May Kaalam man Sila

“ANG mga adulto maalam, apang may kaalam man ang mga kabataan,” siling sang isa ka hulubaton sa Nigeria. Nasapwan ni Edwin, isa ka Cristianong gulang sa Nigeria, nga matuod ini.

Isa ka adlaw, may nakita si Edwin nga isa ka salsalon nga kahon sa idalom sang iya lamesa sa ila balay.

“Kay sin-o ini?” Pamangkot ni Edwin sa iya tatlo ka kabataan.

“Akon ina,” sabat sang otso-anyos nga si Emmanuel. Ginpaathag niya dayon nga ining tuktukon, 12 sentimetros nga kahon nga salsalon nga may giha sa ibabaw para sa mga amot sa bug-os kalibutan nga hilikuton sang mga Saksi ni Jehova. “Bangod wala ako nagakadto sa Kingdom Hall kada adlaw,” paathag niya, “namat-od ako nga maghimo sing kahon kay kon indi ko magasto ang akon inugpamahaw, mabutang ko ini sa kahon.”

Ang tatay ni Emmanuel may alkansiya para gamiton sa pagtambong sa distrito nga kombension kada tuig. Apang bangod sang isa ka emerhensia sa pamilya, nagasto nila ini. Agod mapat-od nga ang iya inug-amot nga kuwarta indi magamit sa iban nga bagay, nagdala si Emmanuel sa manugwelding sing daan nga lata agod takpan ini. Ang manugwelding, sang mahibaluan ang gamitan sang lata, naghimo sing isa ka kahon sang retaso nga salsalon. Nangayo man sing kahon si Michael, ang singko-anyos nga manghod ni Emmanuel.

Bangod natingala sang ginhimo sang kabataan, ginpamangkot sila ni Edwin kon ngaa nagpahimo sila sing mga kahon. Si Michael nagsabat: “Luyag ko mag-amot!”

Wala mahibaluan sang ila mga ginikanan, sanday Emmanuel, Michael, kag Uchei, ang ila nuebe-anyos nga utod nga babayi, nga nagatipon gali sila sing pila ka kuwarta nga inugbakal sing pamahaw kag ginabutang ini sa mga kahon. Diin nila nakuha ini nga ideya? Sugod nga makakapot na sila sang kuwarta, ginatudluan sila sang ila mga ginikanan nga maghulog sing pila ka kuwarta sa kahon alamutan sa Kingdom Hall. Maathag nga nakatuon gid sila sing maayo.

Sang napuno ang mga kahon, ginbuksan ini. Ang natipon naglab-ot sa $3.13 (E.U.)—indi diutay nga kantidad sa isa ka pungsod nga ang kita sa bug-os nga tuig mga $300 lamang. Ining boluntaryo nga mga amot amo ang nagasakdag sa pagbantala nga hilikuton sang mga Saksi ni Jehova nga ginahimo sa 235 ka kadutaan sa bug-os nga kalibutan.