Maayo nga Pagpanguna​—Diin Naton Ini Makita?

“ANG tagsa ka balay may nagtukod,” siling sang Biblia, “apang sia nga nagtukod sing tanan nga butang amo ang Dios.” (Hebreo 3:⁠4; Bugna 4:11) Bangod ang matuod nga Dios, si Jehova, amo ang aton Manunuga, “sia gid nakahibalo sang aton pagkahuman.” (Salmo 103:14) Nahibaluan gid niya ang aton mga limitasyon kag mga kinahanglanon. Kag bangod mahigugmaon sia nga Dios, luyag niya ihatag ini nga mga kinahanglanon. (Salmo 145:16; 1 Juan 4:⁠8) Lakip sa sini ang aton kinahanglanon nga maayong pagpanguna.

Paagi kay manalagna Isaias, si Jehova nagsiling: “Yari karon! Subong saksi sa pungsudnon nga mga grupo ginhatag ko sia, subong lider kag kumandante sa pungsudnon nga mga grupo.” (Isaias 55:⁠4) Ang solusyon sa kakulangan karon para sa maayo nga pagpanguna nagdalahig sang pagkilala sa sini nga Lider​—⁠nga gintangdo mismo sang Labing Gamhanan⁠​—⁠​kag pagbaton sa iya pagpanguna. Sin-o, nian, ining gintagna nga Lider kag Kumandante? Ano ang iya mga kinaiya subong isa ka lider? Diin niya kita tuytuyan? Ano ang dapat naton himuon agod makabenepisyo kita sa iya pagpanguna?

Nag-abot ang Ginsaad nga Lider

Sang nagligad nga mga 2,500 ka tuig, nagpakita si anghel Gabriel kay manalagna Daniel kag nagsiling sa iya: “Dapat mahibaluan mo  kag mahantop nga kutob sa pagguwa sang sugo nga ipasag-uli kag patindugon liwat ang Jerusalem tubtob sa pagkari sang Mesias nga Lider, mangin pito ka semana, subong man kan-uman kag duha ka semana. Magabalik sia kag patindugon liwat, nga may plasa kag kalog, apang sa magamo nga tion.”​—⁠Daniel 9:25.

Maathag nga ginpahibalo sang anghel kay Daniel ang espesipiko nga tion sang pag-abot sang ginpili ni Jehova nga Lider. Magakari ang “Mesias nga Lider” sa katapusan sang 69 ka semana, ukon 483 ka tuig, nagaisip halin sang 455 B.⁠C.⁠E., sang ginsugo nga ipatindog liwat ang Jerusalem.⁠ * (Nehemias 2:​1-8) Ano ang natabo sang matapos ini nga tion? Ang manunulat sang Ebanghelyo nga si Lucas nagsaysay: “Sang ikapulog-lima nga tuig sang paghari ni Tiberio Cesar, sang si Poncio Pilato ang gobernador sang Judea, kag si Herodes ang manugdumala sang distrito sang Galilea [29 C.⁠E.], . . . ang pulong sang Dios nag-abot kay Juan nga anak ni Zacarias sa kahanayakan. Gani nagkadto sia sa bug-os nga puod sa palibot sang Jordan, nga nagabantala sang bawtismo subong simbulo sang paghinulsol para sa kapatawaran sang mga sala.” Sadto nga tion, “ang mga tawo may ginapaabot” nga Mesias nga Lider. (Lucas 3:​1-3, 15) Bisan pa nagkari ang kadam-an kay Juan, indi sia ini nga Lider.

Nian sang mga Oktubre sang 29 C.⁠E., nagpalapit kay Juan si Jesus nga taga-Nazaret agod magpabawtismo. Kag nagpamatuod si Juan, nga nagasiling: “Nakita ko ang espiritu nga nagakunsad subong sang salampati gikan sa langit, kag nagpabilin ini sa ibabaw niya. Bisan ako wala makakilala sa iya, apang ang Isa mismo nga nagsugo sa akon nga bawtismuhan sia sa tubig ang nagsiling sa akon, ‘Sa iya nga makita mo ang espiritu nga nagakunsad kag nagapabilin, ini amo ang isa nga nagabawtismo sa balaan nga espiritu.’ Kag nakita ko ini, kag nagpamatuod ako nga ining isa amo ang Anak sang Dios.” (Juan 1:32-34) Sang ginbawtismuhan sia, si Jesus nangin hinaplas nga Lider​—⁠ang Mesias, ukon Cristo.

Huo, ang ginsaad nga “lider kag kumandante sa pungsudnon nga mga grupo” amo si Jesucristo. Kag kon binagbinagon naton ang iya mga kinaiya subong isa ka lider, mahantop naton sa gilayon nga ang iya pagpanguna nagalabaw gid sa modernong-adlaw nga kalipikasyon sang maayo gid nga lider.

Ang Mesias​—⁠Isa ka Maayo Gid nga Lider

Ang sangkol nga lider nagahatag sing maathag nga panuytoy kag nagabulig sa mga tawo nga iya ginapangunahan nga makatigayon sing determinasyon kag ikasarang agod malubad nila ang mga problema sing madinalag-on. ‘Amo ini ang kinahanglan sa isa ka madinalag-on nga lider sa ika-21 nga siglo,’ siling sang libro nga 21st Century Leadership: Dialogues With 100 Top Leaders. Epektibo gid nga ginhanda ni Jesus ang iya mga tagpalamati agod maatubang ang matag-adlaw nga mga sitwasyon! Binagbinaga lamang ang iya labing bantog nga pamulongpulong​—⁠ang Sermon sa Bukid. Puno sing praktikal nga laygay ang mga pinamulong nga nasulat sa Mateo kapitulo 5 tubtob 7.

Halimbawa, binagbinaga ang laygay ni Jesus tuhoy sa paglubad sa personal nga di-paghangpanay. Sia nagsiling: “Kon, nian, nagadala ka sang imo dulot sa halaran kag didto nadumduman mo nga ang imo utod may isa ka butang nga batok sa imo, bayai didto ang imo dulot sa atubangan sang halaran, kag maglakat ka; una makighidait ka sa imo utod, kag nian, sa pagbalik mo, ihalad ang imo dulot.” (Mateo 5:​23, 24) Dapat unahon ang pagpakighidait sa iban​—⁠una pa sa paghimo sang isa ka relihioso nga obligasyon, subong sang pagdulot sa altar sang templo sa Jerusalem nga ginpatuman sang Mosaikong Kasuguan. Kay kon indi, indi pagbatunon sang Dios ang pagsimba sang isa. Praktikal man sa karon ang laygay ni Jesus subong sang nagligad nga mga siglo.

Ginbuligan man ni Jesus ang iya mga tagpalamati nga malikawan ang siod sang imoralidad. Ginlaygayan niya sila: “Nabatian ninyo nga ginsiling, ‘Indi ka magpanglahi.’ Apang nagasiling ako sa inyo nga ang tagsa-tagsa nga padayon nga nagatan-aw sa isa ka babayi nga may daku nga pagkaibog sa iya nakahimo na sa iya sing panghilahi sa iya tagipusuon.” (Mateo 5:​27, 28) Nagakaigo  gid nga paandam! Ngaa umpisahan naton ang panghilahi paagi sa paghunahuna sa sini? Gikan sa tagipusuon nagahalin ang pagpakighilawas kag panghilahi, siling ni Jesus. (Mateo 15:​18, 19) Maalamon ang pag-amlig sa aton tagipusuon.​—⁠Hulubaton 4:23.

Nagaunod man ang Sermon sa Bukid sing maayo gid nga mga laygay tuhoy sa paghigugma sa aton mga kaaway, sa pagpakita sing kaalwan, sa nagakaigo nga pagtamod sa materyal kag espirituwal nga mga butang, kag iban pa. (Mateo 5:43-47; 6:​1-4, 19-21, 24-34) Ginpakita man ni Jesus sa iya mga tagpalamati kon paano matigayon ang bulig sang Dios paagi sa pagtudlo sa ila kon paano mangamuyo. (Mateo 6:9-13) Ginapabakod kag ginahanda sang Mesias nga Lider ang iya mga sumulunod nga maatubang ang mga problema sang katawhan.

Sa Sermon sa Bukid, anom ka beses nga ginsugdan ni Jesus ang iya mga pinamulong paagi sa ekspresyon “nabatian ninyo nga ginsiling” ukon “dugang pa ginsiling ini,” apang ginpresentar niya dayon ang isa pa ka ideya, nga nagasiling “apang, nagasiling ako sa inyo.” (Mateo 5:​21, 22, 27, 28, 31-34, 38, 39, 43, 44) Ginapakita sini nga may naandan na nga paggawi ang iya mga tagpalamati, suno sa pinalatonlaton nga mga tradisyon sang mga Fariseo. Apang ginpakita karon ni Jesus ang tuhay nga paagi​—⁠isa nga nagapabanaag sang matuod nga kahulugan sang Mosaikong Kasuguan. Sa amo, ginapalig-on ni Jesus ang pagbag-o, kag ginhimo niya ini sa paagi nga mahapos batunon sang iya mga sumulunod. Huo, ginpahulag ni Jesus ang mga tawo nga bag-uhon gid ang ila kabuhi, sa espirituwal kag sa moral. Tanda ini sang matuod nga lider.

Ginapatalupangod sang isa ka libro tuhoy sa pagdumala kon daw ano ka budlay himuon ini nga pagbag-o. Ini nagasiling: “Ang lider nga makapabag-o nagakinahanglan sang balatyagon sang social worker, paghantop sang sikologo, kabakod sang manugdalagan, kaisog sang bulldog, pagkaindependiente sang ermitanyo, kag pagpailob sang santo. Kag bisan yara sa iya ining tanan nga kinaiya, indi gihapon pat-od nga magmadinalag-on.”

“Dapat maggawi ang mga lider suno sa luyag nila nga paggawi sang ila mga sumulunod,” siling sang artikulo nga natig-uluhan “Pagpanguna: Importante Bala ang mga Kinaiya?” Sa pagkamatuod, ginabuhat sang isa ka maayo nga lider ang iya ginabantala. Matuod gid ini kay Jesucristo! Huo, gintudluan niya ang mga kaupod niya nga mangin mapainubuson, apang naghatag man sia sing halimbawa paagi sa paghinaw sang ila mga tiil. (Juan 13:5-15) Wala lamang niya ginpadala ang iya mga disipulo sa pagbantala sing maayong balita sang Ginharian sang Dios, kundi nangin makugi man sia sa sini nga hilikuton. (Mateo 4:18-25; Lucas 8:​1-3; 9:​1-6; 10:1-24; Juan 10:40-42) Kag kon tuhoy sa iya pagpasakop sa nagapanguna, nagpahamtang si Jesus sang halimbawa. “Ang Anak indi makahimo sing bisan ano sa iya kaugalingon,” siling niya tuhoy sa iya kaugalingon, “kundi lamang ang nakita niya nga ginahimo sang Amay.”​—⁠Juan 5:19.

Ang bag-o lang mabinagbinag nga ginsiling kag ginhimo ni Jesus maathag nga nagapakita nga sia ang maayo gid nga Lider. Sa pagkamatuod, nagalabaw sia sa tanan nga tawhanon nga talaksan sang maayo nga pagpanguna. Himpit si Jesus. Bangod nakabaton sia sing pagkadimamalatyon sa tapos sang iya kamatayon kag pagkabanhaw, nagakabuhi sia sing dayon. (1 Pedro 3:18; Bugna 1:13-18) Sin-o nga tawo nga lider ang makatupong sa sini nga mga kalipikasyon?

Ano ang Dapat Naton Himuon?

Subong nagagahom nga Hari sang Ginharian sang Dios, ang “Mesias nga Lider” magapakamaayo sa matinumanon nga katawhan. Tuhoy sa sini ang Kasulatan nagasaad: “Ang duta pat-od gid nga matugob sang ihibalo ni Jehova subong sang tubig nga nagatabon sa dagat.” (Isaias 11:⁠9) “Ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.” (Salmo 37:11) “Magalingkod sila, ang tagsatagsa sa idalom sang iya puno sang ubas kag sa idalom sang iya kahoy nga higuera, kag wala sing magapakurog sa ila.” (Miqueas 4:⁠4) “Ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—⁠Bugna 21:​3, 4.

 Problema karon sa kalibutan ang maayo nga pagpanguna. Apang, ginatuytuyan ni Jesucristo ang mga mahagop pasulod sa isa ka mahidaiton nga bag-ong kalibutan, diin mahiusa ang matinumanon nga katawhan sa pagsimba kay Jehova nga Dios kag magauswag padulong sa kahimpitan. Importante gid nga hatagan naton sing tion ang pagtigayon sing ihibalo tuhoy sa matuod nga Dios kag sa iya gintangdo nga Lider kag maghikot suno sa sini nga ihibalo!​—⁠Juan 17:3.

Ang isa sang pinakamaayo nga pagdayaw nga mahatag naton sa isa ka tawo amo ang pag-ilog sa iya. Indi bala naton dapat ilugon ang labing daku nga Lider sa maragtas sang tawo​—⁠si Jesucristo? Paano naton ini himuon? Ano ang epekto sang pagbaton naton sang iya pagpanguna sa aton kabuhi? Binagbinagon sa masunod nga duha ka artikulo ini kag ang iban pa nga mga pamangkot.

[Nota]

[Retrato sa pahina 4]

Gintagna ni Daniel ang pagkari sang ginpili sang Dios nga Lider

[Retrato sa pahina 7]

Ang mga panudlo ni Jesus naghanda sa mga tawo nga maatubang ang mga problema sa kabuhi

[Retrato sa pahina 7]

Tuytuyan ni Jesus ang matinumanon nga katawhan pasulod sa isa ka mahidaiton nga bag-ong kalibutan