Pagbatas sa “Ungon sa Unod”

“Ang akon di-bagay nga kaayo tuman na para sa imo.”​—⁠2 CORINTO 12:9.

1, 2. (a) Ngaa indi kita dapat matingala sa kamatuoran nga nagaatubang kita sing mga pagtilaw kag mga problema? (b) Ngaa makasalig kita walay sapayan sang mga pagtilaw?

“ANG tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Timoteo 3:12) Ngaa amo sini? Bangod nagsiling si Satanas nga nagaalagad lamang kuno ang tawo sa Dios bangod sang makagod nga mga rason, kag desperado sia nga pamatud-an ini. Ginpaandaman anay ni Jesus ang iya matutom nga mga apostoles: “Ginapangayo kamo ni Satanas agod ayagon niya kamo subong sang trigo.” (Lucas 22:31) Nakahibalo gid si Jesus nga ginatugutan sang Dios si Satanas nga tilawan kita paagi sa mapiot nga mga problema. Sa pagkamatuod, wala ini nagakahulugan nga ang aton tanan nga kabudlayan sa kabuhi nagahalin sing direkta kay Satanas kag sa iya mga demonyo. (Manugwali 9:11) Apang interesado si Satanas nga gamiton ang tanan nga masarangan niya agod indi naton mahuptan ang aton integridad.

² Ang Biblia nagasugid sa aton nga indi kita dapat matingala sa mga pagtilaw sa aton. Ano man ang maagihan naton, indi ini bag-o ukon wala ginapaabot. (1 Pedro 4:12) Ang matuod, “ang amo man nga mga pag-antos nagakatabo sa [aton] bug-os nga paghiliutod sa kalibutan.” (1 Pedro 5:9) Sa karon, labi pa nga ginahingabot ni Satanas ang tagsa ka alagad sang Dios. Nalipay ang Yawa nga makita kita nga nagaantos sing madamong tulad-ungon nga mga problema kon mahimo. Agod mahimo ini, ginagamit niya ang iya sistema sang mga butang agod dugangan ukon pabug-aton ang ‘mga ungon sa aton unod.’ (2 Corinto 12:7) Apang, ang mga pagsalakay ni Satanas indi dapat magpaluya sang aton integridad. Subong nga si Jehova “magahatag sing lulutsan” agod mabatas naton ang pagsulay, himuon man niya ini kon nagaatubang kita sing mga problema nga kaangay sang mga ungon sa aton unod.​—⁠1 Corinto 10:13.

Kon Paano Batason ang Ungon

3. Ano ang sabat ni Jehova sang ginpangabay sia ni Pablo nga kuhaon ang ungon sa iya unod?

³ Nakitluoy si apostol Pablo sa Dios nga kuhaon ang ungon sa iya unod. “Bangod sini makatlo ako nga nakitluoy sa Ginuo nga magbiya ini sa akon.” Ano ang sabat ni Jehova sa hanuot nga pangabay ni Pablo? “Ang akon di-bagay nga kaayo tuman na para sa imo; kay ang akon gahom ginahimpit sa kaluyahon.” (2 Corinto 12:​8, 9) Usisaon naton ini nga sabat kag tan-awon kon paano ini makabulig sa aton nga mabatas ang  bisan anong tulad-ungon nga mga problema nga nagapapiot sa aton.

4. Sa anong paagi nakabenepisyo si Pablo gikan sa di-bagay nga kaayo ni Jehova?

⁴ Talupangda nga ginpalig-on sang Dios si Pablo nga magpasalamat sa di-bagay nga kaayo nga ginhatag na sa iya paagi kay Cristo. Matuod, si Pablo ginpakamaayo sing daku sa madamo nga paagi. Mahigugmaon nga ginhatagan sia ni Jehova sing pribilehiyo nga mangin disipulo ni Jesus, bisan pa nga isa anay sia ka panatiko nga manugpamatok sang mga sumulunod ni Jesus. (Binuhatan 7:58; 8:⁠3; 9:1-4) Pagkatapos sini mainayuhon nga ginhatagan ni Jehova si Pablo sing madamong makalilipay nga mga asaynment kag mga pribilehiyo. Maathag ang leksion para sa aton. Bisan sa pinakamabudlay nga tion, may yara gihapon kita madamong pagpakamaayo nga dapat pasalamatan. Indi gid naton dapat pagkalimtan ang bugana nga pagkaayo ni Jehova bangod sang mga pagtilaw sa aton.​—⁠Salmo 31:19.

5, 6. (a) Paano gintudluan ni Jehova si Pablo nga ang gahom sang Dios “ginahimpit sa kaluyahon”? (b) Paano ang halimbawa ni Pablo nagpamatuod kay Satanas nga butigon?

⁵ Ang di-bagay nga kaayo ni Jehova tuman na sa isa pa ka paagi. Ang gahom sang Dios tuman na agod buligan kita nga mabatas ang mga pagtilaw sa aton. (Efeso 3:20) Gintudluan ni Jehova si Pablo nga ang gahom sang Dios “ginahimpit sa kaluyahon.” Paano? Mahigugmaon nga ginhatagan niya si Pablo sang tanan nga kusog nga kinahanglan niya agod mabatas ang pagtilaw sa iya. Ang pagbatas ni Pablo kag ang iya bug-os nga pagsalig kay Jehova nagpakita man sa tanan nga ang gahom sang Dios madinalag-on sa bahin sining maluya kag makasasala nga tawo. Binagbinaga karon ang epekto sa Yawa, nga nagsiling nga nagaalagad lamang kuno ang mga tawo sa Dios kon masulhay kag mahulas ang pangabuhi. Ang integridad ni Pablo isa gid ka tampa sa nawong sadtong mapasipalahon!

⁶ Yari si Pablo, nga kaalyado anay ni Satanas sa pagpakig-away niya sa Dios, isa ka bugalon nga manughingabot sang mga Cristiano, isa ka makugi nga Fariseo nga, sa walay duhaduha, nag-agom anay sing madamo nga kasulhayan sa kabuhi bangod natawo sia sa isa ka manggaranon nga pamilya. Nagaalagad karon si Pablo kay Jehova kag kay Jesus subong ang “pinakakubos sa mga apostoles.” (1 Corinto 15:9) Bangod amo sini, mapainubuson sia nga nagpasakop sa awtoridad sang Cristianong nagadumala nga hubon sang unang siglo. Kag nagbatas sia sing matutom walay sapayan sang ungon niya sa unod. Sa daku nga kaugot ni Satanas, wala mabuhinan sang mga pagtilaw sa kabuhi ang kakugi ni Pablo. Wala gid malipatan ni Pablo ang paglaum nga agumon niya sa langitnon nga Ginharian ni Cristo. (2 Timoteo 2:12; 4:18) Bisan daw ano man ka sakit, walay ungon ang mahimo makabuhin sang iya kakugi. Kabay nga ang aton kakugi padayon man nga mangin mabakod! Paagi sa pag-alay-ay sa aton agod mabatas ang mga pagtilaw sa aton, ginapakataas kita ni Jehova paagi sa pribilehiyo nga makabulig sa pagpamatuod kay Satanas nga butigon.​—⁠Hulubaton 27:11.

Ang mga Aman ni Jehova Kinahanglanon

7, 8. (a) Paagi sa ano ginapabakod ni Jehova ang iya mga alagad karon? (b) Ngaa ang adlaw-adlaw nga pagbasa kag pagtuon sa Biblia importante gid agod mabatas ang ungon sa aton unod?

⁷ Sa karon, ginapabakod ni Jehova ang matutom nga mga Cristiano paagi sa iya balaan nga espiritu, sa iya Pulong, kag sa aton Cristianong paghiliutod. Kaangay ni apostol Pablo, mahaboy naton ang aton mga lulan kay Jehova sa pangamuyo. (Salmo 55:22) Bisan pa mahimo nga indi pagkuhaon sang Dios ang mga pagtilaw sa aton, mahatagan niya kita sing kaalam agod mabatas ini, bisan ang mga pagtilaw nga mabudlay gid batason. Mahatagan man kita ni Jehova sing kabakod​—⁠ginahatagan kita sing “gahom nga labaw sa kinaandan”​—⁠agod buligan kita nga makabatas.​—⁠2 Corinto 4:7.

⁸ Paano naton mabaton ini nga bulig? Dapat naton tun-an sing maukod ang Pulong sang Dios, kay diri naton makita ang iya sigurado nga mga lugpay. (Salmo 94:19) Sa Biblia, mabasa naton ang makatalandog nga mga pulong sang mga alagad sang Dios samtang nagapakitluoy sila sing bulig sa Dios. Ang mga sabat ni Jehova, nga masami nagalakip sang paggamit sing makalulugpay nga mga tinaga, butang nga dapat pamalandungan. Ang pagtuon magapabakod sa aton agod ang ‘gahom nga labaw sa kinaandan mangin iya sang Dios kag indi gikan sa aton kaugalingon.’ Subong nga kinahanglan naton nga magkaon sing pisikal nga pagkaon kada adlaw agod makatigayon sing kusog, dapat man kita pirme magkaon sa mga  pulong sang Dios. Ginahimo bala naton ini? Kon ginahimo naton ini, nian makita naton nga ang pagbaton naton sing “gahom nga labaw sa kinaandan” magabulig sa aton nga mabatas ang bisan ano man nga malaragwayon nga mga ungon nga mahimo magpapiot sa aton sa karon.

9. Paano maalay-ayan sang mga gulang ang mga nagabatas sing mga problema?

⁹ Ang mahinadlukon-sa-Dios nga Cristianong mga gulang “mangin subong sang palalipdan sa hangin” sang kapiot, “palanaguan sa unos” sang mga problema. Ang mga gulang, nga luyag magpahisanto sa sining inspirado nga paglaragway, mapainubuson kag sinsero nga nagapangabay kay Jehova nga hatagan sila sing “dila sang mga natudluan” agod mahibaluan nila kon paano sabton ang mga nagaantos paagi sa nagakaigo nga mga tinaga. Ang mga pulong sang mga gulang mangin subong sang dabudabo nga nagapabugnaw kag nagapatawhay sang aton hunahuna sa mabudlay nga mga tion sa kabuhi. Paagi sa paghambal sing “malugpayon sa mga kalag nga ginapung-awan,” ginaalay-ayan gid sang mga gulang ang ila espirituwal nga mga kauturan nga mahimo nalapyo ukon naluyahan sing buot bangod sang pila ka ungon sa ila unod.​—⁠Isaias 32:⁠2; 50:⁠4; 1 Tesalonica 5:14.

10, 11. Paano mapalig-on sang mga alagad sang Dios ang iban nga nagaantos sing daku nga mga pagtilaw?

¹⁰ Ang tanan nga alagad ni Jehova bahin sang iya nahiusa nga Cristianong pamilya. Huo, “mga bahin [kita] nga ang kada isa natungod sa isa kag isa,” kag “obligado [kita] nga maghigugmaanay.” (Roma 12:⁠5; 1 Juan 4:11) Paano naton ginahimo ini nga obligasyon? Suno sa 1 Pedro 3:​8, ginahimo naton ini paagi sa ‘pagpakita sing patugsiling, utudnon nga gugma, kag mapinalanggaon nga kaawa’ sa tanan nga may labot sa aton sa pagtuo. Para sa mga nagabatas sing masakit gid nga ungon sa unod, bata man sila ukon tigulang, mapakitaan man naton sila sing pinasahi nga patugsiling. Paano?

¹¹ Dapat kita manikasog nga mangin sensitibo sa ila pag-antos. Kon kita di-mahinuklugon, wala balatyagon, ukon wala nagasapak, mahimo naton ginapalubha sing di-hungod ang ila pag-antos. Bangod nahibaluan naton ang mga pagtilaw sa ila, magapahulag ini sa aton nga maghalong sa aton ginahambal, kon paano naton ini ihambal, kag kon paano kita nagahulag. Ang aton pagkamalaumon kag pagpalig-on magabulig sa pagpahaganhagan sa daku nga kasakit sang ano man nga ungon nga nagapapiot sa ila. Gani kabay nga pamatud-an naton nga nagapabakod nga bulig kita sa ila.​—⁠Colosas 4:11.

Kon Paano ang Iban Nagbatas sing Madinalag-on

12-14. (a) Ano ang ginhimo sang isa ka Cristiano agod mabatas ang kanser? (b) Paano ining babayi ginsuportahan kag ginpalig-on sang iya espirituwal nga mga kauturan?

¹² Samtang malapit na matapos ining katapusan nga mga adlaw, ang “mga hapdi sang kasakit” nagadugang adlaw-adlaw. (Mateo 24:8) Sa amo, ang mga pagtilaw mahimo magpapiot sa tanan sa duta, ilabi na sa matutom nga mga alagad ni  Jehova, nga nagapanikasog sa paghimo sang iya kabubut-on. Halimbawa, binagbinaga ang isa ka Cristiano nga isa ka bug-os tion nga ministro. Nasayasat sia nga may kanser kag dapat kuhaon ang iya mga salivary kag lymphatic gland paagi sa operasyon. Sang mahibaluan nila nga mag-asawa nga may amo sia sini nga balatian, gilayon sila nga nagdangop kay Jehova sa malawig kag nagapakitluoy nga pangamuyo. Nagsiling sia sang ulihi nga nabatyagan nila ang di-mapatihan nga kalinong. Walay sapayan sini, nabatas niya ang maayo kag malain nga mga tion, ilabi na ang epekto sang mga pagbulong sa iya.

¹³ Agod maatubang ang iya kahimtangan, gintun-an sining utod nga babayi ang tanan nga masarangan niya tuhoy sa kanser. Ginkonsulta niya ang iya mga doktor. Nakita niya sa Ang Lalantawan, Magmata!, kag sa may kaangtanan nga Cristianong mga publikasyon ang mga sugilanon sa kabuhi nga nagapakita kon paano nabatas sang mga indibiduwal ining balatian. Ginbasa man niya ang nagakaigo nga mga teksto sa Biblia nga nagapakita sang ikasarang ni Jehova sa pagpabakod sang iya katawhan sa sining mga kabudlayan, kag ang iban pa nga mapuslanon nga impormasyon.

¹⁴ Ang isa ka artikulo tuhoy sa kon paano batason ang pagkawalay paglaum naghatag sining maalamon nga mga pulong: “Ang isa nga nagapain sang iya kaugalingon magapangita sang iya makagod nga handum.” (Hulubaton 18:1) Busa ang artikulo naghatag sining laygay: “Pamatuki ang pag-isahanon.”⁠ * Ang utod nga babayi nagsaysay: “Madamo ang nagsiling sa akon nga ginapangamuyo nila ako; ang iban naman nagtelepono sa akon. Ang duha ka gulang pirme nagapangamusta sa akon. Nakabaton ako sing mga bulak kag madamo nga kard. Ang iban nagluto pa gani sing pagkaon. Subong man, madamo ang nagboluntaryo sa pagdul-ong sa akon sa pagpabulong ko.”

15-17. (a) Paano nabatas sang isa ka Cristiano ang mga kabudlayan nga resulta sang mga aksidente? (b) Ano nga suporta ang ginhatag sang mga kauturan sa kongregasyon?

¹⁵ Ang isa ka madugay na nga alagad ni Jehova sa New Mexico, E.⁠U.⁠A., naaksidente sing makaduha sa salakyan. Ang iya liog kag mga abaga nasamad, nga nagpalubha sang iya balatian nga arthritis nga ginaantos niya sa kapin sa 25 ka tuig. Sia nagsaysay: “Nabudlayan gid ako sa pagtadlong sang akon ulo kag sa pagbitbit sang bisan ano nga butang nga nagabug-at sing sobra sa duha ka kilo. Apang ang hugot nga pangamuyo kay Jehova nagpabakod sing daku sa akon. Amo man ang mga artikulo sa Ang Lalantawan nga ginatun-an naton. Ang isa nagkomento sa Miqueas 6:​8, nagpatalupangod nga ang maugdang nga paglakat upod sa Dios nagakahulugan sang paghibalo sa aton mga limitasyon. Nagbulig ini sa akon nga mahangpan nga walay sapayan sang akon kahimtangan, indi ako dapat maluyahan sing buot, bisan pa ang tion nga ginahinguyang ko sa ministeryo kubos sangsa luyag ko. Ang pag-alagad sa iya nga may matinlo nga mga motibo amo gid ang importante.”

¹⁶ Nagreport man sia: “Pirme ginadayaw sang mga gulang ang akon mga panikasog nga makatambong sa mga miting kag makaguwa sa ministeryo sa latagon. Ang mga pamatan-on nagasug-alaw sa akon sing hakos. Ang payunir nga mga ministro mapailubon gid sa akon kag masunson nga nagapasibu sang ila iskedyul sa inadlaw nga malain ang akon pamatyag amo nga indi ako makaguwa sa latagon. Kon malain ang tiempo, mainayuhon nga ginaupod nila ako sa mga pagduaw liwat ukon ginahagad ako sa pagbuylog sa ila mga pagtuon sa Biblia. Kag bangod indi ako makabitbit sing bag, ginasulod sang iban nga mga manugbantala ang akon literatura sa ila bag kon magguwa ako sa hilikuton nga pagbantala.”

¹⁷ Talupangda kon paano ginbuligan sang mga gulang sang kongregasyon kag sang mga masigkatumuluo ining duha ka utod nga babayi sa pagbatas sa ila tulad-ungon nga mga sablag. Nagbulig sila sa praktikal kag mainayuhon nga paagi sa katuyuan nga mahatag ang espesipiko nga espirituwal, pisikal, kag emosyonal nga mga kinahanglanon. Wala bala ini nagapalig-on sa imo nga buligan man ang iban nga mga kauturan nga may mga problema? Mga pamatan-on, mabuligan man ninyo ang mga kauturan sa inyo kongregasyon nga nagabatas sing mga ungon sa ila unod.​—⁠Hulubaton 20:29.

18. Anong pagpalig-on ang masapwan naton sa mga sugilanon sang kabuhi nga nabalhag sa mga magasin nga Lalantawan kag Magmata!?

¹⁸ Ang mga magasin nga Lalantawan kag Magmata!  nagbalhag sing madamong sugilanon sang kabuhi kag mga eksperiensia sang mga Saksi nga nagbatas, kag nagabatas gihapon, sing mga problema sa kabuhi. Kon pirme mo ginabasa ini nga mga artikulo, makita mo nga madamo sang imo espirituwal nga mga kauturan sa bug-os nga kalibutan ang nagaantos sing kapigaduhon, pagtaliwan sang mga hinigugma sa mga kalamidad, kag sing delikado nga mga kahimtangan sa panahon sang gira. Ang iban nagabatas sing nagapabaldado nga mga balatian. Madamo ang indi makahimo sang pila sang mahapos nga mga hilikuton sa kabuhi nga ginapasapayanan lamang sang mga may maayong panglawas. Ang ila mga balatian nagatilaw gid sa ila, ilabi na kon indi sila makapakigbahin sa Cristianong mga hilikuton subong sang luyag nila. Daw ano gid ang ila pagpasalamat sa bulig kag suporta nga ginahatag sa ila sang ila mga kauturan, bata man kag tigulang!

Ang Pagbatas Nagahatag sing Kalipay

19. Ngaa nalipay si Pablo walay sapayan sang iya tulad-ungon nga mga pagtilaw kag mga kaluyahon?

¹⁹ Nalipay si Pablo nga makita kon paano sia ginpabakod sang Dios. Nagsiling sia: “Sa labing daku nga kalipay magapabugal ako sa akon mga kaluyahon, agod ang gahom ni Cristo magapabilin kaangay sang isa ka tolda sa ibabaw ko. Gani nagakalipay ako sa mga kaluyahon, sa mga insulto, sa mga kaiwat, sa mga paghingabot kag sa mga kabudlayan, tungod kay Cristo. Kay kon maluya ako, nian gamhanan ako.” (2 Corinto 12:​9, 10) Bangod sang iya personal nga mga inagihan, si Pablo masinaligon nga makasiling: “Indi nga nagahambal ako nahanungod sa kinawad-on, kay natun-an ko, sa bisan ano nga kahimtangan, nga mangin kontento. Makahibalo gid ako kon paano magkinawad-on, makahibalo gid ako kon paano magpakabugana. Sa tanan nga butang kag sa tanan nga kahimtangan natun-an ko ang sekreto kon paano magpakabusog kag kon paano magpakagutom, kon paano magpakabugana kag kon paano magkinawad-on. Sa tanan nga butang may kusog ako bangod sa iya nga nagahatag sing gahom sa akon.”​—⁠Filipos 4:11-13.

20, 21. (a) Ngaa makasapo kita sing kalipay sa pagpamalandong sa “mga butang nga di-makita”? (b) Ano ang pila sang “mga butang nga di-makita” nga ginalauman mo nga makita sa dutan-on nga Paraiso?

²⁰ Gani, nian, paagi sa pagbatas sa bisan anong malaragwayon nga ungon sa aton unod, makasapo kita sing daku nga kalipay sa pagpakita sa tanan nga ang gahom ni Jehova ginahimpit sa aton kaluyahon. Si Pablo nagsulat: “Wala kami ginalapyo . . . Pat-od gid nga ang amon pagkatawo sa sulod nagabag-o adlaw-adlaw. Bangod bisan pa ang kapipit-an umalagi kag mamag-an, nagapanghikot ini sa amon sing isa ka himaya nga may labaw pa nga kabug-aton kag walay katapusan; samtang ginatuon namon ang amon mga mata . . . sa mga butang nga di-makita. Kay ang mga butang nga . . . di-makita walay katapusan.”​—⁠2 Corinto 4:16-18.

²¹ Ang kalabanan nga katawhan ni Jehova karon nagalaum nga magkabuhi sa iya dutan-on nga Paraiso kag mag-agom sang mga pagpakamaayo nga ginsaad niya. Ini nga mga pagpakamaayo makabig nga “di-makita” karon sa aton. Apang, ang tion madasig nga nagahinampot nga makita naton sa aton mismo mga mata ining mga pagpakamaayo, huo, kag maagom ini sing dayon. Ang isa sang amo sini nga pagpakamaayo amo ang kaumpawan nga indi na gid liwat mag-antos sing bisan anong tulad-ungon nga problema! ‘Laglagon sang Anak sang Dios ang mga binuhatan sang Yawa’ kag ‘laglagon ang isa nga may ikasarang sa pagpahanabo sang kamatayon.’​—⁠1 Juan 3:⁠8; Hebreo 2:14.

22. Ano dapat ang aton pagsalig kag determinasyon?

²² Busa, ano man nga ungon sa aton unod ang ginaantos naton karon, padayon naton ini nga batason. Kaangay ni Pablo, may kusog kita nga himuon ini sa bulig ni Jehova, nga maalwan nga nagahatag sing gahom sa aton. Kon nagapuyo na kita sa dutan-on nga Paraiso, pakamaayuhon naton si Jehova nga aton Dios kada adlaw tungod sa tanan nga dalayawon nga mga binuhatan niya para sa aton.​—⁠Salmo 103:2.

[Nota]

Paano Mo Sabton?

• Ngaa kag paano ginatinguhaan sang Yawa nga paluyahon ang integridad sang matuod nga mga Cristiano?

• Paano ang gahom ni Jehova “ginahimpit sa kaluyahon”?

• Paano mapalig-on sang mga gulang kag sang iban pa ang mga nagaantos bangod sang mga problema?

[Mga Pamangkot sa Pagtinuon]

[Retrato sa pahina 18]

Si Pablo makatlo nga nangamuyo sa Dios nga kuhaon ang ungon sa iya unod