Isa ka Siudad sa Ibabaw sang Bukid

“KAMO ang kapawa sang kalibutan. Ang siudad indi matago kon nahamtang sa ibabaw sang bukid,” siling ni Jesus sa iya mga disipulo sa iya bantog nga Sermon sa Bukid.—Mateo 5:14.

Madamo sang banwa sa Judea kag Galilea ang nahamtang sa mga bukid sa baylo nga sa mga nalupyakan. Ang panguna nga rason sa pagpili sa ibabaw sang bungyod amo ang kalig-unan. Magluwas sa nagapanakop nga mga hangaway, pirme ginasalakay sang mga grupo sang manug-ati ang ginapuy-an sang mga Israelinhon. (2 Hari 5:2; 24:2) Mahapos mapangapinan sang maisog nga mga pumuluyo ang nagapunsok nga mga balay sa ibabaw sang isa ka bukid sangsa banwa nga nahamtang sa manubo nga duog nga nagakinahanglan sing mas daku nga pader agod maamligan.

Bangod ang mga pader sang mga balay sang Judiyo masami nga ginabasyadahan sang apog, ang isa ka punsok sang balay nga nabasyadahan sing puti sa ibabaw sang bungyod mahapos makita bisan minilya pa ang kalayuon sa palibot sini. (Binuhatan 23:3) Sa masanag nga adlaw sa Palestina, ini nga mga banwa sa bungyod nagabanaag kaangay sang parola, kaangay sang mga banwa karon sa Mediteraneo.

Gingamit ni Jesus ining talalupangdon nga kahimtangan sang duog sa Galilea kag Judea sa pagtudlo sa iya mga sumulunod sang papel sang isa ka matuod nga Cristiano. “Subong man paiwaga ang inyo kapawa sa atubangan sang mga tawo,” siling niya sa ila, “agod makita nila ang inyo maayong mga buhat kag maghimaya sa inyo Amay nga yara sa mga langit.” (Mateo 5:16) Samtang ang mga Cristiano wala nagahimo sing maayo nga mga buhat agod dayawon sang mga tawo, ang ila maayo nga paggawi natalupangdan gid.—Mateo 6:1.

Ining maayo nga paggawi mas maathag pa gid sa tion sang distrito nga mga kombension sang mga Saksi ni Jehova. Ang isa ka pamantalaan sa Espanya, nga nagapatuhoy sa bag-o lang ginhiwat nga kombension, nagreport: “Samtang ang interes sa relihioso nga mga butang nagatahaw sa iban nga denominasyon, indi amo sini ang kahimtangan sa mga Saksi ni Jehova. Bangod indi nila luyag nga madula ang importansia sang Biblia, ginsunod nila ang Pulong sang Dios.”

Si Tomas, nga amo ang nagaatipan sang istadyum sa aminhan-katundan sang Espanya nga ginagamit pirme sang mga Saksi, nalipay sa pagpakig-upod sa mga tawo nga nagatuman sa Pulong sang Dios. Ginpalantang niya ang iya pagretiro sing pila ka semana agod makatambong sia sa isa ka distrito nga kombension sang mga Saksi ni Jehova. Sang ang madamo nga delegado, lakip ang mga lamharon, nagpalapit sa iya pagkatapos sang kombension agod pasalamatan sia sa iya kooperasyon sa nagliligad nga mga tuig kag nagpaalam nga mangin maayo ang iya pagretiro, naghibi sia. “Ang makilala kamo amo ang isa sang labing maayo nga eksperiensia sa akon kabuhi,” siling niya.

Ang isa ka siudad sa ibabaw sang bukid nagakuha sang igtalupangod sang nagatan-aw bangod maathag ini sa kahawaan kag bangod ang bisan ano nga puti nga mga balay nagabanaag sa silak sang adlaw. Sing kaanggid, ang matuod nga mga Cristiano makita nga tuhay bangod nagapanikasog sila nga sundon ang mataas nga mga talaksan sa Kasulatan sang pagkabunayag, moralidad, kag kaluoy.

Dugang pa, ang mga Cristiano nagapabanaag sang kapawa sang kamatuoran paagi sa ila pagbantala. Si apostol Pablo nagsiling sa unang-siglo nga mga Cristiano: “Bangod may amo kami sini nga ministeryo suno sa kaluoy nga ginpakita sa amon, wala kami nagauntat . . . apang paagi  sa paghimo nga dayag sang kamatuoran nga nagarekomendar sang amon kaugalingon sa tagsa ka konsiensia sang tawo sa itululok sang Dios.” (2 Corinto 4:1, 2) Bisan pa nga nakaatubang sila sing mga paghingabot bisan diin man sila nagabantala, ginpakamaayo ni Jehova ang ila ministeryo, amo nga sang mga tuig 60 C.E., si Pablo sarang makasulat nga ang maayong balita nabantala na sa “tanan nga tinuga sa idalom sang langit.”—Colosas 1:23.

Karon, serioso nga ginabuhat sang mga Saksi ni Jehova ang ila responsabilidad nga ‘ipabanaag ang ila kapawa sa mga tawo,’ subong sang ginsugo ni Jesus. Paagi sa paghambal kag sa ginbalhag nga materyal, napaalinton sang mga Saksi ni Jehova ang maayong balita sang Ginharian sa 235 ka kadutaan sa bug-os nga kalibutan. Agod nga ang kapawa sang kamatuoran sang Biblia makalab-ot sa madamo nga tawo kon posible, ginhimo nila ang ila mga publikasyon sa Biblia sa mga 370 ka lenguahe.—Mateo 24:14; Bugna 14:6, 7.

Sa madamo nga duog, ang mga Saksi nangabudlay sing lakas sa pagtuon sang mga lenguahe sang mga tawo nga nagsaylo gikan sa mga pungsod diin ginadumilian ang pagbantala. Halimbawa, sa pila ka dalagku nga mga siudad sa Aminhan nga Amerika, madamo nga tawo ang naghalin sa Tsina kag Rusya. Ang lokal nga mga Saksi nanikasog nga makatuon sang Tsino, Ruso, kag iban pa nga lenguahe agod makabantala sang maayong balita sa mga nag-alabot. Sa katunayan, ginahiwat ang madasig nga mga pagtuon sa pila ka lenguahe agod ang maayong balita mabantala sa iban pa samtang ang latagon ‘maputi agod anihon.’—Juan 4:35.

Si manalagna Isaias nagtagna: “Mahanabo gid sa ulihi nga bahin sang mga adlaw nga ang bukid sang balay ni Jehova tukuron sing malig-on nga mataas pa sa putukputukan sang kabukiran, kag pataason pa ini sa kabakuluran; kag magadugok sa sini ang tanan nga pungsod.” Paagi sa ila paggawi kag sa ila ministeryo, ginabuligan sang mga Saksi ni Jehova ang mga tawo bisan diin nga magtaklad sa “bukid sang balay ni Jehova” agod tudluan tuhoy sa mga dalanon sang Dios kag magtuon sa paglakat sa sini. (Isaias 2:2, 3) Ang malipayon nga resulta amo nga, subong sang ginpakita ni Jesus, tingob sila nga ‘nagahimaya sa ila langitnon nga Amay,’ si Jehova nga Dios.—Mateo 5:16; 1 Pedro 2:12.