. Ginpauna niya ang babayi agod mabulong sia sa gilayon. Sang ulihi, nasumalang sining tigulang nga babayi ang Saksi sa tiendahan. Natandaan niya sia kag ang iya maayo nga ginhimo sa ospital. “Nahibaluan ko karon nga ang mga Saksi ni Jehova nagahigugma gid sang ila isigkatawo,” siling niya. Bisan pa nga wala sia anay nagabaton sa mensahe sang Ginharian, ang pagkaayo nga ginpakita sa iya sang Saksi may maayo nga epekto. Ginbaton niya ang tanyag nga isa ka pagtuon sa Biblia sa puluy-an kag nagsugod sa pagkuha sing ihibalo sa Pulong sang Dios.

22. Ano ang isa ka importante gid nga paagi sa ‘padayon nga paghimo sing maayo’?

²² Mahimo gid nga makasaysay ka sing mga eksperiensia nga nagapakita sang importansia sang pagpakita sing pagkaayo. Ang isa ka importante nga paagi agod ‘magpadayon sa paghimo sing maayo’ amo ang regular nga pagpakigbahin sa pagbantala sing maayong balita tuhoy sa Ginharian sang Dios. (Mateo 24:14) Kabay nga padayon kita nga makigbahin sa sining hamili nga hilikuton, nakahibalo nga isa ini ka paagi sa paghimo sing maayo, ilabi na sa mga nagapamati. Sing labing importante, ang aton ministeryo kag maayo nga paggawi nagahimaya kay Jehova, ang panguna nga ginahalinan sang pagkaayo.​—⁠Mateo 19:​16, 17.

Magpadayon sa “Pagbuhat sing Maayo”

23. Ngaa ang Cristianong ministeryo isa ka maayo nga hilikuton?

²³ Ang aton ministeryo isa gid ka maayo nga hilikuton. Mahimo ini magdul-ong sa aton kaluwasan kag sang mga nagapamati sa mensahe sang Biblia kag sa amo maglakat sa dalan padulong sa kabuhi nga walay katapusan. (Mateo 7:​13, 14; 1 Timoteo 4:16) Nian, kon maghimo kita sing mga desisyon, ang handum nga himuon ang maayo magapahulag sa aton nga pamangkuton ang aton kaugalingon: ‘Ano ang epekto sini nga desisyon sa akon pagbantala sing Ginharian nga hilikuton? Ang dalanon bala nga akon ginahunahuna maayo gid? Mabuligan ko bala ang iban nga batunon ang “maayong balita nga dayon” kag mangin suod kay Jehova nga Dios paagi sini?’ (Bugna 14:6) Matigayon ang daku nga kalipay gikan sa desisyon nga nagapasangkad sang intereses sang Ginharian.​—⁠Mateo 6:33; Binuhatan 20:35.

24, 25. Ano ang pila ka paagi sa paghimo sing maayo sa kongregasyon, kag ano ang mapat-od naton kon padayon naton nga ginapakita ang pagkaayo?

²⁴ Indi gid naton pagpakadiutayon ang mapuslanon nga mga epekto sang pagkaayo. Padayon naton nga mapakita ini nga kinaiya paagi sa pagsakdag sa Cristianong kongregasyon kag sa paghimo sa masarangan naton agod maatipan ang intereses kag kaayuhan sini. Nagahimo gid kita sing maayo kon regular kita nga nagatambong kag nagapakigbahin sa Cristianong mga miting. Ang aton mismo pagtambong nagapalig-on sa mga masigkasumilimba, kag ang aton nahanda-sing-maayo nga mga komento nagapalig-on sa ila sa espirituwal. Nagahimo man kita sing maayo kon ginagamit naton ang aton mga ikasarang kag pagkabutang sa pagmentinar sa Kingdom Hall kag kon nagabulig kita sa pag-atipan sa sini. (2 Hari 22:​3-7; 2 Corinto 9:​6, 7) Sa pagkamatuod, “samtang may kahigayunan kita sa sini, magbuhat kita sing maayo sa tanan, apang labi na gid sa mga may labot sa aton sa pagtuo.”​—⁠Galacia 6:10.

²⁵ Indi naton masigahom ang tanan nga kahimtangan nga nagakinahanglan sang pagpakita sing pagkaayo. Nian, samtang nagaatubang kita sing bag-o nga mga hangkat, mangita kita sing kasanagan gikan sa Kasulatan, mangamuyo sing balaan nga espiritu ni Jehova, kag himuon ang aton gid masarangan sa paghimo sang iya maayo kag himpit nga kabubut-on. (Roma 2:​9, 10; 12:2) Makasalig gid kita nga pakamaayuhon kita ni Jehova sing bugana samtang padayon naton nga ginapakita ang pagkaayo.

Paano Mo Sabton?

• Paano naton mahimo ang labing maayo?

• Ngaa ang pagkaayo ginatawag nga ‘bunga sang kapawa’?

• Ngaa ang pagkaayo ginatawag nga ‘bunga sang espiritu’?

• Ano ang epekto sang aton maayo nga paggawi?

[Mga Pamangkot sa Pagtinuon]

[Retrato sa pahina 17]

Ang Pulong sang Dios kag ang iya balaan nga espiritu nagabulig sa aton agod ipakita ang pagkaayo

[Mga retrato sa pahina 18]

Ang pagpakita sing pagkaayo may maayo nga mga resulta