“Anay pa ha, Sakit Bala Ini”

NABATIAN mo na bala ini nga mga pulong? Mahimo nga ginhambal ini sang isa ka doktor ukon nars antes himuon ang ginrekomendar nga pagbulong.

Mahimo gid nga wala ikaw nagpangindi sa pagpabulong agod lamang malikawan ang ginapaabot nga kasakit. Sa baylo, gin-antos mo ang kasakit agod maagom ang makapapagros nga mga benepisyo sa ulihi. Sa mabudlay gid nga mga kahimtangan, ang pagbaton ukon pagsikway sang masakit nga pagbulong mahimo magdalahig sang kabuhi kag kamatayon.

Bisan pa kon kaisa indi gid man kita obligado nga magpadoktor, tanan kita subong di-himpit nga mga tawo nagakinahanglan sing disiplina, ukon pagtadlong, bisan pa, kon kaisa, mahimo nga masakit ini. (Jeremias 10:23) Ginapadaku ini nga kinahanglanon sa bahin sang kabataan, ang Biblia nagasiling: “Ang kabuangan nahigot sa tagipusuon sang bata; ang bilugon sang disiplina amo ang magapahilayo sini sa iya.”​—Hulubaton 22:15.

Ang bilugon, sa sini nga kahimtangan, isa ka simbulo sang awtoridad sang mga ginikanan. Matuod, pila lamang ka kabataan ang luyag disiplinahon. Kon ginaupdan ini sang isa ka sahi sang pagsilot, mahimo nga maakig sila. Apang, mas importante para sa maalam kag mahigugmaon nga mga ginikanan ang kaayuhan sang ila bata sa ulihi sangsa masaklaw ang iya balatyagon. Nahibaluan sang Cristianong mga ginikanan nga ang Pulong sang Dios matuod sang nagsiling ini: “Wala sing disiplina ang daw makalilipay sa karon, kundi masakit; apang pagkatapos sa mga nahanas sa sini nagapatubas ini sing mahidaiton nga bunga, nga amo, ang pagkamatarong.”​—Hebreo 12:11; Hulubaton 13:24.

Siempre, indi lamang kabataan ang nagakinahanglan sing disiplina. Ang mga tigulang nagakinahanglan man. Ang Biblia nagahambal sa mga tigulang sang nagsiling ini: “Kapti sing malig-on ang disiplina; dili ini pagbuy-i. Amligi ini, kay ini mismo ang imo kabuhi.” (Hulubaton 4:​13) Huo, ang maalam nga mga tawo​—bata kag tigulang​—magabaton sang disiplina pasad sa Pulong sang Dios, ang Biblia, bangod ang paghimo sini, sa ulihi, magaamlig sang ila kabuhi.