Ang Pagpili Mo sa mga Prinsipio

MAY PRINSIPIO ka bala nga tawo? Ukon ginakabig mo bala ang mga prinsipio nga medyo kinaraan na? Ang matuod, ginatuytuyan ang kada isa sang pila ka sahi sang prinsipio, nga ginakabig niya nga importante. Suno sa The New Shorter Oxford English Dictionary, ang prinsipio mahimo ipaathag subong “isa ka personal nga pagsulundan sang matarong nga buhat.” Ginaimpluwensiahan sang mga prinsipio ang aton mga desisyon kag ginatuytuyan ang aton dalanon sa pagkabuhi. Ang mga prinsipio makapanghikot subong kompas.

Halimbawa, ginpalig-on ni Jesus ang iya mga sumulunod nga sundon ang Bulawanon nga Pagsulundan, nga masapwan sa Mateo 7:12: “Busa, ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.” Ang mga sumulunod ni Confucius nagasunod sa mga prinsipio sang li kag jen, nga nagapatuhoy sa mga kinaiya subong sang kaayo, pagkamapainubuson, pagtahod, kag pagkamainunungon. Bisan ang mga tawo nga indi relihioso may pila ka prioridad ukon mga panuytoy nga nagapat-od sang ila paggawi.

Ano nga mga Prinsipio ang Dapat Naton Pilion?

Apang, dapat naton dumdumon nga ang mga prinsipio mahimo nga mangin maayo ukon malain. Halimbawa, sang nagligad nga sulusobra isa ka dekada, nagdamo pa ang mga tawo nga naimpluwensiahan sang ginatawag nga ako-anay. Bisan pa madamo ang wala makahibalo sang termino ukon mahimo magbatyag nga indi sila apektado, ang ako-anay isa ka prinsipio nga ginapili sang madamo samtang ginasikway nila ang mataas nga mga talaksan sa paggawi. Ginahimo man nila ini ukon wala, ang ako-anay isa ka pagpadayag sing pagkamaiyaiyahon, nga masami ginaupdan sang di-makatarunganon nga materyalismo. “Duha lamang ang aton prinsipio,” siling sang isa ka ehekutibo sa telebisyon sa Tsina. “Ang isa amo ang pagpaayaw sang handum. Ang isa pa amo ang pagtipon sing kuwarta.”

Ang ako-anay kaangay sang magnet. Kag ano ang epekto sang magnet sa kompas? Kon magtuparay ang duha, ang dagom sang kompas magatalang. Sa amo man nga paagi, ang ako-anay makapagumon sa moral nga kompas, ukon pagsulundan sa husto nga paggawi sang isa ka tawo, paagi sa paghimo sa tanan nga butang nga ikaduha lamang sa mga handum sang tawo.

Makibot ka bala kon mahibaluan mo nga ang ako-anay wala lamang magluntad karon? Ini nga paagi sang pagkabuhi nagsugod sa hardin sang Eden sang ang aton una nga mga ginikanan nagsikway sa talaksan sang paggawi nga ginpahamtang sa ila sang aton Manunuga. Ini nagpatalang sang ila moral nga kompas. Subong mga kaliwat nanday Adan kag Eva, ang mga tawo nasit-an sang amo man nga paagi sang pagkabuhi, nga gintawag sining karon lang nga “ako-anay.”​—⁠Genesis 3:6-8, 12.

Ang paglapnag sini nga panimuot maathag kaayo sa tion sang gintagna sang Biblia nga “katapusan nga mga adlaw,” nga ginatandaan sang “makahalanguyos nga mga tion nga mabudlay pakigbagayan.” Madamo nga tawo ang “mahigugmaon sang kaugalingon.” Indi katingalahan nga ginaipit  kita mismo nga sundon ang paagi sang ako-anay.​—⁠2 Timoteo 3:1-5.

Ayhan magaugyon ka sa isa ka pamatan-on nga si Olaf nga nagsulat sa isa ka talatapan sang mga Saksi ni Jehova sa Europa: “Mabudlay gid ang magpabilin nga matarong sa moral, ilabi na sa amon nga mga lamharon. Palihug pahanumduma kami pirme sang kinahanglanon nga magpadayon sa pagsunod sa mga prinsipio sang Biblia.”

Si Olaf nagpakita sing pagkamahinantupon. Ang diosnon nga mga prinsipio makabulig sa aton​—⁠bata ukon tigulang​—⁠nga mahuptan ang mataas nga mga talaksan sa paggawi. Makabulig man ini sa aton nga pamatukan ang ako-anay, ginapabangdan man sini ukon wala. Kon luyag mo mahibaluan kon paano ang mga prinsipio sa Biblia makabulig gid sa imo, palihug binagbinaga ang masunod nga artikulo.

[Mga retrato sa pahina 4]

Madamo nga tawo karon ang wala nagasapak sa mga kinahanglanon sang iban