Mga Pamangkot Gikan sa mga Bumalasa

Tubtob diin naaplikar sa mga Cristiano karon ang mga pagdumili sang Mosaikong Kasuguan tuhoy sa pagpangasawa sang himata?

Ang Kasuguan nga ginhatag ni Jehova sa pungsod sang Israel indi detalyado tuhoy sa mga seremonya kag mga pamaagi sang kasal. Apang, may mga pagdumili ini batok sa pila ka kaangtanan sa pag-asawahay. Halimbawa, sa Levitico 18:6-20, masapwan naton ang isa ka listahan sang ginadumilian nga mga relasyon nga nagalakip sa “suod nga himata.” Ini nga mga dinalan may mga detalye kon sin-o nga himata ang indi dapat maghulid. Siempre, ang mga Cristiano wala napaidalom sa Mosaikong Kasuguan ukon obligado sa mga kasuguan sini. (Efeso 2:15; Colosas 2:14) Apang, indi buot silingon nga indi na lang pagsapakon sang mga Cristiano ini nga butang kon nagapili sing tiayon. Madamo sing rason kon ngaa dapat talupangdon ini.

Una, may sekular nga mga kasuguan nga nagakontrol sa pag-asawahay sang suod nga mga himata, kag obligado ang mga Cristiano sa pagtuman sang mga kasuguan sang pungsod nga ila ginapuy-an. (Mateo 22:21; Roma 13:1) Sa pagkamatuod, ini nga mga kasuguan nagalainlain sa tagsa ka duog. Ang modernong mga kasuguan tuhoy sa sini napasad una sa genetiko nga mga rason. Isa ka katunayan nga ang pag-asawahay sang suod nga mga himata mahimo tunaan sang mga depekto sa genetiko kag mga balatian sang ila mga kabataan. Bangod sini kag bangod sang ila ‘pagpasakop sa superyor nga mga awtoridad,’ ginatuman sang manugminyo nga mga Cristiano ang mga kasuguan tuhoy sa pag-asawahay sa ila duog.

Nian yara ang tuhoy sa kon ano ang sarang mabaton ukon indi mabaton sa komunidad nga ginapuy-an sang isa. Ang halos tanan nga kultura may mga kasuguan kag mga kustombre nga nagadumili sang pag-asawahay sa suod nga mga himata, nagatamod sa masami sinang pag-asawahay nga incestuso kag busa malain. Bisan pa nga ang espesipiko nga mga relasyon nga ginadumilian mahimo gid nga nanuhaytuhay sa tagsa ka kultura, “sa kabug-usan, kon mas suod ang relasyon sa genetiko sang duha ka tawo, mas mabakod kag mas mabaskog ang kasuguan nga nagadumili ukon nagasikway sang seksuwal nga relasyon sa ulot nila,” siling sang The Encyclopædia Britannica. Sa amo, bisan wala sing incestuso nga mga relasyon ang nadalahig, indi luyag sang mga Cristiano nga isikway sing bug-os ang mga kustombre ukon ang makatarunganon nga pagtamod sang komunidad, agod indi mapakahuy-an ang Cristianong kongregasyon ukon ang ngalan sang Dios.—2 Corinto 6:3.

Indi man mapasapayanan ang hatag-Dios nga konsiensia. Ang tanan nga tawo nabun-ag nga may igbalatyag kon ano ang husto kag sayop, kon ano ang maayo kag malain. (Roma 2:15) Ang ila konsiensia nagadikta sa ila kon ano ang normal kag nagakaigo kag kon ano ang indi natural kag malain, magluwas kon ini napatalang ukon nagtig-a bangod sang sayop nga mga buhat. Ginpatuhuyan ni Jehova ini nga kamatuoran sang naghatag sia sang iya kasuguan sa mga Israelinhon batok sa pag-asawahay sang suod nga mga himata. Aton mabasa: “Dili kamo maghimo suno sa mga ginahimo sa duta sang Egipto, diin nagpuyo kamo; kag dili kamo maghimo suno sa mga ginahimo sa duta sang Canaan, diin ginadala ko kamo; kag dili kamo maglakat suno sa ila mga palatukuran.” (Levitico 18:3) Ginapakabahandi sang mga Cristiano ang ila pasad-Biblia nga konsiensia kag wala nila ginatugutan nga madagtaan ini sang tiko nga pagbatyag sang mga pungsod sa kon ano ang husto kag sayop.—Efeso 4:17-19.

Busa, ano karon ang aton mahinakop? Samtang ang mga Cristiano wala napaidalom sa Mosaikong Kasuguan, ang ila konsiensia nagahambal sa ila sing maathag nga ang pag-asawahay sa ulot sang suod nga mga himata—subong sang mag-amay, mag-iloy, mag-utod⁠—ginadumilian sa Cristianong komunidad. * Samtang nagasangkad ang pamilya, ginakilala sang mga Cristiano nga may mga kasuguan kag mga palatukuran nga nagagahom sa legal nga pag-asawahay kag nga may mga talaksan nga ginabaton sa katilingban kag kultura. Dapat gid ini binagbinagon sing maayo agod makasunod kita sa Makasulatanhon nga laygay: “Ang pag-asawahay mangin dungganon sa tunga sang tanan.”—Hebreo 13:4.

[Nota]