Nagasalig Ka Bala sa Isa ka Dios nga Tunay?

Isa ka ekspedisyon ang ginpadala sang American Museum of Natural History agod tun-an ang isa ka duog sa Arctic nga nakita kuno sang manuglagulad nga si Robert E. Peary mga pito ka tuig antes, sang 1906.

GIKAN sa Cape Colgate sa pinakaaminhan-nakatundan nga bahin sang Aminhan nga Amerika, nakita ni Peary ang daw maputi nga mga putukputukan sang isa ka malayo nga duog. Ginhingadlan niya ini nga Crocker Land sunod sa isa sang mga nagsuporta sa iya sa mga gastos niya. Nakunyag gid ang mga nakaupod sa ekspedisyon sang nalantawan nila ang isa ka duog nga may mga pukatod, mga nalupyakan, kag mga bukid nga nakulapan sang niebe! Apang narealisar nila sang ulihi nga namata-mata lang gali sila. Nalimbungan si Peary sining namata-mata lamang nga panan-aw, kag sang narealisar nila ini nakahinguyang na sila sing tion, kusog, kag kuwarta sa paglagulad sa isa ka butang nga indi gali matuod.

Sa karon, madamo nga tawo ang nagahatag sang ila debosyon kag sang ila tion sa mga dios nga ginapatihan nila nga tunay. Sang panahon sang mga apostoles ni Jesus, ginasimba ang mga dios subong nanday Hermes kag Zeus. (Binuhatan 14:​11, 12) Sa karon, minilyon ang ginasimba nga mga dios sang Shinto, Hindu, kag iban pa nga mga relihion sa kalibutan. Sa pagkamatuod, subong sang ginasiling sang Biblia, “may madamo nga ‘dios’ kag madamo nga ‘ginuo.’ ” (1 Corinto 8:​5, 6) Mahimo bala nga ini tanan tunay nga mga dios?

Mga Dios nga “Indi Makaluwas”

Binagbinaga, halimbawa, ang paggamit sing mga imahen ukon mga simbulo sa pagsimba. Para sa mga nagasalig sa ila ukon nagapangadi paagi sa ila, ang mga idolo daw nangin mga manluluwas nga may labaw-sa-tawo nga mga gahom nga makapadya sa mga tawo ukon makaluwas sa ila gikan sa katalagman. Apang makaluwas gid bala sila? Tuhoy sining mga butang, ang salmista nag-amba: “Ang mga idolo sang mga pungsod pilak kag bulawan, ang binuhatan sang mga kamot sang dutan-on nga tawo. May baba sila, apang indi sila  makahambal; may mga mata sila, apang indi sila makakita; may mga dulunggan sila, apang indi sila makabati. Wala man sing espiritu sa ila baba.” Sa pagkamatuod, mga dios sila nga “indi makaluwas.”​​—⁠Salmo 135:15-​17; Isaias 45:20.

Matuod, ang mga nagahimo sing mga idolo mahimo magpatungod sing kabuhi kag gahom sa binuhatan sang ila mga kamot. Kag ang mga nagasimba sa mga idolo nagasalig sa ila. “Ginapas-an nila [ang idolo],” siling ni manalagna Isaias, “ginadala nila ini kag ginabutang sa iya duog agod makatindog ini.” Sia nagsiling pa: “Gikan sa ginatindugan sini wala ini nagahalin. Ang isa nagatuaw pa gani sa sini, apang wala ini nagasabat; gikan sa kalisdanan sang isa wala ini nagaluwas sa iya.” (Isaias 46:7) Ang kamatuoran amo nga ang isa ka idolo nagapabilin nga wala sing kabuhi bisan ano man ka hanuot ang pagtuo sang mga nagasalig sa sini. Ining larawan nga mga tinigban kag tinunaw nga mga estatwa “walay pulos nga mga dios.”​—⁠Habacuc 2:18.

Ang pag-idolo, pagsimba, ukon paghangad sa mga artista, mga humalampang, mga sistema sang politika, kag pila ka lider sang relihion kinaandan man karon. Dugang pa, ginapakadios sang madamo ang kuwarta. Sa tagsa ka kaso, ining mga idolo ginapresentar nga may mga kinaiya kag mga kabilihanan nga wala sa ila. Wala kag indi sila makahatag sang tanan nga ginalauman sang mga nagatuo sa ila. Halimbawa, ang manggad mahimo nga daw amo ang solusyon sa madamo nga problema, apang ang gahom sang manggad malimbungon. (Marcos 4:19) Ang isa ka manugpanalawsaw nagpamangkot: “Ngaa ang isa ka butang nga ginahandum gid sang madamo nga tawo, kag ginapatihan nga amo ang remedyo sa tanan nga kabudlayan, kon matigayon na may yara nanuhaytuhay nga epekto halin sa kalugaw-an pakadto sa kasamaran?” Huo, bangod sa paghingamo sa manggad, mahimo nga isakripisyo sang isa ka tawo ang isa ka butang nga tunay nga importante, subong sang maayo nga panglawas, makalilipay nga kabuhi sang pamilya, suod nga mga kaangtanan, ukon hamili nga kaangtanan sa Manunuga. Ang iya ginapakadios nga kuwarta kag manggad nangin isa ka ‘dios-dios sang kabutigan’!​—⁠Jonas 2:8.

“Wala sing Bisan Sin-o nga Nagasabat”

Kabuangan nga tawgon nga tunay ang butang nga indi tunay. Ang mga sumilimba sang dios nga si Baal sang panahon ni manalagna Elias nakatuon sa sini paagi sa masakit nga eksperiensia. Nagpati gid sila nga may gahom si Baal sa pagpapanaug sing kalayo gikan sa langit kag sunugon ang halad nga sapat. Sa katunayan, “nagpanawag sila sa ngalan ni Baal kutob sa aga tubtob sa udto, nga nagasiling: ‘O Baal, sabta kami!’ ” Si Baal bala may mga dulunggan nga makabati kag baba nga makahambal? Ang kasaysayan nagapadayon: “Wala sing tingog, kag wala sing bisan sin-o nga nagasabat.” Sa pagkamatuod, “wala sing nagatalupangod.” (1 Hari 18:​26, 29) Si Baal indi tunay, buhi, ukon aktibo.

Daw ano ka importante nga makilala naton kag simbahon ang isa ka Dios nga tunay! Apang sin-o sia? Kag paano kita makabenepisyo gikan sa pagsalig sa iya?

[Mga retrato sa pahina 3]

Ang kaupod ni Peary nga si Egingwah naglagulad sang gintaipan sa pagpangita sa duta

Si Robert E. Peary

[Credit Lines]

Egingwah: Gikan sa libro nga The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Mga retrato sa pahina 4]

Madamo ang nalimbungan sang ginaidolo sa sining kalibutan