Magsalig kay Jehova—Ang Dios nga Tunay

Nakatangla ka na bala sa kahawaan sa kagab-ihon nga wala sing panganod kag nakita ang ginatos ka bituon? Ngaa nagaluntad sila?

SA KALINONG sang kagab-ihon, ang mga bituon daw naghambal kay Hari David sang dumaan nga Israel, nga nagtiklod sa iya sa pagsulat: “Ang mga langit nagapahayag sang himaya sang Dios; kag ang kahawaan nagasugid sang binuhatan sang iya mga kamot.” (Salmo 19:1) Huo, ang Manunuga sa baylo sang tinuga amo ang takus “sa pagbaton sang himaya kag dungog kag gahom.”​—⁠Bugna 4:11; Roma 1:25.

“Sia nga nagtukod sing tanan nga butang amo ang Dios,” siling sang Biblia. (Hebreo 3:4) Sa pagkamatuod, ang matuod nga Dios, ‘nga ang ngalan si Jehova, amo ang Labing Mataas sa bug-os nga duta.’ (Salmo 83:18) Kag indi sia isa ka panan-awan lamang​—⁠isa ka ilusyon lamang. Si Jesucristo nagsiling tuhoy sa iya langitnon nga Amay, si Jehova: “Sia nga nagpadala sa akon tunay.”​—⁠Juan 7:28.

Si Jehova​​—⁠Ang Manugtuman sang Iya mga Katuyuan

Ang pinasahi nga ngalan sang Dios, nga Jehova, makita sing halos 7,000 ka beses sa Hebreong Kasulatan lamang. Ini nga ngalan mismo nagapamatuod nga sia tunay. Ang ngalan sang Dios literal nga nagakahulugan sing “Ginapahanabo Niya nga Mangin Amo.” Sa amo, ginapakilala ni Jehova nga Dios ang iya kaugalingon subong Manugtuman sang iya mga katuyuan. Sang ginpamangkot ni Moises ang Dios sang iya ngalan, ginpaathag ni Jehova ang kahulugan sini sa sining paagi: “Ako mangin amo kon ano ako mangin amo.” (Exodo 3:14) Ang badbad ni Rotherham maathag nga nagasiling: “Mangin Amo Ako sa bisan ano nga luyag ko.” Si Jehova mangin amo, ukon makapamat-od nga mangin amo, kon ano man ang kinahanglan agod matuman ang iya matarong nga mga katuyuan kag mga saad. Sa amo, may yara sia madamong dalayawon nga titulo, subong sang Manunuga, Amay, Soberanong Ginuo, Manugbantay, Jehova sang mga kasuldadusan, Nagapamati sing pangamuyo, Hukom, Dakung Instruktor, Manunubos.​—⁠Hukom 11:27; Salmo 23:⁠1; 65:⁠2; 73:28; 89:26; Isaias 8:​13; 30:20; 40:28; 41:14.

Ang matuod nga Dios lamang ang may kinamatarong sa pag-angkon sa ngalan nga Jehova, kay indi gid mapat-od sang mga tawo nga ang ila mga plano magamadinalag-on. (Santiago 4:​13, 14) Si Jehova lamang ang makasiling: “Subong nga ang nagabubo nga ulan nagatupa, kag ang niebe, gikan sa mga langit kag wala nagabalik sa sina nga duog, luwas kon mahupog sini ang duta kag mapabunga kag mapasalingsing ini, kag ang binhi mahatag sa manugsab-ug kag ang tinapay sa manugkaon, mangin amo man ang pulong nga nagaguwa sa akon baba. Indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga tungod sina ginpadala ko ini.”​—⁠Isaias 55:​10, 11.

Ginatuman ni Jehova ang iya katuyuan sing subong ka pat-od amo nga bisan ang daw indi tunay para sa mga tawo tunay gikan sa iya pagtamod. Sang madugay na nga napatay sanday Abraham,  Isaac, kag Jacob, ginsambit sila ni Jesus kag nagsiling: “Sia [si Jehova] ang Dios, indi sang mga patay, kundi sang mga buhi, kay sila tanan buhi sa iya.” (Lucas 20:​37, 38) Ang tatlo ka matutom nga patriarka patay na, apang ang katuyuan sang Dios nga banhawon sila pat-od gid nga matuman amo nga para sa iya daw buhi sila. Ang pagbanhaw sa sining matutom nga mga alagad sang una indi mabudlay para kay Jehova subong sang pagtuga niya sa nahauna nga tawo gikan sa yab-ok sang duta.​—⁠Genesis 2:7.

Si apostol Pablo naghatag sing isa pa ka halimbawa sang katunayan nga ginapahanabo sang Dios nga matuman ang iya katuyuan. Sa Kasulatan, gintawag si Abraham nga “amay sang madamo nga pungsod.” (Roma 4:​16, 17) Samtang wala pa sing anak si Abram, gin-islan ni Jehova ang iya ngalan sa Abraham, nga buot silingon “Amay sang Kadam-an.” Ginpahanabo ni Jehova nga mangin katunayan ang kahulugan sina nga ngalan paagi sa milagruso nga pagpasag-uli sa ikasarang sa pagpanganak sang tigulang na nga si Abraham kag sang iya tigulang nga asawa, si Sara.​—⁠Hebreo 11:​11, 12.

Ginhatagan sing daku nga gahom kag awtoridad, naghambal si Jesucristo tuhoy sa mga katunayan gikan sa mas mataas nga pagtamod sangsa mga tawo. Bisan pa napatay ang iya suod nga abyan nga si Lazaro, ginsilingan ni Jesus ang iya mga disipulo: “Si Lazaro nga aton abyan nagpahuway, apang magalakbay ako pakadto didto agod nga mapukaw sia sa katulugon.” (Juan 11:11) Ngaa nagsiling si Jesus tuhoy sa isa ka patay nga tawo subong nga daw nagakatulog lamang?

Sang nakalab-ot si Jesus sa dutang natawhan ni Lazaro nga Betania, nagkadto sia sa lulubngan kag nagsugo nga kuhaon ang bato nga nagatakop sa ganhaan sini. Pagkatapos makapangamuyo sing mabaskog, nagsugo sia: “Lazaro, guwa ka!” Kag samtang ang mga mata sang mga nagatan-aw napansal sa lulubngan, “ang tawo nga napatay nagguwa nga nasamburan ang iya mga tiil kag mga kamot, kag ang iya nawong naputos sing tela.” Nian si Jesus nagsiling: “Hubari ninyo sia kag palakta sia.” (Juan 11:​43, 44) Ginbanhaw ni Jesus si Lazaro​—⁠ginpasag-uli ang kabuhi sang isa ka tawo nga patay na sa sulod sang apat ka adlaw! Wala si Cristo nagbutig sang nagsiling sia nga ang iya abyan nagakatulog. Gikan sa pagtamod ni Jehova kag ni Jesus, ang patay nga si Lazaro daw nagakatulog lang. Huo, ang ginasiling ni Jesus kag sang iya langitnon nga Amay matuod gid.

Mahimo ni Jehova ang Aton mga Ginalauman nga Mangin mga Katunayan

Daw ano nga kinatuhayan ang yara sa ulot sang malimbungon nga mga idolo kag sang tunay nga Dios! Sayop nga ginapatungod sang mga sumilimba sa idolo ang labaw-sa-tawo nga mga gahom sa ila ginasimba nga mga butang. Apang, ini nga paghangad indi makahatag sing milagruso nga mga ikasarang sa sining mga idolo. Sa pihak nga bahin, nagakaigo nga mapatuhuyan ni Jehova nga Dios ang iya madugay-na-nga-patay nga mga alagad subong nga daw nagakabuhi sila kay sarang niya sila banhawon. “Si Jehova isa gid ka Dios,” kag wala gid niya ginalimbungan ang iya katawhan.​—⁠Jeremias 10:10.

Daw ano ka makalulugpay mahibaluan nga sa gintalana nga tion ni Jehova, ang mga patay nga yara sa iya handumanan pagabanhawon​—⁠pagabuhion liwat! (Binuhatan 24:15) Huo, ang pagkabanhaw nagadalahig sing pagpasag-uli sa personalidad sang indibiduwal. Ang pagtanda sa personalidad sang mga patay kag pagbanhaw sa ila indi problema para sa Manunuga, nga ang kaalam kag gahom wala sing latid. (Job 12:13; Isaias 40:26) Bangod si Jehova bugana sa gugma, gamiton niya ang iya himpit nga memorya sa pagbanhaw  sa mga patay sa isa ka paraiso nga duta upod ang personalidad nila antes mapatay.​—⁠1 Juan 4:8.

Samtang nagahilapit ang katapusan sang kalibutan ni Satanas, pat-od gid nga masanag ang palaabuton sang mga nagasalig sa matuod nga Dios. (Hulubaton 2:​21, 22; Daniel 2:​44; 1 Juan 5:19) Ang salmista nagapasalig sa aton: “Sa diutay pa nga tion, kag ang malauton wala na; . . . apang ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.” (Salmo 37:​10, 11) Ang krimen kag kasingki mangin mga butang sang nagligad. Ang katarungan magaluntad, kag ang kapigaduhon sa pangabuhi madula. (Salmo 37:⁠6; 72:​12, 13; Isaias 65:21-​23) Ang tanan nga agi sang pag-ihig-ihig bangod sang tindog sa katilingban, rasa, tribo, kag etniko mapanas. (Binuhatan 10:​34, 35) Ang mga inaway kag mga hinganiban sa inaway wala na. (Salmo 46:9) Sa sina nga tion “wala sing pumuluyo nga magasiling: ‘Nagamasakit ako.’ ” (Isaias 33:24) Ang tanan makatigayon sing himpit kag mapagros nga panglawas. (Bugna 21:​3, 4) Sa indi madugay ang paraiso sa duta mangin isa ka katunayan. Gintuyo ini ni Jehova!

Huo, ang tanan nga paglaum nga pasad sa Biblia matuman sa indi madugay. Ngaa abi tugutan naton ang aton kaugalingon nga patalangon sang ginaidolo sa sining kalibutan kon makasalig kita sing bug-os kay Jehova? Kabubut-on niya “nga ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Timoteo 2:​3, 4) Sa baylo nga ihugod ang aton tion kag pagkabutang sa mga handurawan, ukon panan-awan lamang, sining sistema sang mga butang kag sang mga dios sini, mag-uswag kita sa ihibalo tuhoy sa Dios nga tunay kag magsalig sa iya sing bug-os tagipusuon.​—⁠Hulubaton 3:1-6; Juan 17:3.

[Retrato sa pahina 6]

Gikan sa pagtamod ni Jehova kag ni Jesus, nagakatulog lamang si Lazaro

[Mga retrato sa pahina 7]

Ang paraiso sa duta mangin isa ka katunayan sa indi madugay